Maarko 6 - ꞌBuuk cĩ Thõõth cĩ Nyekuci

Ũtũbũrĩt eeta Yeesu Naaꞌtharẽta

¹ Ma baa ũtũngteek Yeesu hĩ nuyyiook cĩgĩnnĩg nĩngĩtĩ niccia, iita oboddiõõthĩ nẽẽg ꞌtaaũnaa cĩ õlõ cĩnĩĩng Naaꞌtharẽta.

² Ma Kõr cĩ ꞌYiommaanõ, iꞌthianaaĩ nẽẽ ũũk illiman eet ꞌCieethaa cĩ Laiitto. Baa abulan thõõth ꞌcĩ alliman nẽẽ ho eet ꞌcĩg mẽẽlĩg gẽrrẽẽt, baa ĩthĩhĩt ĩnõõnnõ. Nẽ othoothito ẽmmẽn ĩĩtõ, “Ammũda baa ẽẽtĩ ciee ꞌgẽẽnyĩth icci vẽlẽk ĩĩna? ꞌGẽẽnyĩth baa ꞌcĩ aaĩ hutuno ꞌcĩ aaꞌnyĩhoothĩk ĩnõõnnõ ho? Nẽ adtican nẽẽ thooꞌthiok ꞌcĩg ĩnaat eeta ho hutuno?

³ Hõllõngaa nooyyia ĩĩn nẽẽ ngeertĩ toddoyyioohit Yothebo nẽ ĩĩ aattĩnnĩ Maria? ꞌGõtõnĩ ꞌJeemithi hĩ Yothebo hĩ ꞌJuuda hĩ ꞌThimõõnẽ? Hõllõngaa nooyyia harũmĩ naag hĩ ngõõnõgĩ ngaati thõng?” Nẽ baa ittiha nẽẽ ꞌgẽẽnyĩth icci aaĩ hoti ho ĩĩna?

⁴ Nĩngĩtĩ annẽẽkĩ Yeesu ĩhõõggõ, “Itieelli eeta põrõvẽtaac loonyini vẽlẽk nẽ ũtũbũrĩt looccaa cĩnnĩ hĩ ittioonniohĩĩ cĩgĩnnĩg hĩ eet ꞌcĩg õlõ cĩnĩĩng.”

⁵ Baa hõllõngaa adtican Yeesu thooꞌthiok ꞌcĩg ĩnaat eeta nĩngaata, nẽẽthĩ nẽẽꞌthẽk, baa ataadĩk athĩn cĩgĩnnĩg eetini ũgẽẽgĩ ꞌcĩg baag abadtẽc ꞌcĩg õmmõõrĩ nẽ aaꞌnyĩk ĩhõõggõ hũbũttaathõ.

⁶ Nẽ baa aꞌngalĩlĩ nẽẽ gẽrrẽẽt, hĩnĩngĩtĩ thõõth ꞌcĩ hõllõngaa aꞌnyahĩ eeta lemiinit. Nĩngĩtĩ õvvõõĩ Yeesu olooyyiohĩ vẽlẽk allimanĩ eeta.

Ĩꞌthõ Yeesu nuyyiook õmmõtõ hĩ ꞌramma

⁷ Ma nĩngaata, ikia ũtũvvũ nẽẽ ꞌthooyyiak cĩgĩnnĩg õmmõtõ hĩ ꞌramma nẽ ĩꞌthõ ĩhõõggõ hõõt hĩ ꞌramma hĩ ꞌramma nẽ aaꞌnyĩk ꞌtirriani ꞌcĩ õõ iiggiaĩ loriẽẽt ꞌcĩg abathĩ.

⁸ Baa aduhaak nẽẽ ꞌthooyyiak cĩgĩnnĩg anneek, “Ma haꞌnyaku ꞌgiimwa hẽẽrõna cunuung ko, aꞌnyahit hĩbahĩꞌnya cĩg tohomiittak diooni, ma haꞌnyaku ꞌgẽẽn hode ꞌrabbẽẽt hode locoburo ꞌcĩ aꞌnyaku ꞌgiimwa.

⁹ Itihimit caawa diooni, ma haꞌnyaku ceremwa ꞌramma.

¹⁰ Ma uduhuttu õlõ umwa ngaatĩ elemmuung eeta, aallattia õlõõ tĩho ĩꞌthõng hõdõlan kõrra ꞌcĩ uunniku õlõ tĩho.

¹¹ Nẽ má hõllõngaa elemmuung eeta õlõõ ꞌcĩ uppwannothoothiku ho nẽ hõllõngaa athiknuunga, ũtũngteek eet nicciag nẽ utuddungteehu tuduhaac cĩ ꞌthoo cugguung nĩngaata, hátĩ hĩĩ terethiinit cĩ bathi cĩnĩĩng.”

¹² Ma ho, ĩtĩngaacõ ꞌthooyyiaha nẽ õõt illimanit eet ꞌgõõl ꞌcĩ ũũnnĩkĩ ꞌthẽccanẽẽt cĩggĩĩng,

¹³ nẽ õõt itiggiaacõ loriẽẽt ꞌcĩg abathĩ eleetinii cĩg eet ꞌcĩg mẽẽlĩg nẽ ĩnĩĩbĩtõ eet ꞌcĩg õmmõõrĩ ho ngõõrra hũbũttaathõ.

Daahĩth cĩ Yõaannẽ Batitta

¹⁴ Baa aku athĩhĩ habuui Ẽrõõdẽ thõõth cĩ Yeesu ho, hĩnĩngĩtĩ baa ĩꞌthaattothoothĩk ꞌthaara cĩg Yeesu loonyin vẽlẽk. Nẽ baa õthõõth eeta ũgẽẽgĩ aĩ, “Ũrũga Yõaannẽ Batitta daahĩtha, ĩnõõ ꞌcĩ aꞌnyahĩ nẽẽ ꞌtirriani ꞌcĩ adticanĩ thooꞌthiok ꞌcĩg ĩnaat eeta ho.”

¹⁵ Baa hinnia ammuk eeta ũgẽẽgĩ aĩ, “Ĩĩn Yeesu Eliijja.” Nẽ tarĩ ummuhit ũgẽẽgĩ ĩĩtõ, “Ĩĩn nẽẽ põrõvẽtaac ꞌcĩ aaĩ hĩ põrõvẽtaaꞌnya baag baarkit.”

¹⁶ Ma baa athĩhĩ habuui Ẽrõõdẽ thõõth icci ho, ikia õthõõth ĩĩ, “Yõaannẽ Batitta ꞌthẽk ꞌcĩ arũgna ho, eet baa hẽttẽẽda naa õõ!”

¹⁷ Baa õthõõth Ẽrõõdẽ hoti, hĩnĩngĩtĩ baa ĩnõõnnõ ꞌcĩ ĩꞌthõ eet hõõt haggamit Yõaannẽ hecebit nẽ aarrik baabuuthatõõ. Adĩman Ẽrõõdẽ hoti, hĩnĩngĩtĩ baa attik nẽẽ Erodia ngaa cĩ Pilippo ꞌgõtõnĩ cĩnnĩ.

¹⁸ Nẽ tarĩ baa ara Yõaannẽ Batitta ngaatĩ aduhaakĩ Ẽrõõdẽ annẽẽkĩ, “Ẽꞌthẽcanuu nii gẽrrẽẽt, ngaatĩ attihi ngaggotonoonu Erodia.”

¹⁹ Nĩngĩtĩ aꞌnyahẽẽkĩ Erodia Yõaannẽ mẽdẽr nẽ idiim uruk ĩnõõnnõ thõng, nẽẽthĩ hinnia, baa hõllõngaa ammũda ꞌgõõl ꞌcĩ occa aruhi ĩnõõnnõ ũdũt.

²⁰ Baa iꞌngolli Ẽrõõdẽ Yõaannẽ nẽ ẽẽla ĩnõõnnõ, hĩnĩngĩtĩ baa aga aĩ ĩĩn nẽẽ eet ꞌcĩ abũnnaa ꞌcĩ ẽllẽẽmĩthĩ. Nẽ tarĩ, baa ahayũnganni Ẽrõõdẽ gẽrrẽẽt, baa athĩhĩ nyeemuut cĩ Yõaannẽ, tananga accamana ngaatĩ athĩknĩ thõõth cĩnnĩ gẽrrẽẽt.

²¹ Dtuurnattaa cĩnnĩ, ikia ũmmũda Erodia ꞌrõtĩ ꞌcĩ aruhi Yõaannẽ kõr baa aꞌnyahĩ Ẽrõõdẽ karrama cĩ kõr cĩ ꞌtirriaanĩt cĩnnĩ. Baa avvaa eeta ꞌcĩg ĩĩn ꞌgaala ꞌcĩg obbitig cĩg ũũrũta, hĩ ꞌgaala ꞌcĩg obbitig cĩg looc cĩ ꞌGalileea vẽlẽk.

²² Ma baa ũrũgũm tĩnaatĩ Erodia, ikia aaꞌnyĩk nẽẽ Ẽrõõdẽ hĩ heerinniook cĩgĩnnĩg haccamattoothĩk. Nẽ ijin habuui Ẽrõõdẽ bũhẽẽc nicci ĩĩnnĩk, “Jinaa nganĩĩt ꞌgiimwa ꞌcĩ adiimi niina, hátĩ haaꞌnyii naa nganiita.”

²³ Ẽdẽcĩ Ẽrõõdẽ bũhẽẽc nicci anneek, “Habũtani haini, ‘Haaꞌnyii hatĩ naa ꞌgii ꞌcĩ ajinnaa nii nganĩĩta, tananga hẽꞌngẽraahii dhoorit cĩ looc ꞌcĩ haggami naa ho hõrggẽẽna bĩtĩ!’ ”

²⁴ Ma ho, ũũk bũhẽẽcĩ nicciee battaala nẽ ũũk ijin aattĩnnĩ ĩĩnnĩk, “Ne occa hatĩ ꞌcĩ hõkõ hajina Ẽrõõdẽ haaꞌnya ho?” Ẽdẽcĩ ngaannia ĩnõõnnõ anneek, “Bĩĩt jina õõ cĩ Yõaannẽ Batitta.”

²⁵ Nĩngĩtĩ õbõdõõꞌthĩ bũhẽẽcĩ nicciee hĩdĩĩkoothong hĩ habu nẽ ũũk uduhaak ĩĩnnĩk, “Hadiimmii naa nganiit ꞌyioko noho, ꞌtẽẽdahaa õõ cĩ Yõaannẽ Batitta nẽ aarĩka hẽddẽẽmaa cĩ.”

²⁶ Baa aaꞌnyĩk thõõth ciee habu hõmõthĩ gẽrrẽẽt nẽ occa hõllõngaa abũrĩ thõõth cĩ bũhẽẽc nicci buúk, hĩnĩngĩtĩ baa ũbũtan nẽẽ muumtinii cĩg heerinniook cĩgĩnnĩg ko vẽlẽk.

²⁷ Nĩngĩtĩ ĩꞌthõõĩ habuui athegereec umwa hĩdĩĩkoothong hũũk hẽttẽẽda õõ cĩ Yõaannẽ Batitta baabuuthatõõ noho dtum.

²⁸ Ma nĩngaata, aꞌnyaha athẽgẽrẽẽcĩ nicciee õõ cĩ Yõaannẽ Batitta hẽddẽẽma nẽ aꞌnyĩĩk bũhẽẽc nicci hũũk haaꞌnyĩk aattĩnnĩ.

²⁹ Ma baa athĩhĩ nuyyiooha cĩg Yõaannẽ thõõth icci ho, iita ootti nẽẽg ẽlẽ cĩ Yõaannẽ nẽ õõt adaacõ.

Irohĩt Yeesu eet aalibꞌnya ꞌtur

³⁰ Ma baa oboddia ꞌthooyyiaha hĩ Yeesu, iita uduktaak ĩnõõnnõ thooꞌthiok vẽlẽk ꞌcĩg baag õõ adtican nẽẽg, hĩ thooꞌthiok vẽlẽk baag õõ allimaneek nẽẽg eeta.

³¹ Nĩngĩtĩ annẽẽkĩ Yeesu ĩhõõggõ, “Hõõt nõõ haaut ngaamwaanĩ ngadiiha ẽmmẽn hiyyiomanit hĩdĩĩc.” Hĩnĩngĩtĩ baa mẽẽlĩg eeta gẽrrẽẽt ꞌcĩg õõ, nẽ iita irigithit ũgẽẽgĩ thõng, hiittiõõ ꞌgõõl ꞌcĩ occa adahĩ ꞌthooyyiaha ꞌgẽẽn tõõ.

³² Ma ho, otodit nẽẽg haahũl nẽ õõt ngaatĩ õõ aattiyyi ẽmmẽn.

³³ Baa mẽẽlĩg eeta ꞌcĩg acĩn ĩhõõggõ ngaatĩ ĩꞌngaannĩ õõĩ nẽ baa aga eeta niccieeg nĩngĩtĩ õõĩ nẽẽg ko. Ma ho, ukulit eeta cĩg ꞌtaaũnnioohu ho vẽlẽk, utuattĩ ĩꞌthõng hõõt hõdõlanit nĩngĩtĩ õõĩ nẽẽg ko ĩĩcĩ oou.

³⁴ Ma baa uduhuna Yeesu haahũla battaala, acĩn hinnia lothippit cobbi gẽrrẽẽt nẽ atamaatĩk ĩhõõggõ, hĩnĩngĩtĩ baa aattĩg nẽẽg hĩ aꞌtha ꞌcĩg aitiõõ tũhayyioohiti tõõ. Nĩngĩtĩ iꞌthianaanĩ nẽẽ allimanĩ ĩhõõggõ thooꞌthiok ꞌcĩg mẽẽlĩg.

³⁵ Ma baa okoloothĩk kõrra cĩ ꞌjiaatĩn niccia, iita uduktaak nuyyiooha Yeesu ĩĩttĩk, “Ĩĩ ꞌjiaatĩn lõõcĩ nẽ ĩĩn nĩngĩtĩ ciee ngadik gẽrrẽẽt,

³⁶ aꞌnyĩĩk eet hõõt manẽẽnĩ hĩ olooyyiohĩĩ ꞌcĩg obokii nĩnga ho, hátĩ hõõt hutuuyyia ꞌgeenniok cĩggĩĩng hadahit.”

³⁷ Anneek hinnia Yeesu ĩhõõggõ, “Aanytĩk eet ꞌgẽẽn niiga.” Ẽdẽcĩ ꞌthooyyiaha anneek, “Adiimmeet nii ngagĩĩt hoottia hutuuyyiawa ꞌgẽẽn ꞌcĩ ũũppan ꞌdinaarꞌnya ꞌmiiaꞌnya ꞌramma, hátĩ haanytĩha eet hadahit?”

³⁸ Ẽdẽcĩ Yeesu ĩhõõggõ anneek, “Aꞌnyaku niig ũbũnẽẽt thõng? Õõt da ĩcĩnĩt!” Ma baa õõ acĩn nẽẽg ũbũnẽẽt hĩ ulugo tĩko ho, iita uduktaak nẽẽg Yeesu ĩĩttĩk, “Aattĩg ũbũnẽẽta ꞌtur hĩ ulugo ꞌramma diooni.”

³⁹ Ma ho, uduhaak Yeesu ĩhõõggõ huduktaak eet haauto loota arteettaa ꞌcĩ cũlahĩ lothippiꞌnyaannĩ cũũmõ cũũmõ.

⁴⁰ Ma nĩngaata, aauto eeta loota lothippiꞌnyaannĩĩ ꞌcĩg ĩĩnnĩ eeta ꞌmiia hõdẽĩ nẽ ĩĩtõ ũgẽẽgĩ hẽẽn ꞌtur.

⁴¹ Nĩngĩtĩ aggamaanĩ Yeesu ũbũnẽẽt ꞌcĩg ĩĩn ꞌtur hĩ ulugo ꞌcĩg ĩĩn ꞌramma ho nẽ ẽdẽẽnyõthĩ hẽẽtkujjieen nẽ aggatan ꞌgẽẽn nicci nẽ appak ũbũnẽẽt nẽ aaꞌnyĩk nuyyiook heꞌngerrieek eet. Nĩngĩtĩ ẽꞌngẽrẽẽkĩ nuyyiooha ulugo ꞌcĩg ĩĩn ꞌramma ho buúk ĩhõõggõ vẽlẽk.

⁴² Baa aduhi eeta vẽlẽk hũũppattĩ.

⁴³ Ma ho, uluttia nuyyiooha lohoddwa ꞌcĩg idiongan õmmõtõ hĩ ꞌramma ꞌcĩg abbĩꞌthĩĩ ũbũnẽẽta hĩ ulugo.

⁴⁴ Baa ĩĩn eeta ꞌcĩg maacĩg dioo ꞌcĩg irohĩt Yeesu ho aalibꞌnya ꞌtur.

Õvvõ Yeesu maamĩ hujjieen

⁴⁵ Ma hĩdĩĩkoothong, uduhaak Yeesu nuyyiook cĩgĩnnĩg hotodit haahũl hutuattĩ habaaktĩ hõõt ĩĩcĩ Beꞌthaida dhoortaa cĩ baakitu, baa nga ĩꞌthaan nẽẽ lothippit cĩ eetu hũũk.

⁴⁶ Ma urutaa ꞌcĩ ũtũngẽẽhĩ nẽẽ nuyyiook, ikia õtõd horooma nẽ ũũk alaõ.

⁴⁷ Ma baa ĩĩ lõõcĩ garrii garrii, ikia õdõlan haahũlĩ horggeeni cĩ bũlũcõ nẽ baa Yeesu dioo ꞌcĩ nga õvvõ dẽmẽta.

⁴⁸ Baa acĩnoothi nẽẽ nuyyiook ngaatĩ õꞌngõnyõõnĩ hĩ haahũl, hĩnĩngĩtĩ baa attĩlanoothĩk nẽẽg ngõõt ꞌcĩ uuhanniaak ĩhõõggõ. Ma baa õbõhĩ aal lõõcĩ, õtõ Yeesu bũlũca hujjieen ĩꞌthõng hõbõhĩ happacana ĩhõõggõ.

⁴⁹ Ma baa acĩn nuyyiooha ĩnõõnnõ ngaatĩ ovvooyyianĩ maamĩ hujjieen ko, baa ammuk hinnia nẽẽg aĩ miningit, nĩngĩtĩ õkõlẽẽkĩ luulu gẽrrẽẽt,

⁵⁰ hĩnĩngĩtĩ baa ikia aggam ĩhõõggõ tẽẽlꞌthĩtĩ cobbiẽẽnĩ. Ma hĩdĩĩkoothong, uduhaak Yeesu ĩhõõggõ ĩĩnnĩk, “Aanytĩk ꞌthinneeti cugguung hokomit, nganĩĩt Yeesu, ma hiteelinnaangu.”

⁵¹ Ma baa õtõd Yeesu ũũk haahũlatõõ, ikia ĩbĩl ngõõtĩ nẽ ĩtĩnaacõ nuyyiooha cĩgĩnnĩg thõõth icci gẽrrẽẽt,

⁵² hĩnĩngĩtĩ baa adĩĩtĩ ooti cĩggĩĩng pĩd nẽ hõllõngaa aga dẽẽdẽ thõõth cĩ ũbũneetu nii.

Aaꞌnyĩk Yeesu eet ꞌcĩg õmmõõrĩ hũbũttaathõ

⁵³ Ma baa abaaktĩ Yeesu hĩ nuyyiook bũlũc, õõt õdõlanit nĩngĩtĩ haĩ ꞌJẽnẽꞌtharẽt, ngaatĩ baa õõ ẽcẽbĩ nẽẽg haahũl.

⁵⁴ Ma ho, uduhutta nẽẽg haahũla battaala nẽ iita agaacõ eeta Yeesu nĩĩcĩ noho.

⁵⁵ Nĩngĩtĩ avviri maajihi lootu looc niccia vẽlẽk, alũtaanĩ eet ꞌcĩg õmmõõrĩ nẽ irriongatta lotoonwẽẽtĩ haꞌnyakta ngaatĩ aayyi Yeesu.

⁵⁶ Nẽ ꞌgoolliohĩ ꞌcĩg õkõõĩ Yeesu olooyyiohĩ hĩ ꞌtaaũnnioohĩ hĩ manẽẽnĩ vẽlẽk, aꞌnyaha eeta eet ꞌcĩg õmmõõrĩ ho ꞌcuuha nẽ alaacõ ĩnõõnnõ haaꞌnyĩk ĩhõõggõ huhumit eetoc cĩ cẽrẽm cĩnnĩ nẽ eeta vẽlẽk ꞌcĩg baag uhumit cẽrẽm cĩnnĩ, iita ũbũttaathõ.