Maarko 15 - ꞌBuuk cĩ Thõõth cĩ Nyekuci

Ijin Pĩlaatõ Yeesu

¹ Ma baa ngaalloohoth ngerrenita, etteedito makayyiooha cĩg paadĩrꞌnyaannu hõdẽĩ hĩ makayyiook cĩg eetuk hĩ ꞌlimmanniook cĩg nyattal cĩ Mũũꞌtha, hĩ eet ꞌcĩg obbitig cĩg lokihooak thõõth cĩnĩĩng. Nĩngĩtĩ ẽcẽbĩ Yeesu nẽ aꞌnyaktoothĩk Pĩlaatõ.

² Ma ho, ijin Pĩlaatõ Yeesu ĩĩnnĩk, “Ĩĩnĩ nii habu cĩ ꞌJudeei?” Ẽdẽcĩ Yeesu anneek, “Eeĩ, hĩcĩ aduha nii ho.”

³ Baa aduha makayyiooha cĩg paadĩrꞌnyaannu thooꞌthiok ꞌcĩg mẽẽlĩg ꞌcĩg abĩllĩ Yeesu.

⁴ Ma ho, ijin tarĩ Pĩlaatõ Yeesu ĩĩnnĩk, “Aitiõõ nii hõllõngaa edeci thõõth icci ũdũt? Thĩĩk nõõ thooꞌthiok ꞌcĩg mẽẽlĩg ꞌrĩng, ꞌcĩg abilli nẽẽg nganiit ko!”

⁵ Baa abũrĩ Yeesu ngaatĩ ẽdẽcĩ thõõth hõdẽẽthõng, nĩngĩtĩ abulanĩ Pĩlaatõ thõõth ꞌcĩ ĩjjaahĩ Yeesu ĩnõõnnõ ho gẽrrẽẽt.

Ũtũbũr lothippiti Yeesu

⁶ Baa gõõng aꞌnyak Pĩlaatõ authet ꞌcĩ õõganĩ baabutheenit hõdẽẽthõng ꞌcĩ ẽbẽra eeta Karramaawa cĩ Haangittõõ.

⁷ Nẽ kõr niccia, baa aaĩ eet umwaa ꞌcĩ haĩ Barabbath baabuuthatõõ hĩ eet ꞌcĩg baag ĩkõõtha jore nẽ uruhit eet ũgĩ joratõõ tĩho.

⁸ Ma baa aluttiaa lothippiti ho, õõt nẽẽg ijinit Pĩlaatõ authet ꞌcĩ gõõng õõgakĩ nẽẽ ĩhõõggõ baabutheenit hõdẽẽthõng karramaawa.

⁹ Ma ho, ijin Pĩlaatõ lothippit ĩĩnnĩk, “Adiimmu niig hõõgahuung habu cĩ ꞌJudeei ho?”

¹⁰ Ajin Pĩlaatõ thõõth icci lohoroor, hĩnĩngĩtĩ aga nẽẽ jurrung ngaatĩ aꞌnyahaakĩ makayyiooha cĩg paadĩrꞌnyaannu Yeesu ĩnõõnnõ, hĩnĩngĩtĩ aꞌnyaheek nẽẽg Yeesu mẽdẽr.

¹¹ Baa hinnia akũtan makayyiooha cĩg paadĩrꞌnyaannu ho lothippit huduktaak Pĩlaatõ hõõga Barabbath, hõllõngaa Yeesu.

¹² Nẽ tarĩ, ijin Pĩlaatõ ĩhõõggõ ĩĩnnĩk, “Ma aaĩ noho, hadahĩ thĩ naa eet ꞌcĩ ainnu niig ĩĩn habu cĩ ꞌJudeei ho ne?”

¹³ Baa hinnia awacak lothippiti aĩ, “Toddoeek Yeesu hurucceea!”

¹⁴ Ma ho, ijin Pĩlaatõ ĩhõõggõ ĩĩnnĩk, “Inni? Ne baa ꞌcĩ ẽꞌthẽcan Yeesu ho?” Ẽggẽrẽny hinnia gẽrrẽẽt aĩ, “Toddoeek ĩnõõnnõ hurucceea!”

¹⁵ Hĩnĩngĩtĩ baa adiim Pĩlaatõ eet haccamattoothĩk, nĩngĩtĩ õõgakĩ nẽẽ ĩhõõggõ Barabbath. Nẽ uduhaak eet cĩgĩnnĩg huukito Yeesu nẽ aaꞌnyĩk hõõt hotoddoyyieek ĩnõõnnõ hurucceea.

Atararri athegereeꞌnya Yeesu

¹⁶ Baa adukni athegereeꞌnya Yeesu õõĩ halangatõõ cĩ habu cobbi cĩ ꞌRooma ngaatĩ haĩ Peretorio nẽ utuvuyyia athegereeꞌnya vẽlẽk hiita ngaatĩ hõdẽẽthõng.

¹⁷ Ma ho, iita itihimtẽẽhĩ nẽẽg Yeesu cẽrẽm ꞌcĩ ꞌrẽggẽẽ nẽ ẽtẽhẽnyta tẽẽ ꞌcĩ ĩĩn bĩlla nẽ õmmõktẽẽhĩ õõa cĩnnĩ.

¹⁸ Nĩngĩtĩ iꞌthianaanĩ ĩꞌthaaĩ ĩnõõnnõ annẽẽkĩ, “Hĩꞌthaaõ habu cĩ ꞌJudeei!”

¹⁹ Ma ho, uukito nẽẽg Yeesu õõ cĩnnĩ hĩbahĩta nẽ uttuurrik ammũta nẽ akattieek huruꞌnyia õlõngaa ꞌcĩ aĩ halayya ĩnõõnnõ.

²⁰ Ma baa edecciaak nẽẽg authet ꞌcĩ uranganĩ Yeesu ho, iita uppuruccia cẽrẽm ꞌcĩ ꞌrẽggẽẽ ho nẽ itihimtẽẽhĩ baagĩnnĩg. Ma baa itihimtẽẽhĩ nẽẽg Yeesu ceremwa ẽlẽk, iita ootti ĩnõõnnõ ĩĩcĩ õõ õdõõddĩkĩ hurucceea.

Õttõddõĩ Yeesu hurucceea

²¹ Ma ꞌgõõla, iita ommottio athegereeꞌnya hĩ eet umwa ꞌcĩ haĩ ꞌThimõõnẽ, maaꞌnyĩ Alĩthandoro hĩ ꞌRuuvo, ꞌcĩ aku ĩĩcĩ looc ꞌcĩ haĩ Cireene. Ma ho, aggamit nẽẽg ꞌThimõõnẽ nẽ ĩttĩngatteek hirriongan hurucce cĩ Yeesu.

²² Iita ootti nẽẽg Yeesu ĩꞌthõng nĩngĩtĩ haĩ ꞌGologooꞌtha, thõõth ꞌcĩ aĩ, “Nĩngĩtĩ ẽmmẽẽn cĩ õõ cĩ eeto.”

²³ Ma nĩngaata, õõt aanytĩk atheregereeꞌnya Yeesu mẽrtĩ cĩ viinoo ꞌcĩ õꞌngõõtanoothĩk ẽgẽrnaacĩ ꞌcĩ haĩ mĩĩra nẽ baa abũrĩ Yeesu.

²⁴ Nĩngĩtĩ õdõõddĩkĩ nẽẽg Yeesu hurucceea nẽ eꞌngerit ceremwa cĩgĩnnĩg ꞌgõõlaa ꞌcĩ baa attĩmanĩ tooto, hetereꞌthia nganĩ ꞌcĩ occa õkõõĩ cẽrẽm ꞌcĩ atab nẽẽnĩ.

²⁵ Baa odooddĩk nẽẽg ĩnõõnnõ hurucceea, baa ꞌthaa tũrkũwwec cĩ loohothu.

²⁶ Nẽ baa eheeddi thõõth baa ẽttẽẽdĩkĩ nẽẽg Yeesu daahĩth hurucceea hujjieen aĩ, “HABU CĨ ꞌJUDEEI.”

²⁷ Baa odooddĩk nẽẽg igorriaak ꞌramma hõdẽĩ hĩ Yeesu, õdõõddĩ umwaa ĩĩcĩ aꞌthiit cĩnnĩ cobbi nẽ õtõddõĩ umwaa ĩĩcĩ aꞌthiit cĩnnĩ ꞌcĩ hidici.

²⁸ Nẽ ikia thõõth baa eheeddi ꞌBuuhaa cĩ Nyekuci ĩĩ dĩdĩ baa aĩ, “Arũmoothĩk nẽẽ hĩ ꞌthẽccanniook hõdẽĩ.”

²⁹ Baa arannĩ eeta ꞌcĩg ẽttẽẽd nĩngaata Yeesu aĩ, “Ac! Ma baa aini nii occa ĩꞌthaanni ꞌCieeth cĩ Nyekuci nẽ etehenyuu waathinnioohĩĩ ꞌcĩg ĩĩn iyyio!

³⁰ Ẽla thiggia ẽlẽ cunni nẽ ulluuccia hurucceea loota!”

³¹ Baa arannĩ makayyiooha cĩg paadĩrꞌnyaannu hĩ ꞌlimmanniook cĩg nyattal cĩ Mũũꞌtha Yeesu anneek, “Ma gõõng ẽẽla nẽẽ eet ũgĩ nẽẽthĩ ꞌyioko, hõllõngaa ẽẽla ẽlẽ cĩnnĩ buúk inni?

³² Aꞌnyĩĩk Krĩstõ habu cĩ Ĩꞌthĩraẽlĩ hulluuccia loota hurucceea, hĩcĩtta naag nẽ hẽlẽmta ĩnõõnnõ!” Nẽ igorriaaha baag ĩĩn ꞌramma õdõõddĩ hĩ Yeesu hõdẽĩ, odoomito ĩnõõnnõ buúk.

Daahĩth cĩ Yeesu

³³ Ma baa aau kõrra lokora, ikia ĩĩ lõõcĩ muguur ĩꞌthõng hĩĩ ꞌthaa iyyio cĩ ꞌjiaatinu.

³⁴ Ma ꞌthaa iyyio, ikia urruuo Yeesu moloohaa cobbi gẽrrẽẽt ĩĩ, “Eloi, Eloi, Lama Thabachthani?” Nĩngĩtĩ aĩ, “Nyekuc caannĩ, Nyekuc caannĩ, ũũnnĩkaa nii nganĩĩt inni?”

³⁵ Nĩngĩtĩ athĩknĩ eeta ũgẽẽgĩ ꞌcĩg baag abĩlĩ nĩngaata nẽ ĩĩtõ, “Ĩthĩhĩt nõõ, aũ nẽẽ Eliijja.”

³⁶ Ma ho, ukul eet umwaa ũũk ittiha cẽrẽm ecebeek hẽẽta nẽ õꞌnyõlaneek viinoatõõ ꞌcĩ ammũccarĩĩ, nĩngĩtĩ ammaccẽẽkĩ ũtũgaa cĩ Yeesu nẽ ĩĩ, “Hereeyyio da hĩcĩnĩt hatĩ aku aara Eliijja ĩnõõnnõ hurucceea!”

³⁷ Ma nĩngaata, urruuo Yeesu gẽrrẽẽt, nĩngĩtĩ adaaknĩ.

³⁸ Ma ho, appahĩ cẽrẽm ꞌcĩ ẽꞌngẽr ꞌCieeth cĩ Nyekuci hĩĩ ꞌramma iꞌthianaanĩ lokora hõdõlan looc.

³⁹ Ma baa acĩn ꞌgaalacĩ cĩ ũũrũta ꞌcĩ baa abĩlĩ õbõhõõ hĩ hurucce nĩngaata ꞌgõõl ꞌcĩ adaaknĩ Yeesu ho, ikia õthõõth ĩĩ, “Ĩko baa ĩĩn ẽẽtĩ ciee Ngeertĩ Nyekuci dĩdĩ!”

⁴⁰ Nẽ baa aattĩg ngaaĩ ũgẽẽgĩ ꞌcĩg ẽbẽha Yeesu ꞌrẽẽna. Hõrggẽẽnaa cĩnĩĩng, baa aattĩg Maria Madalẽẽna hĩ Maria aattĩ ꞌJeemith baa hidici hĩ ꞌJothẽth hĩ Thaloome nĩngaata.

⁴¹ Baa anũ nẽẽg nẽ eelito Yeesu, baa nga aaĩ looccaa cĩ ꞌGalileea. Baa mẽẽlĩg ngaaĩ ũgẽẽgĩ buúk ꞌcĩg õõkõr hĩ Yeesu õõ ꞌJeruꞌthalẽma.

Adaĩ Yeesu

⁴² Ma baa õbõhĩ ĩĩ ꞌjiaatĩn lõõcĩ, iita ũkũmattoothĩk eeta, hĩnĩngĩtĩ baa õbõhĩ Kõrraa cĩ ꞌYiommaanõ.

⁴³ Nẽ baa aaĩ eet umwaa ꞌcĩ haĩ Yothebo cĩ ꞌtaaũn cĩ Arimathea, ꞌcĩ baa ĩĩn eet ꞌcĩ abuli lothippitaa cĩ eet ꞌcĩg obbitig cĩg lokihooak. Nẽ baa ĩĩn Yothebo buúk eet ꞌcĩ ereeyyi adiim acĩn habuccieet cĩ Nyekuci. Nĩngĩtĩ õkõõĩ cũrũmũũm hĩ Pĩlaatõ hũũk hijin ẽlẽ cĩ Yeesu.

⁴⁴ Nẽ Pĩlaatõ ꞌcĩ baa nga haga ngaatĩ adaahĩ Yeesu, ukuleek ꞌjieen nẽ ũtũvva ꞌgaalac cĩ ũũrũta hikia hijin hatĩ adaak Yeesu.

⁴⁵ Ma baa urutaa ꞌcĩ uduhaahĩ ꞌgaalacĩ cĩ ũũrũta ĩnõõnnõ daahĩth cĩ Yeesu ẽlẽk, ikia ẽlẽmaahĩ Pĩlaatõ Yothebo ẽlẽ cĩ Yeesu.

⁴⁶ Nĩngĩtĩ õkõ ũũtanĩ Yothebo cẽrẽm ꞌcĩ aku amũmmũũranĩ ẽlẽ cĩ Yeesu nẽ aara ĩnõõnnõ hurucceea nẽ ũmũmmũũraneek cẽrẽm, nĩngĩtĩ aarĩkĩ waanya ꞌcĩ baa adayyia biyyia. Ma ho, ũꞌnyũũg hattũũg cĩ waanyõ biyyiaa cobbi.

⁴⁷ Baa ẽbẽk Maria Madalẽẽna hĩ Maria aattĩ ꞌJothẽthĩ thooꞌthiok nicciag vẽlẽk muguruur nẽ uꞌthuutti nĩngĩtĩ adaiini Yeesu ho jurrung.