Maarko 12 - ꞌBuuk cĩ Thõõth cĩ Nyekuci

Dticcianniook cĩg manu

¹ Baa iꞌthianaanĩ Yeesu aduhaak makayyiook cĩg ꞌJudeei thõõth ꞌcĩ awantoothĩk anneek, “Baa aaĩ ẽẽtĩ umwaa ꞌcĩ atiboolan hẽẽn cĩg viinoaak, nẽ ũlũk araan hirriaman nẽ ada ꞌlook ꞌcĩ ammaccĩ viino nẽ ẽttẽẽd lobelĩ ꞌcĩ behiitto. Nĩngĩtĩ ũũnnĩkĩ mana cĩnnĩ ho kattiook nẽ ũũk hẽẽrõna.

² Ma baa õdõlanit waathinniooha cĩg janiittak, ikia ĩꞌthooĩk nẽẽ dticciannioohit hũũk hĩ bekiook, hátĩ haanytĩk baattĩ manu viino cĩnnĩ.

³ Baa õõ hinnia aggam bekiooha tĩko dticciannioohit thõng nẽ uukito gẽrrẽẽt nẽ alahatteek hõbõdõõthĩ athĩnĩ ꞌtẽl.

⁴ Ma ho, ĩꞌthõ baattĩ manu dticciannioohit umwa tarĩ, aalla hinnia õõ uuk niccia buúk nẽ ohoddia õõ lokor, õdõõm ĩnõõnnõ nẽ ĩdĩmanit ꞌbuth ngaaoniitta.

⁵ Baa aalla ĩꞌthõ baattĩ manu dticciannioohit umwa tarĩ noho, õõ hinnia aruk ĩnõõnnõ hadaak. Nẽ aalla aku ĩꞌthõ baattĩ manu dticcianniook ũgĩ ꞌgõõlaa nĩĩcĩ dioo noho, õõ hinnia uuk ũgĩ nẽ uruhit ũgĩ thõng.

⁶ “Baa nga aꞌnyak baattĩ manu ngeerĩnĩ hõdẽẽthõng ꞌcĩ ammĩnan nẽẽ gẽrrẽẽt. Ma baa urutaa cĩ thooꞌthiok iccig vẽlẽk, ikia aattĩ ĩꞌthõ nẽẽ ngeerĩnĩ dẽẽdẽ. Baa ammuk hinnia nẽẽ aĩ, ‘Õõ hatĩ iꞌngolli nẽẽg loholeec caannĩ.’

⁷ “Au hinnia õthõõth bekiooha niccieeg aĩ, ‘Loholeec aattĩ cĩnnĩ dẽẽdẽ niccieeni, hiita huruhit ĩnõõnnõ, hátĩ hirigithit mana cĩnĩĩng ko hĩĩ cĩnaac.’

⁸ Ma nĩngaata, iita aggamit nẽẽg ngeertĩ baattĩ manu nẽ uruhit ĩnõõnnõ nẽ udhukteek ẽlẽ cĩnnĩ ho tẽrẽtẽraa cĩ mana cĩ viinoo.”

⁹ Ma nĩngaata, ikia ijin Yeesu makayyiook cĩg ꞌJudeei ho ĩĩnnĩk, “Adĩman occa hatĩ baattĩ manu bekiook cĩg manu ho hutuno? Aku hatĩ aruk nẽẽ bekiook niccig vẽlẽk nẽ aaꞌnyĩk mana nicci eet ꞌcĩg ꞌrĩĩng hebehit mana cĩnnĩ ho.

¹⁰ Ma ho, ĩĩnnĩk Yeesu ĩhõõggõ, nga nooyyia itigiilit niig thõõth baa eheeddi ꞌBuuhaa cĩ Nyekuci aĩ, “ ‘Bẽẽ baa abũrĩ teheꞌnyiooha, ikia ĩĩ bẽẽ ꞌcĩ ĩllõõan gẽrrẽẽt ꞌgoonoginni vẽlẽk?

¹¹ Baa Makayyioohit ꞌcĩ adĩman thõõth icci ho, nĩngĩtĩ athithanĩ eeta aĩnnĩ, ẽllẽẽm ngaatĩ hacĩnĩ bẽẽ icci.’ ”

¹² Ma nĩngaata, iita idiimito makayyiooha cĩg ꞌJudeei ꞌgõõl ꞌcĩ aggamĩ Yeesu, hĩnĩngĩtĩ baa aga nẽẽg ngaatĩ awantẽẽkĩ nẽẽ ĩhõõggõ thõõth. Nẽẽthĩ, baa hinnia iꞌngolli nẽẽg lothippit cĩ eetu, nĩngĩtĩ ũũnnĩkĩ ĩnõõnnõ nẽ ammanyattĩ õõta.

Jinẽẽnĩt cĩ dũman cĩ occoro

¹³ Ma baa uruta, iita ĩꞌthõõcõ makayyiooha Variꞌtheei ũgĩ hĩ eet ũgĩ ꞌcĩg ĩĩn lothippit cĩ habu Ẽrõõdẽ hõõt hotogollieek Yeesu, thooꞌthiohĩĩ ꞌcĩg õthõõth nẽẽnĩ.

¹⁴ Ma ho, ummuddieek nẽẽg Yeesu nẽ ijinit ĩĩttĩk, “ꞌLimmannioohit, hagayyĩa naag aduha nii thõõth ꞌcĩ ĩĩn dĩdĩ nẽ hõllõngaa itieelli thooꞌthiok ꞌcĩg ammuk eeta. Nẽ tarĩ hõllõngaa aallahi makaaꞌthĩt cĩ eetu, nẽẽthĩ, allimani eet thõõth cĩ Nyekuci ꞌcĩ ĩĩn dĩdĩ. Duhaaheet da, abathĩ occa nyattaalaa cĩnaang ngaatĩ hadũmaneeka habu cobbi cĩ ꞌRooma occoro, hode abũnnaa ngaatĩ hadũmaneeka?

¹⁵ Hũdũmatta occoro hode hiittiõõ hõllõngaa hadũmanna?” Nẽẽthĩ, baa aga Yeesu ngaatĩ aꞌnyahĩ nẽẽg muhẽẽnĩt ꞌcĩ abathĩ nẽ ẽdẽc ĩhõõggõ ĩĩnnĩk, “Inni idiimit niig otogollieehaangu nganĩĩt ko? Aꞌnyakta da ꞌdinaar hõdẽẽthõng hĩcĩn naana.”

¹⁶ Ma ho, aꞌnyaktaak nẽẽg Yeesu ꞌrabbaacit ꞌcĩ hũtũrĩ, nĩngĩtĩ ajini Yeesu ĩhõõggõ annẽẽkĩ, “ꞌCĩ nganĩ ꞌthooura ciee hĩ ꞌthaar iccig?” Ẽdẽcĩ nẽẽg aĩ, “ꞌThoura hĩ ꞌthaar cĩg habu cobbi cĩ ꞌRooma.”

¹⁷ Nĩngĩtĩ aduhaakĩ Yeesu ĩhõõggõ annẽẽkĩ, “Aanytĩk habu cobbi cĩ ꞌRooma ꞌgii cĩnnĩ nẽ aanytĩhu Nyekuc ꞌgii cĩ Nyekuci.” Ma nĩngaata, iita idhirriaangtĩ nẽẽg gẽrrẽẽt, hĩnĩngĩtĩ thõõth cĩ Yeesu ho.

Thõõth ꞌcĩ harũgnaanĩ daahĩtha

¹⁸ Baa õõ ajin Thadutheei ũgẽẽgĩ ꞌcĩg ẽppẽhan aĩ hõllõngaa arũgna eeta daahĩtha Yeesu anneek,

¹⁹ “ꞌLimmannioohit, baa eheedĩkeet ngagĩĩt Mũũꞌtha nyattal icci aĩ, má adaahĩ ẽẽtĩ ũũnnĩk ngaa hiꞌthihi lõhõlĩ, aku ꞌgotonnia nẽ õlõm ngaatĩbõyyĩ nicci, hátĩ hittiraak lõhõlĩ ꞌcĩg hatĩ ĩĩn cĩg ꞌgõtõnĩ ꞌcĩ adaak ko.

²⁰ Nẽ baa aattĩg eeta tũkĩramma ꞌcĩg ĩĩn ꞌgõtõn, ma ho, ikia ũꞌthũwanõõ ꞌgotonnia cobbiẽẽnĩ nẽ adaak hiꞌthihi lõhõlĩ.

²¹ Ma nĩngaata, ikia õlõm ꞌgotonnia ꞌcĩ anũẽẽkĩ ngaatĩbõyyĩ tĩho, aku hinnia adaahĩ nẽẽ buúk nga haꞌnyak lõhõlĩ. Aku anũẽẽkĩ ꞌgotonnia ꞌcĩ ĩĩn iyyio buúk ꞌgõõl nicci dioo noho.

²² Ma ho, adaahito ꞌgõtõnĩ ꞌcĩg ĩĩn tũkĩramma ho vẽlẽk hiꞌthihi lõhõlĩ. Ma dtuurnattaa cĩnnĩ, ikia adaak ngaa nicciee buúk.

²³ Nẽẽthĩ, ma occa hatĩ kõr ꞌcĩ arũgnaanĩ eeta vẽlẽk ꞌcĩg adaahito, ĩĩn occa hatĩ ngaa nicciee ꞌcĩ nganĩ? Hĩnĩngĩtĩ baa olomit ꞌgõtõnĩ ꞌcĩg ĩĩn tũkĩramma ho vẽlẽk ĩnõõnnõ.”

²⁴ Baa hinnia ẽdẽcĩ Yeesu Thadutheei tĩko anneek, “Ẽꞌthẽcannu niig, hĩnĩngĩtĩ hõllõngaa agayyu thõõth ꞌcĩ eheeddi ꞌBuuhaa cĩ Nyekuci nẽ tarĩ hõllõngaa agayyu ꞌtirrian cĩ Nyekuci.

²⁵ Ma ũrũgũtha Nyekuci eet ꞌcĩg adaahito, iittiõõ hatĩ nẽẽg hõllõngaa au aꞌthũwanni tarĩ, iita hatĩ aauto nẽẽg hĩ aajĩlẽẽta cĩg hẽẽtkujjieen.

²⁶ Agayyu niig thõõth ꞌcĩ arũgthaanĩ Nyekuci eet daahĩtha nẽ agayyu dtẽẽllẽn cĩg Mũũꞌtha hĩ thõõth baa atũũthẽnĩ tumuth nẽ ĩĩnnĩk Nyekuci ĩnõõnnõ, ‘Hĩĩnĩ naa Nyekuc cĩ Abũrahamĩ hĩ cĩ Iꞌthaako nẽ hĩĩna Nyekuc cĩ Yakobo.’

²⁷ Ĩĩn nẽẽ Nyekuc cĩ eet ꞌcĩg arũgĩ, hõllõngaa cĩ daakiahu. Nẽ aitiõõ niig hõllõngaa athiknu thõõth icci jurrung!”

Tilooinit ꞌcĩ tiiri gẽrrẽẽt

²⁸ Baa õthõõthõõ Yeesu hĩ Thadutheei, baa aaĩ ꞌlimmannioohiti cĩ nyattal cĩ Mũũꞌtha buúk nĩngaata. Baa acĩn nẽẽ ngaatĩ ẽdẽcĩ Yeesu thõõth cĩnĩĩng ko jurrung. Nĩngĩtĩ ẽẽjẽhõõthĩkĩ nẽẽ Yeesu nẽ ijin ĩĩnnĩk, “Tilooinit iina dẽẽdẽ ꞌcĩ tiiri ꞌgoonoginni vẽlẽk?”

²⁹ Baa ẽdẽcĩ Yeesu ĩnõõnnõ anneek, “Tilooinit ꞌcĩ tiiri ꞌgoonoginni vẽlẽk cieeni, ‘Ĩthĩktõ niig eeta cĩg Ĩꞌthĩraẽlĩ! Ĩĩn Makayyioohiti cĩnaac Nyekuc hõdẽẽthõng diooni.

³⁰ Mĩnnan Makayyioohit Nyekuc cunni ꞌthĩnĩtaa cunni vẽlẽk, hĩ loriiaa cunni vẽlẽk, hĩ muhẽẽttaa cunni hĩ ꞌtirriaanaa cunni vẽlẽk.’

³¹ Nẽ tilooinit ꞌcĩ ĩĩn ꞌramma cieeni, ‘Mĩnnan eet ꞌcĩ aaronnu haau hĩcĩ ammĩnani ẽlẽ cunni.’ Aitiõõ tilooiniti umwaa ꞌcĩ ĩllõõan tilooinit icci ĩĩn ꞌramma ho tõõ.”

³² Ma ho, uduhaak ꞌlimmannioohiti cĩ nyattaalõ Yeesu ĩĩnnĩk, “Ẽbẽaneehu ꞌlimmannioohit! Ĩĩn thõõth ꞌcĩ aduha nii ho, thõõth dĩdĩ ꞌcĩ aĩnnĩ, ĩĩn Makayyioohiti Nyekuci hõdẽẽthõng diooni nẽ aitiõõ umwaa tarĩ tõõ.

³³ Haga naa aaddi ngaatĩ hammĩnanĩĩ Nyekuc ꞌthĩnĩtaa caannĩ vẽlẽk hĩ muhẽẽttaa caannĩ vẽlẽk hĩ ꞌtirriaanaa caannĩ vẽlẽk, hĩ ngaatĩ hammĩnanĩĩ eet ꞌcĩ haaronna haau hĩcĩ hammĩnani ẽlẽ caannĩ. Ĩĩn cieeg thooꞌthiok ꞌcĩg õkõmĩ gẽrrẽẽt ĩllõõan ngaatĩ occa hĩbbõõrĩ ꞌgaarriẽẽn ꞌcĩg mẽẽlĩg ꞌcĩg adiim nyattalĩ.”

³⁴ Ma baa athĩhĩ Yeesu ĩnõõnnõ ngaatĩ õthõõthĩ ꞌgẽẽnyĩtha ho, ĩĩnnĩk ĩnõõnnõ, “Obohoonnu niig hĩ habuccieet cĩ Nyekuci. Ma baa urutaa cĩ, iittiõõ eet umwaa ꞌcĩ nga ajin Yeesu thõõth umwa tarĩ tõõ.”

Ĩĩn Krĩstõ Ngeertĩ nganĩ?

³⁵ Ma baa nga alliman Yeesu eet halangatõõ cĩ ꞌCieeth cĩ Nyekuci, ikia ijino nẽẽ ĩĩ, “Inni gõõng hĩĩtõ ꞌlimmanniooha cĩg nyattal cĩ Mũũꞌtha, ‘Ĩĩn Krĩstõ Ngeertĩ Daavide ho?’

³⁶ Baa aduhaak Lorii ꞌcĩ Ẽllẽẽmĩth Daavide thõõth anneek, “ ‘Aduhaak Makayyioohiti Makayyioohit caannĩ anneek, “ꞌCioloongan ngaati attiaa caannĩ cobbi ĩꞌthõng huruk mĩrõk cugunnig.” ’

³⁷ Má nõõ aũ Daavide dẽẽdẽ ĩnõõnnõ anneek, ‘Makayyioohit,’ nẽ occa hatĩ ĩĩn Krĩstõ Ngeertĩ Daavide hutuno?” Nẽ tarĩ baa accamana eeta ꞌcĩg mẽẽlĩg ĩnõõnnõ nẽ ĩthĩhĩt thõõth cĩnnĩ ho taliitta.

Uuk Yeesu Variꞌtheei hĩ ꞌlimmanniook cĩg nyattaalak

³⁸ Baa alliman Yeesu eet anneek, “Ĩcĩnĩt ꞌlimmanniook cĩg nyattal cĩ Mũũꞌtha ho jurrung. Ẽmmẽddaanĩ nẽẽg ngaatĩ ahimti ceremwa cĩg uuttik nẽ idiimito hĩꞌthaacõ eeta ĩhõõggõ tẽẽlꞌthĩta ꞌcuuhatõõ.

³⁹ Nẽ tarĩ etemeddiaaĩ ngaatĩ adiim iccioloonganĩ dtaabĩtĩĩ ꞌcĩg oou ꞌCieethini cĩg Laiittak, hĩ ngaatĩ aattiyyi dtaabĩtĩĩ ꞌcĩg obbitig ngaatĩ karrameetu.

⁴⁰ Ĩĩn nẽẽg eet ꞌcĩg arratana ngaatĩbõyyĩꞌnya ijjio olooyyiohĩĩ cĩggĩĩng nẽ etereꞌthia eleeti cĩggĩĩng ngaatĩ aꞌnyahĩ laiinit ꞌcĩ uuni. Nẽẽthĩ, uuk hatĩ Nyekuci eet ꞌcĩg aattĩg noho gẽrrẽẽt!”

ꞌBaaninit cĩ ngaatĩbõyyĩ

⁴¹ Ma baa aau Yeesu loota ngaatĩ aarĩkĩ eeta ꞌbaaninit cĩnĩĩng, ikia ẽbẽk nẽẽ eet ngaatĩ adhuhẽẽkĩ ꞌrabbẽẽt cĩggĩĩng cadduhaa cĩ ꞌrabbẽẽt cĩg ꞌCieeth cĩ Nyekuci. Baa adhuheek balliooha ꞌrabbẽẽt ꞌcĩg mẽẽlĩg gẽrrẽẽt.

⁴² Nẽ baa aaĩ ngaa umwaa buúk ꞌcĩ ĩĩn ngaatĩbõyyĩ ꞌcĩ baa aku adhuheek ꞌrabbẽẽt ꞌcĩg kũtũrĩg ꞌcĩg kidicig ꞌramma.

⁴³ Ma ho, ikia ũtũvvũ Yeesu nuyyiook cĩgĩnnĩg nẽ ĩĩnnĩk, “Haduhaakuung naa ngagiit dĩdĩ, aarĩk ngaatĩbõyyĩ ciee nucẽẽt ꞌcĩg mẽẽlĩg ꞌcĩg ĩllõõan cĩg eet vẽlẽk.

⁴⁴ Hĩnĩngĩtĩ aarĩk balliooha ꞌrabbẽẽt ꞌcĩg ẽꞌngẽra ꞌrabbẽẽtĩĩ cĩggĩĩng. Nẽẽthĩ, ngaatĩbõyyĩ cieeni, ẽdẽca nẽẽ nucẽẽt vẽlẽk ꞌcĩg occa arũgnĩ nẽẽnĩ.”