Maatteeo 17 - ꞌBuuk cĩ Thõõth cĩ Nyekuci

Ũtũhũĩ ẽlẽ cĩ Yeesu

¹ Ma baa urutaa cĩ waathinniook tõrkõnõn, ikia ũũhĩ Yeesu Pẽẽtũrũ hĩ ꞌJeemith hĩ Yõaannẽ ꞌgõtõnĩ ꞌJeemithi, muuraa umwaanĩ ĩcĩ uuni kĩdak.

² Ma muuraa tĩho, ikia ũtũhũĩ ẽlẽ cĩ Yeesu hẽbẽrẽẽnnĩĩ cĩggĩĩng hattaal hĩĩ õõppẽr. Baa attaalĩth muum cĩnnĩ haau hĩ kõrra nẽ attaalito ceremwaana cĩgĩnnĩg buúk, haauto hĩ lanyit cĩ korro.

³ Ma nĩngaata noho, uppwaattak Mũũꞌtha hĩ Eliijja ĩhõõggõ, nĩngĩtĩ au õthõõthõnĩ hĩ Yeesu.

⁴ Ma ho, othoothĩk Pẽẽtũrũ Yeesu ĩĩnnĩk, “Makayyioohit, ẽllẽẽmĩth gẽrrẽẽt ngaatĩ haattiyyi naag ngaati, má adiimi, ĩꞌnya hẽtẽhẽnya tuggẽẽt iyyio, cunni hõdẽĩ, cĩ Mũũꞌtha hõdẽĩ nẽ ĩĩ cĩ Eliijja hõdẽĩ.”

⁵ Ma baa nga õthõõth nẽẽnĩ, ikia ũmmũt ĩhõõggõ diith umwaa ꞌcĩ õõppẽr nẽ õthõõtha mõlõõhĩ umwaa diithatõõ ĩĩ, “Loholeec caannĩ ꞌcĩ hamĩna cieeni, haccamanoothihi naa gẽrrẽẽt, hĩnĩngĩtĩ ĩnõõnnõ. Ĩthĩhĩt ĩnõõnnõ!”

⁶ Ma baa athĩhĩ nuyyiooha thõõth icci ho, iita itingolli nẽẽg gẽrrẽẽt, nĩngĩtĩ ẽttẽẽdĩ looc nĩngaata tẽẽlꞌthĩta.

⁷ Ma baa ho, ikia uhum Yeesu ĩhõõggõ nẽ ĩĩnnĩk, “Ma hiteelinnu! Ĩtĩngaac ꞌjieena.”

⁸ Ma baa ĩꞌngaathĩ nẽẽg ko, adtuuha hinnia hiꞌthihi eet umwa, ĩĩ Yeesu diooni.

⁹ Ma baa ulluuccia nẽẽg muura hujjieen, ikia itilo Yeesu ĩhõõggõ ĩĩnnĩk, “Ma hõõ haduhaaku eet umwa ꞌgiiaa acinnu niig ũdũt, ĩꞌthõng hatĩ hũrũga Ngeertĩ Eeto daahĩtha.”

¹⁰ Nĩngĩtĩ ajini nuyyiooha ĩnõõnnõ annẽẽkĩ, “Inni hĩĩtõ ꞌlimmanniooha cĩg nyattal cĩ Mũũꞌtha, uwwattaa hatĩ Eliijja ho?”

¹¹ Ẽdẽcĩ Yeesu ĩhõõggõ anneek, “Ĩꞌnya huduhaahuung dĩdĩ, aku hatĩ akũmaneek Eliijja hẽlẽggĩ vẽlẽk jurrung.

¹² Nẽẽthĩ haduhaakuung dĩdĩ, ikia Eliijja ẽlẽk, aitiõõ hinnia hõllõngaa aga nẽẽg ĩnõõnnõ. Nẽẽthĩ, baa ĩdĩmatteek nẽẽg ĩnõõnnõ ꞌgii vẽlẽk ꞌcĩ adiim nẽẽgĩ. Nẽ ꞌgõõlaa tĩho dioo, õkõ hatĩ accananni Ngeertĩ Eeto athĩnĩĩ cĩggĩĩng.”

¹³ Au hinnia aga nuyyiooha aĩ, õthõõth Yeesu thõõth cĩ Yõaannẽ Batitta.

Aaꞌnyĩk Yeesu buulenit hũbũna

¹⁴ Ma baa uppwaannak Yeesu hĩ nuyyiook cĩgĩnnĩg eet ũgĩ ho, ikia akateek ẽẽtĩ umwaa Yeesu huruꞌnyia nẽ ĩĩnnĩk,

¹⁵ “Makayyioohit, loholeec nganĩĩt umwa ciee ꞌcĩ ara ẽhẽc namakarĩ nẽ accananni gẽrrẽẽt ũdũt. Ara adhuheek ĩnõõnnõ ꞌgwoyyiatõõ hode maamĩtõõ. Tamaatĩk baaĩ nuun ĩnõõnnõ.

¹⁶ Baa haꞌnyahaahi ĩnõõnnõ nuyyiook cugunnig, hõllõngaa tarĩ ẽẽl ĩnõõnnõ hũbũna buúk.”

¹⁷ Ma ho, uduhaak Yeesu ĩhõõggõ ĩĩnnĩk, “Ĩĩgĩnnu niig eet ꞌcĩg okommuung ooti nẽ aitiõõ lemiiniti tõõ! Harũmĩ hatĩ naag hĩ ngagiit ĩꞌthõng ningina? Hemeeꞌthuung hatĩ naa ngagiit ĩꞌthõng ningina? Aꞌnyaktahaangu da buulenit nicci ngaati.”

¹⁸ Nĩngĩtĩ ẽggẽrꞌnyẽẽkĩ Yeesu lori ꞌcĩ abathĩ nẽ uduhuna buuletta nĩĩcĩ battaala, nĩngĩtĩ abũnnayyĩ nẽẽ ꞌthaa tĩho noho.

¹⁹ Ma baa urutaa cĩnnĩ, iita ummuddioothĩk nuyyiooha Yeesu ngadiiha nẽ ijinit ĩnõõnnõ ĩĩttĩk, “Inni hatĩ hanyamaneet ngagĩĩt ngaatĩ hiiggiayyia lori ꞌcĩ abathĩ hata?”

²⁰ Ẽdẽcĩ Yeesu ĩhõõggõ anneek, “Aꞌnyamannuung ngagiit lorii ꞌcĩ abathĩ, hĩnĩngĩtĩ aitiõõ ngagiit lemiiniti tõõ! Nẽẽthĩ haduhaakuung dĩdĩ, má aꞌnyahit lemiinit ꞌcĩ hidici ꞌcĩ ĩĩkĩ buraacit ꞌcĩ dĩppĩlĩ, occa ꞌthẽk anneeku muur icci, ‘Tĩnga nĩnga bĩĩt ĩĩca,’ ĩꞌngaathĩ ꞌthẽk hatĩnĩ. Aitiõõ hatĩ thõõth ꞌcĩ aꞌnyamannuung ngagiit tõõ.”

²¹ Nẽẽthĩ, õkõ lorii ciee abathĩ ho battaala, laiitta hĩ ngaatĩ hẽdẽtaanĩ ẽlẽ ꞌgẽẽna diooni.

Õthõõth Yeesu daahĩth cĩnnĩ tarĩ

²² Ma baa õdõlanit nẽẽg ꞌGalileea, uduhaak Yeesu ĩhõõggõ ĩĩnnĩk, “Õkõ hatĩ õhõppõõcanoothĩk Ngeertĩ Eeto eet

²³ ꞌcĩg hatĩ õõ aruk ĩnõõnnõ. Nẽẽthĩ, urutaa cĩ waathinniook iyyio, arũgna hatĩ nẽẽ daahĩtha.” Nĩngĩtĩ aaꞌnyĩkĩ thooꞌthioha cieeg vẽlẽk nuyyiook homoꞌthi gẽrrẽẽt.

Dũman cĩ occoro cĩg ꞌCieeth cĩ Nyekuci

²⁴ Ma baa õdõlanit Yeesu hĩ nuyyiook Kapernaum, õõt ijinit eeta ꞌcĩg alũt occoro cĩg ꞌCieeth cĩ Nyekuci Pẽẽtũrũ ĩĩttĩk, “Adũman ꞌthẽk ꞌlimmannioohiti cunuung hata occoro cĩg ꞌCieeth cĩ Nyekuci?”

²⁵ Ẽdẽcĩ Pẽẽtũrũ anneek, “Eei, adũmanĩ.” Ma baa õdõlan Pẽẽtũrũ ꞌcieetõõ, iꞌthianaaĩ Yeesu ijin ĩnõõnnõ ĩĩnnĩk, “Ammuhi nii hutuno ꞌThimõõnẽ? Alũta habuẽẽta cĩg lootu occoro hĩ lõhõlĩ cĩggĩĩng hode hĩ eet ũgĩ?”

²⁶ Ẽdẽcĩ Pẽẽtũrũ anneek, “Alũta hĩ eet ũgĩ.” Nẽ ẽdẽc Yeesu ĩnõõnnõ ĩĩnnĩk, “Aitiõõ thĩ lohollia cĩggĩĩng hõllõngaa adũman occoro.

²⁷ Bĩĩt dhuheek nyelelewwa bũlũcatõõ nẽ utuguraa ulugooc ꞌcĩ oou ꞌcĩ aggami. ꞌBuuk ũtũg cĩnnĩ, ammũda hatĩ ꞌrabbaacit ꞌcĩ hũtũrĩ ũtũũgatõõ ꞌcĩ ũũppan ꞌdinaarꞌnya ꞌwec, ꞌtiha dũmanĩ occoro cugguung hĩ cĩgannĩg buúk.”