ꞌLuuka 18 - ꞌBuuk cĩ Thõõth cĩ Nyekuci

Ngaatĩbõyyĩ hĩ ꞌgaadĩ

¹ Nĩngĩtĩ aduhaakĩ Yeesu nuyyiook cĩgĩnnĩg thõõth ꞌcĩ awantoothĩk ko, hẽtẽrẽth ĩhõõggõ hatĩ gõõng halayyio ooo nẽ iittiõõ hõllõngaa ũũnnĩk laiinit.

² Baa aduhaak nẽẽ ĩhõõggõ anneek, “Baa aaĩ ꞌgaadĩ umwaa ꞌtaaũnaa umwaanĩ ꞌcĩ hõllõngaa itieelli Nyekuc nẽ hõllõngaa aallak eeta.

³ Nẽ baa aaĩ ngaatĩbõyyĩ umwaa ꞌtaaũnaa tĩho buúk, ꞌcĩ õkõ ĩĩlaleek ꞌgaadĩ anneek, ‘Kũmaneeka baaĩ nuun thõõth ꞌcĩ abĩlla ẽẽtĩ ho.’

⁴ “Abũrĩ hinnia nõõ ꞌgaadĩ ngaatĩ ẽẽlĩ ĩnõõnnõ. Ma uruta ꞌrĩng, ikia ummuk ĩĩ, ‘Tananga aitiõõ naa hõllõngaa hiteelli Nyekuc, hode haallahi eeta,

⁵ ĩꞌnya hũkũmaneek thõõth cĩ ngaatĩbõyyĩ icci, hátĩ hiittiõõ hõllõngaa ara aku accananĩ!’ ”

⁶ Nĩngĩtĩ annẽẽkĩ Makayyioohiti nuyyiook cĩgĩnnĩg, “Ĩthĩhĩt thĩ dako nõõ thõõth ꞌcĩ aduha ꞌgaadĩ ꞌcĩ ĩĩn ꞌloorriahit ko.

⁷ Ĩcca occa ꞌthẽk hõllõngaa ẽẽl Nyekuci eet cĩgĩnnĩg ꞌcĩg ẽbẽra nẽẽ ẽlẽk, ꞌcĩg ĩĩlaleek ĩnõõnnõ baalin hĩ waathĩn? Ara occa hatĩ iiggiaeek ĩhõõggõ tuu?

⁸ Haduhaakuunga, aaꞌnyĩk ꞌthẽk hatĩ nẽẽ ĩhõõggõ hummuddia eliinit hĩdĩĩkoothong. ꞌYioko occa ꞌthẽk hatĩ ma õbõda Ngeertĩ Eeto, ammũdaak occa ꞌthẽk hatĩ lemiinit loota nĩnga?”

ꞌLimman ꞌcĩ awantoothĩk Variꞌtheenit hĩ eet ꞌcĩ alũt occoro

⁹ Baa aduhaak Yeesu ꞌlimman ꞌcĩ awantoothĩk eet ꞌcĩg ammuk aĩ habũnnayya nẽ atararri ꞌgõõnõgĩ ũgĩ anneek,

¹⁰ “Baa aattĩg eeta ꞌramma ꞌcĩg õõ alayyi ꞌCieethaa cĩ Nyekuci. Baa ĩĩn hõdẽĩ Variꞌtheenit nẽ ĩĩ umwaa luttioohit cĩ occoro.

¹¹ Õkõ alayyi Variꞌtheeniti ꞌjieena aĩ, ‘Nyekuc, hanneekii ĩlaallẽ, hĩnĩngĩtĩ aitiõõ naa hõllõngaa haaĩ hĩ eeta ũgẽẽgĩ. Aitiõõ naa hõllõngaa hĩgõrꞌthĩ nẽ hõllõngaa hĩĩnĩ lobolobbiaahit nẽ hõllõngaa hattihi ngaaĩ cĩg eetuk nẽ tarĩ hõllõngaa ꞌthẽk haaĩ hĩ luttioohiti cĩ occoro ho.

¹² Hẽdẽta naa ẽlẽ caannĩ ꞌgẽẽna waathinniook ꞌramma lomidikaawa hõdẽẽthõng. Nẽ tarĩ, hẽꞌngẽraakii ꞌgii ꞌcĩ abadtẽc hõdõõkõthĩ, hatĩ hammũda.’

¹³ “Baa hinnia abĩllaa luttioohiti cĩ occoro ho ꞌrẽẽna, akannĩ hẽbẽrĩ looc, hĩnĩngĩtĩ aga ngaatĩ ĩĩnĩ ꞌthẽccannioohit ꞌcĩ hõllõngaa occa ũũppan ngaatĩ acĩnõõꞌthĩ hẽẽtkujjieen. Nĩngĩtĩ ĩddaaĩ ĩyyõ nẽ alaõ ĩĩ, ‘Nyekuc, tamaatĩhaa nganĩĩt ꞌthẽccannioohit.’ ”

¹⁴ Ma ho, uduha Yeesu ĩĩ, “Haduhaakuung dĩdĩ, luttioohit cĩ occoro ho ꞌcĩ aku accamana Nyekuci, baa ikia õbõdõõthĩ ĩĩcĩ olu hĩllõõan Variꞌtheenit. Hĩnĩngĩtĩ ẽẽtĩ ꞌcĩ õdõng ẽlẽ cĩnnĩ ꞌgoonoginni vẽlẽk, arritanniaak hatĩ looc nẽ ẽẽtĩ ꞌcĩ arritan ẽlẽ cĩnnĩ, odoꞌngi hatĩnĩ.”

Aggatan Yeesu lõhõlĩ ꞌcĩg hidicig

¹⁵ Baa aꞌnyahaak eeta Yeesu lõhõlĩ ꞌcĩg hidicig hikia huhum nẽẽnĩ. Ma baa adtuuha nuyyiooha ho, eggerenyteek ĩhõõggõ hoboddi lõhõlĩ.

¹⁶ Aũ hinnia Yeesu lõhõlĩ nẽ ĩĩ, “Aanytĩk lõhõlĩ ꞌcĩg hidicig ko hiita hĩ nganĩĩta, ma halaammu, hĩnĩngĩtĩ ĩĩn habuccieet cĩ Nyekuci cĩ eet ꞌcĩg aattĩg hĩ ꞌyioko nẽẽg ko.

¹⁷ Haduhaakuung dĩdĩ, ẽẽtĩ ꞌcĩ hõllõngaa ẽlẽmĩ habuccieet cĩ Nyekuci hĩ lohollia cieegi, aitiõõ hatĩ nẽẽ hõllõngaa aduhun habuccieet cĩ Nyekuci ũdũt.”

ꞌGaalac ꞌcĩ aballi

¹⁸ Ma ho, ijin ꞌgaalacĩ umwaa Yeesu ĩĩnnĩk, “ꞌLimmannioohit ꞌcĩ abũnnaa, ne occa ꞌcĩ adiim hadĩmani naa, hátĩ hũmmũda rũgẽt ꞌcĩ aalla ũdũt?”

¹⁹ Ẽdẽcĩ Yeesu anneek, “Inni tũvvaa nii nganĩĩt ĩnnĩhaa habũnna ho? Nyekuc dioo ꞌcĩ abũnnaa.

²⁰ Hõllõngaa aga nii tilooinit ꞌcĩ aĩ, ‘Ma hattihi ngaa cĩ eet umwa, ma haruhi, ma hĩgõrꞌthĩ, ma haddangaahi, tingõlĩ maaꞌnyu hĩ ngaanu!’ ”

²¹ Ẽdẽcĩ hinnia ꞌgaalacĩ nicciee aĩ, “Hũnũũhĩha naa ngaatĩ haꞌthũũnnĩ thooꞌthiok iccig vẽlẽk nganĩngĩtĩ hĩĩnnĩ hĩdĩca.”

²² Ma baa athĩhĩ Yeesu thõõth icci ho, ikia uduhaak ĩnõõnnõ ĩĩnnĩk, “Nga thĩ aitioonni nganiit ꞌgii hõdẽẽthõng tõõ, bĩĩt tũũõĩ ꞌgii vẽlẽk ꞌcĩ aꞌnyahi nẽ eꞌngereehu hullaha ꞌrabbẽẽta, nẽẽthĩ, ikia ũnũaa nganĩĩta nẽ hatĩ aꞌnyahu baliinit hẽẽtahujjieen.”

²³ Ma athĩhĩ ꞌgaalacĩ ciee thõõth icci ho, ikia õmõthĩ gẽrrẽẽt, hĩnĩngĩtĩ baa ĩĩn nẽẽ eet ꞌcĩ aballi gẽrrẽẽt.

²⁴ Nĩngĩtĩ acĩnĩ Yeesu ĩnõõnnõ noho nẽ ĩĩ, “Hõlõ õkõm ngaatĩ occa adukni ballioohiti habuccieet cĩ Nyekuci!

²⁵ Dĩdĩ, mẽẽn ngaatĩ occa adukni nyaakaalĩ hutuli aagõõng lĩbbĩraaõ, hĩllõõan ngaatĩ occa adukni ballioohiti habuccieet cĩ Nyekuci.”

²⁶ Nĩngĩtĩ ajini eeta ꞌcĩg baag aattĩg nĩngaata Yeesu annẽẽkĩ, “Eet occa thĩ hatĩ ꞌcĩg aattĩg hutuno ꞌcĩg occa eelliaa?”

²⁷ Ẽdẽca Yeesu aĩ, “ꞌGii ꞌcĩ aꞌnyaman eet, ũũlũ Nyekuci.”

²⁸ Ma ho, ijin Pẽẽtũrũ ĩnõõnnõ ĩĩnnĩk, “Ma ꞌyioko naag ꞌcĩg hũtũngteeha ꞌgii vẽlẽk nẽ hunuyyi nganiit ko?”

²⁹ Ẽdẽcĩ Yeesu ĩhõõggõ anneek, “Haduhaakuung dĩdĩ, ẽẽtĩ umwaa ꞌcĩ ũtũngeek õlõ cĩnnĩ, hode ngaa cĩnnĩ, hode ꞌgõtõõnõgĩ, hode aattĩnnĩ hĩ maaꞌnyĩ, hode lõhõlĩ cĩgĩnnĩg, hĩnĩngĩtĩ habuccieet cĩ Nyekuci,

³⁰ aaꞌnyĩhoothĩk hatĩ hẽlẽggĩ ꞌcĩg ĩllõõan loota nĩnga. Aaꞌnyĩhoothĩk hatĩ ĩnõõnnõ rũgẽtĩ ꞌcĩ aalla ũdũt hẽẽtahujjieen.”

Uduha Yeesu thõõth cĩ daahĩth cĩnnĩ tarĩ

³¹ Ma ho, ũũhĩ Yeesu nuyyiook cĩgĩnnĩg ngadiiha nẽ ĩĩnnĩk, “Hõõ ꞌyioko hatĩ naag ꞌJeruꞌthalẽma nẽ õõ hatĩ edeeꞌnyia thooꞌthioha vẽlẽk baag ẽhẽẽd põrõvẽtaaꞌnya, hĩnĩngĩtĩ Ngeertĩ Eeto ĩĩca.

³² Aaꞌnyĩhoothĩk hatĩ nẽẽ eet ꞌcĩg hõllõngaa ĩĩn ꞌJudeei. Uuk hatĩ nẽẽg ĩnõõnnõ nẽ odoomito nẽ uttuurrik ammũta nẽ uruhit hadaak.

³³ Ma hatĩ urutaa cĩ waathinniook iyyio, arũgna hatĩ nẽẽ daahĩtha.”

³⁴ Baa hõllõngaa aga nuyyiooha thõõth ꞌcĩ õthõõth Yeesu ho, hĩnĩngĩtĩ baa ammiꞌthi thõõth ciee hĩ ĩhõõggõ.

Aaꞌnyĩk Yeesu eet ꞌcĩ rubenĩ hĩcĩnĩ

³⁵ Ma baa õbõktõ Yeesu hĩ ꞌJeriko, baa aaĩ rubenniaahiti umwaa ꞌcĩ ala eet ꞌgõõla ngadiiha.

³⁶ Ma baa athĩhĩ nẽẽ lothippit ꞌcĩ õvvõ ho, ijin eet ĩĩnnĩk, “Neegi thĩnõ hõlõ?”

³⁷ Ẽdẽcĩ eeta anneek, “Yeesu ꞌcĩ Naaꞌtharẽtĩ ꞌcĩ õkõ ho.”

³⁸ Ma athĩhĩ rubenniaahiti nicciee ho, ũtũvvõ ĩĩ, “Yeesu, Ngeertĩ Daavide, tamaatĩhaanĩ!”

³⁹ Eggerꞌnyeek hinnia eeta ꞌcĩg uwwattĩ ĩnõõnnõ anneek ꞌjaahõ. Ẽggẽrẽny hinnia gẽrrẽẽt aĩ, “Ngeertĩ Daavide, tamaatĩhaanĩ!”

⁴⁰ Ma ho, ĩbĩl Yeesu nĩngĩtĩ aduhaakĩ eet haꞌnyakta ĩnõõnnõ. Ma baa aꞌnyakiaa ho, ijin Yeesu ĩnõõnnõ ĩĩnnĩk,

⁴¹ “Ne ꞌcĩ adiimmaa nii nganĩĩt hadĩmaneehi?” Ẽdẽcĩ nẽẽ aĩ, “Makayyioohit, hadiimi hacĩnĩ.”

⁴² Nĩngĩtĩ annẽẽkĩ Yeesu ĩnõõnnõ, “Cĩnĩ. Aaꞌnyi lemiiniti cunni bũna.”

⁴³ Ma hĩdĩĩkoothong ĩcĩnĩ ẽẽtĩ nicciee nĩĩcĩ noho nẽ ũnũ Yeesu ĩdĩhĩthõõthĩ Nyekuc. Ma baa acĩn eeta vẽlẽk ko, idihiꞌthiõõthĩ nẽẽg buúk Nyekuc.