ꞌLuuka 9 - ꞌBuuk cĩ Thõõth cĩ Nyekuci

Ĩꞌthõ Yeesu ꞌthooyyiak õmmõtõ hĩ ꞌramma

¹ Ma baa ũtũvva Yeesu ꞌthooyyiak ꞌcĩg ĩĩn õmmõtõ hĩ ꞌramma ho hiita ngaatĩ hõdẽẽthõng, ikia aaꞌnyĩk ĩhõõggõ ꞌtirrian hĩ makaaꞌthĩt ꞌcĩ iiggiaĩ loriẽẽt ꞌcĩg abathĩ vẽlẽk heelliaĩĩ eet mooriꞌthioohĩ,

² nẽ ĩꞌthõ ĩhõõggõ hõõt hillimatteek eet thõõth cĩ habuccieet cĩ Nyekuci nẽ aanytĩk ꞌcĩg õmmõõrĩ hũbũttaathõ.

³ Nĩngĩtĩ aduhaakĩ ĩhõõggõ annẽẽkĩ, “Õõt haaga. Ma haꞌnyahi eet umwaa hĩbahĩt hode locoburo hode ꞌgẽẽn hode ꞌrabbẽẽta hode ceremwa.

⁴ Ma uduhuttu halang umwa, aallattia nĩngaata ĩꞌthõng ũtũngteek ꞌtaaũn tĩho.

⁵ Nẽ má aburruung eeta ngaamwaanĩ, utuddungteek tuduhaac cĩ ꞌthoo cugguung nĩngaata, hatĩ ũtũngteehu ꞌtaaũn tĩho, hátĩ hĩĩ terethiinit ꞌcĩ utuburru niig ĩhõõggõ.”

⁶ Nĩngĩtĩ ĩꞌngaannĩ ꞌthooyyiaha õõĩ olooyyiohĩ vẽlẽk nẽ illimanit nyeemuut ꞌcĩ abũnnaa nẽ aanytĩk eet hũbũttaathõ mooriꞌthioohĩ lõkõrẽẽt vẽlẽk.

Õmmõthĩ Ẽrõõdẽ

⁷ Ma baa athĩhĩ Ẽrõõdẽ habuui thooꞌthiok iccig vẽlẽk ko, ikia õmmõthĩ nẽẽ gẽrrẽẽt, hĩnĩngĩtĩ baa aĩ eeta ũgẽẽgĩ, ũrũga Yõaannẽ daahĩtha,

⁸ nẽ tarĩ ĩĩtõ ũgẽẽgĩ õbõda Eliijja nẽ ĩĩtõ ũgẽẽgĩ ũrũga põrõvẽtaacĩ umwaa ꞌcĩ baa baarkit.

⁹ Baa õthõõth Ẽrõõdẽ aĩ, “Baa huruha naa Yõaannẽ ẽlẽk nẽ nganĩ ciee nga hathihi naa aĩ, adĩman thooꞌthiok ꞌcĩg aattĩg hoti ho?” Nĩngĩtĩ adiim acĩnĩ nẽẽ Yeesu.

Aaꞌnyĩk Yeesu eet aalibꞌnya ꞌtur ꞌgẽẽn

¹⁰ Ma baa oboddia ꞌthooyyiaha, iita uduktaak Yeesu dtiicanĩ ꞌcĩg baag adĩman nẽẽg ko. Nĩngĩtĩ õkõõĩ nẽẽ ĩhõõggõ ĩĩcĩ ꞌtaaũn cĩ Beꞌthaida.

¹¹ Au hinnia aga eeta thõõth icci, nĩngĩtĩ anũĩ ĩnõõnnõ. Nẽ atal Yeesu ĩhõõggõ ngaatĩ auuni nẽ illimaneek ĩhõõggõ thõõth cĩ habuccieet cĩ Nyekuci nẽ aaꞌnyĩk ꞌcĩg õmmõõrĩ hũbũttaathõ.

¹² Ma baa iggiingi kõrra, iita ꞌthooyyiaha ĩĩttĩk Yeesu, “Duhaak eet hõõt hummuddia ꞌgẽẽn olooyyiohĩĩ ꞌcĩg obokii hĩ nĩngĩtĩ ooginni, hĩnĩngĩtĩ haattĩg naag ngaatĩ aitiõõnnĩ ꞌgii vẽlẽk tõõ.”

¹³ Ẽdẽcĩ hinnia Yeesu anneek, “Aanytĩk niig ĩhõõggõ ꞌgiimwa hadahit.” Ẽdẽcĩ nẽẽg Yeesu anneek, “Haꞌnyaka naag ũbũnẽẽt ꞌtur hĩ ulugo ꞌramma haaga, occa thĩ mĩĩ nõõ hõõ hũũtanna ꞌgẽẽn cĩ eet iccig vẽlẽk.”

¹⁴ Baa ũũppan eeta ꞌcĩg maacĩg dioo ĩĩn aalibꞌnya ꞌtur nĩngaata. Nĩngĩtĩ annẽẽkĩ Yeesu nuyyiook cĩgĩnnĩg, “Aanytĩk eet haauto loota hĩĩtõ hẽẽn ꞌtur, hẽẽn ꞌtur.”

¹⁵ Nĩngĩtĩ adĩmanĩ ꞌthooyyiaha buúk hĩcĩ aduha nẽẽ ho.

¹⁶ Ma ho, ittiha Yeesu ũbũnẽẽt ꞌcĩg ĩĩn ꞌtur hĩ ulugo ꞌcĩg ĩĩn ꞌramma ho nẽ ĩcĩnõõthĩ hẽẽtkujjieen nẽ alaõõĩ nẽ ẽꞌngẽra. Nĩngĩtĩ aaꞌnyĩkĩ nuyyiook heꞌngerrieek lothippit.

¹⁷ Aduk eeta ꞌgẽẽn tĩho ĩꞌthõng hũũppattĩ nẽẽg vẽlẽk, huluttia ꞌthooyyiaha thuruthur ꞌcĩg ũũppan lohoddwa õmmõtõ hĩ ꞌramma.

Uppulana Pẽẽtũrũ Yeesu

¹⁸ Kõr umwa, baa õkõ Yeesu ĩĩcĩ burki nẽ ũũk alaõ. Ma nĩngaata, iita ummuddiaak nuyyiooha cĩgĩnnĩg ĩnõõnnõ, nĩngĩtĩ ajini nẽẽ ĩhõõggõ annẽẽkĩ, “Aĩ nõõ ꞌthẽk eeta dẽẽdẽ nganĩ naa?”

¹⁹ Ẽdẽcĩ nẽẽg anneek, “Aĩ eeta ũgẽẽgĩ ĩĩnĩ nii Yõaannẽ Batitta, nẽ ĩĩtõ ũgẽẽgĩ ĩĩnĩ nii Eliijja nẽ tarĩ ĩĩtõ ũgẽẽgĩ, iini moho nii põrõvẽtaac umwa cĩ baarkit ꞌcĩ ũrũga thõng.”

²⁰ Nĩngĩtĩ ajini Yeesu ĩhõõggõ tarĩ annẽẽkĩ, “Ma niig ainnu nganĩ naa?” Ẽdẽcĩ Pẽẽtũrũ aĩ, “Ĩĩnĩ nii Krĩstõ ꞌcĩ ĩꞌthõõa Nyekuci.”

²¹ Ma ho, itilo Yeesu ĩhõõggõ hiittiõõ hõllõngaa õõ aduhaak eet umwa thõõth icci ũdũt.

Õthõõth Yeesu daahĩth cĩnnĩ

²² Ma nĩngaata, uduhaak Yeesu nuyyiook ĩĩnnĩk, “Accananni hatĩ Ngeertĩ Eeto ĩꞌthõng nẽ ũtũbũrĩt makayyiooha cĩg eetuk hĩ makayyiook cĩg paadĩrꞌnyaannu, hĩ ꞌlimmanniook cĩg nyattaalak nẽ hatĩ uruhi. Ma urutaa cĩ waathinniook iyyio, arũgna hatĩ nẽẽ daahĩtha.”

²³ Ma ho, uduhaak ĩhõõggõ vẽlẽk ĩĩnnĩk, “Ẽẽtĩ ꞌcĩ adiim anũyya nganĩĩta, aꞌnyĩĩk hẽlẽmana ẽlẽ cĩnnĩ nẽ irriongan hurucce cĩnnĩ nẽ ũnũaanĩ.

²⁴ Ẽẽtĩ ꞌcĩ adiim aꞌthũũnnĩ rũgẽt cĩnnĩ, adhuheek hatĩ tuu, nẽẽthĩ, ẽẽtĩ ꞌcĩ adhuheek rũgẽt cĩnnĩ tuu, hĩnĩngĩtĩ nganĩĩta, ẽẽla hatĩ nẽẽ rũgẽt cĩnnĩ.

²⁵ Ne ꞌyioko ꞌthẽk ꞌcĩ occa ammũda ẽẽtĩ hĩĩ ꞌcĩ aaꞌnyĩhõõthĩkĩ ĩnõõnnõ lõõcĩ nicciee vẽlẽk nẽ udhuheek rũgẽt cĩnnĩ tuu?

²⁶ Nẽ má abũrĩ ẽẽtĩ umwaa ngaatĩ ẽlẽmma nganĩĩt hĩ thõõth caannĩ, abũrĩ hatĩ Ngeertĩ Eeto buúk ngaatĩ ẽlẽmmĩ ĩnõõnnõ, hatĩ ikia nẽẽ bulẽẽttaa cĩnnĩ, hĩ ĩĩcĩ Maacõnĩ, hĩ ĩĩcĩ aajĩlẽẽt ꞌcĩg ẽllẽẽmĩthĩ.

²⁷ Haduhaakuung dĩdĩ, aattĩg eeta ũgẽẽgĩ hõrggẽẽnaa cunuung ꞌcĩg hatĩ arũgĩ ĩꞌthõng hĩcĩnĩt habuccieet cĩ Nyekuci.”

Tũhũẽẽnĩt cĩ ẽlẽ cĩ Yeesu

²⁸ Ma urutaa cĩ waathinniook turkiyyio, ũtũvvũ nẽẽ Pẽẽtũrũ, hĩ Yõaannẽ, hĩ ꞌJeemith nẽ ũũhĩ ĩhõõggõ muuraa umwaanĩ ĩĩcĩ õõ alaiini.

²⁹ Ma baa nga alayyi nẽẽnĩ, ũtũhũĩ muum cĩnnĩ hĩ ceremwa hattaalito hĩĩtõ õõppẽr.

³⁰ Ma hĩdĩĩkoothong, uppwaatta Mũũꞌtha hĩ Eliijja

³¹ bulẽẽttaa ꞌcĩ ẽllẽẽmĩth gẽrrẽẽt, hiita hothooꞌthio hĩ Yeesu. Baa atuhan nẽẽg thõõth cĩ ꞌgõõl ꞌcĩ hatĩ õkõ adaaknĩ Yeesu ꞌJeruꞌthalẽma hĩ baa adukiaa.

³² Ammũdeek hinnia thõõth ciee aggamta Pẽẽtũrũ hĩ ꞌgõõnõgĩ ũꞌnyaaha. Ma baa acĩnĩ ho, adtuuha hinnia bulẽẽnĩt cĩ Yeesu nẽ ĩcĩnĩt eet ꞌramma abĩlĩ hõdẽĩ hĩ ĩnõõnnõ.

³³ Ma baa ĩꞌngaathĩ Mũũꞌtha hĩ Eliijja õõ ho, othoothĩk Pẽẽtũrũ Yeesu ĩĩnnĩk, “Makayyioohit, ẽllẽẽmĩth ngaatĩ haattiyyi ngaati gẽrrẽẽt, hẽtẽhẽnyta da ꞌcieethi iyyio, cunni hõdẽĩ, cĩ Mũũꞌtha hõdẽĩ nẽ ĩĩ cĩ Eliijja.” Baa hõllõngaa aga Pẽẽtũrũ thõõth ꞌcĩ aduha ho.

³⁴ Ma baa nga õthõõth Pẽẽtũrũ, uppwaanna diith umwaa nẽ ũmmũt ĩhõõggõ, nĩngĩtĩ itieelini ꞌthooyyiaha gẽrrẽẽt.

³⁵ Ma ho, õthõõtha mõlõõhĩ umwaa diithatõõ ĩĩ, “Loholeec caannĩ ꞌcĩ hẽbẽra cieeni, ĩthĩhĩt ĩnõõnnõ.”

³⁶ Ma baa õthõõth mõlõõhĩ ẽlẽk, iita ĩcĩnĩt ꞌthooyyiaha Yeesu aau ẽmmẽn. Nĩngĩtĩ au ammiꞌthẽẽnĩ nẽẽg thõõth icci korriook nicciag ĩꞌthõng irkiꞌnyia ũgĩ.

Ẽẽla Yeesu buulenit

³⁷ Ma loohoth cĩnnĩ, ulluuccia Yeesu hĩ ꞌthooyyiak cĩgĩnnĩg muuraa nẽ iita ommottio hĩ lothippit cobbi gẽrrẽẽt unaahatõõ.

³⁸ Ma nĩngaata noho, õthõõthak eet umwaa Yeesu lothippitatõõ ĩĩnnĩk, “ꞌLimmannioohit, ẽlaahaa baaĩ nuun loholeec caannĩ ꞌcĩ odoyyii ho.

³⁹ Loholeec ꞌcĩ accananeeka lorii ꞌcĩ abathĩ, ara ẽttẽẽdĩ looc hẽvẽvvẽr ĩꞌthõng huduu ũtũgĩ. Hõllõngaa alahaneek buúk nẽ iꞌnyiathanaaha loholeec gẽrrẽẽt.

⁴⁰ Baa hala nuyyiook cugunnig hitiggiaacõ, aitiõõ hinnia hõllõngaa ũũlũ ũdũt.”

⁴¹ Nĩngĩtĩ annẽẽkĩ Yeesu ĩhõõggõ, “Illoorru niig eeta cĩg irkiꞌnyia iccig ko gẽrrẽẽt nẽ nga aitioonnuung lemiiniti tõõ. Adiimmu niig hũrũmtĩ naag hĩ ngagiit ĩꞌthõng hatĩngaan? ꞌNyaha daho loholeec cunni ho ngaati ẽlẽ.”

⁴² Tananga baa nga õkõ buuleniti ĩĩcĩ aayyi Yeesu, ara ẽttẽẽdĩ lorii ꞌcĩ abathĩ ho ĩnõõnnõ looc noho ꞌlir hẽvẽvvẽr. Ma ho, eggerꞌnyeek Yeesu lori ꞌcĩ abathĩ ho, hũbũna buuleniti nĩĩcĩ noho. Ma nĩngaata, õbõdẽẽhĩ Yeesu loholeec maaꞌnyĩ.

⁴³ Nĩngĩtĩ abulanĩ ꞌtirriani ꞌcĩ Nyekuci ho eet gẽrrẽẽt. Ma baa nga abulan eet ꞌlẽẽmĩthĩ cĩ thõõth ꞌcĩ adtican Yeesu ho, ĩĩnnĩk nẽẽ nuyyiook cĩgĩnnĩg,

Ẽppẽẽda Yeesu daahĩth cĩnnĩ tarĩ

⁴⁴ “Ĩthĩhĩt thõõth ꞌcĩ hẽppẽẽdahuung naa ho jurrung. Õhõppõõcanoothĩk hatĩ Ngeertĩ Eeto athĩnĩĩ cĩg eetuk.”

⁴⁵ Baa hinnia aitiõõ hõllõngaa aga nẽẽg thõõth ꞌcĩ õthõõth Yeesu ho, hĩnĩngĩtĩ baa ammiꞌthi hĩ ĩhõõggõ hiittiõõ hõllõngaa aga. Nẽ tarĩ, baa itieelli nẽẽg ngaatĩ ajini ĩnõõnnõ.

Nganĩ hatĩ ꞌcĩ maka?

⁴⁶ Ma kõr umwa, ẽppẽhattõõĩ ꞌthooyyiaha cĩg Yeesu thõõth ꞌcĩ aĩ, nganĩ occa hatĩ ꞌcĩ maka hõrggẽẽnaa cĩnĩĩng.

⁴⁷ Baa aga Yeesu muhẽẽnĩt cĩnĩĩng ko. Nĩngĩtĩ attihaanĩ loholeec ꞌcĩ hidici nẽ aaꞌnyĩk hĩbĩl ojoonu hĩ ĩnõõnnõ.

⁴⁸ Nẽ irrioonĩk ĩhõõggõ ĩĩnnĩk, “Ẽẽtĩ ꞌcĩ ẽlẽmĩ ngaatĩ arũmẽẽnĩ hĩ loholeec icci õlõõ cĩnnĩ taliitta ꞌthaarĩĩ cĩgannĩg, ẽlẽmma nganĩĩta nẽ ẽẽtĩ ꞌcĩ ẽlẽmma nganĩĩta, ẽlẽmĩ eet baa ĩꞌthõõannaa nganĩĩt buúk. Ẽẽtĩ ꞌcĩ hidici gẽrrẽẽt hõrggẽẽnaa cunuung vẽlẽk, ĩnõõnnõ ꞌcĩ maka gẽrrẽẽt.”

Eet cĩnaac nganĩ?

⁴⁹ Ma ho, ĩĩnnĩk Yõaannẽ Yeesu, “Makayyioohit baa hacĩnna eet umwa iiggia loriẽẽt ꞌcĩg abathĩ ꞌthaarĩĩ cugunnig, nẽ hĩĩttĩha occa abĩllĩ dtiic cĩnnĩ ho, hĩnĩngĩtĩ hõllõngaa ĩĩn nẽẽ eet cĩnaac.”

⁵⁰ Ẽdẽcĩ hinnia Yeesu anneek, “Ma habĩllu, hĩnĩngĩtĩ ẽẽtĩ ꞌcĩ hõllõngaa aaburreekeet ngagĩĩta, ĩĩn eet cĩnaac.”

Ũtũbũrĩt eeta Yeesu Thamaria

⁵¹ Ma baa õbõhĩ kõrra ꞌcĩ odongiini Yeesu õkõõĩ hẽẽtahujjieen, ikia ĩrĩnyanoothĩk nẽẽ ngaatĩ õkõõĩ ꞌJeruꞌthalẽma.

⁵² Nĩngĩtĩ ĩꞌthõõĩ eet ũgĩ hutuwattĩ hõõt õlõõ umwaanĩ looccaa cĩ Thamaria, hátĩ hõõt hũkũmattẽẽhĩ ĩnõõnnõ ꞌgii vẽlẽk.

⁵³ Nẽẽthĩ hinnia, baa abũrĩ eeta cĩg õlõ tĩho Yeesu, hĩnĩngĩtĩ baa aku edeceek nẽẽ ĩĩcĩ ꞌJeruꞌthalẽmĩ.

⁵⁴ Ma baa adtuuha nuyyiooha, ꞌJeemithi hĩ Yõaannẽ thõõth ꞌcĩ aaĩ hoti ho, õõt ijinit Yeesu ĩĩttĩk, “Makayyioohit, adiimmeet nii ngagĩĩt hutuvvuyyiaawa ꞌgwoo hẽẽtahujjieen hĩ baa Eliijja, hikia hũtũũth eet iccig?”

⁵⁵ Abbuudi hinnia Yeesu nẽ eggerenyeek ĩhõõggõ,

⁵⁶ nĩngĩtĩ õõĩ õlõõ ꞌcĩ ꞌrĩĩng.

Kõmĩĩth ꞌcĩ hanũĩ Yeesu

⁵⁷ Ma baa nga ẽdẽcĩ nẽẽg ꞌgõõla, ĩĩnnĩk eet umwaa Yeesu, “Hanuyyii hatĩ naa nganiit loonyini vẽlẽk ĩcĩg õkõõĩ.”

⁵⁸ Ẽdẽcĩ hinnia Yeesu ĩnõõnnõ anneek, “Aꞌnyak irrieerrwaana tabannwa ꞌcĩg ooginni nẽ aꞌnyak hĩbaallĩ buúk ꞌcieethi cĩggĩĩng, nẽẽthĩ, aitiõõ Ngeertĩ Eeto nĩngĩtĩ aruhaanĩ õõ haaga tõõ.”

⁵⁹ Ma ho, õbõk Yeesu eet umwa nĩngaata noho nẽ ĩĩnnĩk, “Ijjia nũaanĩ.” Ẽdẽcĩ hinnia ẽẽtĩ tĩho aĩ, “Makayyioohit, aꞌnyaa nõõ hũũk hũmmũt nyakangaan nẽ hõbõda.”

⁶⁰ Ẽdẽcĩ Yeesu ĩnõõnnõ anneek, “Aꞌnyĩĩk daakiak hũmmũtĩt daakiak nyaagwaana. Bĩĩt nẽẽ nii ꞌlimmaneek eet nyeemuut cĩ habuccieet cĩ Nyekuci.”

⁶¹ Ma nĩngaata, ẽdẽca ẽẽtĩ umwaa tarĩ ĩĩ, “Makayyioohit, hanuyyii nẽẽꞌthẽk hatĩ naa buúk nganiita, ĩꞌnya nõõ hũũk huduhaak eet cĩg halang caannĩ.”

⁶² Ẽdẽcĩ hinnia Yeesu ĩnõõnnõ anneek, “Aitiõõ eet ꞌcĩ aggam hõllaac cĩ taꞌngõõ nẽ ubbuudõthĩ looc uruta, hõllõngaa ũũppan ngaatĩ occa adticaniini habuccieetaa cĩ Nyekuci.”