Maatteeo 12 - ꞌBuuk cĩ Thõõth cĩ Nyekuci

Makayyioohit cĩ Kõr cĩ ꞌYiommaanõ

¹ Kõr niccia, baa õõkõr Yeesu hĩ nuyyiook cĩgĩnnĩg manẽẽnĩĩ cĩg ꞌgẽẽmẽ Kõrraa cĩ ꞌYiommaanõ. Nẽ baa adak nuyyiook cĩgĩnnĩg ko magĩthĩ gẽrrẽẽt, nĩngĩtĩ ẽttẽẽdanĩ ꞌgẽẽmẽ nẽ ũrũmtõõthĩ ꞌjieena.

² Ma baa acĩn Variꞌtheei thõõth icci ho, iita ĩĩttĩk nẽẽg Yeesu, “Cĩĩn nõõ! Inni nuyyiooha cugunnig hĩdĩmanit ꞌgii ꞌcĩ abũrĩ nyattalĩ Kõrraa cĩ ꞌYiommaanõ, ngaatĩ ẽttẽẽdanĩ ꞌgẽẽmẽ ho?”

³ Ẽdẽcĩ Yeesu ĩhõõggõ anneek, “Nga baa itigiilit niig thõõth baa adĩman Daavide hĩ nuyyiook cĩgĩnnĩg baa adak magĩthĩ?

⁴ Baa aduhun nẽẽ hĩ nuyyiook cĩgĩnnĩg ꞌCieeth cĩ Nyekuci nẽ õõt uduhit ũbũnẽẽt ꞌcĩg aꞌngirannii gõõng occa aduk paadĩrꞌnya diooni.

⁵ Hode nga nooyyia itigiilit niig nyattaalaa cĩ Mũũꞌtha, ngaatĩ ẽlẽmiaakĩ paadĩrꞌnya ꞌCieethaa cĩ Nyekuci hidticattõõ Kõrraa cĩ ꞌYiommaanõ nẽ hiꞌthihi eet ꞌcĩ aĩ ĩĩn nẽẽg ꞌthẽccanniook buúk?

⁶ Haduhaakuung dĩdĩ, aaĩ eet umwaa ngaati ꞌcĩ maka ĩllõõan ꞌCieeth cĩ Nyekuci.

⁷ Má baa agaac thõõth ꞌcĩ aduha thooꞌthioha cieeg aĩ, ‘Haccamanaa naa tamaati, hõllõngaa haccamanaa ꞌgaarrieenit,’ occa ꞌyioko hõllõngaa addangaaku eet ꞌcĩg ammĩrĩ.

⁸ Hĩnĩngĩtĩ ĩĩn Ngeertĩ Eeto Makayyioohit cĩ Kõr cĩ ꞌYiommaanõ.”

Eet ꞌcĩ alalliaa aꞌthiiti

⁹ Nĩngĩtĩ ĩꞌngaannĩ Yeesu nẽ ũũk ꞌCieethaa cĩnĩĩng ĩcĩ Laiitto.

¹⁰ Nẽ baa aaĩ ẽẽtĩ umwaa ꞌcĩ alalliaa aꞌthiiti nĩngaata. Baa aattĩg Variꞌtheei ꞌcĩg adiim ẽdẽt Yeesu nẽ ijinit ĩnõõnnõ ĩĩttĩk, “Abũnnaa occa ngaatĩ haaꞌnyĩkĩ eet hũbũna Kõrraa cĩ ꞌYiommaanõ?”

¹¹ Ẽdẽcĩ Yeesu anneek, “Má haꞌnyak eet umwaa hõrggẽẽnaa cunuung aꞌtheet ꞌcĩ adhuhoothĩk ꞌlook Kõrraa cĩ ꞌYiommaanõ, hõllõngaa occa õdõngaak nẽẽ aꞌtheet battaali?

¹² Õkõmĩ ẽẽtĩ gẽrrẽẽt ĩllõõan aꞌtheet! Nẽẽthĩ, abũnnaa hadtican ꞌgii ꞌcĩ ẽllẽẽmĩth Kõrraa cĩ ꞌYiommaanõ.”

¹³ Nĩngĩtĩ aduhaakĩ Yeesu eet nicci annẽẽkĩ, “Õõd aꞌthiit cunni ho.” Nĩngĩtĩ õõdĩ ẽẽtĩ nicciee aꞌthiit cĩnnĩ ho hũbũna hudukto hĩ ꞌgõõnĩ thõng.

¹⁴ Ma ho, õõt utuhanit Variꞌtheei ꞌgõõl ꞌcĩ adiim aruhi Yeesu.

Dticciannioohit cĩ Nyekuci ꞌcĩ eberriaa

¹⁵ Baa aga Yeesu thõõth ꞌcĩ atuhan nẽẽg ko, nĩngĩtĩ aku ũũnnĩkĩ nĩngĩtĩho. Nẽ baa maka lothippiti ꞌcĩ anũ ĩnõõnnõ gẽrrẽẽt, nĩngĩtĩ aaꞌnyĩkĩ eet cĩggĩĩng ꞌcĩg õmmõõrĩ vẽlẽk hũbũttaathõ,

¹⁶ nẽ itilo ĩhõõggõ hiittiõõ hõllõngaa aduhaak eet umwa nganĩ nẽẽ.

¹⁷ Nĩngĩtĩ aku edeeꞌnyianĩ thõõth cĩ Nyekuci ĩĩnnĩ dĩdĩ, hĩ baa aduha põrõvẽtaacĩ Iꞌthaia aĩ,

¹⁸ “Dticciannioohit caannĩ cieeni baa hẽbẽra naana, hamĩna naa ĩnõõnnõ, nẽ haccamanoothihi naa, hĩnĩngĩtĩ ĩnõõnnõ, haarihi hatĩ naa Lori caannĩ hĩ ĩnõõnnõ. Nẽ hatĩ aꞌnyahaak nẽẽ eet bũnnai loonyini vẽlẽk.

¹⁹ Aitiõõ hatĩ nẽẽ hõllõngaa ẽggẽrẽny hode arruui, nẽ aitiõõ hatĩ ẽẽtĩ ꞌcĩ athĩhĩ molook cĩnnĩ ꞌgoolliohĩĩ ꞌcĩg obbitig tõõ.

²⁰ Aitiõõ hatĩ nẽẽ hõllõngaa aduul ĩhaooc ꞌcĩ aggiingi, hode adĩĩt ꞌloomo ꞌcĩ attũllĩ, ĩꞌthõng hatĩ haꞌnyaha bũnnai.

²¹ Aarĩk hatĩ loonyini vẽlẽk muhẽẽnĩt cĩnĩĩng hĩ ĩnõõnnõ ꞌthaarĩĩ cĩgĩnnĩg.”

Aĩ eeta ĩĩn Yeesu ꞌBeelthebub

²² Ma ho, aꞌnyaktaak eeta Yeesu eet umwa ꞌcĩ rubenĩ ꞌcĩ ijjiaaki kim nẽ aꞌnyak lori ꞌcĩ abathĩ, nĩngĩtĩ aaꞌnyĩkĩ Yeesu ĩnõõnnõ hũbũna hikia hõthõõth nẽ ĩcĩnĩ.

²³ Ma nĩngaata ikia ubulan thõõth ciee eet gẽrrẽẽt nẽ ijitto ĩĩtõ, “Ĩĩn occa ẽẽtĩ ciee Ngeertĩ Daavide?”

²⁴ Ma baa athĩhĩ Variꞌtheei thõõth icci ho, iita ĩĩtõ, “ꞌBeelthebub makayyioohit cĩ loriẽẽt ꞌcĩg abathĩ, ꞌcĩ aaꞌnyĩk eet icci hitiggia loriẽẽt ꞌcĩg abathĩ ho.”

²⁵ Baa aga Yeesu muhẽẽnĩt cĩnĩĩng nẽ ĩĩnnĩk ĩhõõggõ, “Habuccieet ꞌcĩ ẽꞌngẽr ẽlẽ cĩnnĩ ẽmmẽn, aduhoothĩk hatĩ hĩĩ ꞌthĩĩ. Nẽ ꞌtaaũnĩ cobbi hode halang ꞌcĩ ẽꞌngẽrõõ eeta ẽmmẽn, aitiõõ hatĩ hõllõngaa abĩlĩ ũdũt.

²⁶ Má iiggia ꞌThĩttaanĩ ꞌThĩttaan ꞌgõõnĩ, ẽꞌngẽr nẽẽ ẽlẽ cĩnnĩ ẽmmẽn. Nẽ occa hatĩ abĩlĩ habuccieet cĩnnĩ ĩꞌthõng hutuno?

²⁷ Má hadticaniini naa ꞌtirrian cĩ ꞌBeelthebubi hitiggiaĩ loriẽẽt ꞌcĩg abathĩ, ꞌtirrian iina ꞌcĩ adticaniini nuyyiooha cugguung hitiggiayyi loriẽẽt ꞌcĩg abathĩ? Nuyyiook hatĩ cugguung ꞌcĩg hatĩ ẽttẽẽd thõõth cunuung.

²⁸ Nẽẽthĩ, má hiiggia naa loriẽẽt ꞌcĩg abathĩ ꞌtirriaanaa cĩ Lori cĩ Nyekuci, ikia thĩ habuccieet cĩ Nyekuci hĩ ngagiit ẽlẽk.

²⁹ “Ĩcca occa ꞌthẽk aduhun eet umwaa ꞌcieeth cĩ eet ꞌcĩ attiran nẽ ĩgõrĩth ijjio cĩgĩnnĩg? Hõllõngaa nõõ occa ẽcẽb nẽẽ eet ꞌcĩ attiran ko thõng nẽẽthĩ, õcõõd ijjio?

³⁰ “Ẽẽtĩ ꞌcĩ hõllõngaa harũmeenna hĩ nganĩĩta, abũrra nẽẽ nganĩĩta nẽ ẽẽtĩ ꞌcĩ hõllõngaa aku hiita hajattooa hĩ nganĩĩta, ĩꞌthaan haala.

³¹ Nẽẽthĩ haduhaakuunga, ũũnnothoothĩk hatĩ ꞌthẽccanẽẽta vẽlẽk ꞌcĩg adĩmannu hode ꞌcĩg othooꞌthu, nẽẽthĩ, ꞌthẽccanĩ ꞌcĩ õdõõmĩ eeta Lori ꞌcĩ Ẽllẽẽmĩthĩ, ĩĩn ꞌthẽccan ꞌcĩ hõllõngaa ũũnnothoothĩk ũdũt.

³² Má õthõõth eet umwaa Ngeertĩ Eeto ꞌbuth, occa horoong ũũnnothoothĩk ꞌthẽccanĩ cĩnnẽẽnĩ. Nẽẽthĩ, ẽẽtĩ ꞌcĩ õthõõth Lori ꞌcĩ Ẽllẽẽmĩthĩ ꞌbuth, hõllõngaa hatĩ ũũnnothoothĩk ꞌthẽccanĩ cĩnnẽẽnĩ, rũgẽtaa cĩ looc nicci hode rũgẽtaa ꞌcĩ urutaa cĩ daahĩthõõ.

Aku thõõth ꞌcĩ abũnnaa ꞌthĩnĩtaa ꞌcĩ abũnnaa

³³ “Õddõngta hẽẽt ꞌcĩ abũnnaa hẽẽn ꞌcĩg abbiiri ꞌcĩg abũnnaa nẽ õddõngõta hẽẽt ꞌcĩ abathĩ hẽẽn ꞌcĩg abathĩ. Agayyi hẽẽt ꞌcĩ abũnnaa, hĩnĩngĩtĩ õddõngta hẽẽn ꞌcĩg abũnnaa.

³⁴ Niig cĩg abaꞌthu dtẽc aaut hĩ hũkaaꞌnya ho, occa gõõng aduhaannu niig thõõth ꞌcĩ abũnnaa hutuno? Hĩnĩngĩtĩ ꞌgii ꞌcĩ aduhaannu niiga, ẽtẽrꞌtha ꞌgii ꞌcĩ aaĩ ꞌthinneetinii cugguung.

³⁵ Õthõõth eeta ꞌcĩg abũnnaa thooꞌthiok ꞌcĩg abũnnaa ꞌcĩg adukna ꞌthinneetinii cĩggĩĩng nẽ othoothito eeta ꞌcĩg abathĩ thooꞌthiok ꞌcĩg abathĩ ꞌcĩg adukna ꞌthinneetinii cĩggĩĩng.

³⁶ Haduhaakuung naa ngagiita, kõr cĩ decciaanĩt cĩ lootu, etteedothoothĩk hatĩ eet hõdẽĩ hõdẽĩ thooꞌthioha ꞌcĩg baag aduha nẽẽg tahatak.

³⁷ Nẽẽthĩ kõr tĩho, adukiaak hatĩ ĩhõõggõ, má ammĩrĩ hode ẽꞌthẽcattõõ nẽẽg thooꞌthiohĩĩ ꞌcĩg baag aduha nẽẽgĩ.”

Terethiinit cĩ Yõõna

³⁸ Ma ho, iita ĩĩttĩk Variꞌtheei ũgẽẽgĩ hĩ ꞌlimmanniook cĩg nyattal cĩ Mũũꞌtha ĩnõõnnõ, “ꞌLimmannioohit, hadiimmi naag nganiit anyeet terethiinit ꞌcĩ aku hẽẽtahujjieen.”

³⁹ Ẽdẽcĩ Yeesu aĩ, “Adiimmu niig terethiinit, hĩnĩngĩtĩ ĩĩgĩnnu niig ꞌthẽccanniook! Terethiinit cĩ põrõvẽtaac Yõõna diooni, ꞌcĩ hatĩ aaꞌnyĩhoothĩkuung ngagiita.

⁴⁰ Hĩnĩngĩtĩ baa aaĩ Yõõna hẽẽngatõõ cĩ ulugooc cobbi waathinniook iyyio hĩ baalinniook iyyio, hĩcĩ hatĩ aaĩ Ngeertĩ Eeto ꞌloohatõõ, waathinniook iyyio hĩ baalinniook iyyio buúk.

⁴¹ Kõr ꞌcĩ decciaanĩt cĩ lootu, abĩlĩ hatĩ eeta cĩg Nineve nẽ etteeddihuung ngagiit thõõth. Hĩnĩngĩtĩ baa ẽlẽmĩ nẽẽg thõõth cĩ Nyekuci baa ũũnnĩk nẽẽg ꞌthẽccanẽẽt cĩggĩĩng ꞌrioonaa cĩ põrõvẽtaac Yõõna, nẽẽthĩ ꞌyioko, aaĩ ẽẽtĩ umwaa ꞌcĩ ĩllõõan Yõõna ngaati.

⁴² Abĩlĩ hatĩ ngaa ꞌcĩ ĩĩn habu cĩ looc cĩ hujjieen, hõrggẽẽnaa cunuung nẽ etteeddihuung ngagiit thõõth. Baa aku nẽẽ ꞌrẽẽna gẽrrẽẽt, hikia hĩthĩk ꞌgẽẽnyĩth cĩ ꞌThõlõmõõnẽ. Nẽẽthĩ ꞌyioko, aau eet umwaa ꞌcĩ ĩllõõan ꞌThõlõmõõnẽ ngaati.

Õbõda lorii ꞌcĩ abathĩ

⁴³ “Hatĩ ũtũngeek lorii ꞌcĩ abathĩ eet, õvvõ hatĩ nẽẽ horrwaa ꞌcĩ õdõhõhĩĩ kak adiim nĩngĩtĩ iyyiomanĩ. Nẽẽthĩ, má hõllõngaa ammũda nẽẽ nĩngĩmwa,

⁴⁴ ammuk hatĩ aĩ, ‘Hobodoothi hatĩ ꞌcieethaa baa haayyi.’ Ma baa õdõlan ko, ammũdeek ꞌcieeth nicci nga haavvi eet umwaanĩ, aiili hĩĩ tẽlla nẽ ũkũmanoothĩk jurrung.

⁴⁵ Õkõ hatĩ aꞌnyaha nẽẽ ꞌgõõnõgĩ tũkĩramma ꞌcĩg abathĩ hĩllõõanit ĩnõõnnõ hõõt haauto nĩngaata. Nĩngĩtĩ hatĩ abathõõꞌthĩ authẽtĩ cĩ eeto hĩllõõan baa oou. ꞌGõõl ꞌthẽk hatĩ ꞌcĩ aattiyyi eeta ꞌcĩg abathĩ cĩg irkiꞌnyia niccig cieeni.”

Eet cĩg halang cĩ Yeesu dẽẽdẽ

⁴⁶ Ma baa nga õthõõthõõ Yeesu hĩ lothippit, uppwaanna hinnia ꞌgotoonoggia hĩ aattĩnnĩ hiita hĩbĩlĩt battaala, adiim au õthõõthõõ hĩ ĩnõõnnõ.

⁴⁷ Ma nĩngaata, ikia uduhaak eet umwaa Yeesu ĩĩnnĩk, “Aattĩg nganiit morwahit hĩ ꞌgotoonogu battaala, adiim othoothonnu.”

⁴⁸ Ẽdẽcĩ Yeesu anneek, “Morwahit caannĩ nganĩ nẽ hĩ nganĩ ꞌcĩg ĩĩn ꞌgotoonoga cĩgannĩg ko?”

⁴⁹ Ma ho, ũũ Yeesu nuyyiook cĩgĩnnĩg nẽ õthõõth ĩĩ, “Ĩĩn cieeg morwahit caannĩ hĩ ꞌgotoonoga cĩgannĩg.

⁵⁰ Hĩnĩngĩtĩ ẽẽtĩ ꞌcĩ adĩman thõõth cĩ Baaba caannĩ cĩ hẽẽtkujjieen, ĩĩn morwahit caannĩ hĩ ꞌgõtõna hĩ ngõõna caannĩ.”