Maatteeo 14 - ꞌBuuk cĩ Thõõth cĩ Nyekuci

Daahĩth cĩ Yõaannẽ Batitta

¹ Waathinnioohĩ nĩĩcag, baa ĩĩn Ẽrõõdẽ habu, ikia ĩthĩk nẽẽ nyeemuut cĩ Yeesu.

² Nĩngĩtĩ aduhaakĩ dticcianniook cĩgĩnnĩg annẽẽkĩ, “Ĩĩn ciee Yõaannẽ Batitta, ũrũga nẽẽ daahĩtha! Ĩnõõ ꞌcĩ aꞌnyahĩ ꞌtirrian ꞌcĩ adticanĩ thooꞌthiok ꞌcĩg ĩnaat eeta ho.”

³ Baa aggam Ẽrõõdẽ Yõaannẽ hẽcẽb nẽ aarĩk baabuuthatõõ, hĩnĩngĩtĩ ngagõtõnõõnĩ ꞌcĩ haĩ Erodia, ngaa cĩ Pilippo,

⁴ hĩnĩngĩtĩ baa gõõng ara aduhaak Yõaannẽ ĩnõõnnõ anneek, “Aꞌngirannii ngaatĩ attihi ngaggotonoonu nga hadaak ꞌgotonu.”

⁵ Baa adiim aruk Ẽrõõdẽ Yõaannẽ nẽ baa itieelli nẽẽ lothippit cĩ eetu, hĩnĩngĩtĩ baa aĩ nẽẽg, ĩĩn Yõaannẽ põrõvẽtaac.

⁶ Ma baa õdõlanit waathinniooha cĩg karrama cĩ kõr baa arrittiaanĩ Ẽrõõdẽ, ikia tĩnaatĩ Erodia ũrũgũmeek eet cĩg karramaawak nẽ aaꞌnyĩk Ẽrõõdẽ haccamanoothĩk gẽrrẽẽt,

⁷ nẽ ũbũtan ngaatĩ aaꞌnyĩkĩ ĩnõõnnõ ꞌgii vẽlẽk ꞌcĩ adiim nẽẽnĩ.

⁸ Ma ho, ikia uduhaak bũhẽẽc nicci ngaannia ĩĩnnĩk, “Bĩĩt duhaak Ẽrõõdẽ anneek, ‘Hadiimi aarĩka õõ cĩ Yõaannẽ Batitta hẽddẽẽma.’ ”

⁹ Baa hõllõngaa accamanoothĩk habuui, nẽẽthĩ, hĩnĩngĩtĩ lõbũtĩ baa aduha nẽẽ hẽbẽrẽẽnnĩĩ cĩg heerinnioohu, ikia uduhaak athegereec

¹⁰ hũũk ĩĩcĩ baabuutho, hũũk hẽttẽẽda õõ cĩ Yõaannẽ Batitta.

¹¹ Nĩngĩtĩ aꞌnyakiaanĩ õõ cĩnnĩ hẽddẽẽma nẽ aaꞌnyĩhoothĩk bũhẽẽc nicci haꞌnyahoothĩk aattĩnnĩ.

¹² Ma ho, iita ootti nuyyiooha cĩg Yõaannẽ ẽlẽ cĩnnĩ nẽ õõt adaacõ. Nĩngĩtĩ õõ aduhaakĩ Yeesu daahĩth nicci.

Aaꞌnyĩk Yeesu eet aalibꞌnya ꞌtur ꞌgẽẽn

¹³ Ma baa urutaa ꞌcĩ ĩthĩhĩ Yeesu daahĩth cĩ Yõaannẽ, ikia abaahĩ nẽẽ bũlũc cĩ ꞌGalileea ũũk ngaamwaanĩ ngaatĩ õkõ aayyi ẽmmẽn. Ma baa athĩhĩ eeta thõõth icci ho, iita ũnnẽẽcõ ĩnõõnnõ lothippiꞌnya ꞌcĩg au ꞌtaaũnnioohĩ ꞌthõõnĩ.

¹⁴ Ma baa uduhuna Yeesu haahũla battaalaa, ikia ĩcĩn nẽẽ lothippit cĩ eetu nẽ atamaatĩk ĩhõõggõ, nĩngĩtĩ aaꞌnyĩkĩ eet ꞌcĩg õmmõõrĩ hũbũttaathõ.

¹⁵ Ma baa ĩĩ ꞌjiaatĩn, iita ummuddiaak nuyyiooha ĩnõõnnõ nẽ ĩĩttĩk, “Ĩĩn nĩngitee ngadik nẽ utub lõõcĩ. Aꞌnyĩĩk lothippit hĩꞌthaanĩ hõõt hutuuyyia eeta ꞌgẽẽn olooyyiohĩ.”

¹⁶ Ẽdẽcĩ Yeesu ĩhõõggõ anneek, “Hõllõngaa adiim occa õõ nẽẽg ĩĩmwaanĩ. Aanytĩk nõõ ĩhõõggõ ꞌgiimwa hadahit.”

¹⁷ Ẽdẽcĩ nẽẽg anneek, “Haꞌnyaka naag ngaati ũbũnẽẽt ꞌtur hĩ ulugo ꞌramma thõng.”

¹⁸ Ma ho, ĩĩnnĩk Yeesu ĩhõõggõ, “Aꞌnyaktahaangu da nganĩĩt ngaati,”

¹⁹ nĩngĩtĩ aduhaakĩ nẽẽ eet haauto loota arteetta. Ma ho, ittiha nẽẽ ũbũnẽẽt ꞌcĩg ĩĩn ꞌtur hĩ ulugo ꞌcĩg ĩĩn ꞌramma ho nẽ ẽdẽẽnyõthĩ hẽẽtkujjieen nẽ aggatana nẽ appaha. Nĩngĩtĩ aaꞌnyĩkĩ nuyyiook cĩgĩnnĩg heꞌngerrieek eeta.

²⁰ Ma baa udukto eeta vẽlẽk hũũppattĩ, iita uluttia nuyyiooha ꞌgẽẽn ꞌcĩ anyiꞌthiaa abbĩꞌthĩĩ lohoddwa õmmõtõ hĩ ꞌramma.

²¹ Baa ĩĩn eeta ꞌcĩg maacĩg ꞌcĩg aduhi aalibꞌnya ꞌtur (5,000) nẽ hõllõngaa agiili ngaaĩ hĩ lõhõlĩ ꞌcĩg kidicig.

Õvvõ Yeesu maamĩ hujjieen

²² Ma nĩngaata, ikia uduhaak Yeesu nuyyiook cĩgĩnnĩg hotodit haahũl habaaktĩ bũlũc hoboddioothĩ ĩĩaa auuni, nga ĩꞌthaan nẽẽ lothippit hõõt.

²³ Ma baa urutaa ꞌcĩ ĩꞌthaanĩ nẽẽ lothippit, ikia õtõd muur ĩĩcĩ õkõ aayyi ẽmmẽn nẽ ũũk alaõ. Baa aaĩ nẽẽ ĩĩca ẽmmẽn ĩꞌthõng hĩĩ ꞌjiaatĩn lõõcĩ,

²⁴ nẽ ꞌthaa niccia, ikia ĩĩ ꞌrẽẽn haahũlĩ gẽrrẽẽt hĩ dẽmẽt cĩ bũlũcõ. Baa uuhan ngõõtĩ hĩdda haahũl nẽ õtõmõõcõ maama buúk gẽrrẽẽt.

²⁵ Ma baa õbõhĩ alĩĩthĩ, ikia otooyyia Yeesu maamĩ hujjieen ũmmũdaak nuyyiook cĩgĩnnĩg.

²⁶ Ma baa atiny nuyyiooha ĩnõõnnõ ho, ammuk hinnia nẽẽg aĩ miningit. Nĩngĩtĩ akulẽẽkĩ ꞌjieen hurruuyyio.

²⁷ Ma hĩdĩĩkoothong, ikia othoothĩk Yeesu ĩhõõggõ ĩĩnnĩk, “Aanytĩk ꞌthinneeti hokomit! Nganĩĩt Yeesu. Ma hiteelinnu.”

²⁸ Ẽdẽcĩ Pẽẽtũrũ ĩnõõnnõ anneek, “Makayyioohit, má ĩĩnĩ nganiit dĩdĩ, tũvvaa hotooyyia maamĩ lokora hikia hĩ nganiita.”

²⁹ Ẽdẽcĩ Yeesu ĩnõõnnõ anneek, “Tooyyia ijjia!” Nĩngĩtĩ ĩꞌngõthaanĩ Pẽẽtũrũ haahũla battaala nẽ õtõ maamĩ hujjieen ũũk ĩĩcĩ aayyi Yeesu.

³⁰ Ma ho, ĩcĩn Pẽẽtũrũ ngaatĩ attiranĩ ngõõtĩ nẽ itingõlĩ, nĩngĩtĩ iꞌthianaanĩ iithoĩ maamĩtõõ nẽ urruuo ĩĩ, “Ẽlaanĩ Makayyioohit!”

³¹ Ma hĩdĩĩkoothong, aggam Yeesu aꞌthiit cĩ Pẽẽtũrũ hõdõnga ĩnõõnnõ nẽ ĩĩ, “Hĩdĩc lemiiniti cunnẽẽnĩ. Akidani inni?”

³² Ma baa õdõlanit Yeesu hĩ Pẽẽtũrũ haahũl, ikia ĩjjaahõ ngõõtĩ,

³³ nĩngĩtĩ au alaĩ nuyyiooha ꞌcĩg baag aattĩg haahũlatõõ Yeesu annẽẽkĩ, “Ĩĩnĩ nii Ngeertĩ Nyekuci dĩdĩ!”

Aaꞌnyĩk Yeesu moorriak hũbũttaathõ

³⁴ Iita abaaktĩ Yeesu hĩ nuyyiook cĩgĩnnĩg bũlũc cĩ ꞌGalileea nẽ õdõlanit dẽmẽt cĩ nĩngĩtĩ haĩ ꞌJẽnẽꞌtharẽt.

³⁵ Ma ho, iita ummuddia eeta ngaatĩ aayyi nẽẽ nĩngaata. Nĩngĩtĩ ĩꞌthanõthõõthĩkĩ nyeemuut looc tĩho vẽlẽk, ma hĩdĩĩkoothong iita aꞌnyaktaak eeta ĩnõõnnõ eet ꞌcĩg õmmõõrĩ vẽlẽk,

³⁶ hiita halaacõ Yeesu hẽlẽmaahĩ eet ꞌcĩg õmmõõrĩ huhumit ceremwa cĩgĩnnĩg, nẽ eeta vẽlẽk ꞌcĩg baag uhumit ĩnõõnnõ, iita ũbũttaathõ.