Maatteeo 18 - ꞌBuuk cĩ Thõõth cĩ Nyekuci

Nganĩ cobbi habuccieetaa cĩ hẽẽtkujjieen?

¹ Ma baa kõr tĩho, iita õõt nuyyiooha hĩ Yeesu nẽ ijinit ĩnõõnnõ ĩĩttĩk, “Nganĩ cobbi habuccieetaa cĩ hẽẽtkujjieen?”

² Ma ho, ũtũvva Yeesu loholeec ꞌcĩ hidici nẽ aaꞌnyĩk hĩbĩl hõrggẽẽnaa cĩnĩĩng.

³ Nẽ uduhaak Yeesu ĩhõõggõ ĩĩnnĩk, “Haduhaakuung dĩdĩ, ma hõllõngaa oboddu niig eleeti aaut hĩ lohollia ꞌcĩg hidiciẽẽgĩ, hõllõngaa hatĩ aduhunnu habuccieet cĩ hẽẽtkujjieen.

⁴ Nẽẽthĩ hoti ho, ẽẽtĩ ꞌcĩ hõllõngaa õdõng ẽlẽ cĩnnĩ haau hĩ loholeec ciee hidici ho, maka nẽẽ gẽrrẽẽt habuccieetaa cĩ hẽẽtkujjieen.

⁵ Nẽ ẽẽtĩ ꞌcĩ ẽlẽmĩ loholeec ꞌcĩ hidici ho ꞌthaarĩĩ cĩgannĩg, ẽlẽmma nganĩĩta.

ꞌTĩmman ꞌcĩ aaꞌnyeet hẽꞌthẽcattõõ

⁶ “Nẽ má aaꞌnyĩk ẽẽtĩ umwaa loholeec ꞌcĩ hidici ꞌcĩ ẽlẽmma nganĩĩt ko hẽꞌthẽcanõõ, occa mẽẽn ngaatĩ ẽcẽbõõthĩkĩ hirriaaĩ cobbi iꞌnyiaawa cĩnnĩ nẽ udhuhoothĩk bũlũcatõõ cobbi hũtũdũdĩt maama.

⁷ Pĩĩrnanĩt hĩ eet cĩg looc nicci, hĩnĩngĩtĩ hẽlẽggĩ ꞌcĩg aaꞌnyĩk eet hẽꞌthẽcattõõ! Au ꞌthẽk hatĩ ꞌthẽccanẽẽta tĩko, nẽẽthĩ, etteedothoothĩk hatĩ pĩĩrnanĩtĩ ꞌcĩ abathĩ gẽrrẽẽt eet ꞌcĩ auuni thooꞌthioha tĩko!

⁸ Má aaꞌnyi aꞌthiiti hode ꞌthõõtĩ cunni ꞌthẽccaanõ, ꞌtẽẽda nẽ udhuheehu tuu! Mẽẽn ngaatĩ occa õkõõĩ hẽẽtahujjieen ĩĩnĩ ꞌngoolliahit, hĩllõõan ngaatĩ aꞌnyahĩ athĩn vẽlẽk hode ꞌthoo vẽlẽk nẽ udhuhoothihuu ꞌgwoyyiaa ꞌcĩ aalla ũdũt.

⁹ Nẽ má aaꞌnyi hẽbẽrẽẽcĩ cunni ꞌthẽccaanõ, ꞌtõkõca nẽ udhuheehu tuu. Mẽẽn ngaatĩ aꞌnyahĩ hebereec hõdẽẽthõng nẽ uuhu hẽẽtahujjieen, hĩllõõan ngaatĩ aꞌnyahĩ hẽbẽrĩ vẽlẽk nẽ udhuhoothihuu ꞌgwoo ꞌcĩ aalla ũdũt.”

Dtẽẽllẽn ꞌcĩg awantoothĩk aꞌtheet ꞌcĩ aꞌnginoothi

¹⁰ Ma nĩngaata, õthõõth Yeesu ĩĩ, “Ma hararru lõhõlĩ ꞌcĩg kidicig ꞌcĩg aattĩg hĩ cieegi. Hĩnĩngĩtĩ haduhaakuung dĩdĩ, acĩn aajĩlẽẽta cĩggĩĩng hẽẽtahujjieen hõdõõkõthĩ muum cĩ Baaba.

¹¹ Baa aku Ngeertĩ Eeto, hikia hẽẽla eet ꞌcĩg iꞌngittõõthĩ.

¹² “Ĩꞌnya da hijinuung thõõth icci, ‘ꞌYioko hĩĩ ꞌcĩ aꞌnyahĩ ẽẽtĩ aꞌtha ꞌmiia hõdẽĩ nẽ iꞌnginõõthĩ hõdẽẽthõng, occa adak neegi? Occa hõllõngaa ũũnnĩk ꞌcĩg ĩĩn hẽẽn tũrkũwwec hĩ tũrkũwwec ko muura ũbũta nẽ idiimõthĩ ꞌcĩ aꞌnginoothi ho?’

¹³ Nẽẽthĩ, má ũmmũda nẽẽ aꞌtheet tĩho, haduhaakuung dĩdĩ, occa accamanoothĩk nẽẽ hĩllõõan ngaatĩ aꞌnyahĩ ꞌcĩg ĩĩn hẽẽn tũrkũwwec hĩ tũrkũwwec, baag hõllõngaa aꞌnginoothi.

¹⁴ Aaĩ noho buúk hĩ Maaꞌnyu cĩ hẽẽtkujjieen. Hõllõngaa adiim nẽẽ ngaatĩ aꞌnginõõꞌthĩ loholeec umwaa lõhõlẽẽnĩĩ ꞌcĩg kidicig ko.

ꞌGotonu ꞌcĩ adĩmannii ꞌbuth

¹⁵ “Má adĩmannii ꞌgotonu ꞌbuth, bĩĩt teretheek ĩnõõnnõ bathi cĩnnĩ ngaatĩ burki. Má athĩkniina, ẽẽla nii ĩnõõnnõ.

¹⁶ Nẽ má abũrĩ ngaatĩ athĩkniina, ꞌnyaak eet ꞌramma hode iyyio hĩĩtõ hẽbẽrĩ, ĩnõõ ꞌcĩ hátĩ ‘ma othooꞌthi thõõth umwaa tarĩ, athĩhĩ hatĩ eeta ꞌcĩg ĩĩn ꞌramma hode iyyio ho, hatĩ ĩĩn dĩdĩ.’

¹⁷ Má abũrĩ nẽẽ ngaatĩ athĩknĩ ĩhõõggõ, uduktaak thõõth tĩho lothippit cĩ lemmioohu. Má abũrĩ nẽẽ ngaatĩ athĩknĩ lothippit cĩ lemmioohu buúk, aanytĩk haau hĩ eet ꞌcĩ hõllõngaa aga Nyekuc hode hĩ eet ꞌcĩ alũt occoro.

¹⁸ “Nẽ haduhaakuung dĩdĩ, thõõth ꞌcĩ aburru niig loota nĩnga, abũrrĩ ꞌthẽk hatĩ hẽẽtahujjieen buúk nẽ má elemtu niig thõõth umwa loota nĩnga, elemmi ꞌthẽk hatĩ hẽẽtahujjieen buúk.

¹⁹ “Nẽ tarĩ haduhaakuung hanneekuung, má elemmu iiginnu ꞌramma thõõth umwa ꞌcĩ ajinnu loota nĩnga, attacan hatĩ Baaba hẽẽtahujjieen thõõth tĩho.

²⁰ Hĩnĩngĩtĩ má alũtĩ eeta ꞌramma hode iyyio ngaatĩ hõdẽẽthõng ꞌthaarĩĩ cĩgannĩg, haaĩ naa hõrggẽẽnaa cĩnĩĩng.”

Alliman Yeesu ꞌgõõl ꞌcĩ occa ammaannĩkĩ eeta ꞌgõõnõgĩ

²¹ Ma ho, ikia ũmmũdaak Pẽẽtũrũ Yeesu nẽ ijin ĩĩnnĩk, “Makayyioohit, occa hammaannihi naa ꞌgõtõna ꞌcĩ adĩmannaa nganĩĩt ꞌbuth tabattĩ thõng, tabattĩ tũkĩramma?”

²² Ẽdẽcĩ Yeesu anneek, “Hõllõngaa tabattĩ tũkĩramma haaga, tabattĩ hẽẽn tũkĩramma hĩ tũkĩramma!

²³ “Nẽẽthĩ hoti ho, aaĩ habuccieet cĩ hẽẽtkujjieen hĩ habuui ꞌcĩ adiim dticcianniook cĩgĩnnĩg hũdũmatteek ĩnõõnnõ ꞌrabbẽẽt baag acuhana nẽẽg hĩ ĩnõõnnõ.

²⁴ Ma baa idiim nẽẽ ꞌrabbẽẽt cĩgĩnnĩg, iita aꞌnyakta eeta eet umwa ꞌcĩ baa acuhana ꞌrabbẽẽt aalibꞌnya õmmõtõ, cĩg ꞌtalẽnꞌnyaannu hĩ ĩnõõnnõ.

²⁵ Ma baa adtuuha habuui ngaatĩ aꞌnyamanĩ dticciannioohit nicci ngaatĩ adũmanĩ ꞌrabbẽẽt tĩko ho, ikia uduhaak nẽẽ eet hutuuyyiõõĩ dticciannioohit nicci hĩ ngaa cĩnnĩ hĩ lõhõlĩ cĩgĩnnĩg hĩ ꞌgii vẽlẽk ꞌcĩ aꞌnyak nẽẽnĩ, hátĩ hũdũman ꞌrabbẽẽt cĩgĩnnĩg ko.

²⁶ “Nĩngĩtĩ akannẽẽkĩ dticciannioohiti habu huruꞌnyia nẽ atamaatĩk ĩnõõnnõ ĩĩnnĩk, ‘ꞌRẽẽõ baaĩ nuun nõõ hĩdĩhĩdĩĩc, hadũmannii ꞌthẽk hatĩ naa nganiit ꞌrabbẽẽt cugunnig.’

²⁷ Ma ho, atamaatĩk habuui dticciannioohit cĩnnĩ ho, nĩngĩtĩ aaꞌnyĩkĩ ĩnõõnnõ hiittiõõ hõllõngaa adũman ꞌrabbẽẽt tĩko nẽ uduhaak eet halahatteek ĩnõõnnõ hũũk.

²⁸ “Ma baa alahanoothĩk dticciannioohiti nicciee ho, ikia ũũk aggam nẽẽ dticciannioohit umwa ꞌcĩ baa acuhana ꞌdinaarꞌnya ꞌmiia hõdẽĩ. Ma ho, aggam ĩnõõnnõ nẽ ucud thõng. Nẽ ĩĩnnĩk, ‘Dũman ꞌrabbẽẽt cĩgannĩg!’

²⁹ “Ma baa nĩngaata, ikia akateek dticciannioohiti tĩho ĩnõõnnõ buúk huruꞌnyia nẽ ala ĩnõõnnõ ĩĩnnĩk, ‘ꞌRẽẽõ nuun nõõ hĩdĩhĩdĩĩc nẽ hatĩ hũdũmanii naa nganiit ꞌrabbẽẽt cugunnig.’

³⁰ “Abũrĩ hinnia nẽẽ thõõth ꞌcĩ aduhaak ꞌgoonnia ho, nĩngĩtĩ adhuhẽẽkĩ ꞌgõõnĩ baabuuthatõõ ĩꞌthõng hũdũman ꞌrabbẽẽt cĩgĩnnĩg ko.

³¹ Ma baa acĩn dticcianniooha ꞌgoonoggia thõõth icci ho, iita ommoꞌthi nẽẽg gẽrrẽẽt, nĩngĩtĩ õõ aduhaakĩ habu thõõth ꞌcĩ adĩman dticciannioohiti nicciee ho.

³² “Nĩngĩtĩ avvaanĩ habuui dticciannioohit ꞌcĩ adĩman ꞌgõõnĩ ꞌbuth ko nẽ ĩĩnnĩk, ‘Nii dticciannioohiti ꞌcĩ abathĩ ho, baa hutungeeki ꞌrabbẽẽt baagannĩg vẽlẽk, hĩnĩngĩtĩ baa alayyaa nii nganĩĩt hatamaatihiina.

³³ Aitiõõ baa hõllõngaa ammaannihi nii ꞌgoonu ꞌcĩ ĩĩn dticciannioohit hĩ baa hammaannikii naa nganiit inni?’

³⁴ Baa alĩĩllĩk habuui dticciannioohit nicci gẽrrẽẽt, nĩngĩtĩ adhuhẽẽkĩ ĩnõõnnõ baabuuthatõõ huukito eeta ĩꞌthõng hũdũman ꞌrabbẽẽt baagĩnnĩg.

³⁵ “ꞌGõõl ꞌcĩ hatĩ adĩmannuung Baaba ꞌcĩ aaĩ hẽẽtahujjieen ngagiit cieeni, hatĩ hõllõngaa ammaanniku niig ꞌgoonogu ꞌthinneetinii cugguung.”