ꞌLuuka 1 - ꞌBuuk cĩ Thõõth cĩ Nyekuci

Terethiinit cĩ ꞌBuuk cĩ ꞌLuuka

¹ Mẽẽlĩg eeta ꞌcĩg ĩttĩmanit gẽrrẽẽt ngaatĩ ẽhẽẽdĩ thooꞌthiok baag adĩman Nyekuci hõrggẽẽnaa cĩnaac.

² Ĩĩn thooꞌthioha baag ẽhẽẽd nẽẽg ko, nyeemuꞌnya baag aduhaakeet ngagĩĩt eeta baag ĩcĩnĩt hẽbẽrẽẽnnĩĩ cĩggĩĩng dẽẽdẽ.

³ Nĩngĩtĩ harrĩĩpanĩ naa buúk nyeemuꞌnya iccig jurrung, hiꞌthianaanĩ ũꞌngeeca. Ĩnõõ ꞌyioko ꞌcĩ haĩ hũnũaahii nganiit buúk jurrung ko makayyioohit Theovilo,

⁴ hanũaakii naa nganiit thooꞌthiok iccig, haini hátĩ gaa nii buúk jurrung thooꞌthiok baag allimanoothikii nganiita.

Udukia ꞌtirriaanĩtĩ cĩ Yõaannẽ Batitta

⁵ Baa ĩĩn Ẽrõõdẽ habu cĩ ꞌJudeea, baa aaĩ paadĩrĩ ꞌcĩ haĩ ꞌThakaria cĩ habuccieet cĩ paadĩrꞌnya cĩg Abija. Baa haĩ ngaa cĩ ꞌThakaria Eliꞌthẽbẽta. Aku Eliꞌthẽbẽta hattũũgaa cĩ Arõõnẽ.

⁶ Nẽ baa ĩĩn ꞌThakaria hĩ Eliꞌthẽbẽta eet ꞌcĩg abũnnaa gẽrrẽẽt muumaa cĩ Nyekuci, baa aꞌthũũnnĩ nẽẽg tilooinit hĩ nyattalliook cĩg Makayyiooktak jurrung.

⁷ Nẽẽthĩ, ammũdeek hinnia baa aitiõõ Eliꞌthẽbẽta lohollia tõõ nẽ tarĩ, baa atahaanyito nẽẽg ꞌrammaattĩg buúk.

⁸ Ma kõr umwa, baa ammũdeek adticanni lothippiti cĩ paadĩrꞌnyaannu hĩ ꞌThakaria ꞌCieethaa cĩ Nyekuci.

⁹ Nẽ nyattaalaa cĩ paadĩrꞌnyaannu, baa eberriaa ꞌThakaria kõr tĩho ꞌgõõlaa ꞌcĩ aruhi eeta tooto, hũũk hĩwaad mõhõõkac ꞌCieethaa cĩ Nyekuci.

¹⁰ Baa nga ĩwaaddi mõhõõkacĩ, baa abĩlĩ lothippiti cobbi gẽrrẽẽt alayyi battaala.

¹¹ Ma hĩdĩĩkoothong, uppwaannak aajĩlõ cĩ Makayyiookto ꞌThakaria ꞌcieetõõ, hikia hĩbĩl ĩĩcĩ aꞌthiit cobbi cĩ altaarĩ ꞌcĩ ĩwaadini mõhõõkacĩ ho.

¹² Ma baa acĩn ꞌThakaria aajĩlõ ho, ĩĩ torriak nẽ abarrit gẽrrẽẽt.

¹³ Anneek hinnia aajĩlõ nicciee ĩnõõnnõ, “ꞌThakaria, ma hiꞌngolinnaanĩ! Ĩthĩk Nyekuci laiinit cunni. Aꞌnyaki hatĩ ngaa cunni Eliꞌthẽbẽta nẽ ũtũhũwa loholeec ꞌcĩ maacĩ. Nẽ ma utuhuyyiaa, kateek ꞌthaar ꞌcĩg kaĩ Yõaannẽ.

¹⁴ Aaꞌnyi hatĩ ꞌtirriaanĩtĩ cĩnnĩ ꞌcammanoothĩk nẽ ꞌthẽk hatĩ accamattoothĩk eeta ꞌcĩg mẽẽlĩg buúk, hĩnĩngĩtĩ ꞌtirriaanĩt cĩnnĩ.

¹⁵ Hĩnĩngĩtĩ ĩĩn hatĩ nẽẽ eet ꞌcĩ tiiri gẽrrẽẽt hẽbẽrẽẽnnĩĩ cĩg Nyekuc Makayyioohit. Ma haaꞌnyiku hũhũd mẽrtĩ hode viino. Ĩĩn hatĩ nẽẽ eet ꞌcĩ aaĩ Lorii ꞌcĩ Ẽllẽẽmĩth hĩ ĩnõõnnõ nganĩngĩtĩ hatĩ arrittiaanĩ.

¹⁶ Irrioonĩk hatĩ nẽẽ eet ꞌcĩg mẽẽlĩg looccaa cĩ Ĩꞌthĩraẽlĩ hoboddia hĩ Makayyioohit Nyekuc cĩnĩĩng.

¹⁷ Uwwattẽẽkĩ hatĩ nẽẽ Makayyioohit loriia hĩ ꞌtirriaana cĩ Eliijja. Uwwattaa hatĩ nẽẽ hikia haaꞌnyĩk eet hũkũmattoothĩk, nga hikia Makayyioohiti. Aku hatĩ aaꞌnyĩk nẽẽ lõhõlĩ harraaccio hĩ maajihi, hátĩ haauto lõꞌngõõc nẽ irrioonĩk eet ꞌcĩg hõllõngaa athĩknĩ, hĩthĩhĩt ꞌgẽẽnyĩth cĩ eet ꞌcĩg abũnnaa.”

¹⁸ Ajin hinnia ꞌThakaria aajĩlõ anneek, “Aku occa ꞌthẽk hatĩ thõõth ciee ĩĩn dĩdĩ? Hĩĩtta naag hĩ ngaa caannĩ morwak haaga.”

¹⁹ Ma ho, ẽdẽc aajĩlõ nicciee ĩnõõnnõ ĩĩnnĩk, “Haĩnna nganĩĩt ꞌGaburẽẽlẽ, dticciannioohit cĩ Nyekuci. Hĩꞌthooyyia naa hikia huduhaahii nganiit nyeemuut ꞌcĩ abũnnaa ho.

²⁰ Nẽ hĩ ꞌyioko hõllõngaa elemi nii thõõth ꞌcĩ haduhaakii naa ho, iittiõõ hatĩ nii hõllõngaa othoothi ĩꞌthõng kõr ꞌcĩ hatĩ arrittiaanĩ loholeec ꞌcĩ haduha naa ho.”

²¹ Ma baa nga ẽrẽ eeta ꞌThakaria hõbõda ꞌCieethaa cĩ Nyekuci, baa apuppudii nẽẽg aĩ, inni haawua nẽẽ ĩꞌthõng ko.

²² Ma baa adukna nẽẽ battaala ho, aꞌnyaman hinnia ngaatĩ õthõõthĩ, nĩngĩtĩ aku õthõõthĩkĩ eet athĩnĩ haaga hĩ ẽẽtĩ ꞌcĩ adĩĩtĩ ĩĩna. Ma nĩngaata noho, agayyiõõthĩ eeta ngaatĩ ĩcĩnĩ nẽẽ ꞌgiimwa ꞌcĩ aku hĩ Nyekuc ꞌCieethaa cĩ Nyekuci.

²³ Ma baa edeccia kõrra cĩ dtiic cĩnnĩ ho, ikia õbõdõõthĩ ĩĩcĩ olu.

²⁴ Ma urutaa cĩ thooꞌthiok iccig, ikia aꞌnyahõ ngaa cĩnnĩ Eliꞌthẽbẽta, nĩngĩtĩ aallanĩ halangatõõ nyĩlõhĩ ꞌtur.

²⁵ Ma ngaati, ikia atal Eliꞌthẽbẽta ĩĩ, “Ẽẽla Makayyioohiti nganĩĩta. Eteretheeha nẽẽ nganĩĩt bũnnai cĩnnĩ waathinnioohĩĩ cĩg. Ittik nẽẽ ngaaoni gõõng nannĩ nẽ iittiõõ hatĩ eeta hõllõngaa aranna nganĩĩt tarĩ.”

Uduha aajĩlõ ꞌtirriaanĩt cĩ Yeesu

²⁶ Ma baa ĩĩtõ nyĩlõhĩ ꞌcĩg aꞌnyahiini Eliꞌthẽbẽta tõrkõnõn, ikia ĩꞌthooĩk Nyekuci aajĩlõ ꞌGaburẽẽlẽ ꞌtaaũnaa cĩ Naaꞌtharẽtĩ looccaa cĩ ꞌGalileea,

²⁷ hũũk hũmmũdoothĩk bũhẽẽc ꞌcĩ nga hatagguutho hĩ eet umwa ũdũt ꞌcĩ haĩ Maria. Baa anũõõ Maria hĩ nyahaappan ꞌcĩ haĩ Yothebo cĩ hattũũg cĩ Daavide.

²⁸ Nĩngĩtĩ õkõõĩ aajĩlõ ꞌGaburẽẽlẽ ĩꞌthõng hõdõlan Maria nẽ ĩꞌtha ĩnõõnnõ ĩĩnnĩk, “Hĩꞌthaayyina loholeec ciee accamanaanni Makayyioohiti ho! Aaĩ Makayyioohiti hĩ nganiita.”

²⁹ Athĩhĩ Maria thõõth icci noho nẽ ukuleek ꞌjieen ĩĩ, “ꞌThaainit occa gõõng ꞌcĩ aaĩ hutuno ciee?”

³⁰ Nĩngĩtĩ aduhaakĩ aajĩlõ ĩnõõnnõ annẽẽkĩ, “Maria, ma hiteelli, accamanaai nganiit Nyekuci,

³¹ aꞌnyaki hatĩ nii nẽ ũtũhũwa loholeec ꞌcĩ maacĩ nẽ hatĩ akateehu ꞌthaar ꞌcĩg haĩ Yeesu.

³² Aku hatĩ ĩĩn nẽẽ eet cobbi gẽrrẽẽt ꞌcĩ hatĩ haĩ, Ngeertĩ Nyekuc ꞌcĩ ĩllõõan vẽlẽk. Aaꞌnyĩk hatĩ Makayyioohiti Nyekuci ĩnõõnnõ hĩĩ habu, hĩ baa maaꞌnyia Daavide.

³³ Ĩĩn hatĩ nẽẽ habu habuccieetaa cĩ Yakobo ũdũt. Aitiõõ hatĩ habuccieet cĩnnĩ hõllõngaa edeccia.”

³⁴ Ma ho, ijin Maria aajĩlõ ĩĩnnĩk, “Haꞌnyaki occa hatĩ hutuno? Nga hatagguuꞌtha hĩ eet nganĩngĩtĩ harittiaanĩ.”

³⁵ Ẽdẽcĩ aajĩlõ ĩnõõnnõ anneek, “Alluucciakii hatĩ Lorii ꞌcĩ Ẽllẽẽmĩth nganiit nẽ ummuti ꞌtirriani cĩ Nyekuc ꞌcĩ ĩllõõan vẽlẽk. Ma urutaa cĩnnĩ, ũũkcaa hatĩ loholeec ꞌcĩ ẽllẽẽmĩth ꞌcĩ hatĩ haĩ Ngeertĩ Nyekuci.

³⁶ Aꞌnyahõ ꞌyioko ittioonniohit cunuung Eliꞌthẽbẽta aagõõng arannĩ eeta anneek cõhõlaac. Ĩĩtõ ꞌyioko nyĩlõhĩ ꞌcĩg aꞌnyahiini nẽẽ tõrkõnõn. Tananga atahaany nẽẽ gẽrrẽẽt, õkõ hatĩ aꞌnyak nẽẽ buúk loholeec.

³⁷ Hĩnĩngĩtĩ aitiõõ ꞌgii ꞌcĩ aꞌnyaman Nyekuc tõõ.”

³⁸ Ma athĩhĩ Maria thõõth icci ho, õthõõth ĩĩ, “Hĩĩnĩ naa dticciannioohit cĩ Makayyiookto, aꞌnyĩĩk haau hĩcĩ aduha nii hataa.” Nĩngĩtĩ õbõdõõꞌthĩ aajĩlõ.

Eheronoothĩk Maria Eliꞌthẽbẽta

³⁹ Ma waathinniook nicciag noho, ũkũmanoothĩk Maria nẽ ũꞌthũkũc ũũk ĩĩcĩ ꞌtaaũn ꞌcĩ aaĩ muurriõhĩĩ cĩg ꞌJudeea,

⁴⁰ nĩngĩtĩ õkõ adukni halang cĩ ꞌThakaria nẽ ũũk ĩꞌtha Eliꞌthẽbẽta.

⁴¹ Ma baa athĩhĩ Eliꞌthẽbẽta ꞌThaainit cĩ Maria ho, ĩꞌngõth loholeec hẽẽngatõõ cĩnnĩ nẽ ikia Lorii ꞌcĩ Ẽllẽẽmĩth ꞌthĩnĩtaa cĩnnĩ.

⁴² Ma nĩngaata, othoothĩk Eliꞌthẽbẽta Maria moloohaa cobbi taliitta ĩĩnnĩk, “Aggatanii nganiit Nyekuci hõrggẽẽnaa cĩ ngaainu vẽlẽk nẽ aggatanĩ loholeec ꞌcĩ hatĩ ũũkca nii ho buúk!

⁴³ Inni occa gõõng aattĩ hẽhẽẽrõnaaha aattĩ Makayyioohiti caannĩ ho?

⁴⁴ Aa ma hathihi ꞌthaainit cunni ho, ĩꞌngõth nganĩĩt loholeec hẽẽngatõõ taliitta.

⁴⁵ Aggatanni nganiit Makayyioohiti, hĩnĩngĩtĩ elemi nii thõõth ꞌcĩ hatĩ adticanneeki nẽẽ nganiit ko!”

Tẽgẽl cĩ Maria cĩ dĩhĩthẽẽttõ

⁴⁶ Ma nĩngaata, ẽbẽnõ Maria ĩĩ, “Abuluth nganĩĩt ꞌthĩnĩt Makayyioohit,

⁴⁷ nẽ accamanoothĩk lorii caannĩ, hĩnĩngĩtĩ Nyekuc Ellioohit caannĩ.

⁴⁸ Hĩnĩngĩtĩ aꞌthũũnna nẽẽ nganĩĩt dticciannioohit cĩnnĩ ꞌcĩ tarbalĩ. Utuvvuyyiaa hatĩ gõõng eeta irkiꞌnyiaannĩ ĩĩttĩhaa, ngaa ꞌcĩ aggatan Nyekuci.

⁴⁹ Hĩnĩngĩtĩ ĩdĩmaneeha Nyekuci ꞌTirriannioohiti thooꞌthiok ꞌcĩg tiirik gẽrrẽẽt. Ẽllẽẽmĩth ꞌthaara cĩgĩnnẽẽgĩ.

⁵⁰ Ammaannĩk nẽẽ eet ꞌcĩg iꞌngolli ĩnõõnnõ irkiꞌnyia hĩ irkiꞌnyia.

⁵¹ Idtican nẽẽ thooꞌthiok ꞌcĩg ĩllõõan gẽrrẽẽt attiaa cĩnnĩ. Ĩꞌthaan nẽẽ eet ꞌcĩg athĩngõõnyanĩ.

⁵² Itiggia nẽẽ habuẽẽt ꞌcĩg aĩ hĩĩgĩnna tõrõmĩ, dtaabĩtĩĩ cĩggĩĩng nẽ irigithieek eet ꞌcĩg tarbalĩg.

⁵³ Aaꞌnyĩk nẽẽ eet ꞌcĩg adak magĩthĩ hẽlẽggĩ ꞌcĩg abũnnaa, nẽ itiggia eet ꞌcĩg aĩ hĩĩgĩnna balliook, hõõt athĩnĩĩ ꞌtẽl.

⁵⁴ Ẽẽl nẽẽ dticciannioohit cĩnnĩ Ĩꞌthĩraẽl nẽ ummuhunõõthĩ ngaatĩ ammaannĩkĩ nẽẽ

⁵⁵ Abũrahaamõ hĩ lõhõlĩ cĩg lõhõlĩ cĩgĩnnĩg irkiꞌnyia hĩ irkiꞌnyia, hĩ baa aduhaak nẽẽ hĩbaangĩ cĩggaac.”

⁵⁶ Baa arũmĩ Maria hĩ Eliꞌthẽbẽta nyĩlõhĩ iyyio nĩngĩtĩ õbõdõõꞌthĩ õlõ.

Ittirria Yõaannẽ Batitta

⁵⁷ Ma baa ũttũbattoothĩk waathinniooha ꞌcĩg okolliaanĩ Eliꞌthẽbẽta, ikia ũtũhũwa nẽẽ loholeec ꞌcĩ maacĩ.

⁵⁸ Ma athĩhĩ ittioonnioha hĩ eet ꞌcĩg õbõhõõ hĩ ĩnõõnnõ ngaatĩ ammaannĩkĩ Makayyioohiti ĩnõõnnõ ho, iita accamattoothĩk nẽẽg vẽlẽk gẽrrẽẽt.

⁵⁹ Ma baa aꞌnyak loholeec waathinniook turkiyyio, iita etteedito eeta ẽlẽ cĩnnĩ nẽ idiimito akattieek ꞌthaar cĩg maacõnĩ ꞌThakaria.

⁶⁰ Ẽdẽcĩ hinnia ngaannia aĩ, “Haĩ ꞌthaar cĩgĩnnĩg Yõaannẽ.”

⁶¹ Attacan tarĩ eeta aĩ, “Aitiõõ eet umwaa ittioonniohĩĩ cugguung ꞌcĩ aꞌnyak ꞌthaar nicciaag tõõ.”

⁶² Nĩngĩtĩ õthõõthĩkĩ nẽẽg ꞌThakaria athĩnĩ, huduha ꞌthaar ꞌcĩg occa akannoothĩk loholeec.

⁶³ Ma ho, ijin ꞌThakaria ĩhõõggõ haanytĩk ĩnõõnnõ waraga, nĩngĩtĩ ẽhẽẽdĩkĩ waragaawa aĩ, “Haĩ ꞌthaar cĩg loholeecak Yõaannẽ.” Baa anyamũũtana eet thõõth ꞌcĩ õõkõrõõnĩ ꞌthaara ꞌcĩg aduha ngaannia hĩ maaꞌnyĩ ho gẽrrẽẽt.

⁶⁴ Ma ꞌthẽk nĩngaata noho, iꞌthianaaĩ ꞌThakaria õthõõth lõꞌngõõc, nĩngĩtĩ adĩkꞌthĩ Nyekuc.

⁶⁵ Baa adhirriaangan thõõth ciee eet ꞌcĩg õbõhõõ hĩ õlõ cĩnnĩ gẽrrẽẽt nẽ baa athithan eeta thõõth icci looccaa cĩ ꞌJudeea hũtũrũũr.

⁶⁶ Baa ꞌthẽk ĩnaat eeta ꞌcĩg athĩhĩ thõõth icci gẽrrẽẽt aĩ, “Loholeec occa hatĩ ꞌcĩ aku ĩĩn ne ciee hõlõ?” Baa ajinõõ eeta noho, hĩnĩngĩtĩ aga nẽẽg ngaatĩ aayyi Makayyioohiti hĩ ĩnõõnnõ.

Tẽgẽl cĩ ꞌThakaria

⁶⁷ Ma ho, aaꞌnyĩk Lorii ꞌcĩ Ẽllẽẽmĩth ꞌThakaria maaꞌnyĩ loholeeco hẽddẽẽbak eet thõõth cĩ Nyekuci ꞌcĩ hatĩ aku edeeꞌnyia horumwa. Baa nẽ õthõõth nẽẽ ĩĩ,

⁶⁸ “Aꞌnyĩĩk hĩdĩhĩthĩ Makayyioohiti Nyekuci cĩ Ĩꞌthĩraẽlĩ, hĩnĩngĩtĩ ikia ũrũgũtha nẽẽ eet cĩgĩnnĩg.

⁶⁹ Aaꞌnyeet nẽẽ ngagĩĩt Ellioohit ꞌcĩ attiran gẽrrẽẽt, ꞌcĩ aku habuccieetaa cĩ Daavide dticciannioohit cĩnnĩ,

⁷⁰ hĩ baa aduha põrõvẽtaaꞌnya baag ẽllẽẽmĩth baarkit aĩ,

⁷¹ ẽẽlanneet hatĩ nẽẽ ngagĩĩt athĩnĩĩ cĩg mĩrõk cĩggaac hĩ ĩcĩg eet ꞌcĩg aaburreekeet ngagĩĩta.

⁷² Nẽ ẽtẽrẽtha tamaati baa aduhaak nẽẽ hĩbaangĩ cĩggaac nẽ ummuhunõõthĩ lõhõt baa nĩnnĩ ẽllẽẽmĩth,

⁷³ hĩ baa abũtaneek nẽẽ nyakangaan cĩnaac Abũrahaamõ anneek,

⁷⁴ ẽẽlanneet hatĩ nẽẽ ngagĩĩt athĩnĩĩ cĩg mĩrõk cĩggaac, nẽ aaꞌnyeet hidticattoothĩk ĩnõõnnõ lõꞌngõõc,

⁷⁵ ꞌlẽẽmĩtha hĩ bũnnaiitta muumaa cĩnnĩ waathinnioohĩĩ cĩggaac vẽlẽk.

⁷⁶ Nẽẽthĩ, niina loholeec caannĩ ho, auyyi hatĩ eeta anneeki põrõvẽtaac cĩ Nyekuc ꞌcĩ ĩllõõan vẽlẽk, hĩnĩngĩtĩ uwwattẽẽkĩ hatĩ nii Makayyioohit õkõ akũmanẽẽkĩ ĩnõõnnõ ꞌgõõla.

⁷⁷ Nganiit hatĩ ꞌcĩ allimaneehi eet ꞌgõõl ꞌcĩ hatĩ aku ẽẽlanĩ Makayyioohiti ĩhõõggõ ꞌthẽccanẽẽtĩĩ cĩggĩĩng,

⁷⁸ hĩnĩngĩtĩ tamaati cobbi cĩ Nyekuc cĩnaac ꞌcĩ abũnnaa, ꞌcĩ hatĩ aku uppwannakeet kõrra ngagĩĩt hẽẽtahujjieen,

⁷⁹ hikia hũttũhũla eet ꞌcĩg aattĩg muguratõõ, hĩ ꞌcĩg aattĩg ꞌriiyyia cĩ daahĩthõõ nẽ eteretheheet ngagĩĩt ꞌgõõl ꞌcĩ haattiyyi lõꞌngõõc.”

⁸⁰ Nĩngĩtĩ alĩꞌthaanĩ loholeec ĩꞌthõng hikia hittiran lorii cĩnnẽẽnĩ, nẽ ũũk aau horrwaa ꞌcĩ õdõhõhĩĩ kak, ĩꞌthõng hũttũbattoothĩk waathinniooha ꞌcĩg aku irrioonĩkĩ nẽẽ eet cĩg Ĩꞌthĩraẽlĩ.