ꞌLuuka 13 - ꞌBuuk cĩ Thõõth cĩ Nyekuci

Ũtũngteek ꞌthẽccan hode adaaknu

¹ Kõr niccia, baa au aduhaak eeta ũgẽẽgĩ Yeesu thõõth cĩ daahĩth cĩ eet cĩg ꞌGalileei, ꞌcĩg baag aruk Pĩlaatõ nga ĩbboorĩk nẽẽg Nyekuc ꞌgaarriẽẽn.

² Ajin hinnia Yeesu ĩhõõggõ anneek, “Ammuku ꞌyioko niig ainnu aruhi baa ꞌGalileei nicciag, hĩnĩngĩtĩ ĩĩn baa nẽẽg ꞌthẽccanniook ꞌcĩg abathĩ hĩllõõanit ꞌGalileei vẽlẽk?

³ Haduhaakuunga, má hõllõngaa uunniku niig ꞌgõõl cĩ ꞌthẽccanẽẽt cugguung, acuddiaannu hatĩ hĩĩ lõõcĩ ꞌthĩĩ!

⁴ Ma eeta baag ĩĩn õmmõtõ hĩ turkiyyio baag arriban ꞌcieeth ꞌThiloama? Ammuku baa niig ainnu ĩĩn baa nẽẽg ꞌthẽccanniook hĩllõõanit ꞌgõõnõgĩ ũgĩ ꞌcĩg aattĩg ꞌJeruꞌthalẽma?

⁵ Huduhaahuung dĩdĩ, má hõllõngaa uunniku niig buúk ꞌgõõl cĩ ꞌthẽccanẽẽt cugguung, adaaknu hatĩ niig buúk hĩ nẽẽgĩ.”

ꞌLimman ꞌcĩ awantoothĩk ꞌmũũnĩc

⁶ Ma ho, uduhaak Yeesu ĩhõõggõ ĩĩnnĩk, “Baa aaĩ ẽẽtĩ umwaa ꞌcĩ aꞌnyak ꞌmũũnĩc manatõõ cĩnnĩ ĩcĩ viinoo. Ma kõr umwa, ũũk ĩcĩn aĩ horoong oho ibbiira. Ammũdoothĩk hinnia nga hõddõngõt buúk.

⁷ Nĩngĩtĩ aduhaakĩ bekioohit cĩ manu annẽẽkĩ, ‘Ẽlẽ, tengedeek ꞌmũũnĩc icci tuu. Ĩĩtõ irkiꞌnyia iyyio ꞌcĩg hara hakuuni naa ngaati, haĩ hikia hĩcĩn ꞌmũũnĩc icci hatĩ õddõngõta, hara hinnia hammũdeehi hiꞌthihi ꞌmũũnĩ. Inni ꞌyioko ꞌthẽk hũtũngteek huranganĩ ꞌthẽẽm haaga ho?’

⁸ “Ẽdẽcĩ bekioohiti nicciee anneek, ‘Makayyioohit, aꞌnyĩĩk baaĩ nuun nõõ haau irkit hõdẽĩ. Hudwaani hatĩ naa jurrung nẽ hũlũtaaha ꞌthẽẽm ꞌcĩg abũnnaa.

⁹ Má õddõngõt irkit cĩ ꞌgõõla, abũnnaa thĩ hatĩnĩ. Má aitiõõ tõõ nẽ thĩ hatĩ etengedeehu tuu.’ ”

Ẽẽla Yeesu ngaa ꞌcĩ ahuuli

¹⁰ Ma Kõr umwa cĩ ꞌYiommaanõ ĩĩcĩ baa allimanĩ Yeesu eet ꞌCieethaa cĩ Laiitto,

¹¹ baa aaĩ ngaa umwaa ꞌcĩ ahuul lorii ꞌcĩ abathĩ irkiꞌnyia õmmõtõ hĩ turkiyyio. Baa aduuli ngaa tĩho harũt hanyaman ngaatĩ abĩllĩ ꞌcũl.

¹² Ma baa adtuuha Yeesu ĩnõõnnõ ho, ũtũvvũ hikia ĩĩcĩ oou nẽ ĩĩnnĩk, “Ngaa cieeni, ũbũnauu niina.”

¹³ Nĩngĩtĩ ahumi Yeesu ĩnõõnnõ hĩbĩl ꞌcũl hĩdĩĩkoothong nẽ iꞌthianaaĩ ĩdĩhĩth Nyekuc.

¹⁴ Ma adtuuha makayyioohiti cĩ ꞌCieeth cĩ Laiitto ngaatĩ adĩmanĩ Yeesu thõõth icci Kõrraa cĩ ꞌYiommaanõ ho, ikia ĩlĩĩlĩ gẽrrẽẽt, nĩngĩtĩ annẽẽkĩ lothippit, “Ĩĩn waathinniooha hõdõõkõthĩ tõrkõnõn cĩg dtiicak. Iita eellia eleeti waathinnioohĩĩ cĩg, hõllõngaa Kõrraa cĩ ꞌYiommaanõ.”

¹⁵ Ẽdẽcĩ hinnia Makayyioohiti ĩnõõnnõ anneek, “Niig oloꞌngiaaha! Aitiõõ nooyyia niig hõllõngaa ooggu olĩꞌnya cĩg kanniittak, hode thigirẽẽt cugguung Kõrraa cĩ ꞌYiommaanõ hõõt huhuddi?

¹⁶ Occa ꞌyioko adiimmu niig tĩnaatĩ Abũrahamĩ ꞌcĩ ẽcẽb ꞌThĩttaanĩ irkiꞌnyia õmmõtõ hĩ turkiyyio ho, hiittiõõ hõllõngaa eelliaa Kõrraa cĩ ꞌYiommaanõ?”

¹⁷ Ma baa aduha Yeesu thõõth icci ho, ikia aggam ngaaoni eet ꞌcĩg abũrĩ thõõth cĩnnĩ ho gẽrrẽẽt nẽ baa accamattoothĩk ꞌcĩg ẽlẽmĩ ĩnõõnnõ, hĩnĩngĩtĩ hẽlẽggĩ ꞌcĩg adĩman nẽẽ ho.

Aaĩ habuccieet cĩ Nyekuci hĩ nii?

¹⁸ Nĩngĩtĩ ajini Yeesu eet annẽẽkĩ, “Aaĩ habuccieet cĩ Nyekuci hĩ nii? Ĩcca occa hĩthakꞌtheehi ne?

¹⁹ Aaĩ habuccieet cĩ hẽẽtkujjieen hĩ hinyomooc ꞌcĩ dĩppĩlĩ ꞌcĩ atiboolan ẽẽtĩ manatõõ nẽ ĩtĩlĩtha hĩĩ hẽẽt ꞌcĩ maka nẽ iita õlõmattĩ hĩbaallĩ taba cĩgĩnnĩg.”

²⁰ Nẽ ijino Yeesu tarĩ ĩĩ, “Hĩthakꞌtheehi occa ꞌthẽk naa habuccieet cĩ Nyekuci ne?

²¹ Aaĩ habuccieet cĩ Nyekuc hĩ abũũlana ꞌcĩg õꞌngõõtaneek ngaa tũkaanatõõ, nĩngĩtĩ aduuyyi tũkanĩ vẽlẽk.”

Hattũũg ꞌcĩ lũdũcĩ

²² Nĩngĩtĩ õkõ allimanõõꞌthĩ Yeesu eet ꞌtaaũnnioohĩ hĩ olooyyiohĩ, baa õkõ nẽẽ ĩĩcĩ ꞌJeruꞌthalẽmĩ.

²³ Ma ho, ikia ijin eet umwaa ĩnõõnnõ ĩĩnnĩk, “Makayyioohit, eelliaa ꞌthẽk hatĩ eeta vẽlẽk, hode eelliaa hatĩ eeta ꞌcĩg abadtẽc haaga?” Ẽdẽcĩ Yeesu eet tĩho anneek,

²⁴ “Haduhaakuung dĩdĩ, ĩrrĩcatta gẽrrẽẽt ngaatĩ aduhunnu hattũũg ꞌcĩ lũdũcĩ, hĩnĩngĩtĩ mẽẽlĩg hatĩ eeta ꞌcĩg attĩman ngaatĩ adukni nẽ aꞌnyaman hatĩnĩ.

²⁵ Ma ꞌthẽk ĩtĩnga baattĩ ꞌcieethu nẽ ũꞌnyũũg hattũũg, abillu hatĩ ꞌrõta battaala, ara aruku hattũũg nẽ ĩĩlallu iittu, ‘Makayyioohit, ꞌbuuhiheet baaĩ nuun hattũũg.’ “Ẽdẽcĩ hatĩ Makayyioohiti aĩ, ‘Aitiõõ naa hõllõngaa hagayyuunga.’

²⁶ “Edeccu hatĩ anneeku, ‘Ma tarĩ ngagĩĩt baag gõõng haduhi hõdẽĩ, hĩ nganiit nẽ illimaneet ꞌgoolliohĩĩ cĩg ꞌtaaũnniook cĩggaang ko?’

²⁷ “Nẽẽthĩ, ẽdẽcĩ hinnia hatĩ nẽẽ aĩ, ‘Hõlõ, hõllõngaa hagayyuung naa ngagiit hĩ looc ꞌcĩ auunnu. Ammanyattĩ muumaa caannĩ, niig eeta baag gõõng adĩmannu ꞌthẽccanẽẽt ko!’

²⁸ “Aluyyu hatĩ gẽrrẽẽt nẽ adaktu nyĩgĩt hatĩ icittu Abũrahaamõ hĩ Iꞌthaako hĩ Yakobo hĩ põrõvẽtaaꞌnya vẽlẽk habuccieetaa cĩ Nyekuci nẽ nẽẽ itiggiayyioothihu niig battaali.

²⁹ Allũnganniaa hatĩ eeta loonyinii vẽlẽk, ĩĩcĩ uruto hĩ ĩĩcĩ õkõlõõthĩkĩ kõrra hĩ ĩĩcĩ holooc hĩ ĩĩcĩ hujjieen, hiita haauto dtaabĩtĩĩ cĩggĩĩng nẽ adahit karrama cobbi gẽrrẽẽt habuccieetaa cĩ Nyekuci.

³⁰ Nẽ dĩdĩ, aattĩg hatĩ eeta ꞌcĩg ꞌyioko adtuurna, ꞌcĩg hatĩ au uwwattĩ. Nẽ aattĩg ꞌcĩg ꞌyioko uwwattĩ ho, ꞌcĩg hatĩ au adtuurna.”

Yeesu hĩ Ẽrõõdẽ

³¹ Ma kõr niccia, iita uduktaak Variꞌtheei ũgẽẽgĩ Yeesu ĩĩttĩk, “Tĩnga ngaati, adiim aku aruki Ẽrõõdẽ.”

³² Ẽdẽcĩ hinnia Yeesu ĩhõõggõ anneek, “Õõt uduktaak irrieer iccia ĩĩttĩk, ‘Nga nõõ hiiggia naa loriẽẽt ꞌcĩg abathĩ nẽ hẽẽla eet ꞌcĩg õmmõõrĩ, kõr nicci hĩ lohotha nẽ hatĩ hẽdẽcaaha dtiic caannĩ luhutheet.’

³³ Hõkõ naa ꞌgõõlaa caannĩ kõr nicci hĩ lohotha, nẽẽthĩ hatĩ hõdõlana ꞌJeruꞌthalẽm luhutheet. Nẽ dĩdĩ, aitiõõ põrõvẽtaacĩ ꞌcĩ occa aruhi battaala cĩ ꞌJeruꞌthalẽmĩ tõõ.”

Ammĩnan Yeesu ꞌJeruꞌthalẽm

³⁴ Ma ho, õppõdan Yeesu ĩĩ, “ꞌWui niig eeta cĩg ꞌJeruꞌthalẽmĩ, aruku bẽrẽ niig põrõvẽtaaꞌnya nẽ ohoddiaau eet ꞌcĩg ĩꞌthooyyiakuung ngagiita. Hĩĩdĩ naa hõdõõkõthĩ ngaatĩ hadiim halũtaanĩ lõhõlĩ cugguung ngaatĩ hõdẽẽthõng, hĩ gõõng alũtaak tũhũlũc lõhõlĩ cĩgĩnnĩg havvuutõnĩtõõ, aburru hinnia niiga.

³⁵ Ĩcĩnĩt nõõ, ngaatĩ ũũnnĩkĩ Nyekuci ꞌcieethi cugguung ẽmmẽn, haauto hĩ ꞌcieethi ꞌcĩg uluugti eeta ẽlẽk. Haduhaakuung dĩdĩ, iittiõõ hatĩ niig hõllõngaa acĩnnaangu nganĩĩt tarĩ, ĩꞌthõng othoothit ĩĩtõ, ‘Aꞌnyĩĩk Nyekuc haggatan eet ꞌcĩ aku ꞌthaarĩĩ cĩg Makayyiookto!’ ”