Maarko 13 - ꞌBuuk cĩ Thõõth cĩ Nyekuci

ꞌRibban cĩ ꞌCieeth cĩ Nyekuci

¹ Ma baa uduhuna Yeesu ꞌCieethaa cĩ Nyekuci battaala, ikia uduhaak nuyyioohiti umwaa cĩnnĩ ĩnõõnnõ ĩĩnnĩk, “ꞌLimmannioohit, cĩĩn nõõ biyyiẽẽn ꞌcĩg obbitig hĩ ꞌcieethi ꞌcĩg ẽllẽẽmĩth gẽrrẽẽt ko!”

² Ẽdẽcĩ Yeesu ĩnõõnnõ anneek, “Acini nii ꞌcieethi ꞌcĩg obbitig gẽrrẽẽt ko? Arribanni hatĩ hĩĩ ꞌthĩĩ hiittiõõ bẽẽ ꞌcĩ ataadothoothĩk ꞌgoonnia tõõ.”

Tilooinit cĩ thooꞌthiok ꞌcĩg abathĩ

³ Ma baa uruta, ũũk iccioloongan Yeesu Muura hujjieen ĩcĩ Olivi ngaatĩ abakꞌthõõ hĩ ꞌCieeth cĩ Nyekuci. Ma nĩngaata, iita ijinit Pẽẽtũrũ hĩ ꞌJeemith hĩ Yõaannẽ hĩ Andrea ĩnõõnnõ ĩĩcĩ burki ĩĩttĩk,

⁴ “Duhaaheet da ngagĩĩt au hatĩ edeeꞌnyia thooꞌthioha cieeg hatĩngaan? Nẽ terethiinit iina ꞌcĩ hatĩ ẽtẽrꞌtha ngaatĩ obohiini thooꞌthioha cieeg ko?”

⁵ Baa ẽdẽcĩ Yeesu ĩhõõggõ anneek, “Aaut dĩkĩĩm, ma haaꞌnyiku eet umwa higgooluung ngagiita.

⁶ Au hatĩ eeta ꞌcĩg mẽẽlĩg iggoolluung aĩ hĩĩgĩnna Krĩstõ. Au hatĩ õthõõthĩ nẽẽg ꞌthaar cĩgannĩg haanytĩk eet ꞌcĩg mẽẽlĩg harahanit.

⁷ Ma ĩthĩktu jõrẽẽn, hode ahĩkĩĩmanni thooꞌthioha cĩg joreenu, ma habarrittu, hĩnĩngĩtĩ au ꞌthẽk hatĩ hẽlẽggĩ cieeg edeeꞌnyia ĩĩcĩ oou. Nẽẽthĩ, nga hatĩ hĩĩ ciee decciaanĩt cĩ lootu.

⁸ Aruhõõ hatĩ loonyini hĩ loonyin nẽ urukto habuccieeꞌnya hĩ habuccieeꞌnya. Nẽ tarĩ aattĩg hatĩ hirihidtikꞌnya loonyinii ꞌcĩg mẽẽlĩg nẽ aaĩ hatĩ nyarõnĩ buúk. Aattĩg hatĩ hẽlẽggĩ cieeg hĩ huciithi cĩ ngaa ꞌcĩ attur ꞌgoonnia.

⁹ “Ma iꞌthiattaaĩ ẽdẽẽnyta thooꞌthioha cieegi, uꞌthuutti eleeti cugguung, hĩnĩngĩtĩ aggamiinnu hatĩ niig nẽ oottu lokihooa, nẽ ommokteeu ꞌCieethinii cĩg Laiittak. Aꞌngĩdeennu hatĩ õõt ĩbĩlĩt muumtinii cĩg makayyioohu hĩ ĩĩcĩg habueetu, hátĩ udukta lemiinit ꞌcĩ ẽlẽmmaangu niig nganĩĩt ko.

¹⁰ Nẽẽthĩ, ma nga hẽdẽẽnyta thooꞌthioha cieegi, illimatteek nõõ nyeemuut ꞌcĩ abũnnaa loonyin vẽlẽk.

¹¹ Ma aggamtuung eeta nẽ oottuung lokihooa, ma hommothiinnu thõõth ꞌcĩ occa hatĩ õõ aduhaannu hatĩ õdõlan kõrra tĩho. Udukta nẽẽ niig thõõth ꞌcĩ occa aduhaannu kõr tĩho, hĩnĩngĩtĩ hõllõngaa hatĩ ngagiit ꞌcĩg aduhaannu thõõth tĩho ho, Lori ꞌcĩ Ẽllẽẽmĩth ꞌcĩ hatĩ othooꞌthuung ngagiit ko.

¹² “Nẽ kõr tĩho, õhõppõõcan hatĩ ꞌgotonnia ꞌgõtõnĩ huruhi nẽ õhõppõõcanit maajihi loholeenu lõhõlĩ cĩggĩĩng buúk hurukti. Nẽ tarĩ õhõppõõcan hatĩ lohollia buúk maajihi hurukti.

¹³ Aharreekuung hatĩ ngagiit eeta vẽlẽk, hĩnĩngĩtĩ nganĩĩt Yeesu. Nẽẽthĩ, eet umwaa ꞌcĩ ẽmmẽẽthĩ ꞌcannan ĩꞌthõng decciaanĩt cĩ lootu, eelliaa hatĩ nẽẽnĩ.

ꞌGii ꞌcĩ abathĩ ꞌcĩ aꞌnyaha ꞌribban

¹⁴ “Kõr umwa, acinnu hatĩ niig ‘ꞌgii ꞌcĩ abathĩ gẽrrẽẽt ꞌcĩ aꞌnyaha ꞌribban,’ abĩlĩ ngaatĩ hõllõngaa occa abĩllĩ. Niig eeta vẽlẽk ꞌcĩg agiilennu agaac jurrung, aĩ ꞌthẽk thõõth ciee dẽẽdẽ ne! Nẽẽthĩ, eeta ꞌcĩg aattĩg ꞌJudeea, aꞌnyĩĩk hivvirit hõõt muurriõhĩ.

¹⁵ Aꞌnyĩĩk eet ꞌcĩ aaĩ ꞌJeruꞌthalẽma ꞌcieethaa cĩnnĩ lokora, hiittiõõ hõllõngaa alluuccia loota hũũk hittiha ꞌgiimwa ꞌcieetõõ hõthõhõt hũũhĩ.

¹⁶ Aꞌnyĩĩk eet ꞌcĩ ayyiaa manatõõ hiittiõõ hõllõngaa obodoothi hũũk hittiha cẽrẽm cĩnnĩ õlõ.

¹⁷ Abathĩ hatĩ waathinniooha tĩko gẽrrẽẽt hĩ ngaaĩ ꞌcĩg aꞌnyaki, hĩ cĩg õrõõktĩ lohollia!

¹⁸ Nẽẽthĩ, alaac Nyekuc gẽrrẽẽt, hátĩ hiittiõõ hẽlẽggĩ cieeg hõllõngaa au edeeꞌnyia ũrraata,

¹⁹ hĩnĩngĩtĩ maka hatĩ ꞌcannani waathinniook nicciag gẽrrẽẽt, ĩllõõan ꞌcĩ baa edeeꞌnyia nganĩngĩtĩ ẽhẽnytaanĩ Nyekuci looc, ĩꞌthõng hĩĩ kõr hĩ niccieeni. Nẽ aitiõõ hatĩ thõõth umwaa tarĩ ꞌcĩ aaĩ hoti tõõ.

²⁰ Má hiittiõõ ngaatĩ õhõdĩ Makayyioohiti waathinniook nicciag hĩĩtõ huturik tõõ, occa hatĩ aitiõõ ẽẽtĩ ꞌcĩ arũgĩ tõõ. Nẽ hĩnĩngĩtĩ eet cĩgĩnnĩg baag eberriaa, irritan nẽẽ waathinniook nicciag.

²¹ “Nẽ ma anneekuung ẽẽtĩ umwa ngagiit, ‘Krĩstõ cieeni,’ hode aĩ, ‘Ĩnõõnnõ caannĩ!’ Ma hathiknu nẽ elemtu thõõth cĩ eet tĩho.

²² Hĩnĩngĩtĩ au hatĩ uppwaanna krĩstõꞌnya hĩ põrõvẽtaaꞌnya ꞌcĩg ĩĩn oloꞌngiaak ꞌcĩg au adtican hẽlẽggĩ ꞌcĩg ĩnaat eeta, aĩ hatĩ higgoollia eet baag ẽbẽra Nyekuci, hatĩ ũũlũ ngaatĩ ĩggõõlĩ ĩhõõggõ.

²³ Aaut dĩkĩĩm huduhaahuung naa ngagiit thõõth vẽlẽk, õõa ꞌcĩ nga hikiaaĩ kõrra tĩho.”

Kõr ꞌcĩ hatĩ akuuni Ngeertĩ Eeto

²⁴ Baa aduhaak Yeesu nuyyiook cĩgĩnnĩg anneek, “Waathinniook nicciag urutaa cĩ ꞌcannaanõ, “ ‘Adaahĩ hatĩ kõrra hĩ nyĩlõk,

²⁵ nẽ adhukiaa hatĩ mũnyũnya nẽ õtõmõõcõ hẽlẽggĩ vẽlẽk ꞌcĩg aattĩg hẽẽtahujjieen.’

²⁶ “Ma kõr tĩho, edeenyothi hatĩ eeta Ngeertĩ Eeto ngaatĩ alluuccianĩ diiꞌthiohĩtõõ makaaꞌthĩtaa cobbi hĩ bulẽẽtta.

²⁷ Nẽ ĩꞌthõ hatĩ Ngeertĩ Eeto aajĩlẽẽt cĩgĩnnĩg hõõt huluttia eet baag ẽbẽra Nyekuci loota nĩnga hĩ hẽẽtahujjieen vẽlẽk.”

ꞌLimman cĩ ꞌmũũnĩcõ

²⁸ Ma ho, uduhaak Yeesu nuyyiook cĩgĩnnĩg ĩĩnnĩk, “Aꞌnyĩĩk da thõõth cĩ ꞌmũũnĩcõ hillimanuung ngagiit nẽ ummuktu thõõth cĩnnĩ. Ma utururri bõllõõha nẽ allaꞌthia ꞌcĩg ĩĩn ngeju, agayyu niig aĩ õbõhĩ lõõlõ.

²⁹ Ma icittu niig thooꞌthiok iccig ẽdẽẽnyta, agaac ĩĩtõ, õbõhĩ kõrra tĩho aau ojoonu.

³⁰ Haduhaakuung naa ngagiit dĩdĩ, ummuhuttooth ĩĩtõ, õõa ꞌcĩ nga hadaaktĩ eeta vẽlẽk cĩg irkiꞌnyia iccig, edeeꞌnyia hatĩ thooꞌthioha cieeg vẽlẽk.

³¹ Ammanyanni hatĩ hẽẽtkujjieen hĩ looc nẽ aalla hatĩ thõõth caannĩ ho ooo.

Hõllõngaa agayyi kõrra ꞌcĩ akuuni Makayyioohiti

³² “Nẽẽthĩ kõr niccia, aitiõõ hatĩ ẽẽtĩ ꞌcĩ aga waathĩn ꞌcĩ hatĩ edeeꞌnyianĩ thooꞌthioha cieeg tõõ, tananga aajĩlẽẽta cĩg hẽẽtkujjieen hode Ngeertĩ Eeto buúk hõllõngaa aga, Baaba ꞌcĩ aaĩ hẽẽtahujjieen dioo ꞌcĩ aga.”

³³ Aaut dĩkĩĩm, hĩnĩngĩtĩ hõllõngaa agayyu niig aku kõrra tĩho hatĩngaan.

³⁴ Aaĩ hatĩ kõrra niccia hĩ ẽẽtĩ ꞌcĩ õkõ hẽẽrõna, ꞌcĩ ũũnnĩk dticcianniook cĩgĩnnĩg hebehit õlõ nẽ eꞌngereek ĩhõõggõ vẽlẽk dtiicanĩ hõdẽĩ hõdẽĩ nẽ uduhaak eet ꞌcĩ ẽbẽk hattũũg haau dĩkĩĩm.

³⁵ “Nẽẽthĩ, aaut niig buúk dĩkĩĩm! Hĩnĩngĩtĩ hõllõngaa agayyu niig kõr ꞌcĩ hatĩ akuuni baattĩ olu. Horoong aku hatĩ nẽẽ ꞌjiaat, hode baal hõrggẽẽna, hode aku nga haal lõõcĩ, hode õlõõha ngerrenita ꞌthaa ꞌcĩ õrõhĩ tũhũlũꞌnya, hode hatĩ uppwaanna kõrra.

³⁶ Má uppwaanna nẽẽ nyahamalliak nga agaac niiga, abũnnaa ammũdaakuung ngagiit acĩnẽẽnnu.

³⁷ Nẽ thõõth ꞌcĩ haduhaakuung naa ngagiit ko, ĩĩn thõõth ꞌcĩ haduhaahi naa eet vẽlẽk. Ũkũmattoothĩk aaut dĩkĩĩm!”