ꞌLuuka 19 - ꞌBuuk cĩ Thõõth cĩ Nyekuci

ꞌThakeeo, luttioohit cĩ occoro

¹ Ma baa uppwaanĩ Yeesu ꞌJeriko nẽ ũũk õtõ ꞌtaaũnatõõ,

² baa aaĩ eet umwaa ꞌcĩ haĩ ꞌThakeeo ꞌcĩ ĩĩn makayyioohit cĩ luttiook cĩg occoro. Baa ĩĩn nẽẽ eet ꞌcĩ aballi gẽrrẽẽt.

³ Baa adiim acĩn nẽẽ Yeesu, nẽẽthĩ hinnia, ahaca huturꞌthẽẽta, hĩnĩngĩtĩ baa maka lothippiti gẽrrẽẽt.

⁴ Nĩngĩtĩ avviri õkõõĩ ĩĩcĩ oou nẽ ũũk õtõd hẽẽt, hátĩ hĩcĩn Yeesu, hĩnĩngĩtĩ baa õkõ Yeesu ĩĩcĩ ꞌgõõl tĩho.

⁵ Ma baa õdõlan Yeesu ngaatĩho ho, acĩnoothi hinnia ꞌThakeeo hẽẽta lokora. Nĩngĩtĩ õthõõthĩkĩ annẽẽkĩ, “ꞌThakeeo, luuccia hataman, hõkõ aattĩ haaĩ naa õlõõ cunni kõr nicci.”

⁶ Nĩngĩtĩ alluuccianĩ ꞌThakeeo hĩdĩĩkoothong nẽ ikia ĩꞌtha Yeesu taliitta.

⁷ Ma acĩn eeta vẽlẽk ꞌcĩg baag aattĩg nĩngaata, ngaatĩ ĩꞌthaaõnĩ Yeesu hĩ ꞌThakeeo ho, adahit ngunungunu ĩĩtõ, “Õkõ bẽrẽ Yeesu õlõõ cĩ ꞌthẽccanniookto.”

⁸ Ma urutaa cĩnnĩ, ĩtĩnga ꞌThakeeo ĩĩnnĩk Yeesu, “Makayyioohit, kõr nicci, hẽꞌngẽraahi hatĩ naa hullaha ijjio cĩgannĩg hõrggẽẽna nẽ má baa hõmmõdanaa eet umwa ꞌrabbẽẽta, hadũmani hatĩ ĩnõõnnõ tabattĩ ꞌwec.”

⁹ Nĩngĩtĩ õthõõthĩ Yeesu aĩnnĩ, “Ikia elliaanĩtĩ kõr icci ꞌcieethaa cĩ, hĩnĩngĩtĩ ĩĩn ẽẽtĩ ciee buúk ngeertĩ Abũrahamĩ.

¹⁰ Baa hakuu naa Ngeertĩ Eeto hikia hidiima nẽ hẽẽla eet ꞌcĩg iꞌngittõõthĩ.”

Dticcianniook õmmõtõ

¹¹ Ma baa nga athĩhĩ eeta thõõth icci, ikia uduhaak Yeesu ĩhõõggõ thõõth ꞌcĩ awantoothĩk, hĩnĩngĩtĩ baa õbõktõ nẽẽ hĩ ꞌJeruꞌthalẽm nẽ baa ammuhuneek eeta aĩ, õkõ hatĩ edeeꞌnyia habuccieet cĩ Nyekuci nĩĩcĩ noho.

¹² Baa aduhaak nẽẽ ĩhõõggõ anneek, “Baa aaĩ eet umwaa ꞌcĩ ĩĩn ngeertĩ habuuo ꞌcĩ baa õkõ ĩĩcĩ looc ꞌcĩ ꞌrẽẽnĩ, hũũk hĩĩ habu nẽ õbõda.

¹³ Ma baa õbõhĩ ĩtĩnga, ũtũvvũ dticcianniook cĩgĩnnĩg õmmõtõ nẽ aaꞌnyĩk ĩhõõggõ hõdẽĩ hõdẽĩ ꞌrabbẽẽt ꞌcĩg mẽẽlĩg nẽ ĩĩnnĩk, ‘Idticattĩ ꞌrabbẽẽt iccig tũjaar ĩꞌthõng hõbõda naana.’

¹⁴ “Baa ammũdeek hinnia abũrĩ eeta ĩnõõnnõ ngaatĩ ĩĩnĩ habu, nĩngĩtĩ ĩꞌthõõĩ nyeemuut hũũk ĩĩcĩ oou anneek, ‘Hõllõngaa hadiimma naag eet icci hĩĩ habu cĩnaang.’

¹⁵ “Ũũk nẽẽꞌthẽk ĩĩ ẽẽtĩ ciee habu, nĩngĩtĩ õbõdaanĩ õlõ. Ma ho, ikia ũtũvvũ dticcianniook baag aaꞌnyĩk nẽẽ ꞌrabbẽẽt, hũmmũda hatĩ má ittoorri ꞌrabbẽẽta.

¹⁶ “Baa aku aduhaak ꞌcĩ oou ĩnõõnnõ anneek, ‘Makayyioohit, ĩttõõrĩ ꞌrabbaacit baa nunni aꞌnyaha ꞌrabbẽẽt ũgĩ õmmõtõ.’

¹⁷ “Ẽdẽcĩ makayyioohiti cĩnnĩ ho anneek, ‘Idticanuu jurrung ẽlẽ. Nẽ hĩnĩngĩtĩ ĩĩnĩ eet ꞌcĩ aꞌthũũnnĩ ꞌgii ꞌcĩ hidici, iinu hatĩ eet ꞌcĩ aggami ꞌtaaũnniook õmmõtõ.’

¹⁸ “Ma ho, ikia dticciannioohiti ꞌcĩ anũẽẽkĩ nẽ ĩĩ, ‘Makayyioohit, ĩttõõrĩ ꞌrabbaacit baa nunni aꞌnyaha ꞌgõõnõgĩ ꞌtur.’

¹⁹ “Ẽdẽcĩ makayyioohiti aĩ, ‘ꞌGaam nii ꞌtaaũnniook ꞌtur.’

²⁰ “Ma tarĩ ho, ikia dticciannioohiti umwaa tarĩ nẽ ĩĩ, ‘Makayyioohit, ꞌrabbaacit baa nunni cieeni, baa hitiangithi locoburoatõõ.

²¹ Baa hiteellinnii, hĩnĩngĩtĩ ĩĩnĩ eet ꞌcĩ okomi kak. Ĩĩnĩ eet ꞌcĩ adiim õkõõĩ hẽlẽggĩ ꞌcĩg hõllõngaa ĩĩn cugunnig nẽ tarĩ, ĩĩnĩ eet ꞌcĩ adiim ajanni ngaatĩ nga katõõĩ.’

²² “Ẽdẽcĩ Makayyioohit anneek, ‘Nii tahahaacĩ cieeni, etteedihuu nii ẽlẽ cunni thõõth ẽmmẽn thõõthaa ꞌcĩ aduha hataa. Má aga nii ngaatĩ hĩĩnnĩ naa eet ꞌcĩ hokomi kak nẽ hĩĩna eet ꞌcĩ hõkõõyyĩ hẽlẽggĩ ꞌcĩg hõllõngaa ĩĩn cĩgannĩg nẽ hajanõ ngaatĩ nga hakatõõĩ,

²³ nẽ baa hõllõngaa aarihi ꞌrabbaacit caannĩ ꞌbẽẽngĩatõõ inni? Occa ꞌyioko hũmmũdaaha ĩttõõrĩ.’

²⁴ “Nĩngĩtĩ annẽẽkĩ eet ꞌcĩg baag abĩlĩ nĩngaata, ‘Aggamta eet icci ꞌrabbaacit nẽ aanytĩhu eet ꞌcĩ aꞌnyak õmmõtõ hata.’

²⁵ “Ẽdẽcĩ hinnia eeta tĩko anneek, ‘Makayyioohit, ma tarĩ aꞌnyak ꞌcĩ umwa ho õmmõtõ ẽlẽk ko!’

²⁶ “Ẽdẽcĩ makayyioohiti anneek, ‘Ẽẽtĩ ꞌcĩ aꞌnyak ꞌgii ꞌcĩ abadtẽc, aaꞌnyĩhoothĩk hatĩ ꞌgii ꞌcĩ maka nẽ ẽẽtĩ ꞌcĩ hiꞌthihi ꞌgiimwa, aggammiaa hatĩ ꞌgii ꞌcĩ abadtẽc ꞌcĩ aꞌnyak nẽẽ haau athĩnĩĩ ꞌtẽl.

²⁷ Aꞌnyakta thĩ mĩrõk cĩgannĩg ꞌcĩg hõllõngaa adiimma hĩĩ habu haggam ĩhõõggõ ho ngaati nẽ uruktu hẽbẽrẽẽnnĩĩ cĩgannĩg.’ ”

Uduhun Yeesu ꞌJeruꞌthalẽm bulẽẽtta

²⁸ Ma baa ẽdẽcaak Yeesu ngaatĩ aduhaanĩ thõõth icci, ĩtĩnga ũũk ĩĩcĩ ꞌJeruꞌthalẽmĩ.

²⁹ Ma baa õbõktõ hĩ olooyyiok ꞌcĩg haĩ Bẽthvaje hĩ Bẽthani, Muuraa ꞌcĩ avvĩ eeta anneek Oliv, ĩꞌthõ nuyyiook ꞌramma anneek,

³⁰ “Õõt õlõõ ꞌcĩ obohoonnu ho nẽ ma uduhuttu, ammũdoothiku hatĩ thigir ꞌcĩ hidici ꞌcĩ nga hõtõõĩ eet umwaa ũdũt ecebbi nĩngaata. Õõkta nẽ aꞌnyaktaau ngaati.

³¹ Nẽ má ajinnuung eet umwaa anneekuung, ‘Õõgannu inni?’ Ĩĩttĩk, ‘Adiim Makayyioohiti.’ ”

³² Ma baa õõ nuyyiooha tĩko ho, ammũdoothĩk ꞌthẽk aaĩ hĩaa adukiaak ĩhõõggõ.

³³ Ma aĩ hõõgtawa ho, ajin hinnia maajihi thigiirak ĩhõõggõ anneek, “Õõgannu thigir inni?”

³⁴ Ẽdẽcĩ nẽẽg maajihi thigiirak ko anneek, “Adiim Makayyioohiti.”

³⁵ Nĩngĩtĩ aꞌnyahõõthĩkĩ nẽẽg Yeesu nẽ arrik ceremwa cĩggĩĩng bahuuca nẽ odongteek Yeesu hataadoothĩk.

³⁶ Ma baa iꞌthianaanĩ Yeesu weet ko, iita eteettik eeta ceremwa cĩggĩĩng ꞌgõõlaa ꞌcĩ õkõõĩ nẽẽ ho.

³⁷ Ma baa õdõlan nĩngĩtĩ allũũcẽnĩ ꞌgõõl õkõõĩ Muuraa cĩ Olivi, iꞌthianaaĩ lothippiti cĩ nuyyioohu ubuluthit Nyekuc gẽrrẽẽt taliitta, hĩnĩngĩtĩ thooꞌthiok baag ĩnaat eeta baag adĩman Yeesu.

³⁸ Baa ebenni nẽẽg aĩ, “Aꞌnyĩĩk Nyekuc haggatan habu ꞌcĩ aku ꞌthaarĩĩ ĩcĩg Makayyiookto!” “Aꞌnyĩĩk bũnnai hĩ bulẽẽnĩt haau hĩ Nyekuc hẽẽtahujjieen!”

³⁹ Aduhaak hinnia Variꞌtheei ũgẽẽgĩ Yeesu lothippitatõõ anneek, “ꞌLimmannioohit, ꞌgerenyeek nuyyiook cugunnig ko hĩjjaaktõ.”

⁴⁰ Ẽdẽcĩ Yeesu anneek, “Haduhaakuunga, má ĩjjaaktõ nẽẽgĩ, occa hinnia hatĩ ebenni biyyiẽẽna.”

⁴¹ Ma baa õbõktõ nẽẽ hĩ ꞌJeruꞌthalẽm nẽ ĩcĩn ꞌtaaũn, ikia utulu,

⁴² nẽ õthõõth ĩĩ, “Kõr nicci, aitiõõ eeta cugunnig hõllõngaa aga ꞌgii ꞌcĩ hatĩ aꞌnyahaak ĩhõõggõ ganõn! Nẽ ꞌyioko, aguꞌthi hĩ ĩhõõggõ hẽbẽrẽẽnnĩĩ cĩggĩĩng.

⁴³ Niig eeta cĩg ꞌJeruꞌthalẽmĩ, aku hatĩ kõrra ꞌcĩ irriamaneekuung ngagiit mĩrõha cugguung nẽ uuktuunga. Irriamaneekuung hatĩ mĩrõha nẽ ũꞌnyũũgĩtõ lõkõrẽẽt vẽlẽk.

⁴⁴ Õrrõyõõhaneekuung hatĩ nẽẽg ngagiit looc, hõdẽĩ hĩ lõhõlĩ cugguung vẽlẽk. Hĩnĩngĩtĩ hõllõngaa hatĩ ũũnnĩk mĩrõha cugguung bẽẽ umwa hataadĩ ꞌgoonnia, hĩnĩngĩtĩ hõllõngaa elemmu niig kõr cĩ elliaanĩt cunuung.”

Yeesu ꞌCieethaa cĩ Nyekuci

⁴⁵ Ma nĩngaata, ũũk uduhun Yeesu halang cĩ ꞌCieeth cĩ Nyekuci nẽ itiggiawaak eet ꞌcĩg baag ũũtẽnĩ ijjio battaali.

⁴⁶ Nẽ ĩĩnnĩk, “Eheeddi thõõth aĩ, ‘Haĩ ꞌcieeth caannĩ, ꞌCieeth cĩ Laiitto,’ Au hinnia aarru niig hĩĩ ‘ꞌcieeth cĩ igorriaahu.’ ”

⁴⁷ Nẽ waathinniook nicciag vẽlẽk, baa gõõng alliman nẽẽ eet ꞌCieethaa cĩ Nyekuci. Adiim hinnia aruk makayyiooha cĩg paadĩrꞌnyaannu hĩ ꞌlimmanniook cĩg nyattaalak, hĩ makayyiook cĩg eetuk ĩnõõnnõ thõng.

⁴⁸ Nẽẽthĩ, baa aꞌnyaman ĩhõõggõ ꞌgõõl ꞌcĩ occa aruhi, hĩnĩngĩtĩ baa aalla eeta vẽlẽk nĩngaata athĩhĩ ĩnõõnnõ.