ꞌLuuka 22 - ꞌBuuk cĩ Thõõth cĩ Nyekuci

Ẽlẽm ꞌJuuda ngaatĩ õhõppõõcanĩ Yeesu

¹ Ma baa õbõhĩ kõrra cĩ Karrama cĩ Ũbũnẽẽt ꞌcĩg aitiõõ Abũũlana tõõ, ꞌcĩ haĩ Kõr cĩ Haangittõõ,

² iita idiimito makayyiooha cĩg paadĩrꞌnyaannu hĩ ꞌlimmanniook cĩg nyattaalak, ꞌgõõl ꞌcĩ occa aruhi Yeesu. Hĩnĩngĩtĩ baa ammũdeek itieelli nẽẽg eeta.

³ Nĩngĩtĩ adukni ꞌThĩttaanĩ ꞌJuuda ꞌcĩ haĩ Ithkarioote ꞌthooyyiahĩĩ ꞌcĩg ĩĩn õmmõtõ hĩ ꞌramma ho.

⁴ Ma nĩngaata, ũũk ũmmũdoothĩk ꞌJuuda makayyiook cĩg paadĩrꞌnyaannu hĩ ꞌgaala cĩg athegereeꞌnya ꞌcĩg ẽbẽk ꞌCieeth cĩ Nyekuci, nĩngĩtĩ atuhanĩ ꞌgõõl ꞌcĩ hatĩ õhõppõõcanĩ nẽẽg Yeesu.

⁵ Ma baa athĩhĩ nẽẽg thõõth cĩ ꞌJuuda ho, accamattoothĩk gẽrrẽẽt, nĩngĩtĩ ẽlẽmmĩ ngaatĩ aaꞌnyĩkĩ ĩnõõnnõ ꞌrabbẽẽt.

⁶ Nĩngĩtĩ ẽlẽmmĩ ꞌJuuda ꞌrabbẽẽt nẽ atarraaban ꞌgõõl ꞌcĩ occa aaꞌnyĩkĩ Yeesu haggamĩ ꞌgõõlaa ꞌcĩ hõllõngaa agaĩ eeta vẽlẽk.

ꞌGẽẽn cĩ Makayyiookto ꞌcĩ adtuurna

⁷ Ma baa õdõlan Kõrra cĩ Ũbũnẽẽt ꞌcĩg aitiõõ Abũũlana tõõ hĩ kõr ꞌcĩ ĩbboorini mĩꞌnyõõn ꞌcĩ ĩĩn ꞌgaarrieenit cĩ Kõr cĩ Haangittõõ,

⁸ ikia ĩꞌthõ Yeesu Pẽẽtũrũ hĩ Yõaannẽ anneek, “Õõt ũkũmatteek ꞌgẽẽn ꞌcĩ hadahĩ Kõr cĩ Haangittõõ.”

⁹ Nĩngĩtĩ ajini nẽẽg Yeesu annẽẽkĩ, “Adiimmeet ꞌyioko nii ngagĩĩt hoottia hũkũmatteeha ngaana?”

¹⁰ Ẽdẽcĩ nẽẽ ĩhõõggõ anneek, “Ma uduhuttu ꞌtaaũnatõõ, ommotoonnu hatĩ hĩ eet umwa ꞌcĩ ilolĩt deeri cĩ maamu. Unuyyiooth ĩnõõnnõ ĩꞌthõng halang ꞌcĩ õkõ adukni,

¹¹ nẽ õõt iittihu baattĩ olu, ‘Aĩ ꞌlimmannioohiti, aaĩ ꞌcieeth cĩ heerinnioohu ngaana, ꞌcĩ hatĩ hadaka naag hĩ nuyyiook cĩgannĩg ꞌgẽẽn cĩ Kõr cĩ Haangittõõ?’

¹² Õkõ hatĩ eterꞌtheekuung nẽẽ ꞌcieeth cobbi lokora ꞌcĩ ũkũmanoothĩk ẽlẽk. Õõt ũkũmatteek ꞌgẽẽn nĩngaata.”

¹³ Nĩngĩtĩ õõĩ Pẽẽtũrũ hĩ Yõaannẽ nẽ ummuddioothĩk hẽlẽggĩ vẽlẽk, aattĩg hĩaa adukiaak ĩhõõggõ nẽ ũkũmatteek ꞌgẽẽn cĩ Kõr cĩ Haangittõõ ngaatĩho.

ꞌGẽẽn cĩ ꞌjiaatinu cĩ Makayyiookto

¹⁴ Ma baa ũttũbanoothĩk kõrra, õõt udukto Yeesu hĩ ꞌthooyyiak cĩgĩnnĩg.

¹⁵ Nĩngĩtĩ annẽẽkĩ Yeesu ĩhõõggõ, “Iyyia ꞌthẽk hatabi hadahi ꞌgẽẽn cĩ Kõr cĩ Haangittõõ ho, hĩ ngagiit hõdẽĩ nga haccananĩ.

¹⁶ Hĩnĩngĩtĩ haduhaakuung dĩdĩ, iittiõõ hatĩ naa hõllõngaa haduk ꞌgẽẽn icci hĩ ngagiit tarĩ, ĩꞌthõng hikia hedeeꞌnyia habuccieetaa cĩ Nyekuci.”

¹⁷ Ma ho, ittiha hooppo cĩ viinoo nẽ aggatana nẽ ĩĩnnĩk ꞌthooyyiak “Erito hooppo icci ũhũdĩt niig vẽlẽk.

¹⁸ Hĩnĩngĩtĩ haduhaakuung dĩdĩ, iittiõõ hatĩ hõllõngaa hahudi viino tarĩ, ĩꞌthõng hikia habuccieet cĩ Nyekuci.”

¹⁹ Nĩngĩtĩ attihaanĩ ũbũnĩ nẽ aggatana. Ma ho, ẽꞌngẽr nẽ aꞌnyĩĩk ĩhõõggõ nẽ ĩĩnnĩk, “Ẽlẽ caannĩ cieeni ꞌcĩ aaꞌnyĩhoothĩkuung ngagiita, uduhit, hátĩ gõõng ummuktaayyiaangu nganĩĩta.”

²⁰ Ma urutaa ꞌcĩ edecciaaĩ ꞌgẽẽna, ittiha hooppo nẽ ĩĩ, “Ĩĩn hooppo ciee lõhõt ꞌcĩ ĩĩn ngeju cĩ biyyi cĩgannĩg, ꞌcĩg hatĩ ẽrrẽnna, hĩnĩngĩtĩ ngagiita.

²¹ Nẽ ꞌyioko, harũmeenna naag hĩ eet ꞌcĩ hatĩ õhõppõõcannaa nganĩĩt ko, tẽrẽmẽẽjawa ꞌcĩ haduhẽẽnĩ ho thõng.

²² Nẽ dĩdĩ, adaahĩ nẽẽ hatĩ Ngeertĩ Eeto hĩ baa ꞌthẽk adukiaa, nẽẽthĩ, adhukiaak hatĩ pĩĩrnanĩtĩ cobbi gẽrrẽẽt eet ꞌcĩ õhõppõõcan ĩnõõnnõ ho.”

²³ Nĩngĩtĩ iꞌthianaanĩ ꞌthooyyiaha ajinõõnĩ nyaagwaana aĩnnĩ, nganĩ occa hatĩ hõrggẽẽnaa cĩnaac ꞌcĩ hatĩ adĩman thõõth icci ho?

Ẽppẽhattõõĩ ꞌthooyyiaha makaaꞌthĩt

²⁴ Ma nĩngaata noho, ẽppẽhattõõ ꞌthooyyiaha ẽmmẽn, hĩnĩngĩtĩ thõõth cĩ eet ꞌcĩ occa maka hõrggẽẽnaa cĩnĩĩng.

²⁵ Nĩngĩtĩ ẽdẽcĩ Yeesu ĩhõõggõ annẽẽkĩ, “Habuẽẽta cĩg eet ꞌcĩg hõllõngaa ĩĩn ꞌJudeei attĩnganeek eet ꞌcĩg aggam nẽẽg thõõth nẽ makayyiooha ꞌcĩg attiranĩ, avvĩ eleeti cĩggĩĩng anneek ꞌgõõnõgĩ eet vẽlẽk.

²⁶ Nẽẽthĩ, ma hattiyyu niig buúk hĩ nẽẽgĩ. Aꞌnyĩĩk eet ꞌcĩ maka hõrggẽẽnaa cunuung, haau hĩ loholeec ꞌcĩ hidiciẽẽnĩ nẽ aꞌnyĩĩk eet ꞌcĩ ĩĩn makayyioohit hõrggẽẽnaa cunuung, hĩĩ dticciannioohit.

²⁷ Occa ꞌyioko eet ꞌcĩ aaĩ tẽrẽmẽẽjawa ꞌcĩ maka, hode eet ꞌcĩ adticanoothĩk ꞌgõõnõgĩ? Occa hõllõngaa eet ꞌcĩ aaĩ tẽrẽmẽẽjawa? Nẽẽthĩ, haaĩ naa hĩ ngagiit hĩ ẽẽtĩ ꞌcĩ adticanoothĩk ꞌgõõnõgĩ.

²⁸ “Ĩĩgĩnnu niig eet ꞌcĩg harũmĩ hĩ nganĩĩt pĩĩrnatta caannĩ.

²⁹ Nẽ ꞌyioko, haaꞌnyuung naa ngagiit ĩĩtõ habuẽẽta, hĩ baa aꞌnyaa nganĩĩt Baaba hĩĩ habu,

³⁰ hátĩ iita udukto nẽ uhuddieeu tẽrẽmẽẽjawa habuccieetaa caannĩ nẽ aauttu dtaabĩtĩĩ ꞌcĩg etteeddiku thõõth hattũũgẽt õmmõtõ hĩ ꞌramma cĩg Ĩꞌthĩraẽlĩ.”

Attĩmanni hatĩ nuyyiooha cĩg Yeesu

³¹ Ma nĩngaata, ĩĩ Yeesu, “ꞌThimõõnẽ, ꞌThimõõnẽ, adiim ꞌThĩttaanĩ egeelluung ngagiit hõdẽĩ hõdẽĩ hĩ aagõõng egeelĩk jannioohiti tahaha cĩg ꞌgẽẽmẽ tuu.

³² Nẽẽthĩ, halaooyyi naa nganiita ꞌThimõõnẽ, hátĩ hõkõm lemiiniti cunnẽẽnĩ. Nẽ ma õbõda hĩ nganĩĩta, ẽẽl ꞌgotoonogu buúk.”

³³ Ẽdẽcĩ hinnia Pẽẽtũrũ aĩ, “Makayyioohit, hakũmanoothihi naa ngaatĩ hõõĩ hĩ nganiit baabuutha hode daahĩtha.”

³⁴ Nẽ ẽdẽc Yeesu ĩnõõnnõ ĩĩnnĩk, “Haduhaakii dĩdĩ, Pẽẽtũrũ, õõa ꞌcĩ nga hõrõhĩ tũhũlũc ꞌcĩ oou lohotha ngerrenita, ẽppẽhannaa hatĩ nii nganĩĩt tabattĩ iyyio, aini hõllõngaa agayyaanĩ.”

³⁵ Nĩngĩtĩ ajini Yeesu ĩhõõggõ annẽẽkĩ, “Ma baa hĩꞌthooyyuung naa ngagiit hiꞌthihi locoburẽẽt cĩg ꞌrabbeetu hode lohoddwa haaga hode caawa, õkõ baa aitioonnuung ꞌgiimwaa tõõ?” Ẽdẽcĩ nẽẽg aĩ, “Aitiõõ.”

³⁶ Nẽ ĩĩnnĩk Yeesu ĩhõõggõ, “Nẽẽthĩ ꞌyioko, má aꞌnyaku locoburẽẽt hĩ lohoddwa ootti. Nẽ má hõllõngaa aꞌnyaku nyetubooꞌnya, utuuyyiõĩ ceremwa cugguung ũgĩ nẽ utuyyiaau hõdẽĩ.

³⁷ Ĩdĩmanit hoti, hĩnĩngĩtĩ eheeddi ꞌBuuhaa cĩ Nyekuci aĩ, ‘Arũmoothĩk nẽẽ hĩ ꞌthẽccanniook hõdẽĩ.’ Baa õthõõꞌtha thõõth ciee nganĩĩta nẽ aku ꞌthẽk hatĩ edeeꞌnyia hĩĩ dĩdĩ hĩdĩĩkoothong.”

³⁸ Ẽdẽcĩ nuyyiooha ĩnõõnnõ anneek, “Makayyioohit, cĩĩn nõõ, nyetubooꞌnya ꞌramma cieegi.” Ẽdẽcĩ Yeesu anneek, “Ũũppanit nicciaagi.”

Alaõ Yeesu Muuraa cĩ Olivi

³⁹ Ma nĩngaata, ũũk alaõ Yeesu hĩ gõõng hõdõõkõthĩ Muuraa cĩ Olivi. Baa anuoothi nuyyiooha cĩgĩnnĩg buúk.

⁴⁰ Ma baa õdõlanit nĩngĩtĩho, ĩĩnnĩk nẽẽ ĩhõõggõ, “Alayyio, hátĩ hiittiõõ hõllõngaa attĩmannuung ꞌThĩttaanĩ.”

⁴¹ Nĩngĩtĩ ẽẽjẽhĩ Yeesu õkõõĩ ngadiiha hĩdĩĩc nẽ akat huruꞌnyia nẽ alaõ ĩĩ,

⁴² “Baaba, má atabi, ꞌtiik hooppo icci pĩĩrnattõõ ho battaala, nẽẽthĩ nẽẽꞌthẽk, dĩman hĩcĩ atabi niina hõllõngaa hĩcĩ hatabi naana.”

⁴³ Ma ho, uppwaannak ĩnõõnnõ aajĩlõ ꞌcĩ aku hẽẽtahujjieen nẽ ikia aaꞌnyĩk ĩnõõnnõ ꞌtirrian.

⁴⁴ Baa aggam ĩnõõnnõ tẽẽlꞌthĩtĩ, nĩngĩtĩ alaiini gẽrrẽẽt ĩꞌthõng hĩdtĩlattaak mũlũha ꞌcĩg aattĩg hĩ biyyieeta looc.

⁴⁵ Ma baa ĩtĩnga nẽẽ ngaatĩ alaiini ho nẽ ũũk ĩĩcĩ aattiyyi nuyyiooha, ammũdoothĩk hinnia eet ꞌcĩg ohoddia ũꞌnyaaha, hĩnĩngĩtĩ ippiirria mothiinit.

⁴⁶ Nĩngĩtĩ annẽẽkĩ ĩhõõggõ, “Ĩtĩngaac alayyio, hátĩ hiittiõõ hõllõngaa attĩmaniinnu.”

Aggamĩ Yeesu

⁴⁷ Ma baa nga õthõõth nẽẽnĩ, uppwaanna hinnia lothippiti ꞌcĩ aꞌnyaha ꞌthooyyiahiti ꞌJuuda. Edeceek hũũk hĩꞌtha Yeesu.

⁴⁸ Ma nĩngaata, ijin Yeesu ĩnõõnnõ ĩĩnnĩk, “ꞌJuuda, õhõppõõcani nii Ngeertĩ Eeto ꞌthaaitta?”

⁴⁹ Ma baa adtuuha nuyyiooha ngaatĩ hatĩ akuuni bathi ho, ijinit ĩnõõnnõ ĩĩttĩk, “Makayyioohit, hiꞌthiattaayyia jore nyetubooꞌnyanĩĩ cĩggaang ko?”

⁵⁰ Nĩngĩtĩ annaanĩ nuyyioohiti umwaa ĩtat cĩ aꞌthiit cobbi cĩ dticciannioohit cĩ paadĩr cobbi noho võr.

⁵¹ Ma ho, ĩĩnnĩk Yeesu ĩhõõggõ, “Ĩnẽẽnĩ!” Nĩngĩtĩ auranaanĩ Yeesu ĩtat cĩ eet tĩho nẽ õbõdẽẽhĩ hũbũna.

⁵² Ma ho, ijin Yeesu makayyiook cĩg paadĩrꞌnyaannu hĩ ꞌgaala cĩg athegereeꞌnya ꞌcĩg ẽbẽk ꞌCieeth cĩ Nyekuci hĩ makayyiook cĩg eetuk ĩĩnnĩk, “Inni iita hĩ nganĩĩt nyetubooꞌnyanĩ hĩ hĩbahĩꞌnyannĩ, hĩcĩ hĩĩnĩ naa ꞌloorriahit ko?

⁵³ Ma gõõng harũmĩ naag hĩ ngagiit hõdõõkõthĩ halangatõõ cĩ ꞌCieeth cĩ Nyekuci nẽ hiꞌthihi eet ꞌcĩ ahumma buúk. Nẽẽthĩ, ĩĩ hatĩ kõr cunuung ciee ꞌcĩ aggamĩ muguuri looc ko?”

Ẽppẽhan Pẽẽtũrũ Yeesu

⁵⁴ Nĩngĩtĩ aggamĩ nẽẽg Yeesu nẽ ootti ĩĩcĩ õlõ cĩ paadĩr cobbi. Baa anuoothi Pẽẽtũrũ ĩnõõnnõ uruta ꞌrẽẽn pee.

⁵⁵ Ma baa õõ aadeek eeta ꞌgwoo hõrggẽẽna ngaatĩ lokihoo ho, ũũk Pẽẽtũrũ buúk, hõõt haauto hĩ ĩhõõggõ hõdẽĩ loota nĩngaata.

⁵⁶ Ma ho, ĩcĩn bũhẽẽcĩ umwaa ꞌcĩ ĩĩn dticciannioohit ĩnõõnnõ ngaatĩ ꞌgwoyyio ho. Ma baa ĩrrĩĩppan bũhẽẽcĩ tĩho ĩnõõnnõ jurrung, ĩĩ, “Baa arũmĩ ẽẽtĩ ciee hĩ Yeesu.”

⁵⁷ Ẽppẽhan hinnia Pẽẽtũrũ aĩ, “Ngaa cieeni, aitiõõ naa hõllõngaa haga ĩnõõnnõ.”

⁵⁸ Ma uruta hĩdĩhĩdĩĩc, annõõ eet umwaa hĩ ĩnõõnnõ hẽbẽrĩ noho ꞌtur, nĩngĩtĩ aĩnnĩ, “Baa gõõng ookorru niig buúk hĩ Yeesu.” Ẽppẽhan Pẽẽtũrũ noho aĩ, “Ẽlẽ hammiri naana.”

⁵⁹ Urutaa ꞌcĩ ꞌthaa hõdẽĩ, õbõdẽẽkĩ eet umwaa tarĩ aĩ, “Hõlõ, baa gõõng õõkõr ẽẽtĩ ciee hĩ Yeesu hõdẽĩ dĩdĩ, hĩnĩngĩtĩ ĩĩn nẽẽ ꞌGalileeinit.”

⁶⁰ Õbõdẽẽkĩ Pẽẽtũrũ aĩ, “Ẽlẽ, ẽrẽka thõõth ꞌcĩ othoothi nii hataa.” Ma baa nga aduha nẽẽ thõõth icci, õrõk tũhũlũc ꞌcĩ oou nĩĩcĩ noho.

⁶¹ Ma ho, ubbuudi Makayyioohiti nẽ ẽdẽẽnyõthĩ Pẽẽtũrũ, nĩngĩtĩ ammuhunõõꞌthĩ Pẽẽtũrũ thõõth baa aduhaak Yeesu ĩnõõnnõ anneek, “Õõa ꞌcĩ nga hõrõhĩ tũhũlũc lohotha ngerrenita, ẽppẽhannaa hatĩ nii nganĩĩt tabattĩ iyyio.”

⁶² Ma nĩngaata, ũũk Pẽẽtũrũ battaala nẽ ũũk urruuo gẽrrẽẽt.

Atararri athegereeꞌnya Yeesu

⁶³ Nĩngĩtĩ iꞌthianaanĩ athegereeꞌnya uuki nẽ atararri Yeesu.

⁶⁴ Baa ammũt nẽẽg ĩnõõnnõ hẽbẽrĩ nẽ ĩĩttĩk, “Duhaaheet da nganĩ ꞌcĩ uuki nganiit ko?”

⁶⁵ Nĩngĩtĩ õdõõmĩ ĩnõõnnõ thooꞌthiohĩĩ ꞌcĩg mẽẽlĩg gẽrrẽẽt.

Yeesu hẽbẽrẽẽnnĩ cĩg Pĩlaatõ hĩ Ẽrõõdẽ

⁶⁶ Ma baa uppwaanna kõrra ngerrenita, uluttia makayyiooha cĩg eetuk hĩ makayyiook cĩg paadĩrꞌnyaannu hĩ ꞌlimmanniook cĩg nyattaalak ngaatĩ hõdẽẽthõng, nĩngĩtĩ aꞌnyakiaanĩ Yeesu hẽbẽrẽẽnnĩĩ cĩggĩĩng.

⁶⁷ Nẽ ijinit ĩnõõnnõ ĩĩttĩk, “Má ĩĩnĩ Krĩstõ dĩdĩ duhaaheeta.” Ẽdẽcĩ Yeesu ĩhõõggõ anneek, “ꞌYioko huduhaahuunga, occa hõllõngaa elemmu,

⁶⁸ nẽ ꞌyioko, hijinuung naa ngagiita, occa hõllõngaa ẽdẽccaangu.

⁶⁹ Nẽẽthĩ, iꞌthianaanĩ kõr nicci, iccioloongan hatĩ Ngeertĩ Eeto attiaa cobbi ĩĩcĩ Nyekuc ꞌTirriannioohit vẽlẽk.”

⁷⁰ Nĩngĩtĩ ajini nẽẽg Yeesu annẽẽkĩ, “Ĩĩnĩ nii Ngeertĩ Nyekuci?” Ẽdẽcĩ Yeesu ĩhõõggõ anneek, “Ẽbẽaneeku.”

⁷¹ Ma ho, ĩĩtõ nẽẽg, “Inni hidiimit eet ꞌcĩg occa nga aduhaakeet thooꞌthiok ũgĩ tarĩ ho? Ma ꞌcĩ hĩthĩhĩt uduha nẽẽ ũtũũgaa cĩnnĩ ẽmmẽn ko.”