Maarko 14 - ꞌBuuk cĩ Thõõth cĩ Nyekuci

Adiim aruk eeta Yeesu

¹ Baa idiongattaa waathinniooha ꞌramma õõa cĩ Kõr cĩ Haangittõõ hĩ kõr cĩ Karrama cĩ Ũbũnẽẽt ꞌcĩg aitiõõ Abũũlana tõõ. Ma nĩngaata, iita atabit makayyiooha cĩg paadĩrꞌnyaannu hĩ ꞌlimmanniook cĩg nyattal cĩ Mũũꞌtha ꞌgõõl ꞌcĩ aggamĩ Yeesu nẽ uruhit ĩnõõnnõ.

² Nĩngĩtĩ õthõõthĩ nẽẽg aĩnnĩ, “Occa hõllõngaa haggam naag Yeesu Karramaawatõõ, hĩnĩngĩtĩ horoong hatĩ hĩkõõtha jore hĩ eeta.”

Uudi Yeesu õlõõ ꞌcĩ haĩ Bẽthani

³ Ma baa nga aaĩ Yeesu Bẽthani õlõõ cĩ eet ꞌcĩ haĩ ꞌThimõõnẽ ꞌcĩ baa adak helleggeri, ikia uppwaannak ngaa umwaa ĩhõõggõ nyapperita baa nga aduhi nẽẽgĩ. Baa aꞌnyaha ngaa tĩho ꞌgiimwa ꞌcĩ aaĩ hĩ deeri ꞌcĩ hidicẽẽnĩ ꞌcĩ aarĩkĩ ngõõrrõ ꞌcĩ aꞌnyak muyuuk ꞌcĩ õꞌngõlĩ ẽmmẽdĩ, ꞌcĩ uuttiaa ꞌrabbẽẽtĩĩ ꞌcĩg mẽẽlĩg gẽrrẽẽt. Ma ho, ubbuuk ngaa tĩho deeri nẽ udduutik ngõõrrõ nicci õõaa cĩ Yeesu.

⁴ Ma baa acĩn eeta ũgẽẽgĩ ꞌcĩg baag aattĩg nĩngaata ĩnõõnnõ ho, iita ĩlĩĩllẽẽcõ nẽ ĩĩtõ, “Õõyõk occa gõõng ngaa ciee ngõõrrõ inni?

⁵ ꞌYioko aa hũtũũĩ ngõõrra ciee thõng, occa ꞌyioko aa aꞌnyaha ꞌdinaarꞌnya ꞌmiiaꞌnya iyyio ꞌcĩg occa aggam ẽẽtĩ ꞌcĩ adticanni irkita hõdẽĩ nẽ haanytĩk ꞌrabbẽẽt nicciag hullaha.” Ma nĩngaata, iita eggerenyteek eeta tĩko ngaa nicci gẽrrẽẽt.

⁶ Ma ho, uduhaak Yeesu ĩhõõggõ ĩĩnnĩk, “Ũtũngteek ngaa nicci ẽmmẽn. Inni occa accananit ĩnõõnnõ ho? Adĩmaneeka nẽẽ nganĩĩt ꞌgii ꞌcĩ abũnnaa.

⁷ Gõõng arũmeennu niig hĩ pĩĩrnattiaak hõdõõkõthĩ nẽ gõõng hõllõngaa eellu ĩhõõggõ hatĩ atabbu inni? Nẽẽthĩ, iitiõõ hatĩgõõng naa hõllõngaa harũmĩ hĩ ngagiit hõdõõkõthĩ.

⁸ Ĩdĩman nga ciee dtiic ꞌcĩ aga nẽẽ ngaatĩ adticanĩ. Uud nẽẽ ẽlẽ caannĩ hũkũmaneek õõaa ꞌcĩ nga hadaõõĩ.

⁹ Haduhaakuung naa dĩdĩ, loonyini vẽlẽk ĩcĩg hatĩ irrioonini nyeemuut ꞌcĩ abũnnaa, irrioonni hatĩ thõõth ꞌcĩ adtican nẽẽ ho buúk, hátĩ hummuktaaĩ eeta ĩnõõnnõ.”

ꞌJuuda hĩ makayyiook cĩg paadĩrꞌnyaannu

¹⁰ Baa ĩꞌngathĩ ꞌJuuda Ithkarioote, baa ĩĩn ꞌthooyyiahit cĩ Yeesu ꞌgoonoginnii baag ĩĩn õmmõtõ hĩ ꞌramma nẽ ũmmũdoothĩk makayyiook cĩg paadĩrꞌnyaannu, hũũk hõhõppõõcaneek Yeesu hĩ ĩhõõggõ haggamit.

¹¹ Ma baa athĩhĩ nẽẽg thõõth ꞌcĩ aduhaak ꞌJuuda ĩhõõggõ ho, iita accamattoothĩk gẽrrẽẽt nẽ elemit ngaatĩ adũmanĩ ĩnõõnnõ ꞌrabbẽẽtĩ. Nĩngĩtĩ iꞌthianaanĩ ꞌJuuda atarraabanĩ ꞌgõõl ꞌcĩ õhõppõõcanĩ Yeesu haggamĩ.

Aggatan Yeesu ũbũnĩ hĩ viino

¹² Ma baa iꞌthianaanĩ kõrra ꞌcĩ oou cĩ Karrama cĩ Ũbũnẽẽt ꞌcĩg aitiõõ Abũũlana tõõ ho, iita ibboorito eeta ꞌgaarriẽẽn cĩg mĩꞌnyõ cĩg Kõr cĩ Haangittõõ. Ma ho, ijinit nuyyiooha Yeesu ĩĩttĩk, “Adiimmeet nii ngagĩĩt hoottia hũkũmatteeha nĩngĩtĩ adahĩ Karrama cĩ Haangittõõ ho ngaana?”

¹³ Ma nĩngaata, ĩꞌthõ Yeesu nuyyiook ꞌramma nẽ ĩĩnnĩk, “Õõt ꞌtaaũna nẽ õõt ommottioou hĩ eet ꞌcĩ aꞌnyak deeri cĩ maamu, ũnnẽẽc ĩnõõnnõ.

¹⁴ Ma uduhun eet tĩho ꞌcieeth, õõt ijinit baattĩ ꞌcieeth tĩho ĩĩttĩk, ‘Aĩ ꞌlimmannioohiti, ꞌcieeth ꞌcĩ hatĩ hau hadaka naag hĩ nuyyiook cĩgannĩg Kõr cĩ Haangittõõ inoo?’

¹⁵ Õkõ hatĩ eterꞌtheekuung nẽẽ ngagiit ꞌcieeth cobbi ꞌcĩ aaĩ lokora ꞌcĩ ũkũmanoothĩk ẽlẽk. Õõt ũkũmatteek ꞌgẽẽn vẽlẽk ꞌcĩ hau hadak nĩngaata.”

¹⁶ Ma ho, ĩtĩngaacõ nuyyiooha õõt ĩĩcĩ ꞌtaaũnõõ nẽ õõt ummuddioothĩk hẽlẽggĩ vẽlẽk aauto hĩ aa aduha Yeesu, nĩngĩtĩ õõ akũmanẽẽkĩ nẽẽg karrama cĩ Kõr cĩ Haangittõõ ho nĩngaata.

¹⁷ Ma baa ĩĩ ꞌjiaatĩn lõõcĩ, iita õdõlanit Yeesu hĩ ꞌthooyyiak cĩgĩnnĩg ĩĩn õmmõtõ hĩ ꞌramma ho.

¹⁸ Ma baa nga aduhi nẽẽgĩ, uduhaak Yeesu ĩhõõggõ ĩĩnnĩk, “Haduhaakuung naa dĩdĩ, aaĩ ẽẽtĩ umwaa hõrggẽẽnaa cunuung ꞌcĩ hatĩ õhõppõõcannaa nganĩĩta, eet ꞌcĩ haduheenna hĩ nganĩĩt hõdẽĩ.”

¹⁹ Baa aaꞌnyĩk thõõth ciee nuyyiook homoꞌthi hõdẽĩ hõdẽĩ nẽ ijinit Yeesu ĩĩttĩk, “Nganĩĩt occa ꞌthẽk?”

²⁰ Ma nĩngaata, ẽdẽc Yeesu ĩhõõggõ ĩĩnnĩk, “Aaĩ eet umwaa hõrggẽẽnaa cunuung ꞌcĩ haduheenna hĩ nganĩĩt hẽddẽẽma hõdẽẽthõng ꞌcĩ hatĩ õhõppõõcannaa nganĩĩta.

²¹ Adaahĩ hatĩ Ngeertĩ Eeto hĩ baa eheeddi ꞌBuuhaa cĩ Nyekuci. Nẽẽthĩ, appĩĩrna hatĩ ẽẽtĩ ꞌcĩ õhõppõõcan ĩnõõnnõ hũmmũda daahĩth ko gẽrrẽẽt! Occa baa mẽẽn ngaatĩ hõllõngaa arrittiaanĩ ẽẽtĩ tĩho!”

ꞌGẽẽn cĩ Makayyiookto cĩ ꞌjiaatinu

²² Ma baa nga aduhi Yeesu hĩ nuyyiook cĩgĩnnĩg, ittiha nẽẽ ũbũnĩ umwa nẽ aggatana nẽ appaha, nĩngĩtĩ ẽꞌngẽrẽẽkĩ nuyyiook cĩgĩnnĩg nẽ ĩĩnnĩk, “Erito, ẽlẽ caannĩ cieeni.”

²³ Ma urutaa ꞌcĩ aggatanĩ nẽẽ ũbũnĩ ẽlẽk, ikia ittiha nẽẽ hooppo nẽ aggatan tarĩ nẽ aaꞌnyĩk nuyyiook vẽlẽk hũhũdĩt.

²⁴ Ma nĩngaata, ĩĩnnĩk ĩhõõggõ, “Biyyi cĩg lõhõt caannĩ cieegi, ꞌcĩg hatĩ ẽrrẽnna, hĩnĩngĩtĩ eet vẽlẽk.

²⁵ Haduhaakuung naa ngagiit dĩdĩ, iitiõõ hatĩ naa hõllõngaa hahudi viino umwa tarĩ, ĩꞌthõng hikia hũhũd ꞌcĩ ĩĩn ngeju habuccieetaa cĩ Nyekuci.”

²⁶ Nĩngĩtĩ ẽbẽnĩ nẽẽg tegellwa nẽ ĩtĩngaacõ õõt ĩĩcĩ Muur cĩ Olivi.

Aduha Yeesu pẽkan cĩ Pẽẽtũrũ

²⁷ Ma ꞌgõõla, uduhaak Yeesu nuyyiook cĩgĩnnĩg ĩĩnnĩk, “Ĩꞌthaaninnu hatĩ niig vẽlẽk ũtũngteehaangu nganĩĩt ẽmmẽn, hĩnĩngĩtĩ õthõõth Nyekuci ꞌBuuhaa cĩnnĩ aĩ, “ ‘Huuki hatĩ naa tũhayyioohit, hĩꞌthaanĩ nyalõmaar cĩ aꞌthaannu.’

²⁸ Nẽẽthĩ, urutaa ꞌcĩ hũrũgaaĩ naa daahĩtha, huwwatteekuung hatĩ naa ngagiit hõkõ ĩĩcĩ ꞌGalileea hõõt hommottio hĩ ngagiit ĩĩca.”

²⁹ Ma nĩngaata, uduhaak Pẽẽtũrũ Yeesu ĩĩnnĩk, “Aitiõõ hatĩ naa hõllõngaa huunnikii nganiit, tananga hũtũngteehi ꞌthooyyiaha vẽlẽk.”

³⁰ Nĩngĩtĩ annẽẽkĩ Yeesu ĩnõõnnõ, “Haduhaakii naa nganiit dĩdĩ, baalin nicci, õõa ꞌcĩ nga hõrõhĩ tũhũlũc tabattĩ ꞌramma, ẽppẽhannaa hatĩ nii nganĩĩt tabattĩ iyyio, aini hõllõngaa agayyaanĩ.”

³¹ Baa aalla Pẽẽtũrũ ẽppẽhan thõõth bacabac aĩ, “Tananga hadaahit naag hĩ nganiita, hõllõngaa hatĩ huunnikii naa nganiit ũdũt!” Nẽ baa õthõõth ꞌthooyyiaha vẽlẽk thõõth nicci dioo noho.

Alaõ Yeesu manatõõ cĩ ꞌJethemani

³² Baa iita Yeesu hĩ nuyyiook cĩgĩnnĩg ĩꞌthõng nĩngĩtĩ haĩ ꞌJethemani. Ma nĩngaata, ikia uduhaak nẽẽ nuyyiook cĩgĩnnĩg ĩĩnnĩk, “Aaut nõõ ngaati, nga halayyi naana.”

³³ Baa õõkõr Yeesu hĩ Pẽẽtũrũ hĩ ꞌJeemith hĩ Yõaannẽ. Ma ho, ulubaak ĩnõõnnõ tẽẽlꞌthĩtĩ hĩ mothiinit ꞌcĩ maka gẽrrẽẽt.

³⁴ Nĩngĩtĩ aduhaakĩ nẽẽ nuyyiook annẽẽkĩ, “Homoꞌthi naa gẽrrẽẽt hĩcĩ haĩ hadaahi. Aaut da nõõ ngaati, ereeyyio dĩkĩĩm.”

³⁵ Ma baa ũũk nẽẽ ꞌrẽẽna hĩdĩhĩdĩĩc, ũũk akat huruꞌnyia nẽ ala Maaꞌnyĩ, hátĩ má aaĩ ꞌgõõl umwaa ꞌcĩ occa ammiiri ꞌcannan cĩ kõr tĩho, hiittiõõ hõllõngaa aku hĩ ĩnõõnnõ.

³⁶ Nĩngĩtĩ alaiini nẽẽ aĩnnĩ, “Baaba! Aitiõõ ꞌgii ꞌcĩ anyamannii nganiit tõõ. ꞌTiik hooppo cĩ ꞌcannan icci battaala ẽllaa caannĩ. Nẽẽthĩ, aꞌnyĩĩk hĩdĩmanĩ tabiiniti cunni hĩcĩ atabi niina, hõllõngaa hĩcĩ hatabi naana.”

³⁷ Ma ho, ikia õbõda Yeesu ũmmũdaak nuyyiook ꞌcĩg ĩĩn iyyio ho atagguutho, nĩngĩtĩ annẽẽkĩ nẽẽ Pẽẽtũrũ, “ꞌThimõõnẽ, atangu thõng? Hõllõngaa occa emmeethi nii ngaatĩ acĩnẽẽnĩ ꞌthaa hõdẽẽthõng haaga buúk?

³⁸ Aaut dĩkĩĩm nẽ alayyioou, hátĩ hiittiõõ hõllõngaa attĩmannuung ꞌThĩttaanĩ. Adiim lorii adtican ꞌgii ꞌcĩ abũnnaa nẽ aitiõõ hinnia ẽlẽ hõllõngaa attiranĩ.”

³⁹ Ma ho, õbõdõõthĩ Yeesu ũũk alaõ tarĩ, õkõ õbõdẽẽkĩ laiinit aanĩ diooni.

⁴⁰ Ma baa õbõda nẽẽ tarĩ, ũmmũdaak nuyyiook atagguutho gẽrrẽẽt nẽ iittiõõ hõllõngaa aga ngaatĩ ẽdẽcĩ ĩnõõnnõ buúk.

⁴¹ Ma ho, ikia õbõda Yeesu tabattĩ iyyio nẽ ĩĩnnĩk ĩhõõggõ, “Nga ooginnu noho nga ũũppattĩ? Ũttũbanoothĩk kõrra. Nẽ kõr nicci, õhõppõõcanni Ngeertĩ Eeto haaꞌnyĩhoothĩk athĩnĩĩ cĩg ꞌthẽccannioohu.

⁴² Ĩtĩngaac hõõtõ! Aau hoppocciaahiti caannĩ ojoonu.”

Aggamĩ Yeesu

⁴³ Ma baa nga õthõõth Yeesu hoti, uppwaanna hinnia ꞌJuuda ꞌthooyyiahiti cĩnnĩ, õõkõra hĩ eet ꞌcĩg aꞌnyak nyetubooꞌnya hĩ hĩbahĩꞌnya. Baa eet ꞌcĩg ĩꞌthõõa makayyiooha cĩg paadĩrꞌnyaannu hĩ ꞌlimmanniook cĩg nyattal cĩ Mũũꞌtha, hĩ makayyiook cĩg eetuk cieegi.

⁴⁴ Ĩko baa ũkũmatteek ꞌJuuda hĩ eet nicciag terethiinit ꞌcĩ hatĩ agaĩ nẽẽg Yeesu. Baa aduhaak nẽẽ ĩhõõggõ anneek, “Ẽẽtĩ ꞌcĩ hõkõ hĩꞌtha naana, eet ꞌcĩ adiimmu niig ko niccia. Aggamit ĩnõõnnõ uꞌthuutti jurrung nẽ oottu.”

⁴⁵ Ma hĩdĩĩkoothong, uppwaanna ꞌJuuda Ithkarioote nẽ edeceek cũrũmũũm hũũk hĩĩnnĩk Yeesu, “ꞌLimmannioohit!” Nĩngĩtĩ ĩꞌthaaĩ ĩnõõnnõ.

⁴⁶ Ma ho, iita uluptaak eeta Yeesu nẽ aggamit ĩnõõnnõ.

⁴⁷ Baa ammũdeek aaĩ eet umwaa nĩngaata ꞌcĩ õbõhõõ hĩ Yeesu, nĩngĩtĩ avvũũcanĩ nyetuboot nẽ ẽttẽẽda ĩtat cĩ dticciannioohit cĩ paadĩr cobbi noho ꞌthalac.

⁴⁸ Ma ho, ijin Yeesu ĩhõõggõ ĩĩnnĩk, “Inni iita hĩ nganĩĩt nyetubooꞌnyanĩ hĩ hĩbahĩꞌnyannĩ haau hĩcĩ hĩĩnĩ naa ꞌloorriahit ko?

⁴⁹ Ma gõõng harũmĩ naag hĩ ngagiit hõdõõkõthĩ, hatĩ hallimani eet ꞌCieethaa cĩ Nyekuci waathinniook vẽlẽk nẽ gõõng hõllõngaa aggammaangu inni? Nẽẽthĩ ꞌyioko, ikia ũttũbanoothĩk thõõth baa eheeddi ꞌBuuhaa cĩ Nyekuci ĩĩ dĩdĩ.”

⁵⁰ Nĩngĩtĩ akuli nuyyiooha vẽlẽk hũtũngteek Yeesu dioo nĩngaata.

⁵¹ Nẽ baa aaĩ nyahaappanĩ umwaa nĩngaata buúk ꞌcĩ baa anũ Yeesu ꞌcĩ abungẽẽnĩ ngĩtõõga. Ma baa aĩ haggamta eet ĩnõõnnõ ho,

⁵² alub hinnia nyahaappanĩ nicciee hũtũngẽẽhĩ ĩhõõggõ cẽrẽm nẽ ukul ngũtũtũũny.

Ootti eeta Yeesu lokihooa

⁵³ Iita ootti eeta Yeesu aꞌnyaktoothĩk paadĩr cobbi õlõõ cĩnnĩ ngaatĩ baa alũtõõthĩkĩ makayyiooha cĩg paadĩrꞌnyaannu vẽlẽk hĩ makayyiook cĩg eetuk hĩ ꞌlimmanniook cĩg nyattal cĩ Mũũꞌtha.

⁵⁴ Baa anuoothi Pẽẽtũrũ ĩnõõnnõ ꞌrẽẽna hĩdĩĩc hĩdĩĩc, ĩꞌthõng hõdõlaneek halangatõõ cĩ paadĩr cobbi nẽ ũũk aau loota ũrũmtĩ hĩ athegereeꞌnya ꞌcĩg baag ĩrraan ꞌgwoo nĩngaata.

⁵⁵ Baa adiim makayyiooha cĩg paadĩrꞌnyaannu hĩ eet ꞌcĩg obbitig cĩg lokihooak vẽlẽk, ammũda thõõth ꞌcĩ abathĩ ꞌcĩ ẽttẽẽdĩkĩ Yeesu daahĩth. Nẽẽthĩ, baa hinnia hõllõngaa ammũda nẽẽg thõõth umwa ꞌcĩ ẽꞌthẽcan Yeesu ũdũt.

⁵⁶ Baa mẽẽlĩg eeta ꞌcĩg aduha thooꞌthiok ꞌcĩg ĩĩn õlõng ꞌcĩg au abĩllĩ ĩnõõnnõ nẽ baa hõllõngaa õõkõrõõ thooꞌthioha nicciag vẽlẽk.

⁵⁷ Ma ho, ĩtĩngaacõ eeta ũgẽẽgĩ ibilli Yeesu nẽ udukta õlõng ꞌcĩ aĩ,

⁵⁸ “Baa hathĩkna naag Yeesu aĩ, ‘Hĩꞌthaani hatĩ ꞌCieeth cĩ Nyekuci ꞌcĩ ẽhẽnyta eeta ho nẽ hẽtẽhẽnyaa umwa waathinnioohĩ ꞌcĩg ĩĩn iyyio, ꞌcĩ occa hõllõngaa ẽhẽnyta eeta.’ ”

⁵⁹ Nẽ thõõthaa cĩ buúk, aitiõõ hõllõngaa õõkõrõõ thooꞌthioha cĩggĩĩng ũdũt.

⁶⁰ Ma ho, ĩtĩnga paadĩrĩ cobbi hẽbẽrẽẽnnĩĩ cĩg lothippitaak vẽlẽk nẽ ijin Yeesu ĩĩnnĩk, “Aitiõõ nii hõllõngaa edeci thõõth icci? Thõõth iina ꞌcĩ abilli nganiit eeta cieeg ko?”

⁶¹ Baa hõllõngaa ẽdẽcĩ Yeesu thõõth icci ũdũt. Õbõdẽẽkĩ paadĩrĩ cobbi ajin ĩnõõnnõ tarĩ anneek, “Ĩĩnĩ nii Krĩstõ Ngeertĩ Eet ꞌcĩ Abuli?”

⁶² Ẽdẽcĩ Yeesu anneek, “Eei, acinnu hatĩ niig Ngeertĩ Eeto ngaatĩ iccioloonganĩ attiaa cobbi ĩĩcĩ Nyekuc Gayyioohit vẽlẽk nẽ ulluuccia diiꞌthiohĩ hẽẽtahujjieen.”

⁶³ Ma ho, ẽrrẽẽc paadĩrĩ cobbi ceremwa cĩgĩnnĩg nẽ õthõõth ĩĩ, “Inni hidiimit eet ũgĩ ꞌcĩg occa nga aduhaakeet thõõth umwa tarĩ ho?

⁶⁴ Ithiktu aattĩ niig buúk ngaatĩ õdõõmĩ nẽẽ Nyekuc. Ainnu ꞌyioko niig ne?” Ma ho, etteeddik eeta cĩg lokihooak Yeesu thõõth ꞌcĩ aĩ, ĩĩn nẽẽ ꞌthẽccannioohit, aꞌnyĩĩk huruhi hadaak.

⁶⁵ Ma nĩngaata, iꞌthiattaaĩ ũgẽẽgĩ uttuurrik Yeesu ammũta nẽ ecebit hẽbẽrĩ cĩgĩnnĩg cẽrẽma nẽ ĩddaacõ athĩnĩĩ nẽ ĩĩttĩk, “Duha da, hĩ nganĩ ꞌcĩg ĩddaayyi nganiit ko!” Nẽ athegereeꞌnya ꞌcĩg baag aattĩg nĩngaata vẽlẽk, iita ootti Yeesu nẽ uukito.

Ẽppẽhan Pẽẽtũrũ Yeesu

⁶⁶ Ma baa nga aaĩ Pẽẽtũrũ loota halangatõõ cĩ paadĩr cobbi, ikia ũmmũdaak bũhẽẽcĩ umwaa ꞌcĩ ĩĩn dticciannioohit cĩ paadĩr cobbi ĩnõõnnõ ĩrraan ꞌgwoo nĩngaata.

⁶⁷ Ma baa acĩn nẽẽ Pẽẽtũrũ ho, ikia akatĩ ĩnõõnnõ hẽbẽrĩ nẽ ĩĩnnĩk, “Baa ookorru nii buúk hĩ Yeesu cĩ Naaꞌtharẽtĩ.”

⁶⁸ Baa hinnia ẽppẽhan Pẽẽtũrũ aĩ, “Ẽrẽka thõõth ꞌcĩ aduha nii ho.” Nĩngĩtĩ ĩꞌngaannĩ nẽẽ õkõõĩ battaala.

⁶⁹ Ma baa adtuuha bũhẽẽcĩ ꞌcĩ ĩĩn dticciannioohit Pẽẽtũrũ tarĩ ho, ikia uduhaak eet ꞌcĩg baag abĩlĩ nĩngaata ĩĩnnĩk, “Umwa ꞌthẽk ẽẽtĩ cieeni!”

⁷⁰ Nĩngĩtĩ ẽppẽhanĩ Pẽẽtũrũ tarĩ. Ma hĩdĩhĩdĩĩc, iita uduktaak eeta ꞌcĩg baag abĩlĩ nĩngaata dẽẽdẽ ĩĩttĩk, “Eet ꞌthẽk umwa nii dĩdĩ, hĩnĩngĩtĩ ĩĩnĩ nii buúk ꞌGalileeinit.”

⁷¹ Ma nĩngaata, ũbũtan Pẽẽtũrũ tarĩ ĩĩ, “Ẽrẽka nganĩĩt eet ꞌcĩ othooꞌthu niig ko!”

⁷² Nĩngĩtĩ õrõhĩ tũhũlũc tabattĩ ꞌramma. Ma nĩngaata, ummuhunõõthĩ Pẽẽtũrũ thõõth baa aduhaak Yeesu ĩnõõnnõ anneek, “Õõa ꞌcĩ nga hõrõhĩ tũhũlũc tabattĩ ꞌramma, ẽppẽhannaa hatĩ nii nganĩĩt tabattĩ iyyio.” Nĩngĩtĩ adtahĩ nẽẽ ulwa nĩngaata.