ꞌLuuka 2 - ꞌBuuk cĩ Thõõth cĩ Nyekuci

ꞌTirriaanĩt cĩ Yeesu

¹ Ma waathinniook nicciag, ikia uduhaak habuui cobbi cĩ ꞌRooma ꞌcĩ haĩ Agguutto eet looccaa cĩ ꞌRooma hũtũrũũr hõõt hitigiilli.

² Baa ĩĩn ciee tigiilẽnĩt ꞌcĩ oou, baa irkiꞌnyia ꞌcĩg ĩĩnnĩ Kwiriino makayyioohit cĩ looc cĩ Thiiria.

³ Nĩngĩtĩ ĩꞌthanõthõõthĩkĩ eeta vẽlẽk ꞌtaaũnniook cĩggĩĩng cũũmõ cũũmõ.

⁴ Baa nẽ ĩtĩnga Yothebo buúk ꞌtaaũnaa cĩ Naaꞌtharẽtĩ looccaa cĩ ꞌGalileea nẽ ũũk ĩꞌthõng Bẽtẽlẽm looccaa cĩ ꞌJudeea ꞌtaaũnaa cĩ Daavide, hĩnĩngĩtĩ baa ĩĩn nẽẽ eet cĩ hattũũg cĩ Daavide.

⁵ Baa õõkõr nẽẽ hĩ Maria, bũhẽẽc baa adiim nẽẽ hatĩ hĩĩ ngaa cĩnnĩ. Ammũdeek hinnia baa ĩdĩddĩng Maria waathinniook tĩko gẽrrẽẽt.

⁶ Ma baa õdõlanit nẽẽg Bẽtẽlẽm, iita ũttũbattoothĩk Maria waathinniooha cĩg tũhũyyiaattak,

⁷ nĩngĩtĩ ũũkcanĩ nẽẽ ngeerĩnĩ ꞌcĩ oou nẽ ũmũmmũũran cẽrẽma nẽ aaꞌnyĩk hatangu haahũlaa ꞌcĩ aarĩkĩ eeta cĩg ꞌJudeei arteenit ꞌcĩ ẽgĩ hẽlẽggĩ, hĩnĩngĩtĩ baa ummuddioothĩk nẽẽg ĩbbĩt nĩngĩtĩ ꞌcĩ gõõng adũman heerinniooha nẽ atagguuꞌthi.

Uppwaannak aajĩlõ tũhayyiook

⁸ Nẽ baa aattĩg tũhayyiooha ũgẽẽgĩ ꞌcĩg õbõhõõ hĩ nyadaharĩt nĩngaata, ꞌcĩg ẽbẽk hẽlẽggĩ cĩggĩĩng baalin niccia.

⁹ Ma baalin niccia, uppwaannak aajĩlõ cĩ Makayyiookto ĩhõõggõ nẽ aara bulẽẽnĩtĩ cĩ Makayyiookto hũttũhũl ĩhõõggõ, nĩngĩtĩ itieelini nẽẽg gẽrrẽẽt.

¹⁰ Ma nĩngaata, ĩĩnnĩk aajĩlõ nicciee ĩhõõggõ, “Ma hiteelinnu, haꞌnyahaakuung naa ngagiit nyeemuut ꞌcĩ abũnnaa gẽrrẽẽt, ꞌcĩ hatĩ aaꞌnyahaak eet vẽlẽk taliinit cobbi gẽrrẽẽt.

¹¹ Ittirria Ellioohiti cunuung iyyieni ꞌtaaũnaa cĩ Daavide, ĩnõõnnõ Krĩstõ Makayyioohiti.

¹² ꞌGõõl ꞌcĩ hatĩ õõ agayyu niig ĩnõõnnõ cieeni, ammũdoothiku hatĩ oongi haahũlatõõ cĩ heleggeennu nẽ ũmũmmũũranĩ ceremwaanĩ.”

¹³ Ma hĩdĩĩkoothong, uppwaanna lothippiti cobbi gẽrrẽẽt cĩ aajĩleetu ummuddiaak aa oou nẽ ĩdĩhĩthĩt Nyekuc nĩngaata hõdẽĩ ĩĩtõ,

¹⁴ “Bulẽẽnĩt hĩ Nyekuc hẽẽtkujjieen, nẽ ganõn hĩ eet ꞌcĩg accamana Nyekuci loota nĩnga.”

¹⁵ Ma baa oboddioothĩ aajĩlẽẽta niccieeg hẽẽtahujjieen, utuhanit tũhayyiooha thõõth ĩĩtõ, “Hõõt da Bẽtẽlẽma, hátĩ hĩcĩnĩt thõõth ꞌcĩ adĩmanni ꞌcĩ aduhaakeet Makayyioohiti ho.”

¹⁶ Nĩngĩtĩ aꞌthũkcĩ ĩꞌthõng hõõt hummudioothĩk Maria hĩ Yothebo nẽ udtuukta ĩdõlĩ ngaatĩ oongiyyi haahũlatõõ cĩ heleggeennu.

¹⁷ Ma baa ĩcĩnĩt nẽẽg ĩdõlĩ ẽlẽk, iita oboddioothĩ nẽẽg õõt ĩꞌthaattĩk eet nyeemuut baa aduhaak aajĩlõ ĩhõõggõ.

¹⁸ Baa abulan nyeemuut ꞌcĩ aduha tũhayyiooha ho eet gẽrrẽẽt.

¹⁹ Nẽẽthĩ, baa aꞌthũũnnĩ Maria thooꞌthiok iccig vẽlẽk nẽ ummuk ꞌthĩnĩtatõõ cĩnnĩ.

²⁰ Nĩngĩtĩ õbõdõõꞌthĩ tũhayyiooha ĩĩcĩ horggu adĩkthoothi nẽ ubuluꞌthiõõthĩ Nyekuc ꞌgõõla, hĩnĩngĩtĩ thooꞌthiok ꞌcĩg athĩhĩ nẽẽg nẽ ĩcĩnĩt hẽbẽrẽẽnnĩĩ cĩggĩĩng ko. Baa acĩn nẽẽg aaĩ thõõth ciee hĩ baa aduhaak aajĩlõ ĩhõõggõ dẽẽdẽ.

Aaꞌnyĩhoothĩk Yeesu Nyekuc

²¹ Ma baa õdõlanit waathinniooha ĩĩtõ turkiyyio, ikia ẽttẽẽdĩ ĩdõlĩ ẽlẽ nẽ akattioothĩk ꞌthaara ꞌcĩg haĩ Yeesu, ꞌThaar baag akanneek aajĩlõ ĩnõõnnõ baa nga haꞌnyahĩ hẽẽngatõõ.

²² Ma baa edeccia waathinniooha cĩg tũũnyẽnĩt ꞌcĩ adiim nyattalĩ cĩ Mũũꞌtha, ootti Maria hĩ Yothebo ĩdõlĩ ꞌJeruꞌthalẽma, hũũk haaꞌnyĩhoothĩk Makayyioohit ꞌCieethaa cĩ Nyekuci,

²³ nẽ hĩcĩ aduha nyattalĩ cĩ Makayyiookto aĩ, “Aanytĩk hatĩ gõõng loholeec ꞌcĩ maacĩ ꞌcĩ arrittiaa ĩĩcĩ oou haaꞌnyĩhoothĩk Makayyioohit.”

²⁴ Nẽ itiktaau ꞌbaaninit haau hĩcĩ aduha nyattalĩ cĩ Makayyiookto aĩ, “Aanytĩk hatĩ gõõng maajihi ĩdõleetu hitikta ngabuuthiꞌnya ꞌramma hode bollooꞌnya ꞌramma ꞌcĩg nga hĩdĩcĩg.” Nĩngĩtĩ adĩmanĩ Maria hĩ Yothebo buúk noho.

Aduha ꞌThimiõõnẽ thõõth cĩ horumwa

²⁵ Baa ammũdeek aaĩ ẽẽtĩ umwaa ꞌcĩ haĩ ꞌThimiõõnẽ ꞌJeruꞌthalẽma, ꞌcĩ baa itieelli Nyekuc nẽ ala ĩnõõnnõ gẽrrẽẽt ũdũt. Baa ẽrẽ nẽẽ Ellioohit hikia hẽẽla eet cĩg Ĩꞌthĩraẽlĩ, nẽ baa aaĩ Lorii ꞌcĩ Ẽllẽẽmĩth hĩ ĩnõõnnõ.

²⁶ Baa aduhaak Lorii ꞌcĩ Ẽllẽẽmĩth ĩnõõnnõ anneek, aitiõõ hatĩ nẽẽ hõllõngaa adaahĩ nga hĩcĩn Krĩstõ cĩ Makayyiookto.

²⁷ Ma baa õõ adĩmaneek Maria hĩ Yothebo ĩdõlĩ Yeesu nyattal cĩ Mũũꞌtha ho, ikia aaꞌnyĩk Lorii ꞌcĩ Ẽllẽẽmĩth ꞌThimiõõnẽ hũũk ꞌCieethaa cĩ Nyekuci.

²⁸ Ma nĩngaata, õdõng ꞌThimiõõnẽ ĩdõlĩ noho nẽ ĩdĩhĩth Nyekuc ĩĩ,

²⁹ “Nyekuc Makayyioohit, aꞌnyaa nganĩĩt dticciannioohit cunni hadaak lõꞌngõõc hĩ baa aduha niina,

³⁰ hĩnĩngĩtĩ hĩcĩna elliaanĩt cunni hẽbẽrẽẽnnĩĩ cĩgannĩg dẽẽdẽ.

³¹ Elliaanĩt ꞌcĩ akũmanẽẽkĩ nii eet vẽlẽk.

³² Ĩĩn nẽẽ lanyit ꞌcĩ eterꞌtheek loonyin vẽlẽk thõõth cunni, nẽ aꞌnyahaak hatĩ eet cugunnig Ĩꞌthĩraẽl bulẽẽnĩt.”

³³ Baa abulan thõõth ꞌcĩ adukiaa hĩnĩngĩtĩ loholeec cĩ Maria hĩ Yothebo ho eet gẽrrẽẽt.

³⁴ Nĩngĩtĩ aggatanĩ ꞌThimiõõnẽ ĩhõõggõ nẽ ĩĩnnĩk ꞌcĩ ĩĩn Maria aattĩ loholeeco, “Aꞌnyahaak hatĩ loholeec ciee eet ũgĩ bathi nẽ aꞌnyahaak ũgĩ bũnnai Ĩꞌthĩraẽla. Ĩꞌthõõa hatĩ Nyekuci ĩnõõnnõ hĩĩ terethiinit, nẽẽthĩ, mẽẽlĩg hatĩ eeta ꞌcĩg abũrĩ ĩnõõnnõ gẽrrẽẽt,

³⁵ hátĩ hedeeꞌnyia muhẽẽnĩtĩ cĩ ꞌthinneeti ꞌcĩg mẽẽlĩg. Nẽ acuhan hatĩ nyetuboot ꞌthĩnĩt cunni buúk.”

³⁶ Nẽ baa aaĩ ngaa umwaa ꞌcĩ ĩĩn põrõvẽtaac ꞌcĩ haĩ Anna, ꞌcĩ baa ĩĩn tĩnaatĩ eet ꞌcĩ haĩ Pannuẽlẽ, cĩ habuccieet cĩ Aathẽrĩ. Baa atahaany nẽẽ gẽrrẽẽt nẽ nganĩngĩtĩ aꞌthũwaniini, arũmĩ hĩ maac cĩnnĩ irkiꞌnyia tũkĩramma haaga nĩngĩtĩ adaaknĩ maac.

³⁷ Ma baa adaak maac cĩnnẽẽnĩ, ikia ĩĩ ngaatĩbõyyĩ ĩꞌthõng hõdõlanit irkiꞌnyia cĩgĩnnĩg hĩĩtõ hẽẽn turkiyyio hĩ ꞌwec. Aalla alayyi nẽẽ ꞌCieethaa cĩ Nyekuci baalin hĩ waathĩn nẽ ẽdẽta ẽlẽ ꞌgẽẽna waathinniook ũgĩ.

³⁸ Ma kõr niccia, ikia ũmmũdaak nẽẽ buúk Yothebo hĩ Maria nẽ atal Nyekuc, nĩngĩtĩ ahĩkĩĩmanaakĩ eet ꞌcĩg baag ẽrẽ elliaanĩt cĩ ꞌJeruꞌthalẽmĩ thõõth cĩ ĩdolo.

³⁹ Ma baa edecciaak Yothebo hĩ Maria authet ꞌcĩ adiim nyattalĩ cĩ Makayyiookto hĩdĩmanĩ ho, iita oboddioothĩ ꞌtaaũnaa cĩnĩĩng Naaꞌtharẽta looccaa cĩ ꞌGalileea.

⁴⁰ Nĩngĩtĩ alĩꞌthĩ loholeec hĩĩ maka. Nẽ baa aꞌnyak nẽẽ ꞌgẽẽnyĩth hĩ bũnnai cĩ Nyekuci.

Yeesu ꞌCieethaa cĩ Nyekuci

⁴¹ Irkiꞌnyiaannĩ vẽlẽk, baa gõõng õõ maaꞌnyĩ Yeesu hĩ aattĩnnĩ ꞌJeruꞌthalẽma Kõrraa cĩ Haangittõõ.

⁴² Ma baa ĩtĩlĩtha Yeesu ĩĩtõ irkiꞌnyia õmmõtõ hĩ ꞌramma, õõt nẽẽg kõrraa cobbi hĩ gõõng hõdõõkõthĩ.

⁴³ Ma baa edeccia karrama tĩho, oboddioothĩ Maria hĩ Yothebo ĩĩcĩ olu. Ĩko nẽẽ idionganniaa Yeesu ꞌJeruꞌthalẽma nẽ hõllõngaa aga nẽẽgĩ.

⁴⁴ Baa hinnia ammuk nẽẽg aĩ utuwattĩ moho Yeesu hĩ ꞌgõõnõgĩ. Ma baa ꞌjiaat, iita iiyyiellia nẽẽg ĩnõõnnõ, nĩngĩtĩ õõ adiimi ittioonniohĩ hĩ ꞌgoonoginni.

⁴⁵ Ma baa aꞌnyaman ngaatĩ ammũdaanĩ ĩnõõnnõ ho, oboddioothĩ õõt idiimto ꞌJeruꞌthalẽma.

⁴⁶ Ma urutaa cĩ waathinniook iyyio, õõ hinnia ammũda halangatõõ cĩ ꞌCieeth cĩ Nyekuci hõrggẽẽnaa cĩ ꞌlimmannioohu, ammũdoothĩk athĩhĩ ĩhõõggõ nẽ ijin thooꞌthiok ꞌcĩg õkõmĩ.

⁴⁷ Nẽ baa abulan ꞌgẽẽnyĩthĩ cĩnnĩ hĩ ꞌgõõl ꞌcĩ attacanĩ nẽẽ thooꞌthiok cĩg eet vẽlẽk ꞌcĩg athĩhĩ ĩnõõnnõ ho gẽrrẽẽt.

⁴⁸ Ma baa acĩn maaꞌnyia hĩ aattĩnnĩ ĩnõõnnõ ho, ikia anyamũũtana thõõth ciee ꞌthinneeti cĩggĩĩng gẽrrẽẽt, nĩngĩtĩ annẽẽkĩ ngaannia, “Adĩmanneet occa hoti inni Yeesu? Cĩĩn nõõ nganĩĩt hĩ maaꞌnyu ngaatĩ hommothiinna, hĩnĩngĩtĩ hadiimmi nganiita.”

⁴⁹ Ẽdẽcĩ hinnia nẽẽ ĩhõõggõ anneek, “Adiimmaangu inni? Hõllõngaa agayyu niig ngaatĩ adiim haayyi naa ꞌcieethaa cĩ Baaba?”

⁵⁰ Baa hinnia aitiõõ nẽẽg hõllõngaa aga thõõth ꞌcĩ aduhaak Yeesu ĩhõõggõ ho.

⁵¹ Nĩngĩtĩ õbõdõõꞌthĩ nẽẽ hĩ ĩhõõggõ Naaꞌtharẽta nẽ ũũk aala ĩthĩk thõõth cĩnĩĩng. Baa aꞌthũũnnĩ ngaannia thooꞌthiok ꞌcĩg aduha nẽẽ ho vẽlẽk ꞌthĩnĩtaa cĩnnĩ nẽ hõllõngaa ataarrothi ũdũt.

⁵² Ma nĩngaata, ĩtĩlĩtha Yeesu hĩĩ maka nẽ ẽggẽẽny gẽrrẽẽt. Baa ammĩnan eeta ĩnõõnnõ nẽ accamana Nyekuci buúk.