Luugithõõ 9 - ꞌBuuk cĩ Thõõth cĩ Nyekuci

ꞌThẽrẽt cĩ heleggeennu

¹ Ma ho, uduhaak Makayyioohiti Mũũꞌtha ĩĩnnĩk, “Mũdoothĩk habu cĩ Ijjibi bĩĩt duhaak anneek, ‘Thõõth ꞌcĩ aduha Makayyioohiti Nyekuci cĩ Ebereei cieeni, “Aꞌnyĩĩk eet cĩgannĩg hõõt halayyia nganĩĩta.”

² Má ẽdẽnẽẽkĩ ĩhõõggõ ꞌgõõl nẽ aggameehu looc noho,

³ aꞌnyahaak hatĩ aꞌthiiti cĩ Makayyiookto ꞌthẽrẽt ꞌcĩ abathĩ gẽrrẽẽt nyangõõllẽẽꞌnya cugguung hĩ thigirẽẽt hĩ nyaakaalnya hĩ tĩĩn hĩ aꞌtha hĩ ẽẽtha nyadaharta.

⁴ Nẽẽthĩ, ahal hatĩ Makayyioohiti hẽlẽggĩ cĩg eet cĩg Ĩꞌthĩraẽlĩ haauto ẽmmẽn hĩ hẽlẽggĩ cĩg eet cĩg Ijjibi, hátĩ hiittiõõ hẽlẽggĩ cĩg Ĩꞌthĩraẽlĩ hõllõngaa adaahĩ.’ ”

⁵ Ẽbẽra Makayyioohiti kõr ꞌcĩ hatĩ iꞌthianaanĩ ꞌthẽrẽt cĩ heleggeennu ẽlẽk. Uduha nẽẽ ĩĩ, “Hadĩmani hatĩ thõõth icci lohotha.”

⁶ Ma ho, ĩdĩman Makayyioohiti hĩ baa ꞌthẽk aduha nẽẽnĩ. Loohoth tĩho, iggiirria hẽlẽggĩ cĩg eet cĩg Ijjibi vẽlẽk hĩĩ lõõcĩ ꞌthĩĩ, nẽẽthĩ, baa hiꞌthihi hẽlẽggĩ cĩg eet cĩg Ĩꞌthĩraẽlĩ ꞌcĩg adaahĩ ũdũt.

⁷ Ma nĩngaata, ikia ĩꞌthõ habuui cĩ Ijjibi eet hõõt hotorootito, hatĩ adaahĩ hẽlẽggĩ cĩg eet cĩg Ĩꞌthĩraẽlĩ buúk, õõ hinnia ammũda hiꞌthihi hẽlẽggĩ cĩg eet cĩg Ĩꞌthĩraẽlĩ ꞌcĩg adaahĩ. Nẽ nẽẽ aalla ĩllõõrĩth habuui cĩ Ijjibi noho nẽ hõllõngaa adiim alahaneek eet hõõt buúk.

Mõõrĩth cĩ muccuhuditu

⁸ Ma ho, ikia uduhaak Makayyioohiti Mũũꞌtha hĩ Arõõnẽ ĩĩnnĩk, “Adamuttia hatiꞌtheet umwa hithingaannĩ nẽ aanytĩhu Mũũꞌtha hutuꞌthaanĩk hẽẽtahujjieen muumaa cĩ habu cĩ Ijjibi.

⁹ Ĩꞌthanothoothĩk hatĩ hatiꞌtheet looc cĩ Ijjibi vẽlẽk, haaꞌnyĩk hadahit eet hĩ hẽlẽggĩ muccuhudita.”

¹⁰ Nĩngĩtĩ adamtwaanĩ nẽẽg hatiꞌtheet hithingaannĩ nẽ ĩbĩlĩt muumaa cĩ habu cĩ Ijjibi. Ma nĩngaata, utuꞌthaanĩk Mũũꞌtha hatiꞌtheet hẽẽtahujjieen, nĩngĩtĩ adahĩ eet muccuhudita hẽlẽggẽẽnnĩ noho.

¹¹ Baa aꞌnyaman ngarĩt ngaatĩ au abĩllĩ muumaa cĩ Mũũꞌtha, hĩnĩngĩtĩ thõõth ꞌcĩ õddõngtĩ eleeti cĩggĩĩng hĩ eet cĩg Ijjibi vẽlẽk.

¹² Nẽẽthĩ, baa hinnia aaꞌnyĩk Makayyioohiti habu cĩ Ijjibi hĩllõõr, hiittiõõ hõllõngaa athĩhĩ Mũũꞌtha hode Arõõnẽ, hĩ baa ꞌthẽk aduhaak Makayyioohiti Mũũꞌtha.

Tammu cĩ telleenu

¹³ Ma tarĩ ho, ikia uduhaak Makayyioohiti Mũũꞌtha ĩĩnnĩk, “Tĩnga lohotha ngerrenita õõt ommottio hĩ habu cĩ Ijjibi nẽ ĩĩnnĩhuu, ‘Thõõth ꞌcĩ aduha Makayyioohiti Nyekuci cĩ Ebereei cieeni. Lahaneek eet cĩgannĩg hõõt halayyia nganĩĩta,

¹⁴ hode hĩꞌthõõakii hinnia hatĩ kõr icci ꞌtirrian cĩ ꞌthereeni cĩgannĩg vẽlẽk, hikia hĩ nganiit hĩ makayyiook cugunnig hĩ eet cugunnig, hátĩ gaa ngaatĩ aitiõõnnĩ eet umwaa ꞌcĩ haduhoonna hĩ nganĩĩt loota nĩnga vẽlẽk tõõ.

¹⁵ Hĩnĩngĩtĩ kõr icci, occa harukii naa nganiit hĩ eet cugunnig vẽlẽk, ꞌthẽrẽtaa ꞌcĩ aggĩĩrannuung loota nĩnga vẽlẽk ĩĩtõ ꞌthĩĩ.

¹⁶ Nẽẽthĩ hinnianĩ, baa haaꞌnyii naa nganiit ĩĩ habu, hĩnĩngĩtĩ thõõth icci, hátĩ heteretheehii ꞌtirrian caannĩ nẽ ubuluꞌthi ꞌthaara cĩgannĩg looc vẽlẽk.

¹⁷ Nẽ nga aalla alaami eet cĩgannĩg noho.

¹⁸ Nẽẽthĩ hoti ho, hĩꞌthõõa hatĩ naa lohotha hatĩ aau kõrra hĩ ꞌyioko ho, tammu cĩ telleenu ꞌcĩ gõõng nga kõr umwa hĩtĩĩl looccaa cĩ Ijjibi ũdũt, nganĩngĩtĩ teheꞌnyiaanĩt cĩ lootu.

¹⁹ Uduktaak ꞌyioko eet hiꞌngiddiaak hẽlẽggĩ ꞌcĩg nga aattĩg nyadaharta vẽlẽk hiita õlõ, hĩnĩngĩtĩ õhõda hatĩ tammu cĩ telleenu ho eet hĩ hẽlẽggĩ vẽlẽk ꞌcĩg nga aattiyyiaa nyadaharta, hũcũda ĩhõõggõ vẽlẽk hĩĩ lõõcĩ ꞌthĩĩ.’ ”

²⁰ Makayyiooha cĩg habu cĩ Ijjibi ꞌcĩg baag itieelli thõõth cĩ Makayyiookto, ukulit hataman hõõt hiꞌngiddia hẽlẽggĩ hĩ appahacaaꞌnya cĩggĩĩng haꞌnyakta õlõ.

²¹ Nẽẽthĩ hinnia, eeta ꞌcĩg baag õjõthẽẽkĩ thõõth cĩ Makayyiookto, ũtũngteek hẽlẽggĩ hĩ appahacaaꞌnya cĩggĩĩng vẽlẽk geyyia.

²² Ma ho, uduhaak Makayyioohiti Mũũꞌtha ĩĩnnĩk, “Dongeek aꞌthiit cunni hẽẽtkujjieen, hátĩ hudhukiaak tammu cĩ telleenu looc cĩ Ijjibi vẽlẽk, eetini hĩ hẽlẽggẽẽnnĩ hĩ manẽẽnĩĩ cĩggĩĩng vẽlẽk.”

²³ Ma baa odongeek Mũũꞌtha hĩbahĩt cĩnnĩ hẽẽtkujjieen ko, ĩꞌthõõa Makayyioohiti tammu cĩ telleenu ꞌcĩ ammadĩ nẽ ĩccaaõ habath lõõcĩ dtẽc. Nĩngĩtĩ ꞌthẽk ĩꞌthõõakĩ Makayyioohiti tammu cĩ telleenu looc cĩ Ijjibi hũtũrũũr;

²⁴ atĩĩlĩ tammu cĩ telleenu ho hammad lõõcĩ vẽlẽk. Baa tammu cobbi ꞌcĩ abathĩ gẽrrẽẽt ꞌcĩ ĩllõõan looccaa cĩ Ijjibi vẽlẽk, nganĩngĩtĩ aggamĩ eeta cĩg Ijjibi looc cĩnĩĩng.

²⁵ Baa ĩcca tammu cĩ telleenu ho ꞌgii vẽlẽk mõrẽẽnĩtõõ hĩ manẽẽn vẽlẽk looccaa cĩ Ijjibi hũtũrũũr, õhõda eet hĩ hẽlẽggĩ, ammũũnyĩk manẽẽn vẽlẽk looc nẽ ũppũrũc hẽẽn vẽlẽk hĩĩ dtĩng.

²⁶ Nẽẽthĩ, baa ꞌGõcẽn dioo, ngaatĩ baa aattiyyi eeta cĩg Ĩꞌthĩraẽlĩ, ꞌcĩ baa hõllõngaa atĩĩllĩ tammu cĩ telleenu.

²⁷ Ma ho, ũtũvvũ habuui cĩ Ijjibi Mũũꞌtha hĩ Arõõnẽ nẽ ĩĩnnĩk ĩhõõggõ, “Hõlõ, hẽꞌthẽcana aattĩ naa kõr icci. Aũlan thõõth cĩ Makayyiookto nẽ hẽꞌthẽcatta naag hĩ eet cĩgannĩg.

²⁸ Alaac Makayyioohit, hĩnĩngĩtĩ ĩtĩĩl tammu cĩ telleenu ho ĩĩ maka gẽrrẽẽt, hĩccaaõ habath lõõcĩ dtẽc. Hẽlẽmaakuung hatĩ naa ngagiit õõtõ, iittiõõ aattĩ hatĩ hõllõngaa aattiyyu ngaati tarĩ.”

²⁹ Ẽdẽcĩ Mũũꞌtha habu anneek, “Ma hũtũngeeha naa ꞌtaaũn, hõkõ hatĩ hodongeehi Makayyioohit athĩn cĩgannĩg nẽ halawa. Abĩlĩ hatĩ madĩĩthĩ cĩ tammwo nẽ iittiõõ tammu cĩ telleenu ho tõõ, hátĩ gaa nii ngaatĩ ĩĩnnĩ lõõcĩ vẽlẽk cĩ Makayyiookto.

³⁰ Nẽẽthĩ, haga naa nga ꞌthẽk itingolli niig hĩ makayyiook cugunnig Makayyioohit Nyekuc.”

³¹ Baa ẽꞌthẽcan tammu ciee mana, hĩnĩngĩtĩ baa nga ĩĩn mana ciee hoboot haaga.

³² Nẽẽthĩ, baa avvũran ꞌcĩg ĩĩn ꞌgẽẽmẽ, hĩnĩngĩtĩ baa au arrit nẽẽg uruta.

³³ Nĩngĩtĩ ũũnnĩkĩ Mũũꞌtha habu cĩ Ijjibi nẽ ũũk battaalaa cĩ ꞌtaaũnõõ nẽ odongeek athĩn cĩgĩnnĩg Makayyioohit, nĩngĩtĩ ahulꞌthi tammu cĩ telleenu ho nẽ iittiõõ hõllõngaa ĩccaayyi.

³⁴ Ma baa acĩn habuui cĩ Ijjibi ngaatĩ ahulꞌthi tammu cĩ telleenu nẽ iittiõõ hõllõngaa ĩccaayyi ho, ikia ẽꞌthẽcanõõ tarĩ. Iita illoorito nẽẽg hĩ makayyiook cĩgĩnnĩg vẽlẽk.

³⁵ Nĩngĩtĩ ĩllõõrrĩ ꞌthẽk habuui cĩ Ijjibi haaga nẽ ũtũbũr ngaatĩ ẽlẽmaakĩ Ĩꞌthĩraẽl hõõt, hĩ baa ꞌthẽk aduha Makayyioohiti ũtũũgaa cĩ Mũũꞌtha.