ꞌLuuka 6 - ꞌBuuk cĩ Thõõth cĩ Nyekuci

Makayyioohit cĩ Kõr cĩ ꞌYiommaanõ

¹ Kõr umwa cĩ ꞌYiommaanõ, baa ẽꞌngẽrkẽẽthan Yeesu hĩ nuyyiook cĩgĩnnĩg hõrggẽẽnaa cĩ mana cĩ ꞌgẽẽmẽ, nĩngĩtĩ ẽttẽẽdanĩ nuyyiooha cĩgĩnnĩg ko ꞌgẽẽmẽ nẽ ĩꞌngĩnyta adahita.

² Ajin hinnia Variꞌtheei ũgẽẽgĩ ĩhõõggõ anneek, “Adĩmannu thõõth ꞌcĩ hõllõngaa ẽlẽmĩ nyattalĩ Kõrraa cĩ ꞌYiommaanõ inni?”

³ Nĩngĩtĩ ẽdẽcõõthĩkĩ Yeesu ĩhõõggõ annẽẽkĩ, “Nga itigiilit niig thõõth baa adĩman Daavide hĩ eet baag õõkõr hĩ ĩnõõnnõ, baa adak ĩhõõggõ magĩthĩ?

⁴ Baa aduhun nẽẽ ꞌCieeth cĩ Nyekuci nẽ ũũk uduk ũbũnẽẽt ꞌcĩg aꞌngirannii ꞌcĩg aĩ nyattalĩ occa aduk paadĩrꞌnya dioo nẽ ẽꞌngẽraak ũgĩ eet ꞌcĩg õõkõr hĩ ĩnõõnnõ ho buúk.”

⁵ Nẽ ĩttoorĩk Yeesu ĩĩnnĩk, “Ĩĩn Ngeertĩ Eeto Makayyioohit cĩ Kõr cĩ ꞌYiommaanõ.”

Aaꞌnyĩk Yeesu eet hũbũna Kõrraa cĩ ꞌYiommaanõ

⁶ Ma Kõr umwa tarĩ cĩ ꞌYiommaanõ, ũũk Yeesu ꞌCieethaa cĩ Laiitto nẽ illimanõõ. Ammũdeek baa aaĩ ẽẽtĩ umwaa ꞌcĩ adaakna ĩba cĩ aꞌthiit cobbi tõõ nĩngaata.

⁷ Baa arrĩĩppan Variꞌtheei hĩ ꞌlimmanniook cĩg nyattaalak, ꞌgõõl ꞌcĩ occa adtuuhanĩ Yeesu ngaatĩ adĩmanĩ thõõth ꞌcĩ abathĩ, hátĩ hõhõppõõcanit ĩnõõnnõ haggamĩ. Nĩngĩtĩ akannĩ nẽẽg ĩnõõnnõ hẽbẽrĩ jurrung, hudtuukta hatĩ má occa ẽẽla eet Kõrraa cĩ ꞌYiommaanõ ho.

⁸ Nẽẽthĩ, baa ammũdeek aga Yeesu muhẽẽnĩt cĩnĩĩng ko, nĩngĩtĩ annẽẽkĩ eet ꞌcĩ alalliaa ĩba cĩ aꞌthiit cobbi ho, “Ẽlẽ, tĩnga daho bĩĩl ꞌjieena hicitti eeta vẽlẽk.” Nĩngĩtĩ ĩꞌngaannĩ ẽẽtĩ noho warac nẽ ĩbĩl ꞌjieena nĩngaata.

⁹ Ma ho, ĩĩnnĩk Yeesu ĩhõõggõ, “Ĩꞌnya da nõõ hijinuung naa ngagiita, aũlan nyattaala ngaatĩ hadĩmanĩ ꞌgii ꞌcĩ abũnnaa Kõrraa cĩ ꞌYiommaanõ hode ngaatĩ hadĩmanĩ ꞌcĩ abathĩ? Aũlan ngaatĩ hẽẽlanĩ rũgẽt cĩ eeto, hode ngaatĩ halahanẽẽkĩ hadaak?”

¹⁰ Nĩngĩtĩ akannĩ Yeesu ĩhõõggõ vẽlẽk hẽbẽrĩ nẽ ĩĩnnĩk eet ꞌcĩ adaakna aꞌthiiti ho, “Õõd aꞌthiit cunni hũũlan.” Ma baa ma õõd ẽẽtĩ nicciee aꞌthiit ko, ũbũna aꞌthiiti nĩĩcĩ noho.

¹¹ Alĩĩlĩ hinnia nẽẽg hodohohit heengti kak nẽ othoothito nyaagwaana ĩĩtõ, “Hadahĩ occa ꞌthẽk Yeesu neegi?”

ꞌThooyyiak õmmõtõ hĩ ꞌramma

¹² Ma kõr umwa waathinnioohĩ nĩĩcag noho, ũũk õtõd Yeesu muur nẽ ũũk ala Nyekuc nĩĩca haal.

¹³ Ma baa ĩĩ lõõcĩ wataak, ũtũvva nẽẽ nuyyiook cĩgĩnnĩg vẽlẽk nẽ ẽbẽra õmmõtõ hĩ ꞌramma nẽ aaꞌnyĩk hĩĩtõ ꞌthooyyiak cĩgĩnnĩg.

¹⁴ Baa ẽbẽra nẽẽ ꞌThimõõnẽ (nẽ akateek ꞌthaar ꞌcĩg haĩ Pẽẽtũrũ) nẽ tarĩ ẽbẽra ꞌgõtõnĩ Pẽẽtũrũ ꞌcĩ haĩ Andrea hĩ ꞌJeemith hĩ Yõaannẽ, hĩ Pilippo hĩ Bartolomeeo,

¹⁵ hĩ Maatteeo hĩ Tomaaꞌthio, hĩ ꞌJeemith ngeertĩ Aliveo hĩ ꞌThimõõnẽ ꞌcĩ baa haĩ ꞌThilot,

¹⁶ hĩ ꞌJuuda ngeertĩ ꞌJeemithi hĩ ꞌJuuda Ithkarioote baa hatĩ aku ĩĩn hoppocciaahit.

Ũnũ lothippiti Yeesu

¹⁷ Ma baa ulluuccia nẽẽg muura hujjieen, iita ĩbĩlĩt nuyyiooha hĩ Yeesu ngamwaanĩ unaahatõõ. Baa irriamaneek ĩnõõnnõ lothippiti cĩ nuyyiook cĩgĩnnĩg hĩ eet ꞌcĩg mẽẽlĩg gẽrrẽẽt ꞌcĩg allũnganniaa looccaa cĩ ꞌJudeea hĩ ꞌJeruꞌthalẽma, hĩ ũgĩ ꞌcĩg au ĩĩcĩ dẽmẽt cĩ ꞌTire hĩ ꞌThidõõnẽ.

¹⁸ Baa au athĩhĩ eeta cieeg ꞌlimman cĩnnĩ ho, nĩngĩtĩ aaꞌnyĩkĩ nẽẽ ĩhõõggõ hũbũttaathõ mooriꞌthioohĩĩ cĩggĩĩng. Nẽ baa eelliaa eeta ꞌcĩg aꞌnyak loriẽẽt ꞌcĩg abathĩ buúk.

¹⁹ Baa atab eeta vẽlẽk ahum ĩnõõnnõ, hĩnĩngĩtĩ baa aku ꞌtirrianĩ ꞌcĩ aaꞌnyĩkĩ nẽẽ eet hũbũttaathõ ho ẽllaa cĩnnĩ.

ꞌGattan hĩ ꞌcĩĩnẽnĩt

²⁰ Nĩngĩtĩ akannĩ Yeesu nuyyiook cĩgĩnnĩg hẽbẽrĩ nẽ ĩĩnnĩk, “Aggatatteeu niig ꞌcĩg iiginnu hullaha ho, ĩĩn habuccieet cĩ Nyekuci cunuung.

²¹ Aggatatteeu niig ꞌcĩg adakuung magĩthĩ ꞌyioko ho, auunnu hatĩ aꞌnyarru. Aggatatteeu niig ꞌcĩg aluyyu ꞌyioko ho, au hatĩ accamanoothiku uruta.

²² Aggatatteeu niig hatĩ aaburreekuung eeta, nẽ ibiꞌthuunga nẽ odoomtuung nẽ utuburruung aaut hĩ eeta ꞌcĩg abaꞌthu, hĩnĩngĩtĩ Ngeertĩ Eeto.

²³ “Baarkit, baa adĩmaneek eeta cugguung põrõvẽtaaꞌnya thooꞌthiok ꞌcĩg aattĩg hĩ cieeg dẽẽdẽ. Nẽẽthĩ ꞌyioko, ma ẽdẽẽnyta hĩ ngagiita, accamattoothĩk nẽ iꞌnyiahattu taliitta! Hĩnĩngĩtĩ aꞌnyaku hatĩ niig ꞌbaaninit cunuung hẽẽtahujjieen.

²⁴ “Nẽẽthĩ, pĩĩrnanĩt hĩ ngagiit balliook, hĩnĩngĩtĩ ummuddiaau niig bũnnai cunuung ẽlẽk.

²⁵ Pĩĩrnanĩt hĩ ngagiit eet ꞌcĩg aꞌnyaku ꞌgẽẽn ꞌcĩ maka ꞌyioko ho, ooyyu hatĩ niig magĩĩtha. Pĩĩrnanĩt hĩ ngagiit eet ꞌcĩg accamanoothiku ꞌyioko ho, au hatĩ arruuennu kõr umwa.

²⁶ Pĩĩrnanĩt hĩ ngagiit eet ꞌcĩg athithannuung eeta vẽlẽk aĩ adĩmannu thooꞌthiok ꞌcĩg abũnnaa, baa ꞌthẽk ꞌgõõl ꞌcĩ athithanĩ maajiha põrõvẽtaaꞌnya baag ĩĩn oloꞌngiaak niccia.

Mĩnnan ꞌcĩ haꞌnyaheek mĩrõk

²⁷ “Nẽẽthĩ, haduhaakuung ngagiit ꞌcĩg athĩknaangu nganĩĩt ko hanneekuung, ĩmmĩnanit mĩrõk cugguung. Ĩdĩmanit eet ꞌcĩg aaburreekuung ngagiit jurrung.

²⁸ Aggatanit eet ꞌcĩg accĩĩnnuung ngagiit nẽ alayyiooyyu eet ꞌcĩg adĩmannuung ngagiit ꞌbuth.

²⁹ Má atabaaꞌngi ẽẽtĩ umwaa mũũcĩc, aꞌnyĩĩk hatabaang ꞌcĩ gõlla buúk. Má adiim õkõõĩ ẽẽtĩ umwaa cẽrẽm cunni hõdẽĩ, aꞌnyĩĩk hũũhĩ umwa tarĩ.

³⁰ Ẽẽl eet ꞌcĩg alayyi nganiita nẽ má ũũhĩ ẽẽtĩ umwaa ꞌgii cunni, ma hadiimi hõbõdaakiina.

³¹ Ĩdĩmatteek ꞌgoonogu thooꞌthiok ꞌcĩg occa adiimmu niig ĩhõõggõ hĩdĩmatteehuung ngagiita.

³² “Má ammĩnannu niig eet ꞌcĩg ammĩnannuung ngagiit dioo, occa ꞌthẽk ꞌyioko ainnu ĩdĩmattu authet ꞌcĩ abũnnaa? Tananga ꞌthẽccanniooha buúk ammĩnan eet ꞌcĩg adĩman ĩhõõggõ jurrung.

³³ Nẽ má adĩmannu niig eet ꞌcĩg abũnnaa hĩ ngagiit dioo jurrung, bũnnai thĩ ꞌyioko ꞌthẽk cunuung ko inoono? Tananga ꞌthẽccanniooha buúk adĩman noho.

³⁴ Má aaꞌnyiku niig eet ꞌcĩg agayyu hucuhattaauung ꞌgiimwa, hĩnĩngĩtĩ agayyu ngaatĩ hatĩ au adũmanĩ, occa ꞌthẽk accamanaannuung Nyekuci ngagiita? Aaꞌnyĩk ꞌthẽccanniooha buúk ꞌgõõnõgĩ, hĩnĩngĩtĩ aga nẽẽg aĩ adũmanneet hatĩnĩ.

³⁵ Nẽẽthĩ, ĩmmĩnanit mĩrõk cugguung nẽ ĩdĩmatteehu thooꞌthiok ꞌcĩg abũnnaa. Nẽ má aaꞌnyiku ĩhõõggõ ꞌgiimwa, ma hadiimmu hoboddiaakuung tarĩ. Ĩnõõ ꞌcĩ hatĩ ammũdaannu ꞌbaaninit ꞌcĩ maka gẽrrẽẽt nẽ iittu lõhõlĩ cĩg Nyekuc ꞌcĩ ĩllõõan vẽlẽk. Hĩnĩngĩtĩ tarbal nẽẽ hĩ eet ꞌcĩg ĩĩn ꞌthẽccanniook hĩ ꞌcĩg hõllõngaa atalĩ ĩnõõnnõ buúk.

³⁶ Atamaattik ꞌgoonogu hĩcĩ ammaannikuung ngagiit Baangẽẽtĩ cunuung.”

ꞌGõõl ꞌcĩ hẽttẽẽdĩkĩ ꞌgoonogeet thõõth

³⁷ Ma nĩngaata, irrioonĩk Yeesu ĩhõõggõ tarĩ ĩĩnnĩk, “Ma hetteediku ꞌgoonogu thooꞌthiok, hátĩ hiittiõõ hõllõngaa etteedothoothĩkuung ngagiit buúk thooꞌthioha. Atamaattik ꞌgoonogu, hátĩ atammaattihoothĩk niig buúk.

³⁸ Aanytĩk ꞌgoonogu ꞌbaaninit nẽẽthĩ hatĩ aaꞌnyĩhoothĩhuung ngagiit buúk. Má adĩmannu noho, au hatĩ ammũdaannu niig buúk ꞌbaaninit ꞌcĩ maka gẽrrẽẽt, ꞌcĩ abatan hĩ haala ꞌcĩg acĩĩdothoothĩk lohod hĩbbĩt hudduutti loota, hĩllõõan baa aaꞌnyiku niig ꞌgoonogu.”

³⁹ Baa nẽ uduhaak nẽẽ ĩhõõggõ thõõth ꞌcĩ awantoothĩk ko ĩĩnnĩk, “ꞌYioko ꞌthẽk ẽẽtĩ ꞌcĩ rubenĩ occa atĩꞌthĩt ꞌgõõnĩ ꞌcĩ rubenĩ? Hõllõngaa hinnia occa adhuhoothĩk nẽẽg vẽlẽk ꞌwoor?

⁴⁰ Aitiõõ loholeec cĩ ꞌthukuulo hõllõngaa ĩllõõan ꞌlimmannioohit cĩnnĩ. Nẽẽthĩ, loholeec ꞌcĩ illimanĩ jurrung, aduhõõ hatĩ nẽẽ hĩ ꞌlimmannioohit cĩnnĩ thõng.

⁴¹ “Inni cĩĩn tahahaac ꞌcĩ mĩllĩꞌnyĩ hebereecaa cĩ ꞌgotonoonu nẽ iittiõõ hõllõngaa acini iggooli ꞌcĩ aaĩ hebereecaa cunni ho?

⁴² Occa gõõng anneehi nii ꞌgotonu, ‘ꞌGõtõna, ĩꞌnya hittihaii tahahaac hebereecaa cunni,’ nẽ nẽẽ aitiõõ hõllõngaa acini iggooli hebereeca cunni ẽmmẽn? Nii oloꞌngiaahiti, ꞌtiha nõõ iggooli hebereecaa cunni nẽ thĩ hatĩ icinu ꞌgõõl ꞌcĩ attihaanĩ tahahaac hebereecaa cĩ ꞌgotonoonu.

Hẽẽt ꞌcĩ abbiiri

⁴³ “Aitiõõ hẽẽt ꞌcĩ abũnnaa hõllõngaa õddõngta ꞌgẽẽn ꞌcĩ abathĩ nẽ aitiõõ hẽẽt ꞌcĩ abathĩ hõllõngaa õddõngõta ꞌgẽẽn ꞌcĩ abũnnaa.

⁴⁴ Agayyi hẽẽt ꞌgẽẽnaa ꞌcĩ õddõngta nẽẽnĩ. Aitiõõ eeta hõllõngaa adũũca ꞌmũũnĩ hẽẽnĩĩ ꞌcĩg ĩĩn bĩlla, hode hẽẽn ꞌcĩg abbiiri cĩg viinoaak hẽẽnĩĩ ꞌcĩg ĩĩn bĩlla.

⁴⁵ Adĩman eeta ꞌcĩg abũnnaa thooꞌthiok ꞌcĩg abũnnaa, hĩnĩngĩtĩ bũnnai ꞌcĩ aaĩ ꞌthinneetinii cĩggĩĩng nẽ adĩman eeta ꞌcĩg abathĩ thooꞌthiok ꞌcĩg abathĩ, hĩnĩngĩtĩ bathi ꞌcĩ aꞌnyak nẽẽg ꞌthinneetinii cĩggĩĩng. Hĩnĩngĩtĩ ẽtẽrꞌtha thooꞌthioha ꞌcĩg aduha ẽẽtĩ ꞌgii ꞌcĩ aaĩ ꞌthĩnĩtatõõ cĩnnĩ.”

Teheꞌnyioohit ꞌcĩ ẽggẽẽnyĩth hĩ ꞌcĩ aggiithi

⁴⁶ Nĩngĩtĩ annẽẽkĩ Yeesu ĩhõõggõ, “Inni niig utuvvuyyiaangu nganĩĩt ĩĩttĩhaangu, ‘Makayyioohit, Makayyioohit,’ nẽ iittiõõ hõllõngaa adĩmannu thõõth ꞌcĩ haduhaakuung naa ho?

⁴⁷ Ĩꞌnya huduhaahuung eet ꞌcĩ aaĩ hutuno ꞌcĩ occa aku athĩhĩ thooꞌthiok cĩgannĩg nẽ idticanõõĩ.

⁴⁸ Aaĩ nẽẽ hĩ ẽẽtĩ ꞌcĩ ma ẽhẽnyĩt ꞌcieeth, ada nõõ ꞌlõõhĩt huuꞌthĩk jurrung nẽ ẽtẽhẽnya loota biyyiẽẽnĩ nẽ ꞌyioko hikia tawanĩ cĩ tammu cobbi buúk, hõllõngaa hatĩ arribanni ꞌcieeth cĩnnĩ ho, hĩnĩngĩtĩ ẽhẽnytĩ jurrung.

⁴⁹ Nẽẽthĩ, ẽẽtĩ ꞌcĩ athĩhĩ thõõth caannĩ nẽ hõllõngaa adticaniini, aaĩ nẽẽ hĩ ẽẽtĩ ꞌcĩ ẽhẽnyta ꞌcieeth hõllõngaa ada ꞌlõõhĩt huuꞌthĩk. Nẽ ma ikia tawanĩ cobbiẽẽnĩ, arriban hatĩ ꞌcieeth tĩho looc hĩ lõõcĩ ꞌthĩĩ.”