ꞌLuuka 10 - ꞌBuuk cĩ Thõõth cĩ Nyekuci

Ĩꞌthõ Yeesu nuyyiook hẽẽn tũkĩramma hĩ ꞌramma

¹ Ma urutaa cĩnnĩ, ẽbẽra Yeesu Makayyioohiti nuyyiook hẽẽn tũkĩramma hĩ ꞌramma tarĩ nẽ ĩꞌthõ hĩ ꞌramma hĩ ꞌramma, hutuwattĩ hõõt ꞌtaaũnnioohĩ hĩ ꞌgoolliohĩ vẽlẽk ĩcĩg hatĩ õkõõĩ nẽẽnĩ.

² Baa iloot nẽẽ ĩhõõggõ anneek, “Ibbiir mana cobbi gẽrrẽẽt nẽ hĩdĩcĩg hinnia janniooha. Alaac Makayyioohit baattĩ manu hĩꞌthõõa janniook ũgĩ.

³ Ĩtĩngaac õõtõ. Nẽẽthĩ, agayyiooth ngaatĩ hĩꞌthooikuung ꞌyioko naa ngagiit ngaatĩ abathĩ, hĩ aꞌtha ꞌcĩg aꞌngĩdoothĩk ngaatĩ abbĩꞌthẽẽnĩ huduumwaana.

⁴ Nẽẽthĩ, ma haꞌnyaku ꞌrabbẽẽt, hode locoburo hode caawa nẽẽ haaga. Nẽ ma hĩꞌthaayyu eet umwa ꞌgõõla ũdũt.

⁵ “Ma aduhunnu halang cĩ eet umwa, aggatanit nõõ ĩĩttĩk, ‘Aꞌnyĩĩk ganõn haau halangatõõ ĩĩcĩ.’

⁶ Nẽ má aaĩ ẽẽtĩ ꞌcĩ abũnnaa halangatõõ tĩho, aggatan hatĩ laiiniti cunuung cĩ bũnnaiitto ho ĩnõõnnõ. Má aitiõõ, õbõda hatĩ ꞌgattanĩ cunuung ko hĩ ngagiita.

⁷ Aallattia halangatõõ tĩho, ma hovvooyyu ꞌjieena ũdũt. Adahit ꞌgẽẽn ꞌcĩ aaꞌnyuung eeta cĩg halang tĩho, hĩnĩngĩtĩ ũũppan ẽẽtĩ ꞌcĩ idticanõõ ngaatĩ adũmaniini.

⁸ “ꞌTaaũnaa ĩĩcĩ õõ aduhunnu nẽ ẽlẽmtuung eeta, adahit ꞌgẽẽn ꞌcĩ aaꞌnyuung nẽẽgĩ.

⁹ Õõt ꞌthẽk aanytĩk eet vẽlẽk ꞌcĩg õmmõõrĩ hũbũttaathõ, nẽ uduktaahu iittihu, ‘Aau habuccieet cĩ Nyekuci ojoonu.’

¹⁰ Nẽẽthĩ, ꞌtaaũnaa ĩĩcĩ ooyyu nẽ utuburruung eeta, õõt ꞌgoolliohĩ cĩggĩĩng nẽ iittihu,

¹¹ ‘Ĩꞌnya hutuddungteeha tuduhaac cĩ ꞌtaaũn cunuung ꞌcĩ aaĩ ꞌthõõnĩ cĩggaang ko loota, hĩĩ terethiinit ꞌcĩ adulothoothikuung bolloohiniti. Nẽẽthĩ, agaac jurrung ngaatĩ aavvi habuccieet cĩ Nyekuci ojoonu.’

¹² Haduhaakuunga, mẽẽttĩg hatĩ eeta cĩg ꞌThõõdõmĩ kõr ꞌcĩ ẽttẽẽdĩkĩ Nyekuci eet vẽlẽk thõõth, hĩllõõan eet cĩg ꞌtaaũn tĩho.”

ꞌTaaũnniook ꞌcĩg abũrĩ thõõth cĩ Nyekuci

¹³ Ma ho, õthõõth Yeesu ĩĩ, “Pĩĩrnanĩt hĩ ngagiit eet cĩg Korathini hĩ cĩg Beꞌthaida! Hĩnĩngĩtĩ ꞌyioko baa hĩĩ ꞌcĩ adĩmaniini thooꞌthioha ꞌcĩg ĩnaat eeta looccaa cunuung ko, hĩĩ ꞌcĩ baa adĩmaniini ꞌtaaũnnioohĩĩ cĩg ꞌTire hĩ ꞌThidõõnẽ, occa baa ũtũngteek eeta cĩg ꞌTire hĩ ꞌThidõõnẽ ꞌthẽccanẽẽt cĩggĩĩng baa hũnũũk ꞌrĩng. Occa ꞌyioko baa ahimit ceremwa cĩg ulwaanak nẽ aauto hatiꞌtheeta.

¹⁴ Nẽẽthĩ, mẽẽttĩg hatĩ eeta cĩg ꞌTire hĩ cĩg ꞌThidõõnẽ kõr ꞌcĩ ẽttẽẽdõthõõthĩkĩ eet thooꞌthioha hĩllõõattuung ngagiita.

¹⁵ Nẽ niig Kapernaumĩ, ammuku mõnõ niig ainnu, okooyyuung hatĩ Nyekuci ngagiit hẽẽtahujjieen thõng? Adhuhoothĩku hatĩ niig looccaa cĩ daakiahu!”

¹⁶ Ma ho, uduhaak Yeesu nuyyiook cĩgĩnnĩg ĩĩnnĩk, “Ẽẽtĩ ꞌcĩ athiknuung ngagiita, athĩkna nganĩĩt buúk. Nẽ ẽẽtĩ ꞌcĩ aburruung ngagiita, abũrra nganĩĩt buúk. Nẽ ẽẽtĩ ꞌcĩ abũrra nganĩĩta, abũrĩ eet baa ĩꞌthõõannaa nganĩĩt buúk.”

Oboddia nuyyiooha

¹⁷ Ma baa oboddia nuyyiooha baag ĩĩn hẽẽn tũkĩramma hĩ ꞌramma, baa atalla nẽẽg ꞌjieena gẽrrẽẽt, nĩngĩtĩ au aduhaakĩ Yeesu annẽẽkĩ, “Makayyioohit, ĩthĩkteet aattĩ loriẽẽta ꞌcĩg abathĩ buúk ꞌthaarĩĩ cugunnig!”

¹⁸ Ẽdẽcĩ Yeesu ĩhõõggõ anneek, “Baa ꞌthẽk hacini naa buúk ngaatĩ adhukiaanĩ ꞌThĩttaanĩ hẽẽtahujjieen hĩ tammu ꞌcĩ ammadĩ thõng.

¹⁹ Haaꞌnyuung naa ngagiit ꞌtirriani ꞌcĩ õõ õrõrrõõcannu hũkaaꞌnya hĩ nyadokorrooꞌnya ẽlẽk, hĩ ꞌtirrian ꞌcĩ ĩllõõannu mĩrõk nẽ aitiõõ ꞌthẽk hatĩ ꞌgii ꞌcĩ adakuung tõõ.

²⁰ Ma thĩ hinnia hatallu, hĩnĩngĩtĩ ĩthĩktuung loriẽẽta ꞌcĩg abathĩ. Atalit hĩnĩngĩtĩ eteheeddi ꞌthaara cugguung hẽẽtahujjieen.”

Accamanoothĩk Yeesu

²¹ Ma nĩngaata, aaꞌnyĩk Lorii ꞌcĩ Ẽllẽẽmĩth Yeesu haccamanoothĩk gẽrrẽẽt, nĩngĩtĩ õthõõthĩ Yeesu aĩnnĩ, “Hatallii naa nganiit gẽrrẽẽt Baaba, Makayyioohit cĩ hẽẽtkujjieen hĩ cĩ lootu, ngaatĩ ammiꞌthẽẽkĩ thooꞌthiok iccig eet ꞌcĩg ẽggẽẽnyĩth hĩ ꞌcĩg illimattĩ nẽ eteretheehu lõhõlĩ ꞌcĩg hidicig hĩ eet ꞌcĩg nga hillimattĩ. Ee Baaba, baa ꞌthẽk ꞌgii ꞌcĩ accamanaa nii cieeni.”

²² “Baa aaꞌnya nganĩĩt Baaba caannĩ hẽlẽggĩ vẽlẽk. Aitiõõ ẽẽtĩ ꞌcĩ aga Ngeerĩnĩ tõõ, Maaꞌnyĩ dioo ꞌcĩ aga. Nẽ tarĩ, aitiõõ ẽẽtĩ ꞌcĩ aga Maaꞌnyĩ tõõ, Ngeerĩnĩ dioo hĩ eet ꞌcĩg ẽbẽra Ngeerĩnẽẽnĩ ꞌcĩg aga ĩnõõnnõ.”

²³ Ma ho, ĩgõrĩthaak nuyyiook ngadiiha ĩĩnnĩk, “Aggatatteeu niig ngaatĩ aaꞌnyuung Nyekuci ĩcĩnĩt thooꞌthiok ꞌcĩg acinnu niig ꞌyioko ho.

²⁴ Haduhaakuung dĩdĩ, baa mẽẽlĩg habuẽẽta hĩ põrõvẽtaaꞌnya ꞌcĩg baag adiim acĩn hẽlẽggĩ ꞌcĩg ꞌyioko acinnu niig ko, nẽẽthĩ hinnia, nga hĩcĩnĩt ũdũt. Hode nẽẽ ngaatĩ athĩknĩ thooꞌthiok ꞌcĩg ꞌyioko athiknu niig ko nẽ nga hĩthĩhĩt ũdũt.”

ꞌLimman ꞌcĩ awantoothĩk Thamaritaanoc ꞌcĩ abũnnaa

²⁵ Baa aku ajin ẽẽtĩ umwaa ꞌcĩ aga nyattal cĩ Mũũꞌtha gẽrrẽẽt Yeesu anneek, “ꞌLimmannioohit, ne occa ꞌthẽk ꞌcĩ occa hadĩmani naa, hátĩ haaꞌnya Nyekuci hũrũg ũdũt?”

²⁶ Ẽdẽcĩ Yeesu ĩnõõnnõ anneek, “Ne ꞌcĩ eheeddi nyattaala? Nẽ ma agiili nii aĩ ne?”

²⁷ Ẽdẽcĩ ẽẽtĩ nicciee buúk aĩ, “ ‘Mĩnnan Nyekuc Makayyioohit cunni ꞌthĩnĩtaa cunni vẽlẽk, hĩ loriiaa cunni vẽlẽk hĩ ꞌtirriaanaa cunni vẽlẽk hĩ muhẽẽttaa cunni vẽlẽk.’ Nẽ ĩĩ, ‘Mĩnnan eet ꞌcĩ aaronnu haau hĩcĩ ammĩnani ẽlẽ cunni.’ ”

²⁸ Nĩngĩtĩ annẽẽkĩ Yeesu ĩnõõnnõ, “Ẽbẽaneehi. Bĩĩt thĩ ꞌthẽk dĩman hĩcĩ aduha nii hataa, nẽẽthĩ hatĩ urugu.”

²⁹ Baa adiim ẽtẽrꞌtha ẽẽtĩ nicciee ngaatĩ ĩĩnnĩ nẽẽ eet ꞌcĩ aga nyattal gẽrrẽẽt, nĩngĩtĩ ajini nẽẽ Yeesu tarĩ annẽẽkĩ, “Eet iina ꞌcĩ haaronna ho?”

³⁰ Ma ho, ẽdtẽbanaak Yeesu ĩnõõnnõ dtẽẽllẽn ũgĩ anneek, “Baa aaĩ eet umwaa ꞌcĩ allũũcĩ kõr umwa ꞌJeruꞌthalẽma õkõ ĩĩcĩ ꞌJeriko. Ma ꞌgõõla, ommottio hĩ igorriaak. Ma nĩngaata, uukito igorriaaha ĩnõõnnõ hatawaal nẽ uppuruccia ceremwa, nĩngĩtĩ ũũnnĩkĩ nĩngaata.

³¹ Ammũdeek baa aaĩ paadĩrĩ umwaa ꞌcĩ ẽdẽcĩ ꞌgõõl tĩho buúk. Ma adtuuha eet nicci ho, awanĩt hinnia ayĩyyĩng õkõ ngadiiha, nĩngĩtĩ ẽdẽcẽẽkĩ.

³² Ma nĩngaata, ikia ẽẽtĩ umwaa cĩ hattũũg cĩ ꞌLeevi ꞌcĩ gõõng adticanni ꞌCieethaa cĩ Nyekuci. Õkõ acĩn nẽẽ buúk eet nicci loota noho, nĩngĩtĩ ẽdẽcẽẽkĩ.

³³ “Nẽẽthĩ urutaa cĩnnĩ, uppwaanna Thamaritaanõcĩ umwaa nĩngaata. Ma adtuuha eet nicci awaalĩth loota ho, aarria ĩnõõnnõ ꞌthĩnĩt nẽ atamaatĩk eet nicci.

³⁴ Nĩngĩtĩ ũũnyĩ ngatũbĩ cĩgĩnnĩg nẽ udduuttik ngõõrrõ hĩ viino nẽ ũmũmmũũran jurrung. Ma nĩngaata, odongeek thigiiraa cĩnnĩ nẽ õcõõd ũũk atanan ꞌtaaũna ꞌcieethaa cĩ heerinnioohu.

³⁵ Ma loohoth cĩnnĩ, ittiha ꞌdinaarꞌnya ꞌramma, nẽ aaꞌnyĩk baattĩ ꞌcieethu nẽ uduhaak ĩĩnnĩk, ‘Tananeehaa nõõ eet icci, ma hõbõda, hakuu hatĩ hadũmannii ꞌrabbẽẽt vẽlẽk ꞌcĩg atananĩĩ ĩnõõnnõ ho.’ ”

³⁶ Nĩngĩtĩ ajini Yeesu eet ꞌcĩ aga nyattal gẽrrẽẽt ko annẽẽkĩ, “Ma ammuhi nii nganĩ eetinii ꞌcĩg ĩĩn iyyio ho, ꞌcĩ abakꞌthõõ hĩ eet ꞌcĩ uuk igorriaaha ho?”

³⁷ Ẽdẽcĩ nẽẽ aĩ, “Eet mĩĩ ꞌthẽk ꞌcĩ ammaannĩk ĩnõõnnõ ho.” Nẽ uhutuuraneek Yeesu ĩĩnnĩk, “Bĩĩt thĩ dĩman nii buúk hĩ ꞌyioko hataa.”

Eheronoothĩk Yeesu Maarta hĩ Maria

³⁸ Ma baa ĩꞌngaathĩ Yeesu hĩ nuyyiook cĩgĩnnĩg ko, ũũk uppwaanĩ õlõõ ꞌcĩ aayyi ngaa ꞌcĩ haĩ Maarta. Nẽ ũtũvvũ ngaa nicciee ĩnõõnnõ ũũhĩ halangatõõ.

³⁹ Baa aꞌnyak Maarta ngõõnĩ ꞌcĩ haĩ Maria, ꞌcĩ baa õkõ iccioloongan loota ꞌthõõnĩĩ cĩg Makayyiooktak nẽ ĩthĩk ꞌlimman cĩnnĩ.

⁴⁰ Baa hinnia õkõ adiddil Maarta akũmaneek ꞌgẽẽn hĩ dtiicanĩ cĩg olu. Nĩngĩtĩ õkõ annẽẽkĩ nẽẽ Yeesu, “Makayyioohit, aaꞌnyĩka occa Maria hebeheeha dtiic noho inni? Duhaaka baaĩ nuun hikia nõõ hẽẽlaanĩ!”

⁴¹ Ẽdẽcĩ hinnia Makayyioohiti ĩnõõnnõ anneek, “Maarta, Maarta, aallahi nii hẽlẽggĩ ꞌcĩg mẽẽlĩg gẽrrẽẽt.

⁴² ꞌGii hõdẽẽthõng dioo ꞌcĩ aaddi, ẽbẽra Maria ꞌgii tĩho, nẽ ꞌthẽk aitiõõ hatĩ hõllõngaa aggammiaa hĩ ĩnõõnnõ ũdũt.”