ꞌLuuka 7 - ꞌBuuk cĩ Thõõth cĩ Nyekuci

Lemiinit cĩ ꞌgaalac cĩ ũũrũta

¹ Ma baa ẽdẽcaak Yeesu ngaatĩ allimanĩ eeta, ĩtĩnga ũũk Kapernauma.

² Baa ammũdeek õmmõõrĩ dticciannioohiti umwaa ꞌcĩ amĩna ꞌgaalacĩ cĩ ũũrũta gẽrrẽẽt hõbõhĩ daahĩthĩ.

³ Ma baa athĩhĩ ꞌgaalacĩ Yeesu nĩngaata ho, ikia ĩꞌthõ makayyiook ũgĩ cĩg eet cĩg ꞌJudeei hõõt hĩĩlallieek Yeesu hikia hẽẽla dticciannioohit cĩnnĩ ho.

⁴ Ma baa õdõlan nyakangaaꞌnya tĩko Yeesu ho, ĩĩlallieek ĩĩttĩk, “Adiimmi ꞌgaalacĩ umwaa cĩ ũũrũta nganiit bĩĩt ẽla dticciannioohit cĩnnĩ.

⁵ Ĩĩn nẽẽ eet ꞌcĩ ammĩnan looc cĩnaac gẽrrẽẽt, ĩꞌthõng hetehenyeheet ꞌCieeth cĩ Laiitto.”

⁶ Nĩngĩtĩ ĩꞌngaannĩ Yeesu nẽ ookorit hĩ ĩhõõggõ. Baa hõllõngaa ꞌrẽẽn Yeesu hĩ ꞌcieeth ꞌcĩ ĩꞌthõõanĩ ꞌgaalacĩ nyakangaaꞌnya ho. Baa ĩꞌthõõa nẽẽ ĩhõõggõ hiita hĩĩttĩk Yeesu, “Makayyioohit, ma haccanani ẽlẽ cunni haaga, hĩnĩngĩtĩ haꞌngaaoni naa ngaatĩ occa aduknaanĩ nii halang caannĩ.

⁷ Ĩnõõ ꞌcĩ adtuuhanĩ hõllõngaa hũũppanĩĩ ngaatĩ huppwaanaki naa dẽẽdẽ ho. Nẽẽthĩ ꞌyioko, duha nuun thõõth hõdẽẽthõng haaga, hátĩ hũbũna dticciannioohiti caannĩ ho.

⁸ Hĩnĩngĩtĩ hĩĩnĩ naa buúk eet ꞌcĩ haꞌnyahi makayyiook cĩgannĩg nẽ tarĩ hĩĩna eet ꞌcĩ haggami ũũrũta. Ma haduhaahi icci hanneehi, ‘Bĩtõ,’ adĩman ꞌthẽk hĩcĩ haduhaahi naa ho. Nẽ ma haduhaahi iccia hanneehi, ‘Ijjia,’ aku ꞌthẽk hĩcĩ haduhaahi naana. Ma haduhaahi dticciannioohit caannĩ hidtican dtiic icci, adtican ꞌthẽk ꞌgõõla tĩho.”

⁹ Ma baa athĩhĩ Yeesu thõõth icci ho, ikia ĩtĩna nẽẽ lemiinit cĩ eet nicci gẽrrẽẽt, nĩngĩtĩ abbuudi eet ꞌcĩg baag anũ ĩnõõnnõ ho nẽ ĩĩnnĩk, “Haduhaakuunga, nga hũmmũda eet ꞌcĩ aꞌnyak lemiinit ꞌcĩ aaĩ hoti tananga Ĩꞌthĩraẽla.”

¹⁰ Ma nĩngaata, oboddioothĩ eeta baag ĩꞌthooyyia halangatõõ, nĩngĩtĩ ammũdõõthĩkĩ dticciannioohit tĩho ũbũna.

Ũrũgũtha Yeesu loholeec cĩ ngaatĩbõyyĩ

¹¹ Ma hĩdĩĩkoothong, ĩtĩngaacõ Yeesu hĩ nuyyiook cĩgĩnnĩg, õõt ꞌtaaũnaa ꞌcĩ haĩ Nain. Baa õõkõr nẽẽ hĩ lothippit cobbi gẽrrẽẽt.

¹² Ma baa õbõktõ nẽẽ hĩ hattũũg cobbi cĩ ꞌtaaũnõõ, irrionganaak hinnia eeta buulenit umwa ꞌcĩ adaahĩ battaali. Baa odoyyii buuleniti ciee adaahĩ ho nẽ ĩĩn ngaannia ngaatĩbõyyĩ. Nẽ baa õõkõr lothippiti cĩ ꞌtaaũnõõ hĩ ĩnõõnnõ.

¹³ Ma baa adtuuha Yeesu Makayyioohiti ngaatĩbõyyĩ tĩho ho, atamaatĩk ĩnõõnnõ nẽ ĩĩnnĩk, “Ma halu.”

¹⁴ Ma ho, ĩbĩlĩt eeta ꞌcĩg irriongan buulenit ko, nĩngĩtĩ õkõ ahumi Yeesu ĩnõõnnõ nẽ othoothĩk ĩĩnnĩk, “Buulenit, hanneekii tĩnga ꞌjieena.”

¹⁵ Nĩngĩtĩ ĩꞌngaanĩ buuleniti aa adaak ko noho cahũkũr haau ꞌjieena nẽ iꞌthianaaĩ õthõõth lõꞌngõõc. Nĩngĩtĩ õbõdẽẽkĩ Yeesu ĩnõõnnõ aattĩnnĩ.

¹⁶ Ma nĩngaata, ubulan thõõth ciee eet vẽlẽk ꞌcĩg aattĩg nĩngaata, nĩngĩtĩ au adĩkꞌthĩ Nyekuc gẽrrẽẽt aĩnnĩ, “Uppwaannaheet aattĩ põrõvẽtaacĩ cobbi gẽrrẽẽt. Ikia ẽla Nyekuci eet cĩgĩnnĩg.”

¹⁷ Nĩngĩtĩ ĩꞌthanõthõõthĩkĩ nyeemuut cĩ Yeesu ho ꞌJudeea hũtũrũũr hĩ loonyin vẽlẽk nĩngaata.

Yeesu hĩ Yõaannẽ Batitta

¹⁸ Baa aduhaak Yõaannẽ nuyyiooha cĩgĩnnĩg thooꞌthiok ꞌcĩg adtican Yeesu ho vẽlẽk. Ma ho, ũtũvvũ nẽẽ nuyyiook cĩgĩnnĩg ꞌramma,

¹⁹ nẽ ĩꞌthõ hõõt hijinit Makayyioohit Yeesu hĩĩttĩk, “Nganiit baa aĩ occa hatĩ akuuni? Hode occa nga hẽrẽẽyya eet umwa?”

²⁰ Ma baa õdõlanit nuyyiooha niccieeg Yeesu, uduktaak ĩĩttĩk, “Ĩꞌthõõanneet ngagĩĩt Yõaannẽ Batitta hiita hijitti hiittihii, ‘Nganiit baa aĩ occa hatĩ akuuni? Hode occa nga hẽrẽẽyya eet umwa?’ ”

²¹ Nẽ kõr niccia, baa ammũdeek ẽẽla Yeesu eet ꞌcĩg õmmõõrĩ mooriꞌthiook ꞌcĩg mẽẽlĩg, hĩ ꞌcĩg aꞌnyak loriẽẽt ꞌcĩg abathĩ, hĩ ꞌcĩg rubettĩg vẽlẽk hũbũttaathõ.

²² Nĩngĩtĩ ẽdẽcĩ Yeesu nuyyiook cĩg Yõaannẽ ho annẽẽkĩ, “Oboddiooth õõt uduktaak Yõaannẽ thooꞌthiok ꞌcĩg acinnu nẽ ĩthĩktu ho. Õõt ĩĩttĩk, ĩcĩttĩ eeta ꞌcĩg rubettẽẽgĩ, õtõõcõ ꞌcĩg ahuuli, ũbũttaathõ ꞌcĩg adak helleggeri, ĩthĩktõ ꞌcĩg adĩĩtĩ ĩĩna, ũrũgta daakiaha nẽ illimanoothĩk nyeemuut ꞌcĩ abũnnaa eet ꞌcĩg ĩĩn hullaha buúk.

²³ Aggatan hatĩ Nyekuci eet ꞌcĩ ẽlẽmma nganĩĩt, hĩnĩngĩtĩ thooꞌthiok ꞌcĩg hadticani naa ho.”

²⁴ Ma baa oboddioothĩ nuyyiooha cĩg Yõaannẽ, iꞌthianaaĩ Yeesu ijin lothippit thõõth cĩ Yõaannẽ anneek, “Eet baa ꞌcĩ aaĩ hutuno baa õõ acinnu niig horrwaa ꞌcĩ õdõhõhĩĩ kak? Aaĩ baa nẽẽ hĩ ĩhaõõcĩ aa gõõng uuni uuhan ngõõtĩ?

²⁵ Má aitiõõ nẽ baa oottu icittu neegi? Eet ꞌcĩ baa ahimit ceremwa ꞌcĩg ẽllẽẽmĩthĩ? Aattĩg eeta ꞌcĩg ahimit ceremwa ꞌcĩg ẽllẽẽmĩth nẽ irrianit gẽrrẽẽt õlõõ cĩ habuuo.

²⁶ Nẽẽthĩ, ne ꞌcĩ baa ooyyu acinnu niig ko dẽẽdẽ? Põrõvẽtaac? Eei dĩdĩ, haduhaakuunga, põrõvẽtaac ꞌcĩ ĩllõõan gẽrrẽẽt.

²⁷ Ĩnõõnnõ ciee baa eheeddi ꞌBuuhaa cĩ Nyekuci aĩ, “ ‘Hĩꞌthõõakii hatĩ naa Nyekuci nganiit ꞌthooyyiahit caannĩ ꞌcĩ aku akũmaneek ꞌgõõl cunni.’

²⁸ Haduhaakuung dĩdĩ, aitiõõ ẽẽtĩ umwaa ꞌcĩ arrita ngaaĩ cĩg irkiꞌnyia iccig ꞌcĩ ĩllõõan Yõaannẽ tõõ. Nẽẽthĩ, ẽẽtĩ ꞌcĩ adtuurna habuccieetaa cĩ Nyekuci, ĩllõõan nẽẽ Yõaannẽ.”

²⁹ Ma baa athĩhĩ eeta vẽlẽk hĩ eet ꞌcĩg alũt occoro buúk thõõth cĩ Yeesu ho, iita elemit nẽẽg ngaatĩ aũlanĩ thõõth cĩ Nyekuci, hĩnĩngĩtĩ baa aggameek Yõaannẽ ĩhõõggõ baattithimo.

³⁰ Baa hinnia abũrĩ Variꞌtheei hĩ ꞌlimmanniook cĩg nyattaalak thõõth cĩ Nyekuci, hĩnĩngĩtĩ baa nga haggameek Yõaannẽ ĩhõõggõ baattithimo.

³¹ Ma ho, õthõõth Yeesu ĩĩ, “Hĩthakꞌtheehi occa ꞌthẽk naa eet cĩg irkiꞌnyia iccig neegi? Aattĩg ꞌyioko ꞌthẽk nẽẽg hĩ nii?

³² Aattĩg nẽẽg hĩ lohollia aa gõõng urangan ngaatĩ tũũõ nẽ othooꞌthik ꞌgõõnõgĩ ĩĩttĩk, “ ‘Hadtaheekuung loboruẽẽt ĩꞌthõng, nẽ hõllõngaa arugummu buúk, hebeneekuung tegellwa cĩg lõngaanak, nẽ hõllõngaa aluyyu buúk.’

³³ Ẽdẽta Yõaannẽ Batitta ẽlẽ ꞌgẽẽna hĩ viinoa, ainnu hinnia ‘Aꞌnyak lori ꞌcĩ abathĩ.’

³⁴ Ma baa aku Ngeertĩ Eeto aduhi nẽ ũhũd viino ho, akanneeku hinnia lõbõlõbẽẽꞌthĩt hĩ dũũtĩth nẽ iittihu, ꞌgõõnĩ luttiook cĩg occoro hĩ cĩ ‘ꞌthẽccannioohu.’

³⁵ Nẽẽthĩ, ẽtẽrꞌthaa ꞌgẽẽnyĩthĩ hĩĩ dĩdĩ eetinii ꞌcĩg ẽlẽmĩ thõõth cĩnnĩ.”

Uud ngaa ꞌcĩ ĩĩn ꞌthẽccannioohit Yeesu

³⁶ Ma ho, ũtũvva Variꞌtheeniti umwaa Yeesu hũũk duhẽẽtta õlõõ cĩnnĩ. Nĩngĩtĩ õkõõĩ Yeesu hũũk hẽrẽẽõ dtaabawa.

³⁷ Ma baa athĩhĩ ngaa umwaa ꞌcĩ baa gõõng ĩĩn ꞌthẽccannioohit ꞌtaaũnaa tĩho aĩ, aduhi Yeesu ꞌcieethaa cĩ Variꞌtheetto nĩngaata ho, aꞌnyaha ngõõrrõ cĩ udẽẽttõ ꞌcĩ aꞌnyak muyuuk ꞌcĩ ẽmmẽdĩ gẽrrẽẽt deera,

³⁸ nẽ ikia ũũk ĩbĩl ĩĩcĩ bahuc cĩnnĩ. Ma ho, utulu ĩꞌthõng hĩdtĩlattoothĩk tilaalõ ꞌthoo cĩg Yeesu nẽ upuppuucan ĩmanĩĩ cĩgĩnnĩg nẽ ũcũũcũ ꞌthoo cĩgĩnnĩg nẽ udduuttik ngõõrrõ.

³⁹ Ma baa acĩn Variꞌtheeniti baa avvĩ Yeesu thõõth icci ho, ummuk ꞌthĩnĩtatõõ ĩĩ, “ꞌYioko hĩĩ ẽẽtĩ ciee põrõvẽtaac dĩdĩ, occa ꞌyioko aga ngaatĩ ĩĩnnĩ ngaa ꞌcĩ ahum ĩnõõnnõ ho ꞌthẽccannioohit.”

⁴⁰ Nĩngĩtĩ annẽẽkĩ Yeesu ĩnõõnnõ, “ꞌThimõõnẽ, hadiimi haduhaakii thõõth umwa.” Nẽ ẽdẽc ꞌThimõõnẽ ĩĩ, “Duhaahaanĩ ꞌlimmannioohit.”

⁴¹ Ma ho, uduhaak Yeesu ĩnõõnnõ ĩĩnnĩk, “Baa aattĩg eeta ũgẽẽgĩ ꞌramma ꞌcĩg acuhana ꞌrabbẽẽt hĩ eet umwa. Acuhana umwaa ꞌdinaarꞌnya ꞌmiiaꞌnya ꞌtur nẽ ucuhana umwaa ꞌdinaarꞌnya hẽẽn ꞌtur.

⁴² Nẽẽthĩ, baa aꞌnyaman ĩhõõggõ ngaatĩ adũmanĩ, nĩngĩtĩ ũũnnĩkĩ baattĩ ꞌrabbeetu ĩhõõggõ, hiittiõõ hõllõngaa adũmanĩ. ꞌYioko eetinii ꞌcĩg ĩĩn ꞌramma ho, eet iina ꞌcĩ occa ammĩnan baattĩ ꞌrabbeetu gẽrrẽẽt?”

⁴³ Ẽdẽcĩ ꞌThimõõnẽ aĩ, “Hammuhi occa eet baa acuhana ꞌrabbẽẽt ꞌcĩg mẽẽlĩg, ꞌcĩ occa atalĩ ĩnõõnnõ gẽrrẽẽt.” Nẽ ẽdẽc Yeesu ĩĩnnĩk, “Ẽbẽaneehi.”

⁴⁴ Nĩngĩtĩ ũũkõthõõthĩkĩ ngaa nicci nẽ ĩĩnnĩk ꞌThimõõnẽ, “Adtuuha nii ngaa icci? Nganĩngĩtĩ haduknaanĩ naa õlõ cunni ho, nga aꞌnyaa maam ꞌcĩg hacũũranĩĩ ꞌthoo. Nẽẽthĩ, ũtũũny ngaa ciee ꞌthoo cĩgannĩg tilaalõnĩ nẽ upuppuucan ĩmaa cĩgĩnnĩg.

⁴⁵ Nganĩngĩtĩ hakuuni, nga ꞌthaawaa nii nganĩĩta, nẽẽthĩ, ĩꞌthaawa ngaa cieeni nẽ nga ꞌthẽk ĩꞌthaayya noho.

⁴⁶ Nẽ nga ꞌduutika ngõõrrõ õõ caannĩ, nẽẽthĩ, udduutik ngaa ciee ngõõrrõ ꞌcĩ aꞌnyak muyuuk ꞌcĩ ẽmmẽdĩ gẽrrẽẽt ꞌthõõnĩĩ cĩgannĩg.

⁴⁷ Haduhaakii naa nganiita, atamaattiothoothĩk ꞌthẽccanẽẽta cĩgĩnnĩg ꞌcĩg mẽẽlĩg ko, hĩnĩngĩtĩ mĩnnan cĩnnĩ ꞌcĩ maka. Ẽẽtĩ ꞌcĩ ũũnnothoothĩk ꞌthẽccanẽẽta ꞌcĩg hidicig haaga, ẽtẽrꞌtha nẽẽ buúk mĩnnan ꞌcĩ hidici.”

⁴⁸ Nẽ uduhaak Yeesu ngaa nicci ĩĩnnĩk, “Atamaattiothoothĩk ꞌthẽccanẽẽta cugunnẽẽgĩ.”

⁴⁹ Ma athĩhĩ heerinniooha ũgẽẽgĩ ꞌcĩg baag arũmĩ hĩ ĩnõõnnõ nĩngaata thõõth icci ho, iita othoothito nyaagwaana ĩĩtõ, “Eet occa aattĩ gõõng iina ciee ammaannĩk eet ꞌthẽccanẽẽt ko?”

⁵⁰ Nẽ uduhaak Yeesu ngaa nicci ĩĩnnĩk, “Ẽẽlaii nganiit lemiiniti cunnẽẽnĩ. Bĩĩt lõꞌngõõc.”