Maatteeo 4 - ꞌBuuk cĩ Thõõth cĩ Nyekuci

Ĩttĩman ꞌThĩttaanĩ Yeesu

¹ Ma baa urutaa cĩnnĩ, ũũhĩ Lorii ꞌcĩ Ẽllẽẽmĩth Yeesu horrwaa ꞌcĩ õdõhõhĩĩ kak, hũũk hĩttĩman habuui cĩ loriẽẽt ꞌcĩg abathĩ.

² Baa ẽdẽta nẽẽ ẽlẽ ꞌgẽẽna waathinniook hẽẽn ꞌwec hĩ baalinniook hẽẽn ꞌwec nẽ ikia adak magĩthĩ ĩnõõnnõ gẽrrẽẽt.

³ Nĩngĩtĩ aku attĩmanĩ ꞌThĩttaanĩ ĩnõõnnõ annẽẽkĩ, “Má ĩĩnĩ nii Ngeertĩ Nyekuci dĩdĩ, duhaak biyyiẽẽn iccig hutuhuyyi hĩĩtõ ũbũnẽẽta.”

⁴ Ẽdẽcĩ Yeesu anneek, “Eheeddi ꞌBuuhaa cĩ Nyekuci aĩ, ‘Aitiõõ ẽẽtĩ hõllõngaa arũgĩ ꞌgẽẽna diooni. Arũgĩ nẽẽ hĩnĩngĩtĩ thooꞌthiok vẽlẽk ꞌcĩg aduha Nyekuci.’ ”

⁵ Ma ho, õtõdĩ habuui cĩ loriẽẽt ꞌcĩg abathĩ Yeesu ꞌCieeth cĩ Nyekuci ꞌJeruꞌthalẽma nẽ aaꞌnyĩk hĩbĩl ngaatĩ ĩĩn ꞌthilo.

⁶ Ma nĩngaata, ĩttĩman ĩnõõnnõ ĩĩnnĩk, “Má ĩĩnĩ nii Ngeertĩ Nyekuci dĩdĩ, dhuhi da ngaati, hĩnĩngĩtĩ eheeddi ꞌBuuhaa cĩ Nyekuci aĩ, “ ‘Aduhaak hatĩ Nyekuci aajĩlẽẽt cĩgĩnnĩg halaamtaii athĩnĩĩ cĩggĩĩng, hátĩ hiittiõõ hõllõngaa aduulli bẽẽ ꞌthoo.’ ”

⁷ Ẽdẽcĩ Yeesu anneek, “Eheeddi ꞌBuuhaa cĩ Nyekuci buúk aĩ, ‘Ma hattĩmani Nyekuc Makayyioohit cunni!’ ”

⁸ Ma tarĩ ho, ũũhĩ habuui cĩ loriẽẽt ꞌcĩg abathĩ ĩnõõnnõ muuraa ꞌcĩ uuni kĩdak nẽ eteretheek ĩnõõnnõ habuccieeꞌnya cĩg lootu hĩ makaaꞌthĩt cĩnĩĩng vẽlẽk.

⁹ Nẽ uduhaak ĩĩnnĩk, “Occa haaꞌnyii naa nganiit loonyin iccig vẽlẽk, hatĩ akanneekaa huruꞌnyia nẽ ubuluthaanĩ.”

¹⁰ Ẽdẽcĩ Yeesu anneek, “Maꞌnyanĩ ngaatĩ haayyi naana ꞌThĩttaan! Eheeddi ꞌBuuhaa cĩ Nyekuci aĩ, ‘Buluth Nyekuc Makayyioohit cunni nẽ idticanoothihuu ĩnõõnnõ diooni.’ ”

¹¹ Nĩngĩtĩ ũũnnĩkĩ habuui cĩ loriẽẽt ꞌcĩg abathĩ ho, Yeesu nẽ iita eelito aajĩlẽẽta ĩnõõnnõ haanytĩk ꞌgii ꞌcĩ adiim nẽẽnĩ.

Iꞌthianaaĩ Yeesu dtiic cĩnnĩ

¹² Ma baa ĩthĩk Yeesu ngaatĩ aarĩhõõthĩhĩ Yõaannẽ Batitta baabuuth, ikia ũũk nẽẽ ĩĩcĩ ꞌGalileea.

¹³ Ma baa ũtũngeek nẽẽ Naaꞌtharẽt, ũũk aau Kapernauma ngaatĩ abakꞌthõõ hĩ bũlũc looccaa cĩ ꞌThebuluni hĩ Navtali.

¹⁴ Nĩngĩtĩ aku ĩĩnnĩ thõõth cĩ Nyekuci baa aduha põrõvẽtaacĩ Iꞌthaia dĩdĩ baa aĩ,

¹⁵ “Niig loonyini cĩg ꞌThebuluni hĩ Navtali, niig loonyini ꞌcĩg aattĩg ꞌgõõlaa ꞌcĩ õkõ ĩĩcĩ bũlũc cĩ hidioo cĩ ꞌJõrdanĩ! Thĩhõõ nii ꞌGalileea, lõõcĩ cĩ eet ꞌcĩg hõllõngaa ĩĩn ꞌJudeei!

¹⁶ Tananga aattĩg eeta cugunnig muguratõõ, acĩn hatĩ nẽẽg lanyit ꞌcĩ õõppẽr. Tananga aattĩg nẽẽg muguraa cĩ daahĩthõõ, attũlla hatĩ lanyit ĩhõõggõ.”

¹⁷ Ngaanĩngĩtĩ kõr niccia, iꞌthianaaĩ Yeesu ngaatĩ irrioonĩkĩ eet annẽẽkĩ, “Ũtũngteek ꞌthẽccanẽẽt cugguung, hĩnĩngĩtĩ aau habuccieet cĩ hẽẽtkujjieen ojoonu.”

Ũtũvvũ Yeesu nuyyiook ꞌcĩg oou

¹⁸ Kõr umwa, baa õvvõ Yeesu dẽmẽtaa cĩ Bũlũc cĩ ꞌGalileea. Ma ho, ĩcĩn ꞌgõtõn ꞌramma ꞌcĩg adhuheek nyelelewwa bũlũcatõõ, hĩnĩngĩtĩ baa ĩĩn nẽẽg eet ꞌcĩg aggam ulugo. Baa haĩ umwa ꞌThimõõnẽ nẽ hĩĩtõ umwa Andrea. Haĩ ꞌThimõõnẽ ꞌthaar ũgĩ Pẽẽtũrũ.

¹⁹ Nĩngĩtĩ annẽẽkĩ Yeesu ĩhõõggõ, “Unuyyiaangu nganĩĩta nẽ hatĩ haaꞌnyuung ĩĩtõ eet ꞌcĩg alũtaannu eeta.”

²⁰ Ma hĩdĩĩkoothong, ũtũngteek nẽẽg nyelelewwaꞌnya cĩggĩĩng nẽ ũnnẽẽcõ ĩnõõnnõ.

²¹ Ma baa nga õvvõ Yeesu nĩngaata, ikia ĩcĩn ꞌgõtõn ꞌramma tarĩ, ꞌJeemith hĩ Yõaannẽ ꞌcĩg baag akũmaneek nyelelewwaꞌnya cĩggĩĩng haahũlatõõ, hĩ maaꞌnyĩ cĩnĩĩng ꞌThebedeeo. Nĩngĩtĩ avvaanĩ Yeesu ĩhõõggõ buúk.

²² Ma hĩdĩĩkoothong, ũtũngteek nẽẽg haahũl hĩ maaꞌnyĩ nẽ ũnnẽẽcõ Yeesu.

Anũ lothippiꞌnya Yeesu

²³ Baa õvvõõĩ Yeesu looc cĩ ꞌGalileea vẽlẽk alliman eet ꞌCieethinii cĩg Laiittak nẽ irrioon nyeemuut ꞌcĩ abũnnaa cĩ habuccieet cĩ Nyekuci nẽ tarĩ aaꞌnyĩk eet ꞌcĩg õmmõõrĩ mooriꞌthiook cũũmõ cũũmõ hũbũttaathõ.

²⁴ Nĩngĩtĩ aku allũnganĩ nyeemuut cĩnnĩ looc cĩ Thiiria vẽlẽk nẽ aꞌnyaktaak eeta ĩnõõnnõ moorriak ꞌcĩg õmmõõrĩ mooriꞌthiook cũũmõ cũũmõ. Baa aꞌnyakiaa eeta ꞌcĩg aꞌnyak mooriꞌthiook ꞌcĩg mẽẽlĩg, hĩ ꞌcĩg aꞌnyak loriẽẽt ꞌcĩg abathĩ hĩ ꞌcĩg õhõda namakarĩ hĩ ꞌcĩg alalliaa ꞌthoona, nĩngĩtĩ ẽẽlanĩ Yeesu ĩhõõggõ vẽlẽk hũbũttaathõ.

²⁵ Baa anũ ĩnõõnnõ lothippiꞌnya ꞌcĩg mẽẽlĩg gẽrrẽẽt. Baa au ũgẽẽgĩ looccaa cĩ ꞌGalileea nẽ iita ũgẽẽgĩ ĩĩcĩ ꞌJeruꞌthalẽmĩ hĩ ũbũtẽẽt cĩg ꞌJudeea. Nẽ baa au ũgẽẽgĩ buúk ꞌtaaũnnioohĩĩ ꞌcĩg ĩĩn õmmõtõ, ĩcĩg agayyi haĩ Dekapoli nẽ abaakta ũgẽẽgĩ dhoortaa cĩ hidioo cĩ ꞌJõrdanĩ.