ꞌLuuka 5 - ꞌBuuk cĩ Thõõth cĩ Nyekuci

ꞌThooyyiak ꞌcĩg oou

¹ Baa kõr umwa abĩlĩ Yeesu dẽmẽtaa cĩ bũlũc ꞌcĩ haĩ ꞌJẽnẽꞌtharẽt, alliman lothippiꞌnya ꞌcĩg õꞌngõnyõõnĩ ꞌgõõl ꞌcĩ auuni hĩ ĩnõõnnõ, hiita hĩthĩhĩt thõõth cĩ Nyekuci.

² Nĩngĩtĩ acĩnõõꞌthĩ nẽẽ haahũlĩt ꞌramma dẽmẽtaa cĩ bũlũcõ, ꞌcĩg baag ũũnnĩk ꞌgammiooha cĩg ulugoonnu ꞌcĩg baag nga ũũny nyelelewwaꞌnya cĩggĩĩng.

³ Ma nĩngaata, õtõd haahũl cĩ eet umwa ꞌcĩ haĩ ꞌThimõõnẽ nẽ uduhaak ĩnõõnnõ hẽẽjẽhĩ haahũl hĩdĩĩc bũlũcatõõ. Nĩngĩtĩ iccioloonganĩ haahũlatõõ nẽ illiman eeta.

⁴ Ma baa ẽdẽcaak thõõth, uduhaak ꞌcĩ ĩĩn ꞌThimõõnẽ ĩĩnnĩk, “Bĩtĩ haahũl ngaatĩ uuthiki bũlũca nẽ udhuheehu nyelelewwaꞌnya maamĩtõõ, hátĩ ꞌgaam ulugo.”

⁵ Ẽdẽcĩ hinnia ꞌThimõõnẽ aĩ, “Makayyioohit, hĩttĩmatta aabaal haal, nẽ hiꞌthihi ꞌgii ꞌcĩ haggamma. Nẽẽthĩ, hĩcĩ aduha nii ho, ĩꞌnya mĩĩ nẽẽ hajanẽẽhĩ naa noho.”

⁶ Ma baa adhuheek nẽẽg nyelelewwaꞌnya bũlũcatõõ ho, aggam hinnia ulugo ꞌcĩg mẽẽlĩg ꞌrĩng hiꞌthiattaaĩ herreecci nyelelewwaꞌnya.

⁷ Nĩngĩtĩ avvaanĩ ꞌgõõnõgĩ ꞌcĩg baag aattĩg haahũlĩtĩ ũgẽẽgĩ, hiita heelito ĩhõõggõ. Ma nĩngaata, iita aarrik nẽẽg ulugo haahũlĩtĩ vẽlẽk, hĩbbĩt hĩcĩ aĩ hakuuyyia maama.

⁸ Ma baa acĩn ꞌThimõõnẽ ꞌcĩ haĩ ꞌthaar ũgĩ Pẽẽtũrũ thõõth icci ho, akat huruꞌnyia muumaa cĩ Yeesu nẽ ĩĩ, “Makayyioohit, ma hakuu hõbõktõ hĩ nganĩĩta, hĩnĩngĩtĩ hĩĩnĩ naa ꞌthẽccannioohit.”

⁹ Baa abulan ĩnõõnnõ hĩ ꞌgõõnõgĩ thõõth ꞌcĩ aggamĩ ulugo ꞌcĩg mẽẽlĩg ko gẽrrẽẽt.

¹⁰ Nẽ ubulan ꞌgõõnõgĩ ꞌcĩg haĩ ꞌJeemith hĩ Yõaannẽ buúk gẽrrẽẽt. Baa ĩĩn cieeg lõhõlĩ cĩg eet ꞌcĩ haĩ ꞌThebedeeo. Ma nĩngaata, uduhaak Yeesu ꞌThimõõnẽ ĩĩnnĩk, “Ma hiꞌngolli ꞌgii umwa, iꞌthianaanĩ kõr nicci, ulutu hatĩ gõõng nii eet hiita hĩthĩhĩt thõõth cĩ Nyekuci hĩgõõng aggami ulugo.”

¹¹ Nĩngĩtĩ agurraaki nẽẽg haahũlĩt cĩggĩĩng ko dẽmẽtaa cĩ bũlũcõ nẽ ũtũngteek ꞌgii vẽlẽk nĩngaata, nĩngĩtĩ anũĩ Yeesu.

Eet ꞌcĩ adak helleggeri

¹² Ma baa nga aaĩ Yeesu ꞌtaaũna, uppwaanna eet umwaa ꞌcĩ adak helleggeri. Ma adtuuha ẽẽtĩ nicciee Yeesu ho, ẽttẽẽd looc muumaa cĩnnĩ nẽ ala ĩnõõnnõ ĩĩnnĩk, “Makayyioohit, má atabi, aaꞌnyaa hũbũna.”

¹³ Nĩngĩtĩ ahumi Yeesu ĩnõõnnõ nẽ ĩĩnnĩk, “Hatabbii, bũna!” Ma hĩdĩĩkoothong, iꞌnginõõthĩ helleggeri.

¹⁴ Nĩngĩtĩ ilootĩ Yeesu ĩnõõnnõ annẽẽkĩ, “Ma hõkõ haduhaahi eet umwa thõõth icci ũdũt. Bĩĩt teretheek paadĩr ẽlẽ cunni nẽ aaꞌnyĩhuu Nyekuc ꞌbaaninit hĩ baa aduha Mũũꞌtha, hátĩ hĩĩ terethiinit hĩ ĩhõõggõ ꞌcĩ aĩ, ũbũnauu niina.”

¹⁵ Baa aalla ĩꞌthanothoothĩk nyeemuut cĩ Yeesu ho lõkõrẽẽt vẽlẽk noho. Nĩngĩtĩ au athĩknĩ eeta ĩnõõnnõ nẽ aaꞌnyĩk ꞌcĩg õmmõõrĩ hũbũttaathõ mooriꞌthioohĩĩ cĩggĩĩng.

¹⁶ Nẽẽthĩ, baa gõõng õkõ Yeesu ꞌgoolliohĩĩ ũgẽẽgĩ ĩĩcĩg aayyi ẽmmẽn nẽ alaõ.

Aaꞌnyĩk Yeesu eet ꞌcĩ ahuuli hũbũna

¹⁷ Kõr umwa, baa nga alliman Yeesu eeta, iita Variꞌtheei hĩ ꞌlimmanniook cĩg nyattaalak ꞌcĩg baag au olooyyiohĩĩ cĩg ꞌGalileea hĩ ꞌJudeea hĩ ꞌJeruꞌthalẽma nẽ iita aauto loota nĩngaata. Nẽ baa ammũdeek aaĩ ꞌtirriani cĩ Makayyiookto hĩ Yeesu ꞌcĩ aaꞌnyĩkĩ nẽẽ eet ꞌcĩg õmmõõrĩ hũbũttaathõ.

¹⁸ Ma ho, uppwaatta eeta ũgẽẽgĩ ꞌcĩg irriongana eet ꞌcĩ alalliaa ẽlẽ lotoonwa nẽ ĩttĩmanit ngaatĩ adiim õõĩ ĩnõõnnõ ꞌcieetõõ hõõt haarrik ngaatĩ aayyi Yeesu.

¹⁹ Nẽ hĩnĩngĩtĩ baa aꞌnyaman ĩhõõggõ ngaatĩ õõyyĩ ꞌcieetõõ hĩnĩngĩtĩ lothippit, otodit ꞌcieeth ĩꞌthõng lokor nẽ õõt erreccia hutuli umwa lokora nẽ õyõyyõõranit eet nicci lotoonwa noho, ĩꞌthõng hõdõlan nĩngĩtĩ ꞌcĩ aayyi Yeesu.

²⁰ Ma acĩn Yeesu lemiinit cĩnĩĩng ko, othoothĩk moorriahit ĩĩnnĩk, “ꞌGõõna, ũtũngtoothĩk nganiit ꞌthẽccanẽẽta cugunnẽẽgĩ.”

²¹ Ammuk hinnia Variꞌtheei hĩ ꞌlimmanniook cĩg nyattaalak ꞌthinneetinii cĩggĩĩng aĩ, “Eet ꞌcĩ nganĩ ciee õdõõm Nyekuc ko? Nganĩ umwaa ꞌcĩ occa ammaannĩk ꞌthẽccanẽẽt? Nyekuc dioo ꞌcĩ occa ammaannĩhĩ.”

²² Baa aga Yeesu muhẽẽnĩt cĩnĩĩng ko, nĩngĩtĩ ẽdẽcõõthĩkĩ ĩhõõggõ annẽẽkĩ, “Inni aꞌnyahit niig muhẽẽnĩt ꞌcĩ abathĩ ꞌthinneetinitõõ cugguung ko?

²³ Ĩꞌnya da hijinuunga, ammũjĩ thõõth inoo, ꞌcĩ hannẽẽkĩ eet, ‘Ũtũngtoothĩk ꞌthẽccanẽẽta cugunnẽẽgĩ,’ hode ngaatĩ hannẽẽkĩ, ‘Tĩnga bĩtõ?’

²⁴ Nẽẽthĩ ꞌyioko, hatabi heterꞌtheekuung agaac ngaatĩ haꞌnyahĩ naa Ngeertĩ Eeto ꞌtirrian ꞌcĩ hammaannĩkĩĩ eet, hĩnĩngĩtĩ ꞌthẽccanẽẽt cĩggĩĩng loota nĩnga.” Nĩngĩtĩ annẽẽkĩ eet ꞌcĩ alalliaa ẽlẽ ho, “Tĩnga bĩtõ. Thõhõt lotoonu cunni ho buúk.”

²⁵ Ma hĩdĩĩkoothong, ĩtĩnga ẽẽtĩ nicciee hẽbẽrẽẽnnĩĩ cĩggĩĩng vẽlẽk noho warac nẽ õthõhõt lotoonu nĩngĩtĩ õkõõĩ ĩĩcĩ olu adĩkthõõꞌthĩ Nyekuc ꞌjieena.

²⁶ Baa nẽ ubulan thõõth ciee lothippit niccia hũtũrũũr nẽ ĩdĩhĩthĩt Nyekuc ĩĩtõ, “Hĩcĩtta aattĩ kõr nicci ꞌgii ꞌcĩ gõõng nga hĩcĩtta hõdõõkõthĩ.”

Ũtũvva Yeesu ꞌLeevi

²⁷ Ma uruta, ĩtĩnga Yeesu ũũk battaala nẽ udtuuha eet umwa ꞌcĩ haĩ ꞌLeevi ꞌcĩ ĩĩn luttioohit cĩ occoro iccioloongan ngaatĩ dtiico. Ma ho, ĩĩnnĩk ĩnõõnnõ, “Nũaa nganĩĩta.”

²⁸ Nĩngĩtĩ ũũnnĩkĩ ꞌLeevi dtiic cĩnnĩ ho noho ꞌcõm, nẽ ũnũ ĩnõõnnõ.

²⁹ Nẽ baa ũũk aarĩhĩ ꞌLeevi Yeesu karrama cobbi gẽrrẽẽt õlõõ cĩnnĩ. Nĩngĩtĩ õõ aduhẽẽnĩ eeta ꞌcĩg alũt occoro hĩ eet ũgĩ buúk hĩ ĩhõõggõ.

³⁰ Ongoongoeek hinnia Variꞌtheei hĩ ꞌlimmanniook cĩg nyattaalak nuyyiook cĩg Yeesu nẽ ijinit ĩĩttĩk, “Aduheennu gõõng hĩ eet ꞌcĩg alũt occoro hĩ ꞌthẽccanniook hõdẽĩ inni?”

³¹ Nẽ ẽdẽc Yeesu ĩhõõggõ ĩĩnnĩk, “Hõllõngaa eet ꞌcĩ abũnnaa ꞌcĩ adiim akĩĩm, nẽẽthĩ, eet ꞌcĩ õmmõõrĩ ꞌcĩ adiim ĩnõõnnõ.

³² Baa hõllõngaa hakuu naa, hĩnĩngĩtĩ eet ꞌcĩg abũnnaa. Hakuu naa hikia hẽẽla ꞌthẽccanniook hũtũngteek ꞌthẽccanẽẽt cĩggĩĩng.”

Ijinit eeta Yeesu ꞌgõõl ꞌcĩ ẽdẽtaanĩ eleeti

³³ Nẽ ijinit nẽẽg Yeesu tarĩ ĩĩttĩk, “Hacĩnna naag nuyyiook cĩg Yõaannẽ hõdõõkõthĩ ẽdẽta eleeti ꞌgẽẽna nẽ alayyio gẽrrẽẽt. Hacĩnna cĩg Variꞌtheei buúk adĩman noho nẽ aalla aduhi cugunnig nẽ uhuddi hõdõõkõthĩ noho inni?”

³⁴ Ẽdẽcĩ Yeesu anneek, “ꞌYioko niig occa aaꞌnyiku heerinniook cĩg nyattaraanak hedettia eleeti hatĩ nga arũmĩ nẽẽg hĩ nyattaraan?

³⁵ Nẽẽthĩ, aku hatĩ kõrra ꞌcĩ aggamiaanĩ nyattaraan hĩ ĩhõõggõ, waathinniook tĩko thĩ ꞌcĩg hatĩ ẽdẽtaanĩ nẽẽg eleeti.”

³⁶ Nĩngĩtĩ aduhaakĩ nẽẽ ĩhõõggõ thõõth ꞌcĩ awantoothĩk ko anneek, “Aitiõõ ẽẽtĩ ꞌcĩ occa attiha cẽrẽm ꞌcĩ ĩĩn ngeju nẽ uhubeek ĩcĩ ũnũũk tõõ. Nẽ má ĩdĩman noho, occa hinnia ẽrrẽẽc nẽẽ cẽrẽm ꞌcĩ ĩĩn ngeju ho. Nẽ aitiõõ haburkẽcĩ ꞌcĩ ĩĩn ngeju ho hõllõngaa õõkõrõõ hĩ ꞌcĩ ũnũuk ko.

³⁷ Nẽ aitiõõ ẽẽtĩ ꞌcĩ occa adũddeek mẽrtĩ cĩ viinoo ꞌcĩ nga ĩĩn ngeju hutubaawa ꞌcĩ ũnũũk tõõ. Nẽ má ĩdĩman noho, occa hinnia hatĩ alib mẽrta ꞌcĩ ĩĩn ngeju ho hutuba.

³⁸ Occa ꞌthẽk aarĩhoothĩk mẽrta cĩ viinoo ꞌcĩ nga ĩĩn ngeju hutubaawa ꞌcĩ nga ĩĩn ngeju buúk.

³⁹ Nẽ aitiõõ ꞌthẽk ẽẽtĩ ꞌcĩ occa accamana mẽrtĩ cĩ viinoo ꞌcĩ nga ĩĩn ngeju hĩllõõan ꞌcĩ ĩĩ ĩtĩba tõõ. Õthõõth hatĩ nẽẽg aĩ, ‘Ĩllõõan ĩtĩbaaĩ.’ ”