Maatteeo 22 - ꞌBuuk cĩ Thõõth cĩ Nyekuci

Dtẽẽllẽn ꞌcĩg awantoothĩk nyahũũta

¹ Baa aduhaak Yeesu eet dtẽẽllẽn ꞌcĩg awantoothĩk thõng tarĩ anneek,

² “Aaĩ habuccieet cĩ hẽẽtkujjieen hĩ habuui ꞌcĩ akũmaneek karrama cĩ nyahũũta cĩ ngeerĩnĩ.

³ Baa ĩꞌthõ habuui nicciee dticcianniook cĩgĩnnĩg hõõt haꞌnyakta eet cĩg karramaawak, abũrĩ hinnia eeta ngaatĩ auuni.

⁴ “Nĩngĩtĩ ĩꞌthõõĩ dticcianniook cĩgĩnnĩg ũgĩ tarĩ annẽẽkĩ, ‘Uduktaak eet ꞌcĩg au karramaawa ĩĩttĩk, hũkũmaneeha naa karrama ẽlẽk, hetteedi olĩꞌnya hĩ tĩĩn ꞌcĩg adĩhĩ nẽ ũkũmanoothĩk ꞌgii vẽlẽk jurrung. Iita karramaawa.’

⁵ “Hõllõngaa hinnia athĩhĩ eeta tĩko, nĩngĩtĩ õõĩ ꞌgoolliohĩĩ cĩggĩĩng, õkõ umwaa ĩĩcĩ mana cĩnnĩ, õkõ umwaa ĩĩcĩ dũkaan cĩnnĩ.

⁶ Nĩngĩtĩ aggamĩ ũgẽẽgĩ dticcianniook cĩg habuuak ko nẽ ĩdĩmanit ꞌbuth nẽ uruhit thõng buúk.

⁷ Baa aku alĩĩlĩ habuui gẽrrẽẽt ũdũt nẽ ĩꞌthõ ũũrũta cĩgĩnnĩg hõõt huruhit mĩrõk tĩko nẽ ũtũũth ꞌtaaũn cĩnĩĩng.

⁸ “Nĩngĩtĩ aduhaakĩ dticcianniook cĩgĩnnĩg annẽẽkĩ, ‘Hũkũmaneeha karrama cĩ nyahũũtaaõ ẽlẽk, nẽẽthĩ hinnia, occa baa hõllõngaa havva naa eet iccig.

⁹ Õõt utuvuyyia eet ꞌcĩg ammũdaannu ꞌgoolliohĩ vẽlẽk hiita karramaawa.’

¹⁰ Nĩngĩtĩ õõĩ dticcianniooha ꞌgoolliohĩ nẽ uluttia eet vẽlẽk ꞌcĩg ammũda nẽẽgĩ, ꞌcĩg abũnnaa hĩ ꞌcĩg abathĩ nẽ ikia ĩbbĩt ꞌcieeth cĩ karramaaõ.

¹¹ “Ma baa aku acĩn habuui heerinniook cĩgĩnnĩg ko, ikia ũmmũda nẽẽ eet umwa ꞌcĩ baa hõllõngaa ahimit ceremwa cĩg nyahũũtaawak.

¹² Nĩngĩtĩ ajini nẽẽ ĩnõõnnõ annẽẽkĩ, ‘Ẽlẽ ꞌgõõna, adukna hatĩ nii ꞌgõõlẽẽna, aitioonni ceremwaana cĩg nyahũũtaawak tõõ ho?’ Baa aitiõõ thõõth ꞌcĩ aduha ẽẽtĩ nicciee tõõ.

¹³ “Nĩngĩtĩ annẽẽkĩ habuui dticcianniook cĩgĩnnĩg, ‘Ecebit ĩnõõnnõ athĩn hĩ ꞌthoo vẽlẽk nẽ udhukteehu ĩnõõnnõ battaala muguratõõ, ngaatĩ hatĩ arruuẽnĩ nẽ adak nyĩgĩt cĩgĩnnĩg huciitha.’

¹⁴ “Hĩnĩngĩtĩ mẽẽlĩg eeta ꞌcĩg avvaa thõng nẽ ĩĩtõ hĩdĩcĩg ꞌcĩg eberriaa.”

Thõõth ꞌcĩ adũmanĩ eeta cĩg ꞌJudeei occoro

¹⁵ Ma nĩngaata, ulutti Variꞌtheei, õõt ũkũmatteek ꞌgõõl ꞌcĩ hatĩ aggamĩ Yeesu thooꞌthiohĩĩ cĩgĩnnĩg.

¹⁶ Ma ho, ĩꞌthooyyia nẽẽg nuyyiook cĩggĩĩng hõdẽĩ hĩ eet cĩg Ẽrõõdẽ, hiita hĩ ĩnõõnnõ. Iita uduktaak nẽẽg ĩnõõnnõ ĩĩttĩk, “ꞌLimmannioohit, hagayyi naag ĩĩnĩ eet ꞌcĩ abũnnaa nẽ allimani thõõth cĩ Nyekuci ꞌgõõlaa ꞌcĩ ĩĩn dĩdĩ. Acini nii eet vẽlẽk ꞌgõõlaa ꞌcĩ aduhõõ thõng nẽ hagayyia ngaatĩ hõllõngaa ũũhũĩ thõõth ꞌcĩ allimani, hĩnĩngĩtĩ thooꞌthiok ꞌcĩg aduhaaki eeta ꞌcĩg obbitig nganiita.

¹⁷ Duhaaheet da muhẽẽnĩt cunni, aũlan ngaatĩ hadũmanẽẽkĩ occoro habu cobbi cĩ ꞌRooma hode aitiõõ?”

¹⁸ Baa aga Yeesu muhẽẽnĩt cĩnĩĩng ꞌcĩ abathĩ ho, nĩngĩtĩ annẽẽkĩ ĩhõõggõ, “Niig oloꞌngiaaha cieegi! Adiimmu ẽdẽttaangu thõng inni?

¹⁹ Iitaaĩ da ꞌrabbaacit ꞌcĩ hũtũrĩ ꞌcĩ adũmannu occoro ho ngaati.” Nĩngĩtĩ aꞌnyahaakĩ nẽẽg ĩnõõnnõ ꞌdinaar hõdẽẽthõng,

²⁰ nẽ ikia ijin Yeesu ĩhõõggõ ĩĩnnĩk, “ꞌCĩ nganĩ ꞌthooura ꞌcĩ aꞌnyak ꞌrabbaacit ciee ho nẽ ꞌcĩ nganĩ teheediniti ꞌcĩ aaĩ ꞌrabbaacitaa cĩ ho?”

²¹ Ẽdẽcĩ nẽẽg anneek, “Cĩ habu cobbi cĩ ꞌRooma.” Ẽdẽcĩ Yeesu anneek, “Aanytĩk habu cĩ ꞌRooma hẽlẽggĩ cĩgĩnnĩg nẽ aanytĩhu Nyekuc hẽlẽggĩ cĩgĩnnĩg.”

²² Baa abulan thõõth ꞌcĩ ẽdẽcĩ Yeesu ĩhõõggõ ho gẽrrẽẽt ũdũt, nĩngĩtĩ ũũnnĩkĩ nẽẽg ĩnõõnnõ nẽ õõta.

Alliman Yeesu thõõth ꞌcĩ arũgnaanĩ eeta daahĩtha

²³ Baa hõllõngaa ẽlẽmĩ Thadutheei ngaatĩ occa arũgnaanĩ eeta urutaa cĩ daahĩthõõ tarĩ. Ma kõr niccia noho, iita ijinit nẽẽg Yeesu ĩĩttĩk,

²⁴ “ꞌLimmannioohit, baa aduhaakeet Mũũꞌtha ngagĩĩt aĩ, má adaahĩ ẽẽtĩ nga haꞌnyak lõhõlĩ, occa õlõm ꞌgotonnia ngaatĩbõyyĩ, hátĩ hittiraak ꞌgõtõnĩ baa adaak lõhõlĩ.

²⁵ Nẽ ꞌyioko, baa aattĩg ꞌgõtõnĩ tũkĩramma ꞌcĩg baag harũmeenna ngaati. Ikia ũꞌthũwanõõ ꞌcĩ oou nẽ adaaha, nẽẽthĩ, hĩnĩngĩtĩ nga hittira lõhõlĩ, ikia ũtũngẽẽhĩ ngaa cĩnnĩ ꞌgõtõnĩ.

²⁶ Iita adaahito ꞌgotoonoggia hõdẽĩ hõdẽĩ ĩꞌthõng hõdõlan daahĩthĩ ꞌgõtõnĩ cĩnĩĩng ꞌcĩ ĩĩn nyangorori.

²⁷ Ma baa uruta, ikia adaak ngaatĩbõyyĩ nicciee buúk.

²⁸ Nẽẽthĩ ꞌyioko, ꞌcĩ nganĩ occa hatĩ ngaa nicciee eetinii ꞌcĩg ĩĩn tũkĩramma ĩĩn ꞌgõtõn ko, hatĩ kõr ꞌcĩ ũrũgũthaaĩ Nyekuci eet? Hĩnĩngĩtĩ baa olomit ꞌgõtõnĩ ꞌcĩg ĩĩn tũkĩramma ho vẽlẽk ĩnõõnnõ?”

²⁹ Ẽdẽcĩ Yeesu anneek, “Ẽꞌthẽcattu nĩngaata, hĩnĩngĩtĩ nga agaac niig ꞌBuuk cĩ Nyekuci hode makaaꞌthĩt cĩnnĩ.

³⁰ Nẽ kõrraa ꞌcĩ hatĩ aaꞌnyĩkĩ Nyekuci eet hũrũgta tarĩ, hõllõngaa hatĩ aꞌthũwanni ngaaĩ hode iittiõõ hatĩ hõllõngaa aꞌthũwan eeta ꞌcĩg maacĩg ngaaĩ, aauto hatĩ nẽẽg hĩ aajĩlẽẽta cĩg hẽẽtkujjieen.

³¹ Nẽ thõõth ꞌcĩ arũgnaanĩ eeta daahĩtha tarĩ, nga baa itigiilit niig thõõth baa aduha Nyekuci aĩ,

³² ‘Hĩĩnĩ naa Nyekuc cĩ Abũrahamĩ, Nyekuc cĩ Iꞌthaako hĩ Nyekuc cĩ Yakobo.’ Ĩĩn nẽẽ Nyekuc cĩ eet ꞌcĩg arũgĩ, hõllõngaa ĩĩn Nyekuc cĩ daakiahu.”

³³ Ma baa athĩhĩ lothippiti ꞌlimman cĩnnĩ ho, iita aꞌngalilli nẽẽg gẽrrẽẽt.

Aduha Yeesu tilooinit ꞌcĩ tiiri

³⁴ Ma athĩhĩ Variꞌtheei ngaatĩ anyamũtanaanĩ Yeesu Thadutheei ho, iita ũrũmĩt nẽẽg eleeti cĩggĩĩng.

³⁵ Nĩngĩtĩ aku ajini Variꞌtheeniti umwaa ꞌcĩ aga nyattal cĩ Mũũꞌtha jurrung Yeesu, ngaatĩ aku attĩmanĩ ĩnõõnnõ ajini annẽẽkĩ,

³⁶ “ꞌLimmannioohit, tilooinit iina ꞌcĩ tiiri nyattaala?”

³⁷ Ẽdẽcĩ Yeesu anneek, “ ‘Mĩnnan Nyekuc Makayyioohit cunni ꞌthĩnĩtaa cunni vẽlẽk, hĩ loriiaa cunni vẽlẽk hĩ muhẽẽttaa cunni vẽlẽk.’

³⁸ Tilooinit ꞌcĩ oou ꞌcĩ tiiri tilooittaa cĩ Nyekuci vẽlẽk cieeni.

³⁹ Nẽ aduhõõ ꞌcĩ ĩĩn ꞌramma hĩ ꞌcĩ oou thõng aĩ, ‘Mĩnnan eet ꞌcĩ aaronnu haau hĩcĩ ammĩnani ẽlẽ cunni.’

⁴⁰ Aggam tilooiniti ꞌcĩ ĩĩn ꞌramma ho, tilooinit vẽlẽk hĩ thooꞌthiok cĩg põrõvẽtaaꞌnyanu.”

Ngeertĩ nganĩ Krĩstõ?

⁴¹ Ma baa nga alũtĩ Variꞌtheei ngaatĩ hõdẽẽthõng, ikia ijin Yeesu ĩhõõggõ ĩĩnnĩk,

⁴² “Ammuku niig Krĩstõ nganĩ? Ngeertĩ nganĩ nẽẽ?” Ẽdẽcĩ nẽẽg ĩnõõnnõ anneek, “Ĩĩn nẽẽ ngeertĩ Daavide.”

⁴³ Ẽdẽcĩ Yeesu ĩhõõggõ anneek, “Nẽ baa aaꞌnyĩk Lorii ꞌcĩ Ẽllẽẽmĩth Daavide hũtũvvũ ĩnõõnnõ hĩĩnnĩk ‘Makayyioohit’ hutuno? Hĩnĩngĩtĩ baa aĩ nẽẽ,

⁴⁴ “ ‘Aduhaak Makayyioohiti Makayyioohit caannĩ anneek, “ꞌCioloongan ngaati attiaa caannĩ cobbi ĩꞌthõng haggam mĩrõk cugunnig.” ’

⁴⁵ Má baa aũ Daavide anneek ĩnõõnnõ, ‘Makayyioohit,’ aga nẽẽ ngaatĩ ĩĩnnĩ ngeerĩnĩ hutuno?”

⁴⁶ Baa aitiõõ ẽẽtĩ ꞌcĩ ẽdẽcĩ ĩnõõnnõ tõõ, ma baa urutaa cĩnnĩ, iittiõõ ẽẽtĩ ꞌcĩ nga ẽhẽggẽẽnyan hijin ĩnõõnnõ thooꞌthiok ũgĩ tarĩ tõõ.