Maarko 4 - ꞌBuuk cĩ Thõõth cĩ Nyekuci

Thõõth cĩ eet ꞌcĩ ĩĩn kattioohit

¹ Ikia iꞌthianaaĩ Yeesu ngaatĩ allimanĩ eet dẽmẽtaa cĩ Bũlũc cĩ ꞌGalileea tarĩ. Baa maka lothippiti ꞌcĩ baa aluttiaak ĩnõõnnõ gẽrrẽẽt, nĩngĩtĩ adukni nẽẽ haahũlatõõ nẽ aau lothippiti cĩ eetu dẽmẽta.

² Baa allimaneek nẽẽ ĩhõõggõ thooꞌthiok ꞌcĩg mẽẽlĩg ꞌcĩg awantoothĩk aĩ,

³ “Ĩthĩktõ! Baa aaĩ ẽẽtĩ umwaa ꞌcĩ õkõ athacĩ hinyomo manaa cĩnnĩ.

⁴ Ma baa athacĩ nẽẽ hinyomo ho, ĩꞌthanothoothĩk hinnia ũgẽẽgĩ ꞌgõõla nẽ iita uuranit hĩbaallĩ.

⁵ Nẽ ĩꞌthaattothoothĩk hinyomona ũgẽẽgĩ ngaatĩ ĩĩn ꞌthẽhẽk nẽ ubuꞌthia hĩdĩĩkoothong, hĩnĩngĩtĩ baa hõllõngaa uuthik ꞌthẽẽma.

⁶ Ma baa ikia kõrra, ikia ũtũũth haal niccig hummuduhito ĩꞌthõng hodohohit, hĩnĩngĩtĩ hõllõngaa aduhun cõrrẽẽna huuꞌthĩk.

⁷ Nẽ ĩꞌthaattothoothĩk hinyomona ũgẽẽgĩ ngaatĩ ĩĩn mõrõ nẽ ĩĩ bĩlla ꞌcĩg alĩꞌtha nẽ uruhit haal hiittiõõ hõllõngaa abbiiri.

⁸ Ma nĩngaata, iita ĩꞌthaattothoothĩk hinyomona ũgẽẽgĩ tarĩ ngaatĩ ĩĩn cooni nẽ ubuꞌthia haala hitiliꞌthia jurrung hibbiirito. Baa aꞌnyak haaliti hõdẽẽthõng haal hẽẽn iyyio nẽ aꞌnyak umwaa haal hẽẽn tõrkõnõn nẽ aꞌnyak umwaa haal ꞌmiia hõdẽĩ.”

⁹ Nĩngĩtĩ aduhaakĩ Yeesu lothippit annẽẽkĩ, “Nẽẽthĩ, ẽẽtĩ ꞌcĩ aꞌnyak ĩtat aꞌnyĩĩk hĩthĩhõ.”

Inni hidticanõõĩ Yeesu dtẽẽllẽn ko?

¹⁰ Ma baa aau Yeesu ẽmmẽn, iita ijinit eeta ꞌcĩg baag arũmĩ hĩ ĩnõõnnõ hĩ ꞌthooyyiak cĩgĩnnĩg thooꞌthiok ꞌcĩg awantoothĩk ko.

¹¹ Ẽdẽcĩ Yeesu ĩhõõggõ anneek, “Baa aaꞌnyĩhoothĩhuung ngagiit thõõth ꞌcĩ ammiꞌthi cĩ habuccieet cĩ Nyekuci. Nẽ haduhaahi naa eet ꞌcĩg battaalu thooꞌthiok ꞌcĩg awantoothĩk,

¹² hĩnĩngĩtĩ “ ‘Acĩnĩ hatĩ eeta cieeg hiriiri nẽ hõllõngaa acĩnĩ, nẽ athĩknĩ hatĩ nẽẽg hiriiri, nẽẽthĩ hinnia, hõllõngaa aga ũdũt, nẽẽthĩ má hagaacõ, occa hatĩ õbõda nẽẽg hĩ Nyekuc, nẽ hatĩ ũtũngeek Nyekuci ꞌthẽccanẽẽt cĩggĩĩng.’ ”

Ẽddẽẽba Yeesu dtẽẽllẽn cĩg kattiookto

¹³ Nĩngĩtĩ ajini Yeesu ĩhõõggõ annẽẽkĩ, “Ma hõllõngaa agayyu niig dtẽẽllẽn ꞌcĩg awantoothĩk ko nẽ hatĩ agayyu dtẽẽllẽn ũgĩ ꞌcĩg awantoothĩk hutuno?

¹⁴ Athacĩ kattioohiti nyeemuut ꞌcĩ ĩĩn thõõth cĩ Nyekuci.

¹⁵ Aattĩg eeta ũgẽẽgĩ hĩ hinyomona ꞌcĩg athacoothĩk ꞌgõõla, athĩhĩ thõõth cĩ Nyekuci noho, ma hĩdĩĩkoothong, ikia ꞌThĩttaanĩ uvvucana thõõth nicci ꞌthinneetinii cĩggĩĩng.

¹⁶ Hinyomona ꞌcĩg athacoothĩk ngaatĩ ĩĩn ꞌthẽhẽk ko, ĩthakꞌthoothĩk eet ꞌcĩg athĩhĩ thõõth cĩ Nyekuci hĩdĩĩkoothong nẽ elemit thõõth taliitta.

¹⁷ Nẽ hõllõngaa aduhun thõõth ꞌthinneetinii cĩggĩĩng jurrung nẽ hõllõngaa aalla ĩꞌthõng. Nẽ ma ikia ꞌcannani hode pĩĩrnanĩtĩ, hĩnĩngĩtĩ thõõth cĩ Nyekuci, iita ũtũngteek nẽẽg thõõth nĩĩcĩ noho ꞌcõm.

¹⁸ Aattĩg eeta ũgẽẽgĩ hĩ hinyomona ꞌcĩg athacoothĩk bĩllanĩtõõ, ĩthakꞌthoothĩk eeta cieeg eet ꞌcĩg athĩhĩ thõõth cĩ Nyekuci,

¹⁹ nẽ hinnia ummuhit rũgẽt cĩ looc nicci hĩ mĩnnan cĩ baliitto hĩ hẽlẽggĩ vẽlẽk ꞌcĩg ammũyan ĩhõõggõ nẽ ẽꞌthẽcanit thõõth cĩ Nyekuci, iittiõõ hõllõngaa abbiiri haꞌnyakta hinyomo.

²⁰ Nẽ hinyomona ꞌcĩg athacoothĩk ngaatĩ abũnnaa ꞌthẽẽma ho, aattĩg hĩ eeta ꞌcĩg athĩhĩ thõõth cĩ Nyekuci nẽ elemita, abbiiri jurrung aꞌnyaha ũgẽẽgĩ haal hẽẽn iyyio, aꞌnyaha ũgẽẽgĩ haal hẽẽn tõrkõnõn nẽ aꞌnyakta ũgẽẽgĩ haal ꞌmiia hõdẽĩ.”

ꞌLoomo ꞌcĩ arimꞌthi dilaata

²¹ Nẽ uduhaak Yeesu ĩhõõggõ tarĩ ĩĩnnĩk, “Ĩcca occa aꞌnyaha eet umwaa ꞌloomo nẽ ikia aarĩk ijjia uruta, hode nangẽrẽba uruta? Ĩcca occa hõllõngaa aarĩk tẽrẽmẽẽjawa lokora?

²² Hĩnĩngĩtĩ appulanniaa hatĩ thooꞌthioha vẽlẽk ꞌcĩg ammiꞌthi lothippita battaala nẽ thooꞌthioha vẽlẽk ꞌcĩg ammiꞌthi, iittiõõ hatĩ hõllõngaa ammiꞌthi.

²³ Má aꞌnyak ẽẽtĩ umwaa ĩĩna, aaꞌnyĩk hĩthĩhõ.”

²⁴ Nẽ uduhaak Yeesu ĩhõõggõ tarĩ ĩĩnnĩk, “Uꞌthuutti thooꞌthiok ꞌcĩg athiknu niig ko jurrung. ꞌGii ꞌcĩ adĩmaneeku niig eet umwa, adĩmaneekuung hatĩ Nyekuci ngagiit buúk ꞌgõõlaa tĩho dioo, komiitta ꞌcĩ ĩllõõan gẽrrẽẽt.

²⁵ Ẽẽtĩ ꞌcĩ aꞌnyak ꞌgiimwa, ĩttoorothoothĩk hatĩ hẽlẽggĩ ũgẽẽgĩ hĩĩtõ mẽẽlĩg nẽ ẽẽtĩ ꞌcĩ hõllõngaa aꞌnyak ꞌgiimwa, attihi hatĩ ꞌgii ꞌcĩ abadtẽc ꞌcĩ aꞌnyak nẽẽ ho battaala.”

Dtẽẽllẽn ꞌcĩg awantoothĩk hinyomooc ꞌcĩ alĩthĩ

²⁶ Nẽ õthõõth Yeesu tarĩ ĩĩ, “Aaĩ habuccieet cĩ Nyekuci hĩ ẽẽtĩ ꞌcĩ athacĩ hinyomo manatõõ.

²⁷ Aitiõõ kattioohiti hõllõngaa iccionganeek mana baalin hĩ waathĩn. Tananga hõllõngaa aga nẽẽ ꞌgõõl ꞌcĩ abũthaanĩ mana, abũtha nẽẽ hatĩ hinyomona nẽ ĩtĩlĩthĩt noho.

²⁸ ꞌThẽẽm ꞌcĩg aaꞌnyĩk hinyomo hupwaanito nẽ aarrik haal ko.

²⁹ Ma ibbiir mana, aggam ẽẽtĩ habath, hĩnĩngĩtĩ õdõlan kõrra cĩ janiitto.”

Dtẽẽllẽn ꞌcĩg awantoothĩk hinyomooc ꞌcĩ dĩppĩlĩ

³⁰ Nẽ õthõõth Yeesu tarĩ ĩĩ, “Occa haĩ naag aaĩ habuccieet cĩ Nyekuci hĩ nii? Thõõth iina ꞌcĩ occa hẽddẽẽbanĩ ĩnõõnnõ?

³¹ Aaĩ nẽẽ hĩ hinyomooc ꞌcĩ dĩppĩlĩ ꞌcĩ athacoothĩk ꞌthẽẽmĩtõõ. Ĩĩn hinyomooc ꞌcĩ hidici gẽrrẽẽt loota nĩnga vẽlẽk.

³² Nẽẽthĩ ma itiboolanĩ, alĩꞌtha hatĩ hĩĩ hẽẽt ꞌcĩ maka gẽrrẽẽt ꞌgoonoginni vẽlẽk manatõõ. Accawana tabana ꞌcĩg makatĩg ꞌcĩg au ẽhẽnytĩ hĩbaallĩ ꞌcieethi cĩggĩĩng ꞌriiyyiatõõ cĩnnĩ.”

Thõõth cĩ allimaniini Yeesu dtẽẽllẽnĩ

³³ Nẽ illimaneek Yeesu eet thooꞌthiok ꞌcĩg mẽẽlĩg ꞌcĩg awantoothĩk ho ĩꞌthõng hĩthĩhĩt eeta dhoorit umwa.

³⁴ Aitiõõ nẽẽ hõllõngaa aduhaak eet thõõth haaga, aduhaak thooꞌthiohĩĩ ꞌcĩg ammiꞌthi nẽ ma aau ẽmmẽn hĩ nuyyiook cĩgĩnnĩg, ẽddẽẽbak ĩhõõggõ thõõth vẽlẽk cũrũmũũm.

Abĩllĩ Yeesu ngõõt

³⁵ Ma ꞌjiaatĩn cĩ kõr niccia, ikia uduhaak Yeesu nuyyiook cĩgĩnnĩg ĩĩnnĩk, “Habaaktĩ da bũlũc hõõt dhoortaa cĩ baakitu.”

³⁶ Nĩngĩtĩ ũũnnĩkĩ nẽẽg lothippit cĩ eetu nẽ otodit nuyyiooha haahũl hõdẽĩ hĩ Yeesu nẽ õõta. Baa aattĩg haahũlĩta ũgẽẽgĩ buúk ꞌcĩg õõkõr hĩ ĩnõõnnõ.

³⁷ Ma hĩdĩĩkoothong, uuhan ngõõtĩ ꞌcĩ attiran gẽrrẽẽt ꞌcĩ õmmõõnnĩ maam hiꞌngoꞌthia haahũlatõõ hõbõktĩ hũmmũlũũnyanit haahũl.

³⁸ Baa oongi Yeesu urutaa cĩ haahũlõ, aruha õõ dtaabawa. Nĩngĩtĩ attiranĩ nuyyiooha annẽẽkĩ, “ꞌLimmannioohit, hõllõngaa aga nii ngaatĩ hõõt hutududdi naaga?”

³⁹ Nĩngĩtĩ ĩꞌngaannĩ Yeesu ꞌjieena nẽ eggerenyeek ngõõt nẽ ĩĩnnĩk maam, “Ĩjjaaktõ! Ĩbĩlĩt!” Nĩngĩtĩ adaaknĩ ngõõtĩ hemmeethĩk ũdũt.

⁴⁰ Ma ho, ijin Yeesu nuyyiook cĩgĩnnĩg ĩĩnnĩk, “Itieelinnu niig inni? Nga aitioonnuung ngagiit lemiiniti tõõ?”

⁴¹ Nẽ baa itieelli nẽẽg gẽrrẽẽt, nĩngĩtĩ õthõõthĩ aĩnnĩ, “Eet ꞌcĩ nganĩ gõõng ciee athĩhĩ ngõõtĩ hĩ maam thõõth cĩnnĩ ho?”