ꞌLuuka 20 - ꞌBuuk cĩ Thõõth cĩ Nyekuci

Makaaꞌthĩt cĩ Yeesu

¹ Kõr umwa, baa alliman Yeesu eet halaangatõõ cĩ ꞌCieeth cĩ Nyekuci nẽ irrioon nyeemuut ꞌcĩ abũnnaa, baa au makayyiooha cĩg paadĩrꞌnyaannu hĩ ꞌlimmanniook cĩg nyattaalak hĩ nyakangaaꞌnya cĩg eetuk hĩ ĩnõõnnõ,

² nẽ ijinit ĩĩttĩk, “Duhaaheet dako jurrung, makaaꞌthĩt tĩhathini ꞌcĩ adticanĩĩ nii thooꞌthiok iccig ko? Nganĩ baa ꞌcĩ aaꞌnyi nganiit makaaꞌthĩt icci ho?”

³ Ẽdẽcĩ Yeesu ĩhõõggõ anneek, “Ĩꞌnya nõõ hijinuung naa buúk ngagiita, uduktaahaangu dako,

⁴ aku baa makaaꞌthĩt baa aggamẽẽkĩ Yõaannẽ eet baattithimo hẽẽtahujjieen hode hĩ eeta?”

⁵ Arumuth hinnia nõõ nẽẽg thõõth ẽmmẽn aĩ, “Má hĩĩttĩk, ‘Aku hẽẽtahujjieen,’ ajinneet hatĩ anneekeet, ‘Nẽ baa hõllõngaa elemmu ĩnõõnnõ inni?’

⁶ Nẽ tarĩ má hĩĩttĩk, ‘Aku hĩ eeta,’ atturreet hatĩ eeta cieeg vẽlẽk biyyiẽẽnĩ, hĩnĩngĩtĩ elemit nẽẽg ngaatĩ ĩĩnnĩ Yõaannẽ põrõvẽtaac.”

⁷ Nĩngĩtĩ annẽẽkĩ, “Erekeet ꞌgõõl ꞌcĩ baa ammũdaanĩ Yõaannẽ makaaꞌthĩt.”

⁸ Ma ho, ẽdẽc Yeesu ĩhõõggõ ĩĩnnĩk, “Aitiõõ thĩ ꞌthẽk naa buúk hõllõngaa haduhaakuung ꞌgõõl ꞌcĩ hammũdaanĩ makaaꞌthĩt ꞌcĩ hadĩmanĩĩ hẽlẽggĩ iccig ko.”

Bekiook cĩg manu

⁹ Nĩngĩtĩ aduhaakĩ Yeesu eet thõõth ꞌcĩ awantoothĩk annẽẽkĩ, “Baa atiboolan ẽẽtĩ umwaa hẽẽn cĩg viinoaak nẽ ũtũngẽẽhĩ bekiook ũgĩ hebehit nẽ ũũk looccaa umwaanĩ ĩĩcĩ õkõ aayyianĩ ĩꞌthõng.

¹⁰ Ma baa ĩĩ korriook cĩg janiittak, ikia ĩꞌthõ nẽẽ dticciannioohit umwa cĩnnĩ, hũũk hũmmũdoothĩk bekiook, hũũk haꞌnyaha viino cĩnnĩ. Õõ hinnia uuk bekiooha dticciannioohit tĩho nẽ itiggiaacõ hõbõdõõthĩ athĩnĩĩ ꞌtẽl.

¹¹ Ma ho, ikia ĩꞌthõ nẽẽ dticciannioohit umwa tarĩ, õõ tarĩ õmmõg tĩho buúk hĩdĩmanit ꞌbuth nẽ itiggiayyieek mõrõ athĩnĩĩ ꞌtẽl.

¹² Ma tarĩ ho, ĩꞌthõ baattĩ manu dticciannioohit umwa tarĩ. Õõ hinnia uuk tĩho buúk hĩccĩnĩt ngatũbĩ nẽ udhukteek tẽrẽtẽraa cĩ manu.

¹³ “Nĩngĩtĩ ammuhi baattĩ manu aĩnnĩ, ‘Hogooni occa hutuno hõlõ? Ĩꞌnya da aattĩ hĩꞌthõ loholeec caannĩ dẽẽdẽ ꞌcĩ hammĩnani, horoong hatĩ õõ iꞌngolli ĩnõõnnõ.’

¹⁴ “Ma baa adtuuha bekiooha ngeertĩ baattĩ manu ho, urumuthit thõõth ĩĩtõ, ‘Ngeerĩnĩ thĩ aattĩ dẽẽdẽ niccieeni, huruhit ĩnõõnnõ, hátĩ hirigithit mana hĩĩ cĩnaac ũdũt.’

¹⁵ Nĩngĩtĩ õõĩ ĩnõõnnõ tẽrẽtẽraa cĩ mana cĩ viinoo nẽ uruhit hadaak. “Ma ammuku niig, occa õkõ adahĩ baattĩ manu bekiook iccig ne?

¹⁶ Occa õkõ aruk ĩhõõggõ vẽlẽk nẽ aaꞌnyĩk mana eet ꞌcĩg ꞌrĩĩng hootti.” Ma baa athĩhĩ eeta thõõth icci ho, othoothito ĩĩtõ, “Aitiõõ hatĩ thõõth ciee hõllõngaa aku haau hoti.”

¹⁷ Nĩngĩtĩ akannĩ Yeesu eet hẽbẽrĩ ĩꞌthõng nẽ ijin ĩĩnnĩk, “Aduha ꞌBuuhi cĩ Nyekuci ne baa eheeddi aĩ, “ ‘Ĩĩ bẽẽ baa abũrĩ teheꞌnyiooha bẽẽ ꞌcĩ tiiri gẽrrẽẽt’?

¹⁸ Ẽẽtĩ ꞌcĩ hatĩ ĩttany looc biyyiaa tĩho, aduuli hatĩ huduhoothĩk hĩĩ ꞌthĩĩ. Nẽẽthĩ, ẽẽtĩ ꞌcĩ hatĩ arriban bẽẽ tĩho, õrõrrõõcanni hatĩ hĩĩ ꞌthĩĩ.”

¹⁹ Nĩngĩtĩ adiim adhuhẽẽkĩ ꞌlimmanniooha cĩg nyattaalak hĩ makayyiook cĩg paadĩrꞌnyaannu Yeesu baabuuth nĩĩcĩ noho, hĩnĩngĩtĩ baa aga nẽẽg ngaatĩ ĩĩnnĩ ĩhõõggõ ꞌcĩg awanteek Yeesu thõõth icci ho. Nẽẽthĩ, baa itieelli nẽẽg eeta.

Dũman cĩ occoro

²⁰ Ma ho, iita akatti ꞌlimmanniooha cĩg nyattaalak hĩ makayyiook cĩg paadĩrꞌnyaannu Yeesu hẽbẽrĩ nẽ itikta eet ꞌcĩg ĩĩn ꞌrootti hotogollioothĩk Yeesu hĩ eeta ꞌcĩg abũnnaa. Baa ẽdẽt nẽẽg Yeesu hatĩ aduha thõõth ꞌcĩ occa aaꞌnyĩk ĩhõõggõ haggamit ĩnõõnnõ nẽ ootti hĩ ꞌgaalac cobbi ꞌcĩ aꞌnyak makaaꞌthĩt hĩ ꞌtirrian ꞌcĩ ẽcẽbĩ eeta.

²¹ Nĩngĩtĩ ajini eeta ꞌcĩg ĩĩn ꞌrootti ho Yeesu annẽẽkĩ, “ꞌLimmannioohit, hagayyia naag ngaatĩ õthõõthĩ nii nẽ illimanuu thõõth ꞌcĩ ĩĩn dĩdĩ nẽ hõllõngaa aallahi thooꞌthiok cĩg eetuk, allimani ꞌthẽk thõõth cĩ Nyekuci ꞌgõõlaa ꞌcĩ ĩĩnnĩ dĩdĩ.

²² Duhaaheet dako, aũlan occa ꞌthẽk ngaatĩ hadũmaneeka naag habu cobbi cĩ ꞌRooma occoro?”

²³ Baa aga Yeesu ngaatĩ attĩmanĩ nẽẽg ĩnõõnnõ thõng, nĩngĩtĩ annẽẽkĩ ĩhõõggõ,

²⁴ “Aanytaangu da ꞌdinaar umwa hĩcĩnõ, ꞌcĩ nganĩ muum ꞌcĩ aaĩ ꞌdinaaraa cĩ ho? Nẽ ĩĩ cĩg nganĩ ꞌthaara cieeg eheedothoothĩk ꞌdinaaraa cĩ ho?”

²⁵ Ẽdẽcĩ nẽẽg aĩ, “Cĩ habu cobbi cĩ ꞌRooma.” Nĩngĩtĩ aduhaakĩ nẽẽ ĩhõõggõ annẽẽkĩ, “Aanytĩk habu cobbi cĩ ꞌRooma ꞌgii cĩnnĩ nẽ aanytĩhu Nyekuc ꞌgii cĩ Nyekuci.”

²⁶ Nĩngĩtĩ aꞌnyamanĩ ĩhõõggõ ngaatĩ occa ẽdẽtĩ Yeesu, hatĩ aduha thõõth ꞌcĩ abathĩ lothippita. Ma ho, ĩjjaaktõ kim, hĩnĩngĩtĩ anyamũũtana thõõth ꞌcĩ occa aduhaak nẽẽg Yeesu.

Rũgẽt urutaa cĩ daahĩthõõ

²⁷ Baa au Thadutheei ũgẽẽgĩ ꞌcĩg aĩ, aitiõõ ẽẽtĩ ꞌcĩ adaak hõllõngaa arũgna tarĩ hĩ Yeesu nẽ ijinit ĩĩttĩk,

²⁸ “ꞌLimmannioohit, baa eheedĩkeet ngagĩĩt Mũũꞌtha nyattal icci aĩ, má adaahĩ ẽẽtĩ ũũnnĩk ngaa hiꞌthihi lõhõlĩ, aku ꞌgotonnia nẽ õlõm ngaatĩbõyyĩ nicci, hátĩ hittiraak lõhõlĩ ꞌcĩg hatĩ ĩĩn cĩg ꞌgõtõnĩ ꞌcĩ adaak ko.

²⁹ Baa aattĩg eeta tũkĩramma ꞌcĩg ĩĩn ꞌgõtõn. Ikia ũꞌthũwanõõ ꞌcĩ oou nẽ adaak nga hittira loholeec.

³⁰ Nĩngĩtĩ aku õlõmmĩ ꞌgotonnia ꞌcĩ anũẽẽkĩ ngagõtõnõõnĩ nẽ ikia adaak nẽẽ buúk nga hittira loholeec hĩ ngaa nicci.

³¹ Ma ho, ikia õlõm ꞌgotonnia ꞌcĩ ĩĩn iyyio buúk ngaa nicci. Nẽ ꞌgõõla hõdẽẽthõng, iita adaahito ꞌgõtõnĩ ꞌcĩg ĩĩn tũkĩramma ho vẽlẽk nga hittirria lõhõlĩ ũdũt.

³² Nẽ ma uruta, ikia adaak ngaa nicciee buúk.

³³ Ma ꞌyioko hatĩ kõr ꞌcĩ arũgnaanĩ eeta daahĩtha, ĩĩn hatĩ ngaa ciee ꞌcĩ nganĩ, hĩcĩ olomit ꞌgõtõnĩ ꞌcĩg ĩĩn tũkĩramma vẽlẽk ho?”

³⁴ Ẽdẽcĩ Yeesu anneek, “Attihi eeta loota nĩnga diooni.

³⁵ Aitiõõ eeta ꞌcĩg hatĩ arũgna daahĩtha hõllõngaa attihi,

³⁶ nẽ iittiõõ hatĩ nẽẽg hõllõngaa adaahĩ, hĩnĩngĩtĩ aauto hĩ aajĩlẽẽta. Ĩĩtõ hatĩ nẽẽg lõhõlĩ cĩg Nyekuci, hĩnĩngĩtĩ ĩĩtõ nẽẽg lõhõlĩ ꞌcĩg ũrũgta daahĩtha.

³⁷ Nẽẽthĩ, dtẽẽllẽnĩĩ baag atũũthẽnĩ tumutha, baa ẽtẽrꞌtha Mũũꞌtha ngaatĩ arũgnaanĩ eeta daahĩtha, hĩnĩngĩtĩ baa avvĩ nẽẽ Makayyioohit anneek, ‘Nyekuc cĩ Abũrahamĩ hĩ Nyekuc cĩ Iꞌthaako hĩ Nyekuc cĩ Yakobo.’

³⁸ Hõllõngaa ĩĩn nẽẽ Nyekuc cĩ daakiahu, ĩĩn Nyekuc cĩ eet cĩg arũgĩ, hĩnĩngĩtĩ hĩ ĩnõõnnõ, arũgĩ eeta vẽlẽk.”

³⁹ Nĩngĩtĩ ẽdẽcĩ ꞌlimmanniooha ũgẽẽgĩ cĩg nyattaalak annẽẽkĩ, “Uduha thõõth dĩdĩ ꞌlimmannioohit.”

⁴⁰ Nẽ iittiõõ ẽẽtĩ ꞌcĩ nga ajin ĩnõõnnõ tarĩ tõõ.

Ĩĩn Krĩstõ Ngeertĩ nganĩ?

⁴¹ Ma ho, ijin Yeesu ĩhõõggõ ĩĩnnĩk, “Inni hĩĩtõ eeta ĩĩn Krĩstõ Ngeertĩ Daavide ho?

⁴² Aduha Daavide ꞌBuuhaa cĩ Tegellwaanu aĩ, “Aduhaak Makayyioohiti Makayyioohit caannĩ anneek, ‘ꞌCioloongan ngaati attiaa caannĩ ĩcobbi

⁴³ ĩꞌthõng haggam mĩrõk cugunnig.’ ”

⁴⁴ “Ma avvĩ Daavide ĩnõõnnõ anneek, ‘Makayyioohit,’ nẽ tarĩ ikia ĩĩ nẽẽ ngeertĩ Daavide hutuno?”

Yeesu hĩ ꞌlimmanniook cĩg nyattal cĩ Mũũꞌtha

⁴⁵ Ma baa ꞌthẽk nga athĩknĩ eeta vẽlẽk, irrioonĩk Yeesu nuyyiook ĩĩnnĩk,

⁴⁶ “Niiga, agaac lõggõõ aagõõng allimaneek eet nyattal nĩnga jurrung. Amĩna nẽẽg ngaatĩ irrianĩ ceremwaanĩĩ ꞌcĩg õkõmĩ kak nẽ idiimito hĩꞌthaacõ eeta ngaatĩ tũũõ hĩ ngaatĩ õõ iccioloonganĩ dtaabĩtĩĩ ꞌcĩg oou ꞌCieethinii cĩg Laiittak hĩ ngaatĩ adahĩ eeta karramẽẽta.

⁴⁷ Ĩĩn nẽẽg eet ꞌcĩg arratana ngaatĩbõyyĩꞌnya ꞌcieethi nẽ ara agurreek laiinit ĩꞌthõng, hĩnĩngĩtĩ adiim ẽtẽrꞌtha eleeti. Uuki hatĩ eeta ꞌcĩg aattĩg noho gẽrrẽẽt ũdũt.”