Maatteeo 23 - ꞌBuuk cĩ Thõõth cĩ Nyekuci

Accĩĩn Yeesu makayyiook cĩg ꞌJudeei

¹ Baa aduhaak Yeesu lothippit hĩ nuyyiook cĩgĩnnĩg anneek,

² “Ĩĩn Variꞌtheei hĩ ꞌlimmanniook cĩg nyattal cĩ Mũũꞌtha, eet ꞌcĩg arigith makaaꞌthĩt cĩ Mũũꞌtha.

³ Ĩthĩhĩt ĩhõõggõ nẽ ĩdĩmattu thooꞌthiok vẽlẽk ꞌcĩg aduhaakuung nẽẽgĩ. Ma thĩ hinnia hadĩmannu thooꞌthiok ꞌcĩg adtican nẽẽgĩ, hĩnĩngĩtĩ hõllõngaa adtican nẽẽg thooꞌthiok ꞌcĩg alliman nẽẽgĩ.

⁴ Ẽcẽbẽẽkĩ nẽẽg eet ijjio ꞌcĩg adĩddĩngĩĩ ꞌgaaũꞌnyaannĩĩ cĩggĩĩng nẽ hõllõngaa ẽẽl ĩhõõggõ hĩdĩĩc haaga buúk.

⁵ “Adĩman nẽẽg thooꞌthiok vẽlẽk, aĩ hátĩ hĩcĩtteet eeta. Ecebeek nẽẽg õlẽẽt ꞌcĩg eheedothoothĩk thooꞌthioha cĩg Nyekuci nẽ itihimit ceremwa ꞌcĩg uuttik ꞌcĩg eceboothĩk ꞌlõõrõngĩta ꞌcĩg ẽllẽẽmĩthĩ.

⁶ Accamana nẽẽg ꞌgoolliok ꞌcĩg itieelini eeta ĩhõõggõ korrioohĩĩ ꞌcĩg obbitig, hĩ ngaatĩ iccioloonganĩ dtaabĩtĩĩ ꞌcĩg tiirik ꞌCieethinii cĩg Laiittak.

⁷ Accamana nẽẽg ngaatĩ ĩꞌthaaĩ eeta ĩhõõggõ ꞌcuuha annẽẽkĩ, ‘ꞌLimmanniook.’

⁸ “Occa hõllõngaa anneekuung eeta, ‘ꞌLimmannioohit,’ hĩnĩngĩtĩ aꞌnyaku niig ꞌlimmannioohit hõdẽẽthõng nẽ aduhoonnu niig vẽlẽk iiginnu ꞌgõtõn hĩ ngõnat.

⁹ Nẽ ma hauyyu eet umwa loota nĩnga hanneeku, ‘Nyakangaan,’ hĩnĩngĩtĩ Nyekuc dioo hẽẽtahujjieen ꞌcĩ ĩĩn Maaꞌnyu cĩ loriẽẽt cugguung.

¹⁰ Hode ma hauyyu eet umwa hanneeku, ‘ꞌlimmannioohit,’ hĩnĩngĩtĩ aaĩ ẽẽtĩ hõdẽẽthõng ꞌcĩ ĩĩn ꞌlimmannioohit, ĩnõõnnõ Krĩstõ.

¹¹ Aanytĩk eet cobbi hõrggẽẽnaa cunuung hĩĩ dticciannioohit cunuung.

¹² Hĩnĩngĩtĩ ẽẽtĩ ꞌcĩ õdõng ẽlẽ cĩnnĩ hĩllõõan ꞌgõõnõgĩ, aaꞌnyĩhoothĩk hatĩ hĩĩ hĩdĩca nẽ ẽẽtĩ ꞌcĩ aaꞌnyĩk ẽlẽ cĩnnĩ hĩĩ hĩdĩca, odoꞌngi hatĩ nẽẽ hĩĩ maka.

¹³ “Pĩĩrnanĩt hĩ ngagiit ꞌlimmanniook cĩg nyattal cĩ Mũũꞌtha hĩ Variꞌtheei, niig oloꞌngiaaha cieegi! Aꞌnyuuggu niig habuccieet cĩ hẽẽtkujjieen hẽbẽrẽẽnnĩĩ cĩg eetuk. Nẽ aitiõõ niig hõllõngaa occa aduhunnu habuccieet cĩ hẽẽtkujjieen hode ẽlẽmaaku eet ꞌcĩg adiim aduhuni.

¹⁴ Pĩĩrnanĩt hĩ ngagiit ꞌlimmanniook cĩg nyattal cĩ Mũũꞌtha hĩ ngagiit Variꞌtheei. Oloꞌngiaaha cieegi! Arratanaannu ngaatĩbõyyĩꞌnya ijjio olooyyiohĩĩ cĩggĩĩng nẽ alayyioou lothippita hũnũũk, hátĩ hicittuung eeta. Uukuung hatĩ Nyekuci ngagiit gẽrrẽẽt ũdũt.

¹⁵ “Pĩĩrnanĩt hĩ ngagiit ꞌlimmanniook cĩg nyattaalak hĩ Variꞌtheei, oloꞌngiaaha cieegi! Ovvooyyu loonyin hĩ bũlũccwa vẽlẽk, hátĩ aanytĩk eet hõdẽẽthõng hĩĩ nuyyioohit cunuung nẽ má ammũdaannu ho, aaꞌnyiku habath gẽrrẽẽt hĩĩ ngeertĩ ꞌgwoo ꞌcĩ aalla ooo haau hĩ niiga.

¹⁶ “Pĩĩrnanĩt hĩ ngagiit tiꞌthittiook ꞌcĩg eet ꞌcĩg rubettĩg! Hĩnĩngĩtĩ allimannu niig eet anneeku, hõllõngaa tiir ngaatĩ abũtanĩ ẽẽtĩ ꞌCieethaa cĩ Nyekuci. Nẽ iittihu tiir ngaatĩ abũtanĩ eet umwaa, ‘ꞌDaab ꞌcĩ aaĩ ꞌCieethaa cĩ Nyekuci.’

¹⁷ Niig ꞌgiiꞌthiaha ꞌcĩg iiginnu rubettĩg ko! Iina ꞌcĩ ĩllõõan, ꞌdaab hode ꞌCieeth cĩ Nyekuci, ꞌcĩ aaꞌnyĩk ꞌdaab hẽllẽẽm ko?

¹⁸ Nẽ tarĩ ainnu niig, ‘Má abũtan ẽẽtĩ umwaa ꞌthaarĩĩ cĩg altaarĩ ꞌcĩ ĩbboorini ꞌgaarrieeniti, aitiõõ lõbũtĩ tĩho hõllõngaa aggam eet nẽ má abũtan ẽẽtĩ ꞌthaarĩĩ cĩg ꞌbaaninit ꞌcĩ aaĩ altaarĩa, lõbũtĩ thĩ dẽẽdẽ niccia!’

¹⁹ Niig eeta ꞌcĩg iiginnu rubettĩg ko! Iina ꞌcĩ ĩllõõan, ꞌbaaninit hode altaarĩ ꞌcĩ aaꞌnyĩk ꞌbaaninit hiꞌngiranĩ ho?

²⁰ Nẽẽthĩ hoti ho, ẽẽtĩ ꞌcĩ abũtan, hĩnĩngĩtĩ nĩngĩtĩ ĩbboorini ꞌgaarrieeniti, abũtan altaarĩaa ꞌcĩ ĩbboorini ꞌgaarrieeniti hĩ hẽlẽggĩ vẽlẽk ꞌcĩg aattĩg nĩngaata.

²¹ Nẽ ẽẽtĩ ꞌcĩ abũtan ꞌCieeth cĩ Nyekuci, abũtan ꞌCieeth cĩ Nyekuci hĩ eet ꞌcĩ aaĩ ꞌCieetõõ cĩ Nyekuci.

²² Nẽ ẽẽtĩ ꞌcĩ abũtan ꞌthaarĩĩ cĩg hẽẽtkujjieen, abũtan nẽẽ dtaaba cĩ Nyekuci nẽ tarĩ ũbũtan ꞌthaarĩĩ cĩg eet ꞌcĩ aayyi dtaaba ho.

²³ “Pĩĩrnanĩt hĩ ngagiit ꞌlimmanniook cĩg nyattaalak hĩ ngagiit Variꞌtheei, oloꞌngiaaha cieegi! Aaꞌnyiku niig Nyekuc ꞌbaaninit ꞌcĩ abadtẽc ꞌcĩ aaĩ hĩ hẽẽt ꞌcĩ hidici ꞌcĩ aarĩhoothĩk ꞌdiaatatõõ nẽ ataarrioꞌthu thooꞌthiok ꞌcĩg õkõmĩ cĩg nyattaalak ꞌcĩg aattĩg hĩ, bũnnai hĩ tamaati hĩ ngaatĩ hathĩknĩ Nyekuc. Abũnnaa ngaatĩ aaꞌnyiku Nyekuc ꞌbaaninit ꞌcĩ abadtẽc nẽ abathĩ ngaatĩ ataarroꞌthu thooꞌthiok cĩg Nyekuci ꞌcĩg aaddi.

²⁴ Niig tiꞌthittiooha ꞌcĩg rubettĩg ko! Acĩccĩĩhannu niig maam ꞌcĩg aꞌnyak ꞌthũũlũl, hátĩ hiittiõõ hõllõngaa akuuyyu ĩhõõggõ nẽ ukuuyyu nyaakaal.

²⁵ “Pĩĩrnanĩt hĩ ngagiit ꞌlimmanniook cĩg nyattaalak hĩ ngagiit Variꞌtheei. Oloꞌngiaaha cieegi! Ĩĩgĩnnu niig eet ꞌcĩg uuꞌnyu hooppoꞌnya hĩ hẽddẽmĩ battaali hĩĩtõ tẽllĩg nẽ ũtũngteehu ĩĩttõõ hĩĩtõ ꞌriiring, haauto hĩ ꞌthinneeti cugguung ꞌcĩg abbĩꞌthĩĩ lõbõlõbẽẽꞌthĩt hĩ muruꞌthẽẽt ko!

²⁶ Nii Variꞌtheeniti ꞌcĩ ĩĩnĩ ruben ko! Tũũny nõõ hooppo hĩ hẽddẽm ĩĩttõõ nẽẽthĩ hatĩ ĩĩ tẽlla battaali buúk.

²⁷ “Pĩĩrnanĩt hĩ ngagiit ꞌlimmanniook cĩg nyattaalak hĩ ngagiit Variꞌtheei. Oloꞌngiaaha cieegi! Aattiyyu niig hĩ ꞌlõõhĩta ꞌcĩg adaiini eeta ꞌcĩg arrũũbĩ helleemito battaala nẽ ĩttõõ, ĩko nẽẽ abbĩꞌthĩĩ ẽmmẽ cĩg eet ꞌcĩg adaahito hĩ ꞌgii vẽlẽk ꞌcĩ ĩĩn ꞌriiring.

²⁸ Nẽẽthĩ ꞌgõõla hõdẽẽthõng, acĩnnuung eeta battaala iiginnu eet ꞌcĩg abũnnayyu nẽ ꞌthinneetinitõõ cugguung, ĩko nẽẽ iiginnu oloꞌngiaak hĩ ꞌthẽccanniook.

²⁹ “Pĩĩrnanĩt hĩ ngagiit ꞌlimmanniook cĩg nyattaalak hĩ ngagiit Variꞌtheei. Oloꞌngiaaha cieegi! Ehenyittu niig nẽ ũkũmattu ꞌlõõhĩt cĩg põrõvẽtaaꞌnyanu hĩ cĩg eet ꞌcĩg abũnnaa.

³⁰ Nẽẽthĩ iittu, ‘Má baa hũrũmteea hõdẽĩ hĩ hĩbaangĩ, occa baa hõllõngaa haruka põrõvẽtaaꞌnya hõdẽĩ hĩ ĩhõõggõ.’

³¹ Má othooꞌthu noho, õhõppõõcannu niig eleeti cugguung ẽmmẽn, ainnu iiginnu lõhõlĩ cĩg eet baag aruk põrõvẽtaaꞌnya.

³² Ĩdĩmanit noho, edecciaak dtiic baa iꞌthiattaaĩ maajihu!

³³ “Niig lohollia cĩg hũkaaꞌnyanu ho! Alĩĩtannu hatĩ niig ukẽẽnĩt cĩ ꞌgwoo ꞌcĩ aalla ũdũt hutuno?

³⁴ Hĩꞌthõõwakuung naa põrõvẽtaaꞌnya hĩ eet ꞌcĩg ẽggẽẽnyĩth hĩ eet ꞌcĩg alliman nyattal cĩ Nyekuci. Aruku hatĩ ũgĩ, nẽ otoddoyyieehu ũgĩ hurucciẽẽtĩ nẽ uuktu ũgĩ ꞌCieethinii cugguung ĩcĩg Laiittak nẽ itiggiayyu ĩhõõggõ ꞌtaaũnnioohĩ.

³⁵ Nẽẽthĩ hoti ho, eheellu hatĩ niig daahĩꞌthiook cĩg eet vẽlẽk cĩg Nyekuci, iꞌthianaanĩ hĩ eet ꞌcĩ abũnnaa, Abeele hõdõlan ꞌThakaria ngeertĩ Berekia, baa aruku hõrggẽẽnaa cĩ ꞌCieeth cĩ Nyekuci hĩ altaarĩ ꞌcĩ ĩbboorini ꞌgaarriẽẽna.

³⁶ Haduhaakuung dĩdĩ, uukennu hatĩ niig eeta cĩg irkiꞌnyia iccig ko, hĩnĩngĩtĩ thooꞌthiok iccig vẽlẽk!

Ammĩnan Yeesu ꞌJeruꞌthalẽm

³⁷ “Niig eeta cĩg ꞌJeruꞌthalẽmĩ! Uruktu niig põrõvẽtaaꞌnya nẽ ohoddiaau eet ꞌcĩg ĩꞌthooyyiakuung ngagiit biyyiẽẽnĩ. Baa hatabi tabattĩ hiriiri halũtaannuung ngagiit hĩ tũhũlũc aagõõng alũtaak lõhõlĩ cĩgĩnnĩg havvuutõnĩĩ cĩgĩnnĩg. Hõllõngaa hinnia ẽlẽmaakaangu buúk.

³⁸ Ĩcĩnĩt nõõ, ũtũngoothĩk ꞌcieeth cunuung cĩ Nyekuci aau haaga.

³⁹ Nẽ haduhaakuung dĩdĩ, iittiõõ hatĩ hõllõngaa acĩnnaangu niig nganĩĩt tarĩ ĩꞌthõng othoothit ĩĩtõ, ‘Aꞌnyĩĩk Nyekuc haggatan eet ꞌcĩ aku ꞌthaarĩĩ cĩg Makayyiookto!’ ”