ꞌLuuka 3 - ꞌBuuk cĩ Thõõth cĩ Nyekuci

Ũkũmaneek Yõaannẽ Batitta ꞌgõõla

¹ Ma baa irkit ꞌcĩ ĩĩn õmmõtõ hĩ ꞌtur, ꞌcĩ ĩĩnnĩ Tiberio habu cobbi cĩ ꞌRooma hũtũrũũr nẽ ĩĩ Ponthio Pĩlaatõ makayyioohit cĩ ꞌJudeea, nẽ ĩĩ Ẽrõõdẽ habu cĩ ꞌGalileea nẽ tarĩ ĩĩ ꞌgotonnia Pilippo habu cĩ Iturea hĩ Tarakoniti nẽ ĩĩ Lĩthaniathĩ habu cĩ Abileene,

² baa ĩĩn Annathĩ hĩ Kaĩava paadĩrꞌnya ꞌcĩg obbitig. Baa nohota, baa õthõõthak Nyekuci Yõaannẽ ꞌcĩ baa aaĩ horrwatõõ ꞌcĩ õdõhõhĩĩ kak. Baa haĩ maaꞌnyĩ Yõaannẽ ꞌThakaria.

³ Nĩngĩtĩ õvvõõĩ Yõaannẽ looc cĩ ꞌJõrdanĩ hũtũrũũr, irrioonĩkĩ eet hoboddia hĩ Nyekuc nẽ aggamit baattithimo, hátĩ hũtũngtoothĩk ꞌthẽccanẽẽta cĩggĩĩng.

⁴ Haau hĩ baa eheeddi ꞌbuuhaa cĩ põrõvẽtaac Iꞌthaia aĩ, “Ẽggẽrẽny mõlõõhĩ cĩ eet umwa horrwaa ꞌcĩ õdõhõhĩĩ kak aĩ, ‘Ũkũmatteek ꞌgõõl cĩ Makayyiookto, aanytĩk ꞌgõõl cĩnnĩ hũũlan.

⁵ Idtibanit liilliok nẽ ĩꞌthaattu muurriok vẽlẽk hĩĩ ꞌthĩĩ. Aanytĩk ꞌgoolliok ꞌcĩg mõrgõlĩg hũũlanit nẽ ũkũmattu ꞌgoolliok ꞌcĩg aĩ ngõdõngõdõ hĩĩtõ lũlũlũlũ.

⁶ Nẽẽthĩ, hatĩ ĩcĩnĩt eeta vẽlẽk elliaanĩt cĩ Nyekuci.’ ”

⁷ Baa mẽẽlĩg eeta ꞌcĩg adiim au aggam baattithimo hĩ Yõaannẽ. Nĩngĩtĩ annẽẽkĩ nẽẽ ĩhõõggõ, “Niig lohollia cieeg hũkaaꞌnyanu ho, nganĩ ꞌcĩ aduhaakuung aĩ, iita baattithimooa, hátĩ iliittia ukẽẽnĩt ꞌcĩ hatĩ nga aku ho?

⁸ Ĩdĩmanit thooꞌthiok ꞌcĩg occa ẽtẽrꞌtha aĩ, ũtũngteehu niig ꞌthẽccanẽẽt cugguung dĩdĩ. Nẽẽthĩ, ma nga hammuku hainnu, ‘Haꞌnyaka baaĩ nẽẽ naag baangeet cĩnaang Abũrahaamõ.’ Nẽ haduhaakuung naa hanneekuung, ũũlũ Nyekuci ngaatĩ occa ũũkcĩ biyyiẽẽn iccig hĩĩtõ lõhõlĩ cĩg Abũrahamĩ.

⁹ Nẽẽthĩ ꞌyioko, ũkũmanoothĩk mẽlẽẽhĩ cĩ ukẽẽnĩt cĩ Nyekuci, hẽtẽngẽd cõrrẽẽn cĩg heenu ẽlẽk. Hẽẽt ꞌcĩ hatĩ hõllõngaa õddõngta ꞌgẽẽn ꞌcĩ abũnnaa, eꞌngeddoothĩk hatĩ looc nẽ udhuhoothĩk ꞌgwoyyiatõõ.”

¹⁰ Nĩngĩtĩ ajini eeta ĩnõõnnõ annẽẽkĩ, “Hĩdĩmatta ꞌyioko hutuno?”

¹¹ Ẽdẽcĩ Yõaannẽ ĩhõõggõ anneek, “Ẽẽtĩ ꞌcĩ aꞌnyak ceremwa ꞌramma, aꞌnyĩĩk hẽꞌngẽraak ꞌgõõnĩ ꞌcĩ hiꞌthihi cẽrẽm nẽ ẽẽtĩ ꞌcĩ aꞌnyak ꞌgẽẽn, aꞌnyĩĩk hotholit hĩ ꞌgõõnĩ ꞌcĩ adak magĩthĩ.”

¹² Baa au aggam eeta ꞌcĩg alũt occoro buúk baattithimo nẽ ijinit Yõaannẽ ĩĩttĩk, “Ma naag hĩdĩmatta hutuno ꞌlimmannioohit?”

¹³ Ẽdẽcĩ nẽẽ ĩhõõggõ anneek, “Ma hadaku eet hatĩ aluttu occoro.”

¹⁴ Nĩngĩtĩ au ajini athegereeꞌnya ũgẽẽgĩ buúk ĩnõõnnõ annẽẽkĩ, “Ma naag hĩdĩmatta hutuno?” Ẽdẽcĩ nẽẽ ĩhõõggõ anneek, “Ma harratanaannu eet ꞌrabbẽẽta, hode ma haꞌngaaꞌnyu eet umwa haaga. Aꞌnyĩĩk hũũppattuung ꞌrabbẽẽta ꞌcĩg adaku nyĩlõhẽẽnnĩ ho dioo.”

¹⁵ Baa ẽrẽ eeta vẽlẽk Krĩstõ hikia hĩdĩĩkoothong nẽ baa abũraneek nẽẽg ngaatĩ agaĩ hatĩ horoong ĩĩn Yõaannẽ Krĩstõ.

¹⁶ Nĩngĩtĩ ẽdẽcĩ Yõaannẽ ĩhõõggõ vẽlẽk annẽẽkĩ, “Habattithannuung naa ngagiit maamĩ haaga, nẽẽthĩ, aaĩ hatĩ eet umwaa cobbi ꞌcĩ aku hĩdĩĩkoothong ꞌcĩ ĩllõõannaa nganĩĩta, eet ꞌcĩ hõllõngaa hũũlũ naa ngaatĩ hõõganĩ lõhamũcĩ cĩg caawa cĩgĩnnĩg. Aku hatĩ aggameekuung nẽẽ baattithimo Loriiaa ꞌcĩ Ẽllẽẽmĩthĩ hĩ ꞌgwoyyia.

¹⁷ Aꞌnyak nẽẽ hẽddẽm cĩ anyiitto attiaa cĩnnĩ. Aany hatĩ nẽẽ haal hilongana nẽ ẽtẽgẽẽl haauto cũũmõ cũũmõ nẽ ũtũũth ngarrimo ꞌgwoyyiaa ꞌcĩ ĩĩn ꞌgelemit ꞌcĩ hõllõngaa adĩĩtĩ ũdũt.”

¹⁸ Baa irrioonĩk Yõaannẽ eet ꞌgoolliohĩĩ ꞌcĩg mẽẽlĩg, ngaatĩ aduhaakĩ ĩhõõggõ nyeemuut ꞌcĩ abũnnaa.

¹⁹ Ma baa eggerenyeek Yõaannẽ habu Ẽrõõdẽ, hĩnĩngĩtĩ thõõth ꞌcĩ attihi ngagõtõnõõnĩ ꞌcĩ haĩ Erodia hĩ thooꞌthiok ꞌcĩg abathĩ ꞌcĩg gõõng adĩman nẽẽ ho,

²⁰ ikia aarĩk Ẽrõõdẽ Yõaannẽ baabuutha. Thõõth ꞌcĩ baa abathĩ gẽrrẽẽt ꞌcĩ adĩman nẽẽ niccia.

Aggam Yeesu baattithimo

²¹ Ma baa aggameek Yõaannẽ eet vẽlẽk baattithimo, ikia aggam Yeesu buúk baattithimo. Ma baa nga alayyi nẽẽnĩ, ubbuuhi hẽẽtkujjieen

²² nẽ ulluuccia Lorii ꞌcĩ Ẽllẽẽmĩth ꞌcĩ aaĩ hĩ bõllõõĩ. Nĩngĩtĩ õthõõthanĩ mõlõõhĩ umwaa hẽẽtahujjieen aĩnnĩ, “Ĩĩnĩ nii Loholeec caannĩ ꞌcĩ hamĩna. Haccamanannii maaꞌnyu gẽrrẽẽt.”

Hĩbaangĩ cĩg Yeesu

²³ Baa iꞌthianaanĩ Yeesu dtiic cĩnnĩ baa õbõktĩ ĩĩtõ irkiꞌnyia cĩgĩnnĩg hẽẽn iyyio. Baa ammuk eeta aĩ, ĩĩn nẽẽ ngeertĩ Yothebo, nẽ ĩĩn Yothebo ngeertĩ Heli,

²⁴ ĩĩn Heli ngeertĩ Maꞌthatĩ ĩĩn Maꞌthatĩ ngeertĩ ꞌLeevi, ĩĩn ꞌLeevi ngeertĩ Melki, ĩĩn Melki ngeertĩ Jannaĩ, ĩĩn Jannaĩ ngeertĩ Yothebo,

²⁵ nẽ baa ĩĩn Yothebo ngeertĩ Mattaꞌthiathĩ, ĩĩn Mattaꞌthiathĩ ngeertĩ Aamothĩ, ĩĩn Aamothĩ ngeertĩ Nahumi, ĩĩn Nahumi ngeertĩ Ethilĩ, ĩĩn Ethilĩ ngeertĩ Naggaĩ,

²⁶ ĩĩn Naggaĩ ngeertĩ Maathĩ, ĩĩn Maathĩ ngeertĩ Mattaꞌthiathĩ, ĩĩn Mattaꞌthiathĩ ngeertĩ Themeini, ĩĩn Themeini ngeertĩ ꞌJothẽhĩ, ĩĩn ꞌJothẽhĩ ngeertĩ ꞌJõõda,

²⁷ ĩĩn ꞌJõõda ngeertĩ Yõannanĩ, ĩĩn Yõannanĩ ngeertĩ ꞌRẽẽtha, ĩĩn ꞌRẽẽtha ngeertĩ ꞌTherubbabẽlĩ, ĩĩn ꞌTherubabẽlĩ ngeertĩ Thealtiẽẽlĩ, ĩĩn Thealtiẽẽlĩ ngeertĩ Neeri

²⁸ ĩĩn Neerĩ ngeertĩ Melki, ĩĩn Melki ngeertĩ Aaddi, ĩĩn Aaddi ngeertĩ Kõthamĩ, ĩĩn Kõthamĩ ngeertĩ Ẽlmadaamĩ, ĩĩn Ẽlmadaamĩ ngeertĩ Eri,

²⁹ ĩĩn Eri ngeertĩ ꞌJooꞌthua, ĩĩn ꞌJooꞌthua ngeertĩ Elieꞌthẽrĩ, ĩĩn Elieꞌthẽrĩ ngeertĩ ꞌJorimi, ĩĩn ꞌJorimi ngeertĩ Maꞌthatĩ, ĩĩn Maꞌthatĩ ngeertĩ ꞌLeevi,

³⁰ ĩĩn ꞌLeevi ngeertĩ ꞌThimiõõnẽ, ĩĩn ꞌThimiõõnẽ ngeertĩ ꞌJuuda, ĩĩn ꞌJuuda ngeertĩ Yothebo, ĩĩn Yothebo ngeertĩ ꞌJõnamĩ, ĩĩn ꞌJõnamĩ ngeertĩ Eliaakimĩ,

³¹ ĩĩn Eliaakimĩ ngeertĩ Mẽlẽa, ĩĩn Mẽlẽa ngeertĩ Mẽnna, ĩĩn Mẽnna ngeertĩ Mattatha, ĩĩn Mattatha ngeertĩ Nathanĩ, ĩĩn Nathanĩ ngeertĩ Daavide,

³² ĩĩn Daavide ngeertĩ ꞌJeeꞌthe, ĩĩn ꞌJeeꞌthe ngeertĩ Obeede, ĩĩn Obeede ngeertĩ ꞌBõathĩ, ĩĩn ꞌBõathĩ ngeertĩ ꞌThalmõnĩ, ĩĩn ꞌThalmõnĩ ngeertĩ Nahathõnĩ,

³³ ĩĩn Nahathõnĩ ngeertĩ Ammĩnadabĩ, ĩĩn Ammĩnadabĩ ngeertĩ Adimini, ĩĩn Adimini ngeertĩ Arni, ĩĩn Arni ngeertĩ Hethoronĩ, ĩĩn Hethoronĩ ngeertĩ Pẽrẽthĩ, ĩĩn Pẽrẽthĩ ngeertĩ ꞌJuuda,

³⁴ ĩĩn ꞌJuuda ngeertĩ Yakobo, ĩĩn Yakobo ngeertĩ Iꞌthaako, ĩĩn Iꞌthaako ngeertĩ Abũrahamĩ, ĩĩn Abũrahamĩ ngeertĩ ꞌTẽra, ĩĩn ꞌTẽra ngeertĩ Naahõrĩ,

³⁵ ĩĩn Naahõrĩ ngeertĩ Theruhi, ĩĩn Theruhi ngeertĩ ꞌReu, ĩĩn ꞌReu ngeertĩ Pẽlẽhĩ, ĩĩn Pẽlẽhĩ ngeertĩ Ẽbẽrĩ, ĩĩn Ẽbẽrĩ ngeertĩ ꞌThẽẽla,

³⁶ ĩĩn ꞌThẽẽla ngeertĩ Kaĩnanĩ, ĩĩn Kaĩnanĩ ngeertĩ Arpathadĩ, ĩĩn Arpathadĩ ngeertĩ ꞌThẽmĩ, ĩĩn ꞌThẽmĩ ngeertĩ Nõõa, ĩĩn Nõõa ngeertĩ Lamẽhĩ,

³⁷ ĩĩn Lamẽhĩ ngeertĩ Methuthẽla, ĩĩn Methuthẽla ngeertĩ Ẽẽnõhĩ, ĩĩn Ẽẽnõhĩ ngeertĩ ꞌJarẽdĩ, ĩĩn ꞌJarẽdĩ ngeertĩ Mahalalẽlĩ, ĩĩn Mahallalẽlĩ ngeertĩ Kẽnaanĩ,

³⁸ ĩĩn Kẽnaanĩ ngeertĩ Ẽnõthĩ, ĩĩn Ẽnõthĩ ngeertĩ Thẽthĩ, ĩĩn Thẽthĩ ngeertĩ Aadamĩ, nẽ ĩĩ Aadamĩ ngeertĩ Nyekuci.