ꞌLuuka 23 - ꞌBuuk cĩ Thõõth cĩ Nyekuci

Ijin Pĩlaatõ Yeesu

¹ Nĩngĩtĩ ĩꞌngaannĩ lothippiti cĩ lokihoo vẽlẽk nẽ ootti Yeesu hĩ Pĩlaatõ.

² Nẽ iꞌthiattaaĩ õhõppõõcanit ĩnõõnnõ hĩ Pĩlaatõ ĩĩtõ, “Hammũdaanna eet icci adiim alũllũũman eet cĩggaang hĩkooꞌthia jore. Nẽ tarĩ, ũlũllũũman eet hiittiõõ hõllõngaa adũmaneek habu cobbi cĩ ꞌRooma occoro nẽ õthõõth ĩĩ, hĩĩnĩ Krĩstõ habu.”

³ Nĩngĩtĩ õkõ ajini Pĩlaatõ Yeesu annẽẽkĩ, “Ĩĩnĩ nii habu cĩ ꞌJudeei?” Ẽdẽcĩ Yeesu aĩ, “Eei, aaĩ hĩcĩ aduha nii hataa.”

⁴ Ma ho, uduhaak Pĩlaatõ makayyiook cĩg paadĩrꞌnyaannu hĩ lothippit ĩĩnnĩk, “Aitiõõ thõõth ꞌcĩ abathĩ ꞌcĩ hammũda naa ẽꞌthẽcan ẽẽtĩ ciee tõõ.”

⁵ Ara hinnia attĩnganeek nẽẽg thõõth noho aĩ, “Akannẽẽkĩ nẽẽ eet ꞌlimmaanaa cĩnnĩ looccaa cĩ ꞌJudeea, iꞌthianaanĩ ꞌGalileea ĩꞌthõng nĩngĩtĩ.”

Aꞌnyakia Yeesu hĩ Ẽrõõdẽ

⁶ Ma baa athĩhĩ Pĩlaatõ thõõth icci ho, ijin lothippit hũmmũda hatĩ ĩĩn Yeesu ꞌGalileeinit.

⁷ Nẽ ma baa ammũda nẽẽ ngaatĩ akuuni Yeesu ĩĩcĩ ꞌGalileea ho, ĩꞌthooĩk ĩnõõnnõ hũũk hĩ habu Ẽrõõdẽ ꞌcĩ baa aaĩ ꞌJeruꞌthalẽma waathinniook nicciag.

⁸ Ma baa adtuuha Ẽrõõdẽ Yeesu ho, accamanoothĩk gẽrrẽẽt, hĩnĩngĩtĩ baa gõõng adiim acĩn nẽẽ ĩnõõnnõ. Baa gõõng adiim nẽẽ acĩn Yeesu, hĩnĩngĩtĩ athĩhĩ aĩ, adĩman thooꞌthiok ꞌcĩg ĩnaat eeta.

⁹ Ma nĩngaata, ijin Ẽrõõdẽ ĩnõõnnõ thooꞌthiok ꞌcĩg mẽẽlĩg gẽrrẽẽt, ijjaak hinnia Yeesu ĩnõõnnõ kim.

¹⁰ Baa abĩlĩ makayyiooha cĩg paadĩrꞌnyaannu hĩ ꞌlimmanniook cĩg nyattaalak nĩngaata, ara õhõppõõcan ĩnõõnnõ thooꞌthiohĩĩ ꞌcĩg mẽẽlĩg ꞌrĩng.

¹¹ Nĩngĩtĩ uranganĩ Ẽrõõdẽ hĩ athegereeꞌnya cĩgĩnnĩg Yeesu nẽ odoomito thõng. Ma nĩngaata, itihimtẽẽhĩ cẽrẽm ꞌcĩ ẽllẽẽmĩthĩ ne iꞌthooyyik hõbõdõõthĩ hĩ Pĩlaatõ.

¹² Nganĩngĩtĩ kõr niccia, iita agayyio Ẽrõõdẽ hĩ Pĩlaatõ, hĩnĩngĩtĩ baa aaburroo ĩĩcĩ oou.

Etteedothoothĩk Yeesu daahĩthĩ

¹³ Ma ho, ũtũvva Pĩlaatõ makayyiook cĩg paadĩrꞌnyaannu hĩ cĩg eetuk,

¹⁴ nẽ uduhaak ĩĩnnĩk, “Aꞌnyahaakaangu niig nganĩĩt eet icci ainnu alũllũũman eet hĩkooꞌthia jore. Nẽ ꞌyioko, hijina naa jurrung hẽbẽrẽẽnnĩĩ cugguung nẽ hammũda ammĩrĩ thõõthaa ꞌcĩ abillu niig ĩnõõnnõ ho.

¹⁵ Aitiõõ Ẽrõõdẽ buúk hõllõngaa ammũda thõõth umwa, ĩnõõ ꞌcĩ ĩꞌthõõanĩ ĩnõõnnõ hõbõda hĩ ngagĩĩt ko. Icittu ꞌyioko niig buúk hiꞌthihi thõõth ꞌcĩ ẽꞌthẽcan nẽẽ ꞌcĩ occa aruhẽẽnĩ.

¹⁶ Hammuhi occa nuun hatĩ uuki haaga nẽ alahanoothĩha.”

¹⁷ Ammũdeek baa gõõng õõga Pĩlaatõ baabutheenit hõdẽẽthõng ꞌcĩ adiim lothippiti hooggia Kõrraa cĩ Haangittõõ.

¹⁸ Ma nĩngaata, awacak lothippiti ĩĩ, “Ma huunnihi, aꞌnyĩĩk ꞌthẽk huruhi! Õgaaheet Barabbath!”

¹⁹ Baa aarĩhoothĩk Barabbathĩ baabuuth, hĩnĩngĩtĩ baa ĩkõõtha jore ꞌtaaũnatõõ nẽ uruk eeta.

²⁰ Baa adiim alahaneek Pĩlaatõ Yeesu, nĩngĩtĩ ajini lothippit tarĩ.

²¹ Aalla hinnia awacak nẽẽg hĩdĩĩtĩ lõõcĩ pĩd aĩ, “Toddoeek ĩnõõnnõ hurucceea! Toddoeek ĩnõõnnõ hurucceea!”

²² Nĩngĩtĩ ajini Pĩlaatõ ĩhõõggõ hĩĩ tabattĩ iyyio annẽẽkĩ, “Inni? Ẽꞌthẽcan ẽẽtĩ ciee neegi? Aitiõõ ꞌgii umwaa ꞌcĩ hammũda naa ꞌcĩ ẽꞌthẽcan ẽẽtĩ ciee tõõ. Ma aaĩ noho, haaꞌnyihi hatĩ naa huuki nẽ alahanoothĩha.”

²³ Awacak hinnia nẽẽg gẽrrẽẽt atĩnganeek thõõth aĩ adiim ꞌthẽk Yeesu hõtõddõĩ.

²⁴ Nĩngĩtĩ ẽlẽmmĩ Pĩlaatõ thõõth cĩnĩĩng ko.

²⁵ Ma nĩngaata, õõga eet baa aarĩhoothĩk baabuutha, hĩnĩngĩtĩ thõõth ꞌcĩ ĩkõõthanĩ jore nẽ uruk eeta. Eet ꞌcĩ baa adiim lothippiti hooggia ho niccia. Nẽ aaꞌnyĩk Pĩlaatõ ĩhõõggõ Yeesu hadaktĩ ꞌgii ꞌcĩ adiim nẽẽgĩ.

Õtõddõĩ Yeesu hurucceea

²⁶ Ma baa ootti nẽẽg Yeesu, õõt aggamit athegereeꞌnya eet umwa ꞌcĩ haĩ ꞌThimõõnẽ cĩ looc cĩ Cireene ꞌcĩ baa aku ĩĩcĩ manu nẽ ĩttĩngatteek hirriongan hurucce hũnũĩ Yeesu.

²⁷ Baa anuoothi lothippiti ꞌcĩ maka gẽrrẽẽt Yeesu uruta, hĩccĩnĩt ngaaĩ ꞌcĩg alluoothi ꞌjieena, hĩnĩngĩtĩ ĩnõõnnõ.

²⁸ Nĩngĩtĩ abbuudi Yeesu ĩhõõggõ nẽ ĩĩnnĩk, “Ngaaĩ cieeg ꞌJeruꞌthalẽmĩ ho, ma haluyyaangu nganĩĩta. Utullẽẽc eleeti cugguung hĩ lõhõlĩ cugguung.

²⁹ Hĩnĩngĩtĩ aku hatĩ kõrra ꞌcĩ ainnu, ‘Aꞌnyĩĩk haggatattĩ ngaaĩ ꞌcĩg hõllõngaa arriti, hĩ heethiꞌnya ꞌcĩg nga hõtõrõõktĩ!’

³⁰ Aduhaak hatĩ nẽẽg muurriok ꞌcĩg obbitig anneek, “ ‘Irribatteetu!’ Nẽ tarĩ ĩĩttĩk muurriok ꞌcĩg hidicig buúk, ‘Utugunyteetu baaĩ nuun!’

³¹ Má hinnia ma adĩman eeta ꞌcĩg maacĩg hẽlẽggĩ iccig nga cũlak hẽẽt ko, aaĩ hinnia hatĩ hutuno hatĩ õdõhõha?”

³² Baa aꞌnyakiaa eeta ũgẽẽgĩ ꞌramma buúk ꞌcĩg ĩĩn ꞌloorriak hiita hurukti.

³³ Ma baa õdõlanit nĩngĩtĩ haĩ, “Ẽmmẽẽn cĩ õõ cĩ eeto,” otoddoyyieek Yeesu hurucceea hĩ ꞌloorriak ꞌcĩg ĩĩn ꞌramma ho buúk. Odooddĩk umwa ĩĩcĩ aꞌthiit cobbi nẽ otoddoyyieek umwa ĩĩcĩ aꞌthiit ꞌcĩ hidici.

³⁴ Ma nĩngaata, õthõõth Yeesu ĩĩ, “Baaba, tamaatĩk ĩhõõggõ, hĩnĩngĩtĩ hõllõngaa aga nẽẽg thõõth ꞌcĩ adĩman ko.” Ma ho, eꞌngerit nẽẽg ceremwa cĩgĩnnĩg ꞌgõõlẽẽ ꞌcĩ attĩmanĩ tooto.

³⁵ Baa arannĩ makayyiooha cĩg eetuk Yeesu hẽbẽrẽẽnnĩĩ cĩg lothippit ꞌcĩ baa abĩlĩ nĩngaata aĩ, “Ma gõõng ẽẽla nẽẽ eet hõdõõkõthĩ, aꞌnyĩĩk thĩ da aattĩ hẽẽla ẽlẽ cĩnnĩ kõr nicci, hatĩ ĩĩn Krĩstõ ꞌcĩ ẽbẽra Nyekuci.”

³⁶ Nĩngĩtĩ auuni athegereeꞌnya buúk nẽ urangattĩ ĩnõõnnõ nẽ aanytĩk mẽrtĩ cĩ viino ꞌcĩ ammũccarĩĩ

³⁷ nẽ ĩĩtõ, “Má ĩĩnĩ habu cĩ ꞌJudeei, ẽla thĩ da ẽlẽ cunni.”

³⁸ Ma nĩngaata, eteheeddik hurucceea thõõth ꞌcĩ aĩ, “Habu cĩ ꞌJudeei cieeni.”

³⁹ Nĩngĩtĩ õdõõmĩ ꞌloorriahiti umwa ꞌcĩ õdõõddĩ hĩ ĩnõõnnõ annẽẽkĩ, “Hõllõngaa nooyyia ĩĩnĩ nii Krĩstõ? Ẽla thiggia ẽlẽ cunni hĩ ngagĩĩt buúk.”

⁴⁰ Eggerꞌnyeek hinnia ꞌgoonnia anneek, “Aitiõõ nii hõllõngaa itieelli Nyekuc? Hõllõngaa adtuuha nii ngaatĩ huukẽnĩ naag hõdẽĩ hĩ eet icci?

⁴¹ Aũlan ngaatĩ huukẽnĩ naag, hĩnĩngĩtĩ thooꞌthiok ꞌcĩg abathĩ ꞌcĩg hadĩman naaga, nẽẽthĩ, aꞌngaaꞌnyi ẽẽtĩ ciee haaga.”

⁴² Nĩngĩtĩ annẽẽkĩ ꞌloorriahiti nicciee Yeesu, “Yeesu, muhaawaa nganĩĩt hatĩ uuhu habuccieetaa cunni.”

⁴³ Nẽ ẽdẽc Yeesu ĩnõõnnõ ĩĩnnĩk, “Haduhaakii dĩdĩ, harũmĩ hatĩ naag hĩ nganiit kõr nicci paradiiꞌthõ.”

Daahĩth cĩ Yeesu

⁴⁴ Ma baa aau kõrra lokora, ikia ĩĩ lõõcĩ vẽlẽk muguur ꞌthaaꞌnya iyyio,

⁴⁵ hĩnĩngĩtĩ baa ikia adaak kõrra. Nĩngĩtĩ appahiini cẽrẽm ꞌcĩ ẽꞌngẽr ꞌCieeth cĩ Nyekuci ĩĩttõõ hõrggẽẽna hĩĩ ꞌramma.

⁴⁶ Nĩngĩtĩ arruuẽnĩ Yeesu moloohaa cobbi gẽrrẽẽt aĩnnĩ, “Baaba, haarihi naa lori caannĩ attiaa cunni.” Ma baa õthõõth hoti ẽlẽk, ikia ẽttẽẽd nĩngaata noho.

⁴⁷ Ma adtuuha ꞌgaalac cĩ ũũrũta thooꞌthiok iccig vẽlẽk ho, ĩdĩhĩth Nyekuc nẽ ĩĩ, “Occa ꞌthẽk baa ĩĩn ẽẽtĩ ciee eet ꞌcĩ abũnnaa.”

⁴⁸ Ma baa alũtoothĩk eeta nĩngaata nẽ ĩcĩnĩt thõõth ꞌcĩ abathĩ ho, iita ommoꞌthi gẽrrẽẽt, nĩngĩtĩ õõyyĩ olooyyiohĩ.

⁴⁹ Nẽ baa aalla abĩlĩ eeta ꞌcĩg aga ĩnõõnnõ ꞌrẽẽna nĩngaata ẽbẽk thooꞌthiok iccig. Baa aattĩg ngaaĩ baag anũa ĩnõõnnõ ĩĩcĩ ꞌGalileea buúk nĩngaata.

Adaĩ Yeesu

⁵⁰ Nẽẽthĩ, baa aaĩ ẽẽtĩ ꞌcĩ abũnnaa ꞌcĩ haĩ Yothebo ꞌcĩ ĩĩn eet cĩ lothippit cĩ makayyiook cĩ eetuk nẽ baa ĩĩn eet ꞌcĩ tẽllĩ gẽrrẽẽt.

⁵¹ Baa aharreek nẽẽ thõõth ꞌcĩ adĩman ꞌgoonoggia ho. Aku Yothebo ꞌtaaũnaa cĩ Arimathea looccaa cĩ ꞌJudeea nẽ baa ẽrẽ nẽẽ habuccieet cĩ Nyekuci hikia.

⁵² Nĩngĩtĩ õkõõĩ nẽẽ hĩ Pĩlaatõ nẽ ũũk ijina ĩnõõnnõ ẽlẽ cĩ Yeesu.

⁵³ Ma ho, ikia aara nẽẽ ẽlẽ cĩ Yeesu hurucceea nẽ ũmũmmũũran cẽrẽmaa ꞌcĩ uuni nẽ ũũk aarĩk waanya ꞌcĩ acciꞌthiaa biyyia. Baa waany ꞌcĩ nga haarĩhõõthĩhĩĩ ẽlẽ cĩ eet umwa ũdũt tĩho.

⁵⁴ Baa kõr ꞌcĩ akũmanõõthĩkĩ eeta vẽlẽk tĩho, hĩnĩngĩtĩ baa õbõhĩ iꞌthianaaĩ Kõrra cĩ ꞌYiommaanõ.

⁵⁵ Ma ho, unuyyiõõthĩ ngaaĩ baag õõkõra hĩ Yeesu ĩĩcĩ ꞌGalileea Yothebo hõõt hĩcĩnĩt waany hĩ ꞌgõõl ꞌcĩ aarĩhõõthĩkĩ ẽlẽ ĩĩttõõ.

⁵⁶ Nĩngĩtĩ õõyyĩ ĩĩcĩ olu nẽ õõt ũkũmatteek ngõõrrẽẽn ꞌcĩg õꞌngõlĩ ẽmmẽdĩ. Nẽ nõõ iyyiomanit Kõrraa cĩ ꞌYiommaanõ, hĩ baa aduha tilooiniti cĩ nyattal cĩ Mũũꞌtha.