Maatteeo 21 - ꞌBuuk cĩ Thõõth cĩ Nyekuci

Aduhun Yeesu ꞌJeruꞌthalẽm bulẽẽttaa cobbi

¹ Ma baa iita Yeesu hĩ nuyyiook cĩgĩnnĩg õbõktõ hĩ ꞌJeruꞌthalẽm, ikia ũũk nẽẽ ĩĩcĩ Bẽthvaje, Muuraa ꞌcĩ Olivi nẽ ĩꞌthõ nuyyiook ꞌramma hõõt ĩĩcĩ oou.

² Baa aduhaak nẽẽ ĩhõõggõ anneek, “Õõt ĩĩcĩ õlõ ꞌcĩ oou ho, ammũdoothiku hatĩ thigir umwa ꞌcĩ ngayyi hĩdĩĩkoothong, ꞌcĩ ecebbi nĩngaata, ꞌcĩ arũmĩ hĩ moolĩt cĩnnĩ. Õõkta ĩhõõggõ nẽ aꞌnyaktahaangu nganĩĩta.

³ Má ajinnuung eet umwaa anneekuung, ne ꞌcĩ adĩmannu ho, uduktaak ĩĩttĩk, ‘Adiim Makayyioohiti.’ Ẽlẽmaakuung hatĩ thigirẽẽt nĩĩcĩ noho.”

⁴ Nĩngĩtĩ ĩĩnnĩ thõõth baa aduha Nyekuci dĩdĩ hĩ baa aduha põrõvẽtaacĩ aĩ,

⁵ “Nii tĩnaatĩ ꞌThionĩ, cĩĩn nõõ habu cunni ngaatĩ, ovvooyyianĩ moolĩtaa cĩ thigiiro. Aaꞌnyĩk nẽẽ ẽlẽ cĩnnĩ hĩĩ hĩdĩca.”

⁶ Iita õõt ĩdĩmanit nuyyiooha hĩ baa aduhaak Yeesu ĩhõõggõ.

⁷ Õõt aꞌnyakta nuyyiooha thigir moolĩtaa cĩnnĩ noho nẽ ataaddik ceremwa ũgĩ bahucciinnii cĩg thigireetu. Nĩngĩtĩ ataadõõthĩkĩ Yeesu.

⁸ Baa ẽꞌthẽdaneek eeta ꞌcĩg mẽẽlĩg ceremwa cĩggĩĩng ꞌgõõla nẽ aarrik ũgẽẽgĩ taba ꞌcĩg baag ẽꞌngẽdda nẽẽg hẽẽnĩ ꞌgõõla.

⁹ Baa uwwattĩ eeta ũgẽẽgĩ hĩ Yeesu ĩĩcĩ oou nẽ unuyyia ũgẽẽgĩ uruta, ẽggẽrẽny nẽẽg vẽlẽk aĩ, “Bulẽẽnĩt hĩ Ngeertĩ Daavide!” “Aꞌnyĩĩk haggatan Nyekuci eet ꞌcĩ aku ꞌthaarĩĩ cĩg Makayyiookto!” “Bulẽẽnĩt hĩ Nyekuc hẽẽtahujjieen!”

¹⁰ Ma baa õdõlan Yeesu ꞌJeruꞌthalẽm, iita ukullieek eeta ꞌjieen ꞌtaaũnatõõ nẽ ijitto ĩĩtõ, “Nganĩ occa ꞌcĩ aku ho?”

¹¹ Ẽdẽcĩ lothippiti aĩ, “Yeesu põrõvẽtaac ꞌcĩ aku Naaꞌtharẽta looccaa cĩ ꞌGalileea.”

Yeesu ꞌCieethaa cĩ Nyekuci

¹² Baa õkõ Yeesu ngaatĩ õbõhõõ hĩ ꞌCieeth cĩ Nyekuci nẽ itiggiawaak eet ꞌcĩg ũũtĩ nĩngaata battaali. Ebelluukan nẽẽ tẽrẽmẽẽjĩt cĩg tuuyyiok ꞌcĩg appahõõnĩ ꞌrabbẽẽt, hĩ eet ꞌcĩg ũũtẽnĩ ngabuuthiꞌnya.

¹³ Nĩngĩtĩ annẽẽkĩ Yeesu ĩhõõggõ, “Aduha ꞌBuuhi cĩ Nyekuci aĩ, ‘Haĩ ꞌcieeth caannĩ, ꞌCieeth cĩ Laiitto,’ au hinnia aarru niig hĩĩ, ‘nĩngĩtĩ aguꞌthẽẽnĩ igorriaaha.’ ”

¹⁴ Ma nĩngaata, iita eeta ꞌcĩg rubettĩg hĩ ꞌcĩg ĩĩn ꞌngoolliak hĩ Yeesu ꞌCieethaa cĩ Nyekuci, nĩngĩtĩ aaꞌnyĩkĩ nẽẽ ĩhõõggõ vẽlẽk hũbũttaathõ.

¹⁵ Ma ho, iita iliiliyyieek makayyiooha cĩg paadĩrꞌnyaannu hĩ ꞌlimmanniook cĩg nyattal cĩ Mũũꞌtha Yeesu, ngaatĩ acĩnĩ thooꞌthiok ꞌcĩg ĩnaat eeta ꞌcĩg adĩman nẽẽnĩ nẽ ĩthĩhĩt ꞌgerenyi cĩ loholeenu ngaatĩ õbõhõõ hĩ halang cĩ ꞌCieeth cĩ Nyekuci aĩnnĩ, “Hĩdĩhĩthĩt Nyekuc, hĩnĩngĩtĩ Ngeertĩ Daavide.”

¹⁶ Ma ho, ijinit nẽẽg Yeesu ĩĩttĩk, “Hõllõngaa athihi nii thõõth ꞌcĩ aduha lohollia ho?” Ẽdẽcĩ Yeesu ĩhõõggõ anneek, “Eei, hathihi! Hõllõngaa agayyu niig thõõth ꞌcĩ aduha ꞌBuuhi cĩ Nyekuci aĩ, “ ‘Ẽbẽn hatĩ lohollia hĩ ĩdõlẽẽt dĩhĩthẽẽnĩt’?”

¹⁷ Nĩngĩtĩ ũũnnĩkĩ Yeesu ꞌtaaũn nẽ ũũk ĩĩcĩ õlõ cĩ Bẽthani, ngaatĩ baa õkõ oongiyyi.

Accĩĩn Yeesu ꞌmũũnĩc

¹⁸ Ma baa ĩtĩnga Yeesu loohoth cĩnnĩ, ikia adak ĩnõõnnõ magĩthĩ nẽ iꞌthianaaĩ ũũk ĩĩcĩ ꞌtaaũnõõ,

¹⁹ ma ꞌgõõla ngadiiha, ikia udtuuha nẽẽ ꞌmũũnĩc. Ma baa õkõ acĩn ko, hõllõngaa hinnia ammũda ꞌmũũnĩ buúk, acĩn bõllõõk diooni. Nĩngĩtĩ accĩĩnĩ ꞌmũũnĩc annẽẽkĩ, “Hõllõngaa ꞌthẽk hatĩ abbiiri tarĩ ũdũt!” Ma hĩdĩĩkoothong õdõhõk hẽẽt nĩĩcĩ noho.

²⁰ Baa ĩnaat nuyyiooha thõõth ꞌcĩ õdõhõknĩ ꞌmũũnĩcĩ hĩdĩĩkoothong ko gẽrrẽẽt.

²¹ Nĩngĩtĩ aduhaakĩ Yeesu ĩhõõggõ annẽẽkĩ, “Má aꞌnyaku niig lemiinit nẽ hõllõngaa ĩccaaddu thõõth umwa, haduhaakuung dĩdĩ, occa adĩmannu thõõth ꞌcĩ hadĩmaneehi naa ꞌmũũnĩc icci ho, nẽ occa adĩmannu thõõth ꞌcĩ ĩllõõan buúk. ꞌYioko ꞌthẽk uduktaak muur icci hĩbĩllĩĩngothoothĩk bũlũc cobbi, occa adĩmanĩ.

²² Má aꞌnyaku niig lemiinit hatĩ alaiinnu, aga Nyekuci ngaatĩ aaꞌnyuung ꞌgii ꞌcĩ ajinnu niig ko.”

Ajin eeta makaaꞌthĩt cĩ Yeesu

²³ Baa õkõ aduhun Yeesu nĩngĩtĩ õbõhõõ hĩ halang cĩ ꞌCieeth cĩ Nyekuci nẽ illiman eeta, ma ho, ummuddiaak makayyiooha cĩg paadĩrꞌnyaannu hĩ makayyiook cĩg eetuk ĩnõõnnõ nẽ ijinit ĩĩttĩk, “Ammũda nii makaaꞌthĩt ꞌcĩ adĩmanĩĩ thooꞌthiok iccig ko ĩĩna? Aaꞌnyi nganĩ?”

²⁴ Ẽdẽcĩ Yeesu ĩhõõggõ anneek, “Haꞌnyahi naa buúk jinẽẽnĩt umwa hĩ ngagiita, má ẽdẽccaangu, haduhaakuung hatĩ naa buúk ngagiit ꞌgõõl ꞌcĩ hammũdaanĩ makaaꞌthĩt ꞌcĩ hadĩmanĩĩ thooꞌthiok iccig ko.

²⁵ Nganĩ baa ꞌcĩ aaꞌnyĩk Yõaannẽ makaaꞌthĩt ꞌcĩ aggamẽẽkĩ eet baattithimo? Aaꞌnyĩk baa Nyekuci hode aaꞌnyĩk eet ꞌcĩ holli õõ haaga?” Iita ijitto nẽẽg nyaagwaana ĩĩtõ, “Má haĩ hĩĩttĩk, ‘Aku hẽẽtahujjieen,’ ajinneet hinnia hatĩ anneekeet, ‘Nẽ baa hõllõngaa elemmu ĩnõõnnõ inni?’

²⁶ “Nẽ ma hanneek, ‘Aku hĩ eeta,’ hiteelli naag eeta, hĩnĩngĩtĩ ammuk nẽẽg vẽlẽk aĩ, ĩĩn Yõaannẽ põrõvẽtaac.”

²⁷ Nĩngĩtĩ ẽdẽcĩ nẽẽg Yeesu annẽẽkĩ, “Hõllõngaa hagayya.” Nẽ ĩĩnnĩk Yeesu ĩhõõggõ, “Hõllõngaa thĩ haduhaakuung naa buúk ngagiit hadĩmani naa thooꞌthiok iccig makaaꞌthĩta ĩĩna.

Dtẽẽllẽn ꞌcĩg awantoothĩk buul ꞌramma

²⁸ “Nẽ õthõõth Yeesu ĩĩ, hẽdtẽbanaakuung ꞌyioko naa ngagiit dtẽẽllẽn ũgĩ cĩg eet umwa ꞌcĩ aꞌnyak buul ꞌramma. Nẽ hatĩ uduktaahaangu thõõth ꞌcĩ ammuku niiga. Baa õkõ anneek nyakangaan umwaa ngeerĩnĩ cobbi, ‘Bĩĩt aattĩ dticcianõ manatõõ caannĩ ĩcĩ viinoo kõr nicci!’

²⁹ “Ẽdẽcĩ ngeerĩnĩ aĩ, ‘Hõllõngaa hõkõ,’ ma uruta, ikia ũtũhũ muhẽẽnĩt cĩnnĩ, nĩngĩtĩ õkõõĩ manatõõ.

³⁰ “Ma nĩngaata, ũũk uduhaak maaꞌnyia ngeerĩnĩ ꞌcĩ hidici, thõõth nicci diooni. Ẽdẽcĩ ngeerĩnĩ aĩ, ‘Hõkõ hatĩnĩ nyakangaan,’ nẽ iittiõõ hõllõngaa õkõ buúk.

³¹ “Ma ammuku niig, occa buulenit iina ꞌcĩ athĩhĩ thõõth ꞌcĩ aduhaak maaꞌnyia ho?” Ẽdẽcĩ paadĩrꞌnya ꞌcĩg obbitig hĩ makayyiook cĩg eetuk aĩ, “Buulenit ꞌcĩ oou.” Nĩngĩtĩ aduhaakĩ Yeesu ĩhõõggõ annẽẽkĩ, “Haduhaakuung naa ngagiit thõõth dĩdĩ, aduhun hatĩ eeta ꞌcĩg alũt occoro hĩ ꞌwaaꞌngiak habuccieet cĩ Nyekuci ĩĩcĩ oou hĩ ngagiita!

³² Hĩnĩngĩtĩ baa aku Yõaannẽ Batitta hikia heteretheehuung ꞌgõõl ꞌcĩ abũnnaa hĩcĩ adiim Nyekuci nẽ baa hinnia hõllõngaa elemmu niig ĩnõõnnõ, baa au ẽlẽmĩ eeta ꞌcĩg alũt occoro hĩ ꞌwaaꞌngiak ĩnõõnnõ. Tananga baa icittu niig thooꞌthiok iccig ẽlẽk, baa hõllõngaa uunniku ꞌthẽccanẽẽt cugguung nẽ elemtu ĩnõõnnõ.”

Dticcianniook cĩg mana cĩ viinoo

³³ Ĩthĩhĩt dtẽẽllẽn ũgĩ ꞌcĩg awantoothĩk aĩ, “Baa aaĩ eet umwaa ꞌcĩ õkõ atiboolan hẽẽn cĩg viinoaak nẽ ũlũk araan hirriaman nẽ ada ꞌlook ꞌcĩ ammaccĩ viino nẽ ẽttẽẽd lobelĩ ꞌcĩ behiitto. Ma nĩngaata, ikia ũtũngẽẽhĩ mana cĩnnĩ ho eet ũgĩ hebehit, nĩngĩtĩ õkõõĩ hẽẽrõna looccaa umwaanĩ.

³⁴ “Ma baa ikia kõrra cĩ janiitto, ũũk ĩꞌthõõa nẽẽ dticcianniook cĩgĩnnĩg hõõt hĩ dticcianniook baag ũũnnĩkĩ nẽẽ mana cĩnnĩ cĩ viinoo, hõõt haꞌnyaktaak ĩnõõnnõ viino ꞌcĩ ibbiira.

³⁵ Au hinnia aggam bekiooha dticcianniook cĩgĩnnĩg ko nẽ uukito umwa nẽ uruhit umwa nẽ ohoddia ꞌcĩ ĩĩn iyyio biyyiẽẽnĩ.

³⁶ Ma ho, ĩꞌthõ nẽẽ dticcianniook ũgĩ tarĩ, ꞌcĩg mẽẽlĩg ĩllõõan baag oou, hõõt hĩ ĩhõõggõ. Õõ hinnia adĩman bekiooha baag ũũnnĩkĩ ẽẽtĩ mana ĩhõõggõ buúk ꞌbuth, ꞌgõõlaa ĩbaalĩ dioo noho.

³⁷ “Ma baa urutaa cĩnnĩ, ikia ĩꞌthooĩk maaꞌnyia ngeerĩnĩ dẽẽdẽ, hĩnĩngĩtĩ ammuk nẽẽ aĩ, ‘Horoong hatĩ õõ iꞌngolli loholeec caannĩ.’

³⁸ “Ma baa acĩn nẽẽg buulenit cĩ baattĩ manu ho, iita utuhattõõ nyaagwaana ĩĩtõ, ‘Ngeerĩnĩ niccieeni, aku hatĩ arigith mana, huruhit ĩnõõnnõ! Nẽ hootti mana icci hĩĩ cĩnaac.’

³⁹ Nĩngĩtĩ aggamĩ ĩnõõnnõ nẽ utugurrieek tẽrẽtẽraa cĩ manu nẽ õõt uruhit nĩngaata.

⁴⁰ “Nẽẽthĩ hoti ho, ma occa hatĩ õbõda baattĩ manu, aku occa hatĩ adahĩ dticcianniook cĩg manu ho ne?”

⁴¹ Ẽdẽcĩ paadĩrꞌnya ꞌcĩg obbitig hĩ makayyiook cĩg eetuk aĩ, “Aku hatĩ aruk nẽẽ ĩhõõggõ ꞌgõõlaa ꞌcĩ abathĩ gẽrrẽẽt. Nẽ hatĩ aaꞌnyĩk nẽẽ mana cĩnnĩ ho, eet ꞌcĩg hatĩ ẽꞌngẽraak ĩnõõnnõ viino ꞌcĩ abbiiri, kõr ꞌcĩ hatĩ ajaniini mana cĩnnĩ ho.”

⁴² Nĩngĩtĩ annẽẽkĩ Yeesu ĩhõõggõ, “Agayyu niig baa aduha ꞌBuuhi cĩ Nyekuci aĩ, “ ‘Ikia ĩĩ tiir bẽẽ baa abũrĩ teheꞌnyiooha gẽrrẽẽt hĩllõõan ꞌgõõnõgĩ vẽlẽk. ꞌGii ꞌcĩ baa adtican Makayyioohiti cieeni, nẽ ubulaneet ngagĩĩt gẽrrẽẽt ũdũt.’

⁴³ “Nẽẽthĩ hoti ho, haduhaakuung naa ngagiit hanneekuung, aggammiaa hatĩ habuccieet cĩ Nyekuci hĩ ngagiit nẽ aaꞌnyĩhoothĩk eet ꞌcĩg hatĩ adtican thooꞌthiok ꞌcĩg accamana Nyekuci.

⁴⁴ Nẽ ẽẽtĩ ꞌcĩ hatĩ adaaca bẽẽ cieeni, aduuli hatĩ nẽẽ hĩĩ ꞌthĩĩ. Nẽ ẽẽtĩ ꞌcĩ hatĩ adhukiaak bẽẽ niccieeni, õrõyõõhanni hatĩ nẽẽ buúk hĩĩ lõõcĩ ꞌthĩĩ.”

⁴⁵ Ma baa athĩhĩ makayyiooha cĩg paadĩrꞌnyaannu hĩ Variꞌtheei dtẽẽllẽn ꞌcĩg awanteek Yeesu thõng ko, iita agayyiõõthĩ nẽẽg ĩĩtõ, ĩko õthõõth Yeesu ĩhõõggõ.

⁴⁶ Nĩngĩtĩ atarraabanĩ nẽẽg ꞌgõõl ꞌcĩ adiim ababuuthanĩ ĩnõõnnõ, nẽẽthĩ hinnia, baa itieelli nẽẽg lothippit, hĩnĩngĩtĩ baa ammuk lothippiti aĩ, ĩĩn Yeesu põrõvẽtaac.