ꞌLuuka 4 - ꞌBuuk cĩ Thõõth cĩ Nyekuci

ꞌTĩmman cĩ Yeesu

¹ Ma baa õbõda Yeesu ĩĩcĩ hidioo cĩ ꞌJõrdanĩ, baa aaĩ Lorii ꞌcĩ Ẽllẽẽmĩth hĩ ĩnõõnnõ, nĩngĩtĩ õkõõĩ Lorii ꞌcĩ Ẽllẽẽmĩth ko ĩnõõnnõ ĩĩcĩ horu ꞌcĩ õdõhõhĩĩ kak.

² Nĩngĩtĩ õkõ attĩmanĩ habuui cĩ loriẽẽt ꞌcĩg abathĩ ĩnõõnnõ waathinniook hẽẽn ꞌwec horrwaa ĩtĩho. Nẽ waathinniook nicciag, baa hõllõngaa aduhi nẽẽnĩ. Ma baa edeccia thooꞌthioha cieeg vẽlẽk, ikia adak ĩnõõnnõ magĩthĩ.

³ Ma ho, ĩttĩman habuui cĩ loriẽẽt ꞌcĩg abathĩ ĩnõõnnõ ĩĩnnĩk, “Má ĩĩnĩ nii Ngeertĩ Nyekuci dĩdĩ, duhaak da bẽẽ icci hũtũhũĩ hĩĩ ũbũnĩ.”

⁴ Ẽdẽcĩ Yeesu ĩnõõnnõ anneek, “Aitiõõ! Eheeddi ꞌBuuhaa cĩ Nyekuci aĩ, ‘Aitiõõ ẽẽtĩ hõllõngaa arũgĩ, hĩnĩngĩtĩ ꞌgẽẽn dioo.’ ”

⁵ Nĩngĩtĩ õkõõĩ habuui cĩ loriẽẽt ꞌcĩg abathĩ ĩnõõnnõ muuraa ꞌcĩ uuni kĩdak. Ma hĩdĩĩkoothong, eteretheek ĩnõõnnõ habuccieeꞌnya cĩg lootu vẽlẽk.

⁶ Nĩngĩtĩ annẽẽkĩ habuui cĩ loriẽẽt ꞌcĩg abathĩ ho ĩnõõnnõ, “Haaꞌnyii hatĩ naa nganiit bulẽẽnĩt cĩ loonyin iccig hĩ makaaꞌthĩt cĩnĩĩng vẽlẽk, hĩnĩngĩtĩ baa aanytĩhoothĩhaa nganĩĩta, nẽ occa haaꞌnyihi eet ꞌcĩ haccamanaa naana.

⁷ Haaꞌnyii hatĩ ĩhõõggõ vẽlẽk nganiita, hatĩ ĩdĩhĩthaa nganĩĩta.”

⁸ Ẽdẽcĩ hinnia Yeesu anneek, “Eheeddi ꞌBuuhaa cĩ Nyekuci aĩ, ‘Dĩhĩth Nyekuc Makayyioohit cunni nẽ idticanoothihuu ĩnõõnnõ diooni.’ ”

⁹ Ma nĩngaata, ũũhĩ habuui cĩ loriẽẽt ꞌcĩg abathĩ ho ĩnõõnnõ ꞌJeruꞌthalẽma nẽ ũũk õtõdĩ ꞌCieeth cĩ Nyekuci lokora ngaatĩ ĩĩn ꞌthilo nẽ ũũk ĩttĩman ĩĩnnĩk, “Má ĩĩnĩ nii Ngeertĩ Nyekuci dĩdĩ, dhuhi da ngaati!

¹⁰ Hĩnĩngĩtĩ eheeddi ꞌBuuhaa cĩ Nyekuci aĩ, “Aduhaak hatĩ Nyekuci aajĩlẽẽt cĩgĩnnĩg huꞌthuutti nganiit jurrung;

¹¹ nẽ alaamtaii athĩnĩĩ cĩggĩĩng, hátĩ hiittiõõ hõllõngaa aduulli bẽẽ ꞌthoo.”

¹² Ẽdẽcĩ Yeesu ĩnõõnnõ anneek, “Aĩ ꞌBuuhi cĩ Nyekuci, ‘Ma hattĩmani Makayyioohit Nyekuc cunni.’ ”

¹³ Ma baa ẽdẽcaak habuui cĩ loriẽẽt ꞌcĩg abathĩ ho ngaatĩ attĩmanĩ Yeesu ꞌgoolliohĩ vẽlẽk, ikia ũtũngeek ĩnõõnnõ hĩdĩhĩdĩĩc, ĩꞌthõng hũmmũda kõr ꞌcĩ occa hatĩ aku attĩmanĩ ĩnõõnnõ tarĩ.

Dtiic cĩ Yeesu ꞌGalileeattĩ

¹⁴ Nĩngĩtĩ õbõdõõꞌthĩ Yeesu õkõõĩ ꞌGalileea ꞌtirriaanaa cĩ Lori cĩ Ẽllẽẽmĩthĩ. Baa ĩꞌthanothoothĩk nyeemuut ꞌcĩ akuuni nẽẽ ho looc niccia vẽlẽk.

¹⁵ Ma nĩngaata, ũũk illiman nẽẽ eet ꞌCieethini cĩg Laiittak nẽ ĩdĩhĩthĩt eeta vẽlẽk ĩnõõnnõ.

Ũtũbũrĩt eeta Yeesu Naaꞌtharẽta

¹⁶ Ma baa õdõlan Yeesu Naaꞌtharẽt ꞌtaaũnaa ĩbaa alĩꞌthaanĩ nẽẽ ho, ũũk illiman eet ꞌCieethaa cĩ Laiitto hĩgõõng hõdõõkõthĩ Kõrraa cĩ ꞌYiommaanõ. Ma ho, ikia ĩtĩnga nẽẽ ũũk itigiil ꞌBuuk cĩ Nyekuci.

¹⁷ Baa aaꞌnyĩhoothĩk ĩnõõnnõ ꞌBuuhi cĩ Põrõvẽtaac Iꞌthaia. Ma baa abbuuk nẽẽ ho, itigiil nĩngĩtĩ eheeddi aĩ,

¹⁸ “Aaꞌnyĩhoothĩhaa nganĩĩt Lorii cĩ Makayyiookto, hĩnĩngĩtĩ ẽbẽraawa nẽẽ nganĩĩt hillimaneek eet ꞌcĩg ĩĩn hullaha, nyeemuut cĩnnĩ ꞌcĩ abũnnaa. Ĩꞌthõõannaa nẽẽ hikia huduhaak baabuuthnya nyeemuut ꞌcĩ ooggianĩ nẽẽgĩ, hĩ nyeemuut cĩ acĩnẽẽnĩ rubenniaaha, nẽ hikia hẽẽla eet ꞌcĩg arratan ꞌgoonoggia,

¹⁹ nẽ huduhaaha eet hĩĩnnĩha, ikia irkit ꞌcĩ hatĩ ẽtẽrꞌthaanĩ Makayyioohiti bũnnai cĩnnĩ.”

²⁰ Nĩngĩtĩ aꞌnyũũgĩ nẽẽ ꞌbuuk nẽ ittioonĩk eet ꞌcĩ ĩĩn dticciannioohit nĩngaata nẽ ũũk aau loota. Ma nĩngaata, akatti eeta vẽlẽk ꞌcĩg baag aattĩg ꞌCieethaa cĩ Laiitto ĩnõõnnõ hẽbẽrĩ,

²¹ nẽ iꞌthianaaĩ uduhaak ĩhõõggõ ĩĩnnĩk, “Thõõth aa athiknu niig hagiili naa ꞌBuuhaa cĩ Nyekuci, ikia ũttũbanoothĩk kõr nicci.”

²² Baa athithan eeta ĩnõõnnõ gẽrrẽẽt nẽ ubulan thõõth ꞌcĩ abũnnaa ꞌcĩ aduha nẽẽ ho ĩhõõggõ gẽrrẽẽt. Nĩngĩtĩ ajinõõnĩ nẽẽg nyaagwaana aĩnnĩ, “Hõllõngaa nooyyia ngeertĩ Yothebo cieeni?”

²³ Baa nẽ uduhaak Yeesu ĩhõõggõ ĩĩnnĩk, “Haga naa õthõõꞌthaangu hatĩ ainnu, ‘Akĩĩm, aꞌnyĩĩk ẽlẽ cunni hũbũna! Dĩman da thooꞌthiok baag hathĩkna aĩ adĩmani nii Kapernauma, ꞌtaaũnaa cunni ngaati buúk.’

²⁴ “Haduhaakuung dĩdĩ, aitiõõ põrõvẽtaacĩ ꞌcĩ ẽlẽmĩ eeta cĩg ꞌtaaũn cĩnĩĩng tõõ.

²⁵ Baa mẽẽlĩg ngaatĩbõyyĩꞌnya looccaa cĩ Ĩꞌthĩraẽlĩ, korrioohĩĩ baag aayyi põrõvẽtaacĩ Eliijja loota nĩnga. Waathinnioohĩĩ baag aitiõõnnĩ tammu irkiꞌnyia iyyio hĩ nyĩlõhĩ tõrkõnõn, ikia ĩꞌthaan nyarõnĩ cobbi looc vẽlẽk.

²⁶ Nẽẽthĩ, baa hõllõngaa ĩꞌthooyyiak Eliijja ĩhõõggõ. Baa ĩꞌthooyyi nẽẽ hũũk hẽẽl ngaatĩbõyyĩ umwa ꞌcĩ aaĩ ꞌtaaũnaa cĩ Tharẽvvathĩ, looccaa cĩ ꞌThidõõnẽ.

²⁷ Nẽ baa mẽẽlĩg eeta ꞌcĩg adak helleggeri looccaa cĩ Ĩꞌthĩraẽlĩ korrioohĩĩ baag põrõvẽtaac Eliiꞌtha buúk, nẽẽthĩ, baa hiꞌthihi ꞌcĩ eelliaa. Baa eet ꞌcĩ looc ꞌcĩ ꞌrĩĩng ꞌcĩ haĩ Naaman cĩ looc cĩ Thiiria dioo ꞌcĩ baa eelliaa.”

²⁸ Ma baa athĩhĩ eeta ꞌCieethaa cĩ Laiitto thõõth icci ho, iita ĩlĩĩllẽẽcõ gẽrrẽẽt.

²⁹ Nĩngĩtĩ ĩꞌngaannĩ nẽ utugurit Yeesu ootti ꞌtaaũna battaala, lõhẽrẽhẽrraa cĩ muur ꞌcĩ ehenytiini ꞌtaaũnĩ cĩnĩĩng ko nẽ idiimito udhuhit ꞌthilla.

³⁰ Adukna hinnia Yeesu eetinitõõ, nĩngĩtĩ õkõõĩ ꞌgõõlaa cĩnnĩ.

Itiggiaeek Yeesu lori ꞌcĩ abathĩ mõrõ

³¹ Nĩngĩtĩ allũũcẽnĩ Yeesu õkõõĩ Kapernauma, ꞌtaaũn ꞌcĩ aaĩ looccaa cĩ ꞌGalileea, nẽ ũũk illiman eet Kõrraa cĩ ꞌYiommaanõ.

³² Baa abulan ꞌlimmanĩ cĩnnĩ ho eet gẽrrẽẽt, hĩnĩngĩtĩ baa aꞌnyak nyeemuut cĩnnĩ ho ꞌtirriani.

³³ Ammũdeek baa aaĩ ẽẽtĩ umwaa ꞌcĩ aꞌnyak lori ꞌcĩ abathĩ tõõ ꞌCieethaa cĩ Laiitto ho, nĩngĩtĩ õkõlẽẽkĩ lorii ꞌcĩ abathĩ ho luulu aĩnnĩ,

³⁴ “ꞌWui! Yeesu cĩ Naaꞌtharẽtĩ, ne ꞌcĩ adiimi nii hĩ ngagĩĩt ko? Akuu arukeet nii ngagĩĩt thõng? Hagayyii naa nganiita, ĩĩnĩ nii Eet ꞌcĩ Elleemi cĩ Nyekuci!”

³⁵ Ma nĩngaata, eggerenyeek Yeesu lori nicci ĩĩnnĩk, “ꞌJaahõ kim!” Nĩngĩtĩ ĩttanyĩ lorii ꞌcĩ abathĩ ho eet nicci looc hẽbẽrẽẽnnĩĩ cĩg eet vẽlẽk noho ꞌlir, nĩngĩtĩ aꞌnginõõꞌthĩ haau ẽẽtĩ lõꞌngõõc.

³⁶ Baa anyamũũtana thõõth ciee eet vẽlẽk, nĩngĩtĩ ajinõõnĩ nyaagwaana aĩnnĩ, “ꞌLimman occa gõõng ꞌcĩ aaĩ hutuno ciee, ꞌcĩ aduhaakĩ ẽẽtĩ ciee loriẽẽt ꞌtirriaana hĩ makaaꞌthĩta, nẽ uduhutta loriẽẽta eetini battaala ho?”

³⁷ Nĩngĩtĩ ĩꞌthanõõthĩkĩ nyeemuut cĩ Yeesu ho loonyin ꞌcĩg obokii nĩngaata vẽlẽk.

Aaꞌnyĩk Yeesu eet ꞌcĩg mẽẽlĩg hũbũttaathõ

³⁸ Ma nĩngaata, uduhuna Yeesu ꞌCieethaa cĩ Laiitto nẽ ũũk õlõõ cĩ ꞌThimõõnẽ. Ammũdoothĩk hinnia inyitti ꞌThimõõnẽ aaburii ẽlẽ, nĩngĩtĩ alaĩ eeta Yeesu hẽẽl ĩnõõnnõ.

³⁹ Ma ho, ũũk iggiingi Yeesu ngaatĩ oongiyyi morwahit nicciee ho nẽ eggerenyeek abuurꞌthet tĩho hũtũngeek ĩnõõnnõ. Nĩngĩtĩ abũnnayyĩ morwahit nĩĩcĩ noho herehoothĩk ĩhõõggõ.

⁴⁰ Ma baa okoloothĩk kõrra, aꞌnyaktaak eeta Yeesu eet ꞌcĩg aꞌnyak mooriꞌthiook cũũmõ cũũmõ nẽ ataadĩk nẽẽ athĩn cĩgĩnnĩg ootinii cĩggĩĩng hõdẽĩ hõdẽĩ, nĩngĩtĩ abũnnayyĩ nẽẽg vẽlẽk.

⁴¹ Baa mẽẽlĩg eeta ꞌcĩg aꞌnyak loriẽẽt ꞌcĩg abathĩ, nĩngĩtĩ aduhaakĩ Yeesu ĩhõõggõ huduhutta eleetinii cĩg eetuk battaala nẽ urruuyyiõthĩ ĩĩtõ, “Ĩĩnĩ nii Ngeertĩ Nyekuci!” Nẽẽthĩ, hĩnĩngĩtĩ baa aga nẽẽg ngaatĩ ĩĩnnĩ Yeesu Krĩstõ, ikia eggerenyeek nẽẽ ĩhõõggõ hiittiõõ hõllõngaa õthõõthĩ.

Irrioon Yeesu ꞌCieethaa cĩ Laiitto

⁴² Ma baa ĩĩ lõõcĩ wataak, ũtũngeek Yeesu ꞌtaaũn nẽ ũũk ngaatĩ õkõ aayyi ẽmmẽn, nĩngĩtĩ adiimi eeta ĩnõõnnõ gẽrrẽẽt. Nẽ ma baa ammũda nẽẽg ĩnõõnnõ ho, ĩttĩmanit ngaatĩ hõllõngaa ẽlẽmaakĩ hĩnĩk tarĩ.

⁴³ Baa hinnia anneek Yeesu eet, “Hidiima naa hũũk hillimaneeha eet nyeemuut ꞌcĩ abũnnaa cĩ habuccieet cĩ Nyekuci ꞌtaaũnnioohĩ ũgẽẽgĩ buúk, hĩnĩngĩtĩ baa thõõth ꞌcĩ hĩꞌthooyyianĩĩ naa ho niccia.”

⁴⁴ Nĩngĩtĩ õkõ araĩ allimanĩ eet ꞌCieethini cĩg Laiittak looccaa cĩ ꞌJudeea.