Maatteeo 15 - ꞌBuuk cĩ Thõõth cĩ Nyekuci

ꞌLimman cĩ hĩbaangĩ

¹ Baa au Variꞌtheei ũgẽẽgĩ hĩ ꞌlimmanniook cĩg nyattal cĩ Mũũꞌtha ꞌJeruꞌthalẽma nẽ iita ijinit Yeesu ĩĩttĩk,

² “Inni nuyyiooha cugunnig hẽꞌthẽcanit nyepitee cĩ makayyiook cĩg eetuk ko? Hõllõngaa nẽẽg ũũny athĩn cĩggĩĩng õõa ꞌcĩ duhẽẽttõ inni?”

³ Ẽdẽcĩ Yeesu ĩhõõggõ anneek, “Inni niig ẽꞌthẽcanit tilooinit cĩ Nyekuci, hĩnĩngĩtĩ nyepitee cunuung ko?

⁴ Hĩnĩngĩtĩ aduha Nyekuci aĩ, ‘Tingõlĩ maaꞌnyu hĩ ngaanu’ nẽ ‘Ẽẽtĩ ꞌcĩ õdõõm maaꞌnyĩ hode aattĩnnĩ, occa aruhi nẽẽ hadaak.’

⁵ Othooꞌthu hinnia niig ainnu, má anneek eet umwaa maaꞌnyĩ hode aattĩnnĩ, ‘Eliiniti vẽlẽk ꞌcĩ occa baa heelli naa nganiita, ĩĩ ꞌbaaninit ꞌcĩ aaꞌnyĩhoothĩk Nyekuc.’

⁶ Ĩĩn occa ꞌthẽk ꞌgõõl ꞌcĩ iꞌngoliinnu maajihu hĩ ngaaggu cieeni? Amaaccu niig tilooinit cĩ Nyekuci nẽ unuyyu nyepitee cunuung.

⁷ Niig oloꞌngiaaha cieegi! Baa ẽbẽaneek põrõvẽtaacĩ Iꞌthaia baa othooꞌthuung ngagiit aĩ,

⁸ “ ‘Adĩhĩꞌthaa eeta cieeg nganĩĩt utugeetinii cĩggĩĩng haaga, nẽ ꞌrẽẽttĩg ꞌthinneeti cĩggĩĩng hĩ nganĩĩta.

⁹ Abathĩ ngaatĩ alayya nẽẽg nganĩĩt, hatĩ alliman nyattal cĩ eetu.’ ”

ꞌGii ꞌcĩ aaꞌnyĩk eet hĩĩtõ ꞌriiring

¹⁰ Nẽ ũtũvvũ Yeesu lothippit hiita hĩ ĩnõõnnõ nẽ ĩĩnnĩk, “Ĩthĩktõ nẽ agaac jurrung aĩ,

¹¹ ꞌgii ꞌcĩ aduhun ũtũũgaa cĩ eeto, hõllõngaa aaꞌnyĩk ĩnõõnnõ hĩĩ ‘ꞌriiring,’ nẽ thõõth ꞌcĩ aduha ẽẽtĩ ũtũũgaa cĩnnĩ, ĩĩn ꞌgii ꞌcĩ aaꞌnyĩk ĩnõõnnõ hĩĩ ‘ꞌriiring,’ ko niccia.”

¹² Nẽ iita ijinit nuyyiooha cĩgĩnnĩg ĩnõõnnõ ĩĩttĩk, “Aga nii ngaatĩ õdõõmĩ Variꞌtheei thõõthaa ĩĩaa aduha niina?”

¹³ Ẽdẽcĩ Yeesu ĩhõõggõ anneek, “Abbutanniaa hatĩ hẽẽna vẽlẽk ꞌcĩg baag hõllõngaa atiboolan Nyakangaan caannĩ ꞌcĩ aaĩ hẽẽtahujjieen cõrrẽẽnĩ noho.

¹⁴ Ũtũngteek Variꞌtheei niccig ẽmmẽn! Aattĩg nẽẽg hĩ eeta ꞌcĩg rubettĩg ꞌcĩg atĩꞌthĩt ꞌgõõnõgĩ ꞌcĩg rubettĩg nẽ hatĩ udhuktoothĩk nẽẽg vẽlẽk ꞌwooratõõ.”

¹⁵ Ẽdẽcĩ Pẽẽtũrũ ĩnõõnnõ anneek, “Duhaaheet da ngagĩĩt dtẽẽllẽn aag aduha nii awantoothĩhĩ.”

¹⁶ Ẽdẽcĩ Yeesu anneek, “Aitiõõ eet umwaa hõrggẽẽnaa cunuung ꞌcĩ aga thõõth caannĩ ho tõõ?

¹⁷ Hõllõngaa agayyu niig aĩ, ꞌgẽẽn ꞌcĩ aariku niig utugeetinii cugguung, õkõ hẽẽngatõõ nẽ uduhuna battaala?

¹⁸ Nẽ thooꞌthioha ꞌcĩg aduhaannu niiga, au ꞌthinneetinitõõ cugguung. Nẽẽthĩ, thooꞌthiok iccig ꞌcĩg aaꞌnyuung ngagiit ĩĩtõ ꞌriiring ko.

¹⁹ Adukna ꞌthinneetini cugguung muhẽẽnĩtĩ ꞌcĩ abathĩ, ruhẽẽnĩt hĩ ꞌtihẽẽnĩt cĩ ngaa cĩ eeto, hĩ ꞌtihõõnĩt tahatak, hĩ ĩgõr hĩ thooꞌthiok ꞌcĩg addangaakĩ eeta ꞌgõõnõgĩ hĩ ngaatĩ aduhaanĩ eeta thooꞌthiok ꞌcĩg abathĩ hẽꞌthẽcanit ꞌthaar cĩg eet umwa.

²⁰ Thooꞌthiok ꞌcĩg aaꞌnyĩk eet hĩĩtõ ꞌriiring ko nicciag, nẽẽthĩ, ma aduhi ẽẽtĩ nga hũtũũnyĩ, hõllõngaa occa aaꞌnyĩk ĩnõõnnõ hĩĩ ꞌriiring.”

Lemiinit ꞌcĩ ngaaõ

²¹ Ikia ũtũngeek Yeesu nĩngĩtĩ niccia nẽ ũũk ĩĩcĩ looc ꞌcĩ õbõhõõ hĩ ꞌtaaũnniook cĩg ꞌTire hĩ ꞌThidõõnẽ.

²² Ma ho, ikia uppwaanna ngaa umwaa ꞌcĩ ĩĩn Kanaaneenit cĩ looc niccia, arruyyia ꞌjieena aĩ, “Makayyioohit, Ngeertĩ Daavide, tamaatĩhaanĩ! Appĩĩrna loholeec caannĩ aꞌnyak loriẽẽt ꞌcĩg abathĩ.”

²³ Baa ĩjjaaki Yeesu hõllõngaa ẽdẽcĩ ĩnõõnnõ. Ma nĩngaata, iita nuyyiooha cĩgĩnnĩg uduktaak Yeesu ĩĩttĩk, “Tiggiaeek ngaa nicci ꞌgõõla, hĩnĩngĩtĩ arruui nẽ ũnũeet ngagĩĩta.”

²⁴ Ẽdẽcĩ Yeesu aĩ, “Baa hĩꞌthooyyiahi naa eet cĩg Ĩꞌthĩraẽlĩ diooni! Hĩnĩngĩtĩ baa aauto nẽẽg hĩ aꞌtha ꞌcĩg iꞌngittõõthĩ.”

²⁵ Nĩngĩtĩ aku akannĩ ngaa nicciee huruꞌnyia muumaa cĩnnĩ nẽ ĩĩnnĩk, “Makayyioohit ẽlaanĩ!”

²⁶ Ẽdẽcĩ Yeesu anneek, “Hõllõngaa abũnnaa ngaatĩ attikiaanĩ ꞌgẽẽn cĩ loholeenu nẽ udhuhoothĩk ũthũrẽẽta.”

²⁷ Ẽdẽcĩ ngaa nicciee aĩ, “Dĩdĩ Makayyioohit, tananga ũthũrẽẽta buúk, nga ꞌthẽk au auran thuruthur ꞌcĩg adhuhi tẽrẽmẽẽjawaa ꞌcĩ aduhẽẽnĩ makayyiooha cĩggĩĩng.”

²⁸ Ẽdẽcĩ Yeesu anneek, “Ngaa cieeni, aꞌnyahi nii lemiinit cobbi gẽrrẽẽt! Hẽlẽma naa thõõth ꞌcĩ ajini nii ho.” Nĩngĩtĩ abũnnayyĩ bũhaanyĩnĩ ꞌthaa niccia noho.

Aaꞌnyĩk Yeesu eet hũbũttaathõ

²⁹ Ma nĩngaata, ẽdẽc Yeesu dẽmẽt cĩ Bũlũc cĩ ꞌGalileea nẽ õtõd muur ũũk aau loota.

³⁰ Ma nĩngaata, ikia lothippiti umwaa cobbi gẽrrẽẽt, ꞌcĩ aꞌnyaha eet ꞌcĩg ngõõlĩg, hĩ ꞌcĩg rubettĩg hĩ ꞌcĩg hõllõngaa õthõõthĩ. Nẽ aarrik ĩhõõggõ vẽlẽk loota muumaa cĩ Yeesu. Nĩngĩtĩ aaꞌnyĩkĩ nẽẽ ĩhõõggõ vẽlẽk hũbũttaathõ.

³¹ Ma nĩngaata, iita atalit eeta hõdẽĩ hõdẽĩ, hĩnĩngĩtĩ ꞌgii ꞌcĩ adtuuha hĩ ꞌcĩ athĩhĩ nẽẽgĩ. Iita othoothito eeta baag hõllõngaa õthõõthĩ. Iita õtõõcõ ꞌngoolliaha nẽ ĩcĩttĩ eeta baag rubettẽẽgĩ nẽ ĩdĩhĩthĩt eeta Nyekuc cĩ Ĩꞌthĩraẽlĩ.

Arũgũth Yeesu eet aalibꞌnya ꞌwec

³² Baa avva Yeesu nuyyiook cĩgĩnnĩg hiita hĩ ĩnõõnnõ nẽ uduhaak ĩĩnnĩk, “Ammaannĩkaa eeta cieeg nganĩĩt gẽrrẽẽt, baa hũrũmteea hĩ ĩhõõggõ waathinniook iyyio nẽ hiꞌthihi ꞌgẽẽn ꞌcĩ adak buúk. Nẽ ꞌyioko, hõllõngaa hadiimi hĩꞌthooihi ĩhõõggõ ꞌgõõl uraa, occa hinnia hatĩ ẽttẽẽd looc ꞌgõõla.”

³³ Ẽdẽcĩ nuyyiooha cĩgĩnnĩg aĩ, “Hammũda ꞌyioko hatĩ ũbũnẽẽt ꞌcĩg ũũppan ngaatĩ hiroktĩ lothippit icci ngaatĩ ꞌrẽẽnĩ ho hutuno?”

³⁴ Ẽdẽcĩ Yeesu ĩhõõggõ tarĩ anneek, “Aꞌnyaku niig ũbũnẽẽt thõng?” Ẽdẽcĩ nẽẽg aĩ, “Haꞌnyaka ũbũnẽẽt tũkĩramma hĩ ulugo ũgĩ cĩg kidicig haaga.”

³⁵ Nĩngĩtĩ aduhaakĩ Yeesu lothippit haau loota.

³⁶ Ma ho, ittiha nẽẽ ũbũnẽẽt ꞌcĩg ĩĩn tũkĩramma hĩ ulugo ꞌcĩg abadtẽc ko, ma baa ĩĩnnĩk nẽẽ Nyekuc Maaꞌnyĩ ĩlaallẽ, ikia ẽꞌngẽr nẽẽ ũbũnẽẽt nẽ aaꞌnyĩk nuyyiook cĩgĩnnĩg, heꞌngerrieek lothippit.

³⁷ Iita udukto nẽẽg vẽlẽk hũũppattĩ. Ma baa urutaa ꞌcĩ duhẽẽttõ, iita uluttia nuyyiooha cĩgĩnnĩg thuruthur cĩg ũbũneetu lohoddwa tũkĩramma ꞌcĩg abbĩꞌthĩĩ.

³⁸ Baa ĩĩn eeta ꞌcĩg aduhi ho vẽlẽk, aalibꞌnya ꞌwec nẽ hõllõngaa agiili ngaaĩ hĩ lõhõlĩ ꞌcĩg kidicig.

³⁹ Ma baa ĩꞌthooĩk Yeesu lothippit ꞌgõõl ẽlẽk, ikia uduhun nẽẽ haahũl nẽ abaahĩ ũũk ĩĩcĩ ũbũtĩ cĩ looc ꞌcĩ haĩ Magadan.