ꞌLuuka 24 - ꞌBuuk cĩ Thõõth cĩ Nyekuci

Ũrũga Yeesu daahĩtha

¹ Lomidikaawa ngerrenita gẽrrẽẽt, ĩtĩngaacõ ngaaĩ ngõõrrẽẽnĩĩ baag akũmaneek nẽ ootti ĩĩcĩ ꞌloohu.

² Ammũdoothĩk hinnia eꞌnyeehothoothĩk bẽẽ baa aꞌnyũũgẽnĩ ꞌlook ngadiiha,

³ ma aduhun ĩĩttõõ ho, ammũdoothĩk hinnia iꞌnginõõthĩ ẽlẽ cĩ Makayyioohit Yeesu.

⁴ Ma baa nga ĩccaad ĩhõõggõ thõõth cieeni, uppwaatta eeta ꞌramma ꞌcĩg ahimit ceremwa ꞌcĩg attaalĩthĩ nẽ ĩbĩlĩt ojoonu ngaatĩ aattiyyi nẽẽg ko.

⁵ Tẽẽlꞌthĩtaa cĩnĩĩng, akatti ngaaĩ hẽbẽrĩ looc nĩngaata, nĩngĩtĩ õthõõthĩkĩ eeta niccieeg ĩhõõggõ annẽẽkĩ, “Inni idiimit eet ꞌcĩ arũgĩ daakiahĩtõõ ho?

⁶ Iittiõõ nẽẽ hõllõngaa aaĩ ngaati. Iyyia ũrũga nẽẽnĩ. Ummuhuttooth thõõth baa aduhaakuung nẽẽ ngagiit baa nga arũmeennu ꞌGalileea aĩ,

⁷ ‘Aaꞌnyĩhoothĩk hatĩ Ngeertĩ Eeto athĩnĩĩ cĩg ꞌthẽccannioohu nẽ õtõddõĩ hurucceea. Ma kõr ꞌcĩ ĩĩn iyyio, arũgna hatĩ daahĩtha.’ ”

⁸ Nĩngĩtĩ ammuhunõõꞌthĩ nẽẽg thooꞌthiok baagĩnnĩg ko.

⁹ Ma baa oboddia nẽẽg ĩĩcĩ waanyõ, iita uduktaak thõõth icci ꞌthooyyiak baag ĩĩn õmmõtõ hĩ hõdẽĩ hĩ eet vẽlẽk.

¹⁰ Baa haĩ ngaaĩ iccig Maria Madalẽẽna hĩ Yõaanna hĩ Maria aattĩ ꞌJeemithi hĩ ꞌgõõnõgĩ ũgĩ ꞌcĩg baag aduhaak thõõth icci ꞌthooyyiak.

¹¹ Nẽẽthĩ, baa aaĩ thõõth ciee hĩcĩ ĩĩn õlõng haaga hĩ eeta, nĩngĩtĩ hõllõngaa ẽlẽmmĩ thõõth tĩho.

¹² Ma nĩngaata, ĩtĩnga Pẽẽtũrũ ukul ũũk ĩĩcĩ ꞌloohu. Ma õdõlan ko, ammũdoothĩk hinnia ceremwa baag amũmmũũraniini ẽlẽ cĩ Yeesu diooni. Nĩngĩtĩ adhirriaangini nĩngaata ẽrẽhĩ ꞌgii ꞌcĩ aĩ hĩdĩman ũdũt.

Ommottio Yeesu hĩ nuyyiook ꞌramma

¹³ Ma kõr niccia noho, baa ĩꞌngaathĩ nuyyiooha ꞌramma ꞌJeruꞌthalẽm õõ õlõõ ꞌcĩ haĩ Emmaauth ꞌcĩ baa ꞌrẽẽnĩ aꞌnyak maaĩlꞌnya tũrkĩramma.

¹⁴ Ma baa nga athithanoothi nẽẽg thõõth cĩ daahĩth cĩ Yeesu ho,

¹⁵ uppwaannak Yeesu ĩhõõggõ nẽ ũrũmtõõthĩ ꞌthoo hõdẽĩ.

¹⁶ Baa aitiõõ nẽẽg hõllõngaa aga ngaatĩ ĩĩnnĩ Yeesu ꞌcĩ õõkõr hĩ ĩhõõggõ ho.

¹⁷ Nĩngĩtĩ ajini Yeesu ĩhõõggõ annẽẽkĩ, “Ne thĩnõ ꞌcĩ athithannu ho hõlõ?” Abĩlĩ hinnia nẽẽg nẽ ĩlĩĩllẽẽcõ huꞌngurruunyti muumti.

¹⁸ Ma nĩngaata, edecoothĩk umwaa ꞌcĩ haĩ Kileopath ĩnõõnnõ ĩĩnnĩk, “Ẽlẽ, nganiit dioo ꞌcĩ ĩĩnĩ heerinnioohit ꞌJeruꞌthalẽma ꞌcĩ hõllõngaa aga thõõth baa adhukiaakeet waathinnioohĩĩ baag ibiaali ngaati?”

¹⁹ Ẽdẽcĩ Yeesu anneek, “Neegi baallĩ?” Ẽdẽcĩ nẽẽg aĩ, “Thõõth cĩ Yeesu cĩ Naaꞌtharẽtĩ, baa ĩĩn põrõvẽtaac ꞌcĩ attiran gẽrrẽẽt thooꞌthiohĩĩ ꞌcĩg õthõõthĩ nẽ idtican hẽbẽrẽẽnnĩĩ cĩg Nyekuci hĩ ĩcĩg eet vẽlẽk.

²⁰ Baa aggam makayyiooha cĩg paadĩrꞌnyaannu hĩ makayyiook cĩggaac ĩnõõnnõ, nĩngĩtĩ ẽttẽẽdĩkĩ daahĩth nẽ otoddoyyieek hurucceea.

²¹ Baa hinnia hammuka haĩnna, occa ĩnõõnnõ ꞌcĩ baa hatĩ aku õõga eet cĩg Ĩꞌthĩraẽlĩ hiita haauto lõꞌngõõc. Aꞌnyak ꞌyioko thõõth ciee iyyieni waathinniook iyyio.

²² Hakuleeka ꞌyioko hinnia ꞌjieen, hĩnĩngĩtĩ thõõth cĩ ngaaĩ ũgĩ ꞌcĩg aag õlõõk aa ngerrenita hõdõlanit waany,

²³ nẽ iittiõõ hõllõngaa ammũdoothĩk ẽlẽ cĩ Yeesu. Ma ho, iita uduktaaheet ĩĩttĩheet ĩcĩnĩt nẽẽg aajĩlẽẽt baag aduhaak ĩhõõggõ anneek ũrũga nẽẽnĩ.

²⁴ Nĩngĩtĩ ꞌyioko ĩꞌngaannĩ ꞌgoonoga ũgẽẽgĩ hõõt hĩcĩnĩt ꞌlook. Ammũdoothĩk hinnia aaĩ ꞌthẽk hĩaa aduha ngaaĩ dẽẽdẽ.”

²⁵ Ma ho, ijin Yeesu ĩhõõggõ ĩĩnnĩk, “Aggiithennu niig hutuno hõlõ! Inni ꞌthinneeti cugguung hĩĩtõ gigigigi ngaatĩ ẽlẽmmĩ thooꞌthiok vẽlẽk baag aduha põrõvẽtaaꞌnya ho?

²⁶ Erekuung baa nooyyia ngagiit ngaatĩ occa accananiini Krĩstõ nga haaꞌnyĩhoothĩk bulẽẽnĩtĩ cĩnnẽẽnĩ?”

²⁷ Nẽ ꞌthianaatta hĩ Mũũꞌtha hĩ põrõvẽtaaꞌnya vẽlẽk, uduhaak Yeesu ĩhõõggõ thõõth baa adukiaa ꞌBuuhẽtĩĩ cĩg Nyekuci, hĩnĩngĩtĩ ĩnõõnnõ.

²⁸ Ma baa õbõktõ nẽẽg hĩ õlõ ꞌcĩ õõyyĩ ho, ikia õtõ Yeesu haau hĩcĩ adiim edeceek thõng.

²⁹ Nĩngĩtĩ ĩĩlalẽẽkĩ nẽẽg ĩnõõnnõ kõmĩĩtha annẽẽkĩ, “Hũrũmtĩ hĩ ngagĩĩt ngaati, hĩnĩngĩtĩ õbõhĩ utub lõõcĩ, okoloothiki hinnia hatĩ kõrra ꞌgõõla.” Nĩngĩtĩ adukni Yeesu halang nẽ ũrũmtĩ hĩ ĩhõõggõ.

³⁰ Ma baa iccioloongan Yeesu, hátĩ hudukto, ittiha ũbũnĩ nẽ aggatana nẽ appak, nĩngĩtĩ aaꞌnyĩkĩ ĩhõõggõ.

³¹ Ma nĩngaata noho, iita agaacõ nẽẽg ĩnõõnnõ. Ma ho, iꞌnginõõthĩ Yeesu noho matadaꞌnyak.

³² Ma nĩngaata, ijitto ĩĩtõ, “Hõllõngaa nooyyia hatĩ accamanoothĩk ꞌthinneeti cĩggaac aa ẽdtẽbanaakeet nẽẽ thõõth ꞌcĩ eheeddi ꞌBuuhẽtĩĩ cĩg Nyekuci ꞌgõõla?”

³³ Nĩngĩtĩ ĩꞌngaannĩ nẽẽg hĩdĩĩkoothong nẽ oboddioothĩ ꞌJeruꞌthalẽma. Nẽ õõt ummuddioothĩk ꞌthooyyiak baag ĩĩn õmmõtõ hĩ hõdẽĩ hĩ eet ꞌcĩg arũmĩ hĩ ĩhõõggõ alũtoothĩk ngaatĩ hõdẽẽthõng,

³⁴ nẽ ĩĩttĩk ĩhõõggõ, “Ũrũga Makayyioohiti dĩdĩ, iyyia ommottio hĩ ꞌThimõõnẽ.”

³⁵ Nĩngĩtĩ aduhaakĩ nuyyiooha ꞌcĩg ĩĩn ꞌramma ho buúk ĩhõõggõ thõõth ꞌcĩ õõkõrĩ nẽẽg hĩ Yeesu ꞌgõõla, hĩ ngaatĩ au agaĩ nẽẽg ĩnõõnnõ baa hatĩ ẽꞌngẽr ũbũnĩ.

Uppwaannak Yeesu nuyyiook

³⁶ Ma baa nga õthõõth nuyyiooha thooꞌthiok iccig, ikia uppwaannak Yeesu ĩhõõggõ nẽ ĩꞌtha ĩĩnnĩk, “Aꞌnyĩĩk ganõn haau hĩ ngagiita.”

³⁷ Nĩngĩtĩ abarti nẽẽg gẽrrẽẽt nẽ ummuhit ĩĩtõ, miningit mõnõ thõng.

³⁸ Nẽ ijin Yeesu ĩhõõggõ ĩĩnnĩk, “Abarrittu gẽrrẽẽt noho inni? Ĩccaadduung ngagiit nii?

³⁹ Ĩcĩnĩt athĩn hĩ ꞌthoo cĩgannĩg. Nganĩĩt ꞌthẽk cieeni! Iita uhumtaangu nẽ ĩcĩttaangu. Aitiõõ miningit hõllõngaa aꞌnyak ẽmmẽ hĩ iding haau hĩcĩ acinnu niig haꞌnyahi naa ho.”

⁴⁰ Ma baa uduha thooꞌthiok iccig ẽlẽk, ikia eteretheek ĩhõõggõ athĩn hĩ ꞌthoo hĩcĩnĩt.

⁴¹ Baa hinnia nõõ abulan ĩhõõggõ thõõth ciee hĩ taliinit hiittiõõ hõllõngaa ẽlẽmĩ. Nĩngĩtĩ ajini Yeesu ĩhõõggõ tarĩ annẽẽkĩ, “Aꞌnyaku ꞌgiimwa ꞌcĩ occa hadahĩ?”

⁴² Baa nẽ aanytĩk ĩnõõnnõ ulugooc ꞌcĩ ogorri.

⁴³ Nĩngĩtĩ aggamaanĩ Yeesu ulugooc nicci nẽ adak hẽbẽrẽẽnnĩĩ cĩggĩĩng vẽlẽk.

⁴⁴ Ma nĩngaata, ĩĩnnĩk ĩhõõggõ, “Baa nga harũmĩ naag hĩ ngagiita, baa gõõng haduhaakuung naa hanneekuung, edeeꞌnyia hatĩ ꞌgii vẽlẽk ꞌcĩ eheeddi, hĩnĩngĩtĩ nganĩĩt nyattaalaa cĩ Mũũꞌtha hĩ ĩĩcĩ põrõvẽtaaꞌnyanu hĩ ꞌBuuhaa cĩ Tegellwaanu.”

⁴⁵ Nĩngĩtĩ abbuuhi nẽẽ ooti cĩggĩĩng hĩthĩhĩt thõõth ꞌcĩ eheeddi ꞌBuuhẽtĩĩ cĩg Nyekuci.

⁴⁶ Baa aduhaak nẽẽ ĩhõõggõ anneek, “Thõõth ꞌcĩ baa eheeddi ho cieeni. Accananni hatĩ Krĩstõ nẽ ikia ũrũga daahĩtha kõr ꞌcĩ ĩĩn iyyio,

⁴⁷ nẽ irrioonni hatĩ thõõth cĩ ũũnnõthõõthĩkĩ ꞌthẽccanẽẽta hĩ thõõth ꞌcĩ ammaannothoothĩkĩ eeta loonyini vẽlẽk ꞌthaarĩĩ cĩgĩnnĩg, iꞌthianaanĩ ꞌJeruꞌthalẽma.

⁴⁸ Iiginnu niig hẽbẽrĩ ꞌcĩg agayyu thooꞌthiok iccig vẽlẽk.

⁴⁹ Hõkõ hatĩ hĩꞌthõõakuung naa ngagiit eet baa aduha Baaba. Nẽẽthĩ, aallattia ꞌtaaũnatõõ ĩꞌthõng haaꞌnyĩhoothĩhuung ꞌtirriani ꞌcĩ aku hẽẽtahujjieen.”

Õbõdõõthĩ Yeesu hẽẽtahujjieen

⁵⁰ Ma baa ũũhĩ Yeesu nuyyiook vẽlẽk Bẽthani, õdõng athĩn cĩgĩnnĩg nẽ aggatan ĩhõõggõ.

⁵¹ Ma baa nga aggatan nẽẽ ĩhõõggõ, ũtũngeek ĩhõõggõ nẽ õdõngĩ ũũk hẽẽtahujjieen.

⁵² Nĩngĩtĩ abuluthi nẽẽg Yeesu nẽ oboddioothĩ ꞌJeruꞌthalẽma taliittaa cobbi gẽrrẽẽt.

⁵³ Nĩngĩtĩ õõ aallanĩ nẽẽg ꞌCieethaa cĩ Nyekuci nẽ ĩdĩhĩthĩt Nyekuc.