Maatteeo 26 - ꞌBuuk cĩ Thõõth cĩ Nyekuci

Adiim aruk eeta Yeesu

¹ Ma baa ẽdẽcaak Yeesu ngaatĩ aduhaanĩ thooꞌthiok iccig vẽlẽk, ikia uduhaak nẽẽ nuyyiook cĩgĩnnĩg ĩĩnnĩk,

² “Hĩcĩ agayyu niig buúk, idiongattaa waathinniooha ꞌramma thõng nẽ hatĩ ĩĩ Kõr cĩ Haangittõõ, aaꞌnyĩhoothĩk hatĩ Ngeertĩ Eeto eet ꞌcĩg õõ odooddĩk ĩnõõnnõ hurucceea.”

³ Ma ho, iita ulutti makayyiooha cĩg paadĩrꞌnyaannu hĩ makayyiook cĩg eetuk ꞌcieethaa cĩ Kaĩava, eet ꞌcĩ baa ĩĩn paadĩr cobbi.

⁴ Baa õngõmĩt nẽẽg ꞌgõõl cĩ occa õgõllõõthĩkĩ nẽẽg Yeesu burkiitina, hátĩ haggamit nẽ uruhit ĩnõõnnõ.

⁵ Nẽẽthĩ aĩ nẽẽg, “Occa hõllõngaa hadticanna thõõth icci, kõrraa cĩ karramaaõ, hátĩ hiittiõõ hõllõngaa ĩkõõtha lothippiti thõõth ꞌcĩ abathĩ.”

Uudi Yeesu ꞌtaaũnaa cĩ Bẽthani

⁶ Ma baa nga aaĩ Yeesu ꞌtaaũnaa cĩ Bẽthani, õlõõ cĩ eet umwa ꞌcĩ baa adak helleggeri hũnũũk ꞌcĩ haĩ ꞌThimõõnẽ,

⁷ ikia ngaa umwaa ꞌcĩ baa aꞌnyaha ngõõrrõ umwa deera, ꞌcĩ õꞌngõlĩ ẽmmẽdĩ gẽrrẽẽt ꞌcĩ uuttiaa ꞌrabbẽẽtĩĩ ꞌcĩg mẽẽlĩg nẽ ikia udduutik õõaa cĩ Yeesu, baa nga aduhi nẽẽ tẽrẽmẽẽjawa.

⁸ Ma baa acĩn nuyyiooha cĩgĩnnĩg thõõth icci ho, iita ĩlĩĩllẽẽcõ nẽ ĩĩtõ, “Inni occa hudduutĩk ngaa ciee ngõõrrõ tuu ho?

⁹ Occa baa ũũtĩ ngõõrra ciee ꞌrabbẽẽtĩĩ ꞌcĩg mẽẽlĩg gẽrrẽẽt nẽ aanytĩhoothĩk ꞌrabbẽẽta eet ꞌcĩg ĩĩn pĩĩrnattiaak.”

¹⁰ Baa aga Yeesu muhẽẽnĩt cĩnĩĩng ko nẽ uduhaak ĩhõõggõ ĩĩnnĩk, “Inni accananit ngaa icci ho? Adĩmaneeka nẽẽ nganĩĩt ꞌgii ꞌcĩ abũnnaa gẽrrẽẽt.

¹¹ Arũmeennu hatĩ gõõng niig hĩ hullaha hõdõõkõthĩ, nẽẽthĩ, hõllõngaa hatĩ harũmĩ naag hĩ ngagiit hõdõõkõthĩ.

¹² Adduutik nẽẽ ngõõrrõ icci ẽllaa caannĩ, hátĩ hũkũmaneeha nganĩĩt hadaĩ ꞌloohatõõ.

¹³ Haduhaakuung dĩdĩ, loonyini vẽlẽk ĩcĩg hatĩ othoothini nyeemuut ciee abũnnaa ho, adukiaa hatĩ thõõth ciee, hátĩ humuhuttõõthĩ eeta thõõth ꞌcĩ adĩman nẽẽ ho.”

Õhõppõõcan ꞌJuuda Yeesu

¹⁴ Nĩngĩtĩ aku õkõõĩ nuyyioohiti umwaa ꞌcĩ haĩ ꞌJuuda Ithkarioote, ꞌgoonoginnii ꞌcĩg ĩĩn õmmõtõ hĩ ꞌramma, ammũdõõthĩkĩ makayyiook cĩg paadĩrꞌnyaannu,

¹⁵ nẽ ijin ĩhõõggõ ĩĩnnĩk, “Ne hatĩ ꞌcĩ occa aaꞌnyaangu niig nganĩĩt, hátĩ heteretheehuung naa eet tĩho?” Nĩngĩtĩ agiilakĩ nẽẽg ĩnõõnnõ ꞌrabbẽẽt ꞌcĩg hũtũrĩg ꞌcĩg ĩĩn maccĩrẽẽn hẽẽn iyyio.

¹⁶ Ma baa nĩngaata, ikia iꞌthianaaĩ ꞌJuuda atarraaban ꞌgõõl ꞌcĩ occa ẽtẽrꞌthẽẽkĩ ĩhõõggõ Yeesu.

ꞌGẽẽn cĩ ꞌjiaatinu ꞌcĩ udtuura

¹⁷ Ma baa kõr ꞌcĩ oou cĩ Karrama cĩ Ũbũnẽẽt ꞌcĩg aitiõõ Abũũlana tõõ, iita ijinit nuyyiooha Yeesu ĩĩttĩk, “Adiimmeet nii ngagĩĩt hoottia hũkũmatteeha nĩngĩtĩ õkõ adahĩ ꞌgẽẽn cĩ Kõr cĩ Haangittõõ ngaana?”

¹⁸ Ẽdẽcĩ Yeesu ĩhõõggõ anneek, “Õõt ꞌtaaũna, ummuddioothĩk eet umwa, uduktaak ĩnõõnnõ ĩĩttĩk, ‘Aĩ ꞌlimmannioohiti, õbõhĩ kõrra caannẽẽnĩ. Hõkõ hadahi naa Kõr cĩ Haangittõõ hĩ nuyyiook cĩgannĩg õlõõ cunni.’ ”

¹⁹ Nĩngĩtĩ adticanĩ nuyyiooha cĩg Yeesu hĩ baa aduhaak nẽẽ ĩhõõggõ hũkũmatteek Kõr cĩ Haangittõõ.

²⁰ Ma baa õdõlan ꞌjiaatĩnĩ niccia, iita aauto Yeesu hĩ nuyyiook cĩgĩnnĩg ꞌcĩg ĩĩn õmmõtõ hĩ ꞌramma tẽrẽmẽẽjawa.

²¹ Ma baa nga aduhi nẽẽgĩ, ikia õthõõth Yeesu ĩĩ, “Haduhaakuung dĩdĩ, aaĩ eet umwaa hõrggẽẽnaa cunuung ꞌcĩ hatĩ õhõppõõcannaa nganĩĩta.”

²² Baa ommoꞌthi nẽẽg gẽrrẽẽt nẽ iꞌthiattaaĩ nẽẽg hõdẽĩ hõdẽĩ ĩĩttĩk ĩnõõnnõ, “Nganĩĩt occa Makayyioohit?”

²³ Ẽdẽcĩ Yeesu aĩ, “Õhõppõõcannaa hatĩ nganĩĩt ẽẽtĩ ꞌcĩ hatĩ haduheenna hĩ nganĩĩt hẽddẽẽma hõdẽẽthõng.

²⁴ Adaahĩ hatĩ Ngeertĩ Eeto hĩ baa aduha ꞌBuuhi cĩ Nyekuci. Nẽẽthĩ, appĩĩrna hatĩ ẽẽtĩ ꞌcĩ õhõppõõcan Ngeertĩ Eeto ho gẽrrẽẽt! Occa baa mẽẽn hĩ ĩnõõnnõ ngaatĩ hõllõngaa arrittiaanĩ.”

²⁵ Nĩngĩtĩ ẽdẽcĩ ꞌJuuda ꞌcĩ hatĩ õkõ õhõppõõcan ĩnõõnnõ ho aĩnnĩ, “Nganĩĩt occa ꞌlimmannioohit?” Ẽdẽcĩ Yeesu aĩ, “Eei nganiit ꞌthẽk!”

ꞌGẽẽn cĩ ꞌjiaatinu cĩ Makayyiookto

²⁶ Ma baa nga aduhi nẽẽgĩ, ittiha Yeesu ũbũnĩ, aggatana nẽ appak hĩĩ ꞌramma, nĩngĩtĩ aaꞌnyĩkĩ nuyyiook cĩgĩnnĩg nẽ ĩĩ, “Erito uduhit ẽlẽ caannĩ cieeni.”

²⁷ Nẽ ittiha hooppo nẽ aggatana, nĩngĩtĩ aaꞌnyĩkĩ ĩhõõggõ nẽ ĩĩ, “Erito ũhũdĩt niig vẽlẽk.

²⁸ Biyyi cĩgannĩg cieegi ꞌcĩg ĩĩn lõhõt cĩ Nyekuci hĩ eet cĩgĩnnĩg. Ẽrrẽnnaa, hĩnĩngĩtĩ eet ꞌcĩg mẽẽlĩg, hátĩ hũtũngtoothĩk ꞌthẽccanẽẽta.

²⁹ Haduhaakuung dĩdĩ, hõllõngaa hatĩ hahudi naa mẽrtĩ icci viinoo ho tarĩ, ĩꞌthõng hõdõlan kõrra ꞌcĩ hatĩ hahũdĩ hĩ ngagiit mẽrtĩ cĩ viinoo ꞌcĩ ĩĩn ngeju, habuccieetaa cĩ Baaba.”

³⁰ Ma baa ebenit nẽẽg tẽgẽl umwa, iita õõt nẽẽg ĩĩcĩ Muur cĩ Olivi.

Uduha Yeesu pẽkan cĩ Pẽẽtũrũ

³¹ Nẽ uduhaak Yeesu ĩhõõggõ ĩĩnnĩk, “Baalin nicci noho, ĩꞌthaaninnu hatĩ niig vẽlẽk ũtũngteehaangu nganĩĩt ẽmmẽn, hĩnĩngĩtĩ eheeddi aĩ, “ ‘Huuki hatĩ naa tũhayyioohit, hĩꞌthaanĩ nyalõmaar cĩ aꞌthaannu.’

³² Nẽẽthĩ, ma urutaa ꞌcĩ hũrũgaaĩ daahĩtha, huwwatteekuung hatĩ naa ngagiit ĩĩcĩ ꞌGalileea.”

³³ Ẽdẽcĩ Pẽẽtũrũ aĩ, “Tananga hĩꞌthaattĩ eeta vẽlẽk hũtũngteehi ẽmmẽn, hõllõngaa hatĩ huunnikii naa ũdũt.”

³⁴ Ẽdẽcĩ Yeesu aĩ, “Haduhaaki dĩdĩ, baalin nicci noho, õõa ꞌcĩ nga hõrõhĩ tũhũlũca, ẽppẽhannaa hatĩ nii nganĩĩt tabattĩ iyyio.”

³⁵ Ẽdẽcĩ Pẽẽtũrũ aĩ, “Aitiõõ, tananga hadaahit hõdẽĩ, hõllõngaa hatĩ hẽppẽhannii naa nganiit ũdũt.” Nĩngĩtĩ õthõõthĩ nuyyiooha vẽlẽk buúk noho.

Alaõ Yeesu manaa cĩ ꞌJethemani

³⁶ Ma nĩngaata, õõt Yeesu hĩ nuyyiook cĩgĩnnĩg ngaatĩ haĩ ꞌJethemani nẽ ĩĩnnĩk ĩhõõggõ, “Aaut loota ngaati, nga nõõ hõkõ halayyi naa ĩĩca.”

³⁷ Baa õõkõr nẽẽ hĩ Pẽẽtũrũ hĩ lõhõlẽẽtĩg ꞌThebedeeo ꞌramma, ꞌJeemith hĩ Yõaannẽ, nĩngĩtĩ iꞌthianaanĩ nẽẽ ahayũnganiini nẽ õmmõthĩ gẽrrẽẽt.

³⁸ Nẽ ĩĩnnĩk Yeesu ĩhõõggõ, “Hommoꞌthi naa gẽrrẽẽt haau hĩcĩ hatĩ hadaaha thõng. Haaut ꞌjieena hĩ nganĩĩt hõdẽĩ.”

³⁹ Ma baa ẽẽjẽk Yeesu ngadiiha hĩdĩhĩdĩĩc, ũũk akat huruꞌnyia nẽ akatĩ hẽbẽrĩ looc nẽ alaõ ĩĩ, “Baaba, má adiimi niina, aꞌnyĩĩk hooppo icci hittihi hĩ nganĩĩt battaala. Nẽ hõllõngaa hĩcĩ hadiimi naana, aꞌnyĩĩk haau hĩcĩ adiimi niina.”

⁴⁰ Ma baa õbõda nẽẽ ĩĩcĩ aattiyyi nuyyiooha cĩgĩnnẽẽgĩ, ũmmũdoothĩk atagguutho ohoddia ũꞌnyaaha. Nĩngĩtĩ annẽẽkĩ nẽẽ Pẽẽtũrũ, “Hõllõngaa uuluyyu niig ngaatĩ hacĩnẽẽnĩ hĩ nganĩĩt ꞌthaa hõdẽĩ haaga buúk?

⁴¹ Ĩcĩttĩ nẽ alayyioou, hátĩ hiittiõõ hõllõngaa attĩmaniinnu. Abũraneek lorii nẽ ahar ꞌcĩ ĩĩn ẽlẽ.”

⁴² Nĩngĩtĩ ĩꞌngaannĩ nẽ tarĩ õkõõĩ ngadiiha nẽ ũũk alaõ ĩĩ, “Baaba, má aitiõõ ꞌgõõl umwaa ꞌcĩ attihi hooppo icci ꞌcannaanõ ho battaala hĩ nganĩĩta, aalla nga hatĩ hadĩmani naa tabiinit cunni noho.”

⁴³ Ma baa ikia õbõda Yeesu tarĩ, ũmmũdeek ĩhõõggõ atagguutho tarĩ, hĩnĩngĩtĩ baa adũngĩ ĩhõõggõ hẽbẽrĩ gẽrrẽẽt.

⁴⁴ Nĩngĩtĩ ũũnnĩkĩ nẽẽ ĩhõõggõ nẽ ũũk ngadiiha tarĩ nẽ alaõ laiinit ꞌcĩ ĩĩn iyyio ꞌgõõla hõdẽẽthõng hĩ aa aangaani.

⁴⁵ Ma ho, ikia õbõda Yeesu ũmmũdeek nuyyiook cĩgĩnnĩg ko tarĩ nẽ ĩĩnnĩk ĩhõõggõ, “Nga ooginnu noho? Ĩcĩnĩt nõõ, õbõhĩ ꞌthaa ꞌcĩ hatĩ õhõppõõcanõõthĩkĩ Ngeertĩ Eeto eet ꞌcĩg ĩĩn ꞌthẽccanniook.

⁴⁶ Ĩtĩngaac hõõtõ! Ikia ẽẽtĩ ꞌcĩ hatĩ õhõppõõcannaa nganĩĩt ko ẽlẽk!”

Aggamĩ Yeesu

⁴⁷ Ma baa nga õthõõth Yeesu hoti, uppwaanna ꞌJuuda baa ĩĩn ꞌthooyyiahit ꞌgoonoginnii ꞌcĩg baag ĩĩn õmmõtõ hĩ ꞌramma, õõkõra hĩ lothippit cĩ eet ꞌcĩg aꞌnyak nyetubooꞌnya hĩ hĩbahĩꞌnya, ꞌcĩg baag ĩꞌthõõa makayyiooha cĩg paadĩrꞌnyaannu hĩ makayyiook cĩg eetuk.

⁴⁸ Baa uduhaak ꞌJuuda lothippit nicci ĩĩcĩ oou ẽlẽk ĩĩnnĩk, “Aggamit eet ꞌcĩ hatĩ hõkõ hĩꞌtha naana.”

⁴⁹ Nĩngĩtĩ aku athũkcõõthĩkĩ ꞌJuuda Yeesu cũrũmũũm nẽ ũũk ĩĩnnĩk, “Hiꞌthaayyiina ꞌlimmannioohit!” Nĩngĩtĩ ĩꞌthaaĩ ĩnõõnnõ.

⁵⁰ Ẽdẽcĩ Yeesu ĩnõõnnõ anneek, “Ẽlẽ, dticcian nẽẽ nii ꞌgii ꞌcĩ hatĩ ꞌthẽk akuuni ho.” Nĩngĩtĩ au aggamĩ eeta Yeesu nẽ ababuuthanit ĩnõõnnõ.

⁵¹ Ma ho, ittiha nuyyioohiti cĩ Yeesu umwaa nyetuboot nẽ aꞌthalacana ĩtat cĩ dticciannioohit cĩ paadĩr cobbi.

⁵² Ẽdẽcĩ Yeesu ĩnõõnnõ anneek, “Bõdẽẽhĩ nyetuboot ngaatĩnnĩ, hĩnĩngĩtĩ eeta cĩg acuhan eet nyetuboota, adaahĩ hatĩ acuhanni nyetuboota.

⁵³ Hõllõngaa agayyu niig aĩ, occa hajini naa Baaba nẽ occa ĩꞌthõõakaa nẽẽ nganĩĩt lothippiꞌnya õmmõtõ hĩ ꞌramma cĩg aajĩleetu hĩdĩĩkoothong?

⁵⁴ Nẽ occa hatĩ adticanni thooꞌthioha cĩg ꞌBuuk cĩ Nyekuci hutuno, ꞌcĩ aĩ adiim ꞌthẽk adticanni hoti?”

⁵⁵ Ma baa kõr niccia, ikia uduhaak Yeesu lothippit ĩĩnnĩk, “Inni iita aggamtaangu nyetubooꞌnyanĩ hĩ hĩbahĩꞌnyannĩ hĩ eet ꞌcĩ hĩĩnĩ ꞌloorriahit ko? Hallimannuung naa ngagiit hõdõõkõthĩ hĩ gõõng haaĩ loota halaangatõõ cĩ ꞌCieeth cĩ Nyekuci nẽ gõõng hõllõngaa aggammaangu inni?

⁵⁶ Nẽẽthĩ, baa adĩmanni thooꞌthioha cieeg vẽlẽk, hátĩ hikia thõõth baa ẽhẽẽd põrõvẽtaaꞌnya hĩĩ dĩdĩ.” Ma ho, iita ivvirit nuyyiooha vẽlẽk ũtũngteek Yeesu.

Aau Yeesu muumaa cĩ lothippit cĩ makayyioohu

⁵⁷ Ma nĩngaata, iita ootti eeta Yeesu, ꞌcieethaa cĩ paadĩr cobbi ꞌcĩ haĩ Kaĩava, ngaatĩ arũmẽẽnĩ ꞌlimmanniooha cĩg nyattaalak hĩ ngaatĩ õmmõtõõnĩ makayyiooha.

⁵⁸ Nẽẽthĩ, baa anũ Pẽẽtũrũ ĩnõõnnõ ngadiiha hĩdĩhĩdĩĩc, ĩꞌthõng hõdõlan ꞌcieeth ꞌcĩ aayyi paadĩrĩ cobbi ho. Baa aduhun nẽẽ nẽ ũũk aau loota ũrũmtĩ hĩ bekioohit, aĩ hatĩ hĩcĩn õõ occa hatĩ adahĩ eeta Yeesu neegi.

⁵⁹ Baa adiim makayyiooha cĩg paadĩrꞌnyaannu hĩ eet cĩg lokihooak vẽlẽk, ammũda ꞌgõõl ꞌcĩ õhõppõõcanĩ Yeesu, hátĩ huruhit ĩnõõnnõ hadaak.

⁶⁰ Baa hinnia hõllõngaa ammũda nẽẽg ꞌgõõl umwa ũdũt, tananga baa mẽẽlĩg eeta gẽrrẽẽt ꞌcĩg au aduha thooꞌthiok ꞌcĩg õhõppõõcanĩ ĩnõõnnõ. Ma urutaa cĩnnĩ, iita ẽdẽẽnyta eeta ꞌramma,

⁶¹ ꞌcĩg au aduha cũrũmũũm aĩ, “Aĩ ẽẽtĩ ciee, ‘Occa hĩꞌthaani ꞌCieeth cĩ Nyekuci nẽ hẽtẽhẽnya waathinnioohĩĩ ꞌcĩg ĩĩn iyyio.’ ”

⁶² Nĩngĩtĩ ĩꞌngaannĩ paadĩrĩ cobbi ꞌjieena nẽ ĩĩnnĩk Yeesu, “Aitiõõ nii hõllõngaa edeci thõõth ꞌcĩ aduha eeta cieeg ko? Aini ꞌyioko nii neegi, thõõthaa ꞌcĩ õhõppõõcanni nẽẽg nganiit ko?”

⁶³ Baa aalla Yeesu ĩjjaaki kim. Nĩngĩtĩ annẽẽkĩ paadĩrĩ cobbi ho ĩnõõnnõ, “Hajinnii naa nganiit ꞌthaarĩĩ cĩg Makayyioohit Nyekuc ꞌcĩ aalla arũgĩ ũdũt hanneekii, duhaaheet da hatĩ ĩĩnĩ nii Krĩstõ Ngeertĩ Nyekuci dĩdĩ.”

⁶⁴ Ẽdẽcĩ Yeesu aĩ, “Eei, aaĩ hĩcĩ aduha nii ho. Nẽẽthĩ, haduhaakuung ngagiit vẽlẽk, horumwa acinnu hatĩ niig Ngeertĩ Eeto iccioloongan attiaa cobbi ĩcĩ Nyekuc Gayyioohit vẽlẽk nẽ ulluuccia diiꞌthiohĩ hẽẽtahujjieen.”

⁶⁵ Nĩngĩtĩ ẽrrẽẽcĩ paadĩrĩ cobbi ceremwa cĩgĩnnĩg nẽ ĩĩ, “Õdõõm ẽẽtĩ ciee Nyekuc! Iittiõõ hõllõngaa occa hadiim eet umwa tarĩ! Ithiktu ꞌyioko niig buúk ngaatĩ õdõõmĩ nẽẽ Nyekuc.

⁶⁶ Ammuku ꞌyioko niig ainnu neegi?” Ẽdẽcĩ nẽẽg aĩ, “Ẽꞌthẽcan nẽẽ gẽrrẽẽt, aꞌnyĩĩk hadaak.”

⁶⁷ Nĩngĩtĩ attũũrĩkĩ nẽẽg Yeesu ammũt nẽ ĩddaacõ ĩnõõnnõ athĩnĩĩ cĩggĩĩng, atabaang ũgẽẽgĩ ĩnõõnnõ thõng,

⁶⁸ nẽ ĩĩttĩk, “Duha da Krĩstõ, nganĩ ꞌcĩ atabaaꞌngi ho?”

Ẽppẽhan Pẽẽtũrũ Yeesu

⁶⁹ Ma baa nga aaĩ Pẽẽtũrũ loota halaangatõõ, ikia ũmmũdeek bũhẽẽcĩ ꞌcĩ ĩĩn dticciannioohit ĩnõõnnõ nẽ ĩĩnnĩk, “Baa ookorru niig hĩ Yeesu cĩ ꞌGalileea hõdẽĩ.”

⁷⁰ Ẽppẽhan hinnia nẽẽ muumaa cĩ eet vẽlẽk aĩ, “Hõllõngaa haga naa thõõth ꞌcĩ othoothi nii ho.”

⁷¹ Ma baa uruta, ikia ũũk nẽẽ ĩĩcĩ hattũũg cobbi, ngaatĩ baa õkõ acĩnĩ loholeec umwaa ꞌcĩ ngayyi ĩnõõnnõ nẽ ĩĩnnĩk eet nĩngaata, “Baa õõkõr ẽẽtĩ ciee hĩ Yeesu cĩ Naaꞌtharẽtĩ hõdẽĩ.”

⁷² Ma nĩngaata, ikia ẽppẽhan Pẽẽtũrũ Yeesu tarĩ, abũtan aattĩ ꞌthaa icci thõng aĩ, “Hõllõngaa haga naa eet tĩho!”

⁷³ Ma uruta hĩdĩhĩdĩĩc, iita eeta ꞌcĩg baag abĩlĩ nĩngaata hĩ Pẽẽtũrũ nẽ ĩĩttĩk, “Nganiit umwaanĩ, hagayyi naag nganiit, hĩnĩngĩtĩ õkõdan ũtũgĩ hĩ ẽẽtĩ ꞌcĩ aku ꞌGalileea.”

⁷⁴ Nĩngĩtĩ aĩnnĩ Pẽẽtũrũ, “Bũtĩ hĩ Nyekuci, hõllõngaa haga naa eet tĩho!” Ma hĩdĩĩkoothong, õrõk tũhũlũca.

⁷⁵ Ma ho, ikia ummuhõõthĩ Pẽẽtũrũ thõõth baa aduhaak Yeesu ĩnõõnnõ annẽẽkĩ, “Õõa ꞌcĩ nga hõrõhĩ tũhũlũca, ẽppẽhannaa hatĩ nii nganĩĩt tabattĩ iyyio.” Nĩngĩtĩ ũũnnĩkĩ Pẽẽtũrũ nĩngĩtĩho nẽ ũũk utulu gẽrrẽẽt ũdũt.