Luugithõõ 8 - ꞌBuuk cĩ Thõõth cĩ Nyekuci

¹ Ma ho, ĩĩnnĩk Makayyioohiti Mũũꞌtha, “Bĩĩt duhaak habu cĩ Ijjibi anneek, ‘Thõõth ꞌcĩ aduha Makayyioohiti cieeni. Lahaneek eet cĩgannĩg, hátĩ hõõt halayyia nganĩĩta.

² Ma ẽdẽnẽẽkĩ ĩhõõggõ ngaatĩ õõyyĩ, haccĩĩnahi hatĩ naa lõkĩdõdõõknya looc cunni hũtũrũũr.

³ Abbĩꞌthĩĩ hatĩ lõkĩdõdõõknya hidioo cĩ Naaĩlĩ. Aduknaaki hatĩ lõkĩdõdõõknya halaangatõõ hĩ ꞌcieethaa cunni, ĩꞌngõthaak hatĩ nĩngĩtĩ oongiyyii nẽ uduhunit ꞌcieethi cĩg makayyiook cugunnig hĩ cĩg eet cugunnig, aduhun hatĩ hithinga hĩ nĩngĩtĩ ũũnyẽnĩ hẽddẽmĩ vẽlẽk.

⁴ Otoddi hatĩ lõkĩdõdõõknya nganiit hĩ eet cugunnig hĩ makayyiook cugunnig vẽlẽk.’ ”

⁵ Nĩngĩtĩ aduhaakĩ Makayyioohiti Mũũꞌtha annẽẽkĩ, “Duhaak Arõõnẽ anneek, ‘Dongeek hĩbahĩt cunni hidiowwẽẽn hĩ ꞌgoolliok ꞌcĩg ẽrrẽẽcĩkĩ eeta maam hirihit hĩ borrokiook, nẽ aaꞌnyĩhuu lõkĩdõdõõknya hũdaanito looc cĩ Ijjibi hũtũrũũr.’ ”

⁶ Ma ho, odongeek Arõõnẽ aꞌthiit cĩnnĩ maam cĩg Ijjibi nĩngĩtĩ au allũnganĩ lõkĩdõdõõknya looc.

⁷ Au hinnia adĩman ngarĩta buúk, hẽlẽggĩ ꞌcĩg aduhõõ ꞌgõõlaa cĩnĩĩng ẽmmẽn, aaꞌnyĩk nẽẽg buúk lõkĩdõdõõknya hĩbbĩtĩt looc cĩ Ijjibi.

⁸ Ma ho, ũtũvvũ habuui cĩ Ijjibi Mũũꞌtha hĩ Arõõnẽ nẽ ĩĩnnĩk, “Alaac Makayyioohit haaꞌnyĩk lõkĩdõdõõknya hammanyattĩ ngaatĩ haattiyyia naag hĩ eet cĩgannĩg vẽlẽk, nẽẽthĩ hatĩ halahaneeha eet cugguung hõõt halaacõ Makayyioohit.”

⁹ Nĩngĩtĩ annẽẽkĩ Mũũꞌtha habu cĩ Ijjibi, “Arĩĩk thĩ nẽẽ nii kõr ꞌcĩ hatĩ halaiinni naa nganiit hĩ makayyiook cugunnig hĩ eet cugunnig. Ũũnnĩk hatĩ lõkĩdõdõõknya ꞌcieethi cugunnig. Nẽẽthĩ, aalla hatĩ cĩg hidioo cĩ Naaĩlĩ diooni.”

¹⁰ Ma ho, ĩĩ habuui cĩ Ijjibi, “Ẽlẽ, ijjia baaĩ laooyya lohotha.” Nĩngĩtĩ aĩnnĩ Mũũꞌtha, “Abũnnaa, aꞌnyĩĩk thĩ da haau hĩcĩ aduha nii ho, hátĩ gaa nii ngaatĩ aitiõõnnĩ eet umwaa ꞌcĩ aduhõõ hĩ Makayyioohit Nyekuc cĩnaang tõõ.

¹¹ Uunnikii hatĩ lõkĩdõdõõknya nganiit hĩ ꞌcieethi cugunnig, hĩ makayyiook cugunnig hĩ eet cugguung, idiongan hatĩ nẽẽg Naaĩlatõõ diooni.”

¹² Ma baa ũtũngteek Mũũꞌtha hĩ Arõõnẽ habu cĩ Ijjibi, ũũk utuluuik Mũũꞌtha Makayyioohit, hĩnĩngĩtĩ lõkĩdõdõõknya ꞌcĩg aꞌnyahaak nẽẽ habu cĩ Ijjibi ho.

¹³ Nĩngĩtĩ adĩmanĩ Makayyioohiti thõõth ꞌcĩ atab Mũũꞌtha ho. Iita adaahito lõkĩdõdõõknya ꞌcieethini hĩ ꞌthĩĩmẽtĩ hĩ manẽẽnĩtõõ vẽlẽk.

¹⁴ Ma ho, iita itihiirito eeta cĩg Ijjibi lõkĩdõdõõknya hĩccĩnĩt cõõmĩt hõtõngõl lõõcĩ ꞌbõhõrõr.

¹⁵ Ma baa acĩn habuui cĩ Ijjibi ngaatĩ aku abũnnayyĩ lõõcĩ ho, ikia ĩllõõr tarĩ nẽ ũtũbũr ngaatĩ athĩknĩ thõõth cĩ Mũũꞌtha hĩ cĩ Arõõnẽ, haau hĩ baa ꞌthẽk aduha Makayyioohiti.

Wĩĩny

¹⁶ Ma ho, ĩĩnnĩk Makayyioohiti Mũũꞌtha, “Duhaak Arõõnẽ anneek, ‘Dõõng hĩbahĩt cunni nẽ uuku looc,’ hikia hũtũhũĩ tuduhaacĩ hĩĩ wĩĩny looccaa cĩ Ijjibi hũtũrũũr.”

¹⁷ Nĩngĩtĩ adĩmanĩ nẽẽg noho, ma baa õdõng Arõõnẽ aꞌthiit cĩnnĩ nẽ uuk looc hĩbahĩta ho, itigirriaak wĩĩnya eet hĩ idiꞌngwa vẽlẽk. Ikia ũtũhũĩ tuduhaacĩ Ijjib hũtũrũũr ĩĩ wĩĩny.

¹⁸ Ma baa ma aĩ hĩttĩmatta ngarĩta ngaatĩ occa aꞌnyahaanĩ nẽẽg buúk wĩĩny ꞌgõõlaa cĩnĩĩng ẽmmẽn ko, aꞌnyaman hinnia ĩhõõggõ thõng. Nĩngĩtĩ ammũlũũnyanĩ wĩĩnya eet hĩ idiꞌngwa vẽlẽk.

¹⁹ Ma ho, iita ĩĩttĩk ngarĩta habu cĩ Ijjibi, “Nyekuc ꞌcĩ adĩman thõõth ꞌcĩ aaĩ hoti ho.” Aalla hinnia ĩllõõrĩth habuui cĩ Ijjibi haau hĩ baa ꞌthẽk aduha Makayyioohiti.

Hĩrõng

²⁰ Ma ho, ĩĩnnĩk Makayyioohiti Mũũꞌtha, “Lõõk da lohotha ngerrenita, õõt ommottio hĩ habu cĩ Ijjibi ꞌgõõlaa ꞌcĩ õkõõĩ hidiaa nẽ uduhaahu ĩnõõnnõ ĩĩnnĩhuu, ‘Thõõth ꞌcĩ aduha Makayyioohiti ciee aĩ, lahaneek eet cĩgannĩg hõõt halayyia nganĩĩta.

²¹ Má hõllõngaa alahaneehi eet cĩgannĩg hõõt, hĩꞌthõõakii hatĩ hĩrõng ꞌcĩg mẽẽlĩg ꞌrĩng nganiit hĩ makayyiook cugunnig hĩ eet cugunnig hĩ ꞌcieethi cugguung vẽlẽk. Abbĩꞌthĩĩ hatĩ hĩrõnga ꞌcieethi cĩg eet cĩg Ijjibi hĩ looc vẽlẽk ꞌcĩ aattiyyi nẽẽgĩ.

²² “ ‘Nẽẽthĩ kõr niccia, huunnihi hatĩ naa looc cĩ ꞌGõcẽnĩ, nĩngĩtĩ aattiyyi eeta cĩgannẽẽgĩ, aitiõõ hatĩ hĩrõnga ĩĩca tõõ, nẽẽthĩ hatĩ agayyu ngaatĩ haayyi naa Makayyioohiti looccaa cĩ.

²³ Heꞌngeri hatĩ naa eet cĩgannĩg hĩ eet cugunnig haauto ẽmmẽn. Edeeꞌnyia hatĩ thõõth ꞌcĩ ĩnaat eeta ho lohotha.’ ”

²⁴ Nĩngĩtĩ adĩmanĩ Makayyioohiti thõõth icci dĩdĩ. Ma ho, ĩꞌthaattak hĩrõnga õlõ cĩ habu cĩ Ijjibi, hĩ olooyyiok cĩg makayyiook cĩgĩnnĩg nẽ baa ẽꞌthẽcanit hĩrõnga looc cĩ Ijjibi hũtũrũũr.

²⁵ Ma ho, ũtũvvũ habuui cĩ Ijjibi Mũũꞌtha hĩ Arõõnẽ nẽ ĩĩnnĩk, “Õõt ibboorrik Nyekuc cunuung ꞌgaarrieenit. Nẽẽthĩ, ĩdĩmanit looccaa cĩ.”

²⁶ Ẽdẽcĩ hinnia Mũũꞌtha aĩ, “Occa hinnia hõllõngaa aũlan thõõth nicciaani. Abũrĩ eeta cĩg Ijjibi ꞌgaarriẽẽn ꞌcĩg hĩbboorĩka naag Makayyioohit Nyekuc cĩnaang ko. Nẽ má hibboorria naag ꞌgaarriẽẽn ꞌcĩg abũrĩ eeta cĩg Ijjibi hẽbẽrẽẽnnĩĩ cĩggĩĩng, hõllõngaa hinnia hatĩ õhõdanneet nẽẽg ngagĩĩt biyyiẽẽnĩ?

²⁷ Adiim ꞌthẽk hooyyia naag waathinniook iyyio horrwaa ꞌcĩ õdõhõhĩĩ kak, hoottia hibboorriha ꞌgaarriẽẽn Makayyioohit Nyekuc cĩnaang, hĩ baa ꞌthẽk aduhakeet nẽẽnĩ.”

²⁸ Ma ho, ĩĩ habuui cĩ Ijjibi, “Hẽlẽmaakuung naa ngagiit õõt ibboorrik Makayyioohit Nyekuc cunuung ꞌgaarriẽẽn horrwaa ꞌcĩ õdõhõhĩĩ kak nẽ ma hooyyu ꞌrẽẽna. Nẽẽthĩ ꞌyioko, laooyyaanĩ.”

²⁹ Ẽdẽcĩ Mũũꞌtha habu anneek, “Ma hutungeehii naa nganiit nẽ hũũha, hõkõ hatĩ halaiinni naa nganiit hĩ Makayyioohit nẽ lohotha, aꞌnginoothi hatĩ hĩrõnga õlõõ cunni hĩ olooyyiohĩĩ cĩg makayyiook cugunnig, hĩ cĩg eet cugunnig vẽlẽk. Nẽẽthĩ, haduhaakii dĩdĩ habu cĩ Ijjibi, ma nga hĩggoolleet ngagĩĩt tarĩ nẽ ẽtẽdẽyẽẽhĩ eet ngaatĩ õõ ĩbbõõrĩkĩ ꞌgaarrieenit Makayyioohit.”

³⁰ Nĩngĩtĩ ũũnnĩkĩ Mũũꞌtha habu cĩ Ijjibi nẽ ala Makayyioohit,

³¹ ma ho, idtican Makayyioohiti thõõth ꞌcĩ atab Mũũꞌtha ho, ammanyattĩ hĩrõnga õlõõ cĩ habu cĩ Ijjibi hĩ ĩĩcĩ makayyiook cĩgĩnnĩg hĩ ĩĩcĩ eet cĩgĩnnĩg, hiittiõõ hirongiti ꞌcĩ nga idiongan tõõ.

³² Nẽẽthĩ kõr icci buúk, aalla nga aku ĩllõõrĩth habuui cĩ Ijjibi noho nẽ ẽtẽdẽyẽẽhĩ eet ꞌgõõl ngaatĩ õõĩ.