Luugithõõ 7 - ꞌBuuk cĩ Thõõth cĩ Nyekuci

ꞌThereeni tũrkũwwec ꞌcĩg uwwattaa

¹ Nĩngĩtĩ aduhaakĩ Makayyioohiti Mũũꞌtha annẽẽkĩ, “Cĩĩn nõõ, haaꞌnyii naa nganiit au hĩ Nyekuci, hĩnĩngĩtĩ habu cĩ Ijjibi nẽ hatĩ ĩĩ ꞌgotonu Arõõnẽ põrõvẽtaac cunni.

² Duhaak Arõõnẽ thõõth vẽlẽk ꞌcĩ haduhaakii naana nẽ aꞌnyĩĩk ĩnõõnnõ huduhaak habu cĩ Ijjibi halahaneek eet cĩg Ĩꞌthĩraẽlĩ, huluugito looccaa cĩnnĩ.

³ Nẽẽthĩ, haaꞌnyihi hatĩ naa habu cĩ Ijjibi hĩllõõr, tananga hadticani thooꞌthiok ꞌcĩg mẽẽlĩg ꞌcĩg ĩnaat eeta Ijjiba,

⁴ aitiõõ hatĩ habuui cĩ Ijjibi hõllõngaa athĩkni nganiita. Nẽẽthĩ, huuki hatĩ naa eet cĩg Ijjibi ꞌtirriaanaa cĩ aꞌthiit caannĩ nẽ huluugaĩĩ eet cĩgannĩg Ĩꞌthĩraẽl.

⁵ Ma hõdõnga naa aꞌthiit caannĩ ꞌcĩ attiran ko nẽ huluugi eet cĩg Ĩꞌthĩraẽlĩ Ijjiba, iita thĩ hatĩ agaacõ eeta cĩg Ijjibi, ngaatĩ hĩĩnnĩ naa Makayyioohit.”

⁶ Nĩngĩtĩ adĩmanĩ Mũũꞌtha hĩ Arõõnẽ hĩ baa aduhaak Makayyioohiti ĩhõõggõ.

⁷ Baa ĩĩn Mũũꞌtha irkiꞌnyia hẽẽn turkiyyio (80) baa nohota nẽ tarĩ ĩĩtõ irkiꞌnyia cĩg Arõõnẽ hẽẽn turkiyyio hĩ iyyio (83), baa õthõõthõõ nẽẽg hĩ habu cĩ Ijjibi.

Ũtũhũĩ hĩbahĩtĩ ĩĩ hũkaat

⁸ Ma nĩngaata, uduhaak Makayyioohiti Mũũꞌtha hĩ Arõõnẽ ĩĩnnĩk,

⁹ “Ma anneekuung habuui cĩ Ijjibi, ‘Idticatteehaangu da thõõth ꞌcĩ ĩnaatti,’ duhaak Arõõnẽ anneek, ‘Dhuheek hĩbahĩt cunni looc muumaa cĩ habu cĩ Ijjibi,’ nẽ aku hatĩ ũũkcĩ hĩbahĩtĩ hĩĩ hũkaat.”

¹⁰ Nĩngĩtĩ õõ ammũdõõthĩkĩ Mũũꞌtha hĩ Arõõnẽ habu cĩ Ijjibi nẽ idticatteek thooꞌthiok baag aduhaak Makayyioohiti ĩhõõggõ hĩdĩmanit. Ma nĩngaata, udhuheek Arõõnẽ hĩbahĩt cĩnnĩ loota muumaa cĩ habu cĩ Ijjibi hĩ makayyiook cĩgĩnnĩg, nĩngĩtĩ ũũkcẽnĩ hĩbahĩtĩ hĩĩ hũkaat.

¹¹ Ma ho, ũtũvvũ habuui cĩ Ijjibi eet cĩg Ijjibi, ꞌcĩg ĩĩn ꞌgeeꞌnyiak hĩ ngarĩt hĩ eet ꞌcĩg aꞌnyak ẽgẽrnẽẽn, hiita hĩdĩmanit thooꞌthiok ꞌcĩg aduhõõ hĩ thõõth ꞌcĩ adĩman Arõõnẽ ho, ꞌtirriaanaa cĩnĩĩng ĩcĩ ammiꞌthi.

¹² Baa adhuheek nẽẽg hõdẽĩ hõdẽĩ hĩbahĩꞌnya cĩggĩĩng looc, nĩngĩtĩ ũũkcẽnĩ ĩĩnnĩ hũkaaꞌnya. Nẽẽthĩ, baa hinnia aku hĩbahĩtĩ cĩ Arõõnẽ hĩbahĩꞌnya cĩggĩĩng ko vẽlẽk.

¹³ Ma ngaati, aalla tarĩ nga adĩĩtĩ habu cĩ Ijjibi õõ pĩd noho nẽ hõllõngaa athĩhĩ thõõth cĩ Mũũꞌtha hĩ cĩ Arõõnẽ ho buúk, hĩ baa aduha Makayyioohiti.

Utuhuyyi maama cĩg Naaĩlĩ ĩĩtõ biyyi

¹⁴ Ma ho, ĩĩnnĩk Makayyioohiti Mũũꞌtha, “Aitiõõ habuui cĩ Ijjibi hõllõngaa athĩknĩ, abũrĩ ngaatĩ alahanẽẽkĩ eet hõõt.

¹⁵ Mũdoothĩk habu cĩ Ijjibi ngaalloohoth, hĩcĩ õkõ nẽẽ ĩĩcĩ hidiowwo. ꞌRẽẽõ dẽmẽtaa cĩ Naaĩlĩ, hátĩ ommottio hĩ ĩnõõnnõ, ꞌnyaak hĩbahĩt baa ũũkcĩ hĩĩ hũkaat buúk.

¹⁶ Nẽ ĩĩnnĩhuu ĩnõõnnõ, ‘Ĩꞌthõõannaa nganĩĩt Makayyioohiti Nyekuci cĩ Ebereei, hikia hiinnihii nganiit, lahaneek eet cĩgannĩg hõõt, hátĩ hõõt halayyia nganĩĩt horrwaa ꞌcĩ õdõhõhĩĩ kak. Nẽẽthĩ hĩĩ noho, nga aburi nii thõõth caannĩ.

¹⁷ Nẽẽthĩ, thõõth ꞌcĩ aduha Makayyioohiti cieeni. Thõõthaa cĩ, aga hatĩ ꞌyioko nii ngaatĩ hĩĩnnĩ naa Makayyioohit. Huuki hatĩ naa maam cĩg Naaĩlaak hĩbahĩtaa caannĩ ho, hutuhuyyi hĩĩtõ biyyi.

¹⁸ Adaahĩ hatĩ ulugo Naaĩlatõõ hõtõngõl hidiaa ꞌbõhõrõr, hiittiõõ eeta cĩg Ijjibi hõllõngaa ahũd maam cĩgĩnnĩg.’ ”

¹⁹ Ma ho, ĩĩnnĩk Makayyioohiti Mũũꞌtha, “Duhaak Arõõnẽ anneek, ‘ꞌTiha hĩbahĩt cunni nẽ odongeehu aꞌthiit cunni maam cĩg Ijjibi, hidiowwẽẽn hĩ ꞌgoolliok vẽlẽk ꞌcĩg ẽrrẽẽcĩkĩ eeta maam, loulẽcĩt hĩ borrohẽẽt vẽlẽk. Ũũkcĩ hatĩ nẽẽg vẽlẽk hĩĩtõ biyyi Ijjib hũtũrũũr, tananga maam ꞌcĩg ogoocĩk eeta dẽẽrẽnĩ hĩ ijjioꞌnyaannĩ.’ ”

²⁰ Nĩngĩtĩ adĩmanĩ Mũũꞌtha hĩ Arõõnẽ hĩ baa aduhaak Makayyioohiti ĩhõõggõ. Ma nĩngaata, õdõng Arõõnẽ hĩbahĩt cĩnnĩ muumaa cĩ habu cĩ Ijjibi hĩ makayyiook cĩgĩnnĩg nẽ uuk maam cĩg Naaĩlaak, nĩngĩtĩ ũũkcẽnĩ maama vẽlẽk hĩĩtõ biyyi.

²¹ Ma ꞌthẽk nĩngaata noho, adaahito ulugo Naaĩlatõõ hõtõngõl hidiaa ꞌbõhõrõr, hiittiõõ eeta cĩg Ijjibi hõllõngaa occa ahũd maam. Ĩbbĩtĩt biyyieeta looc cĩ Ijjibi lokor vẽlẽk.

²² Nẽẽthĩ hinnianĩ, baa adtican ngarĩta buúk, thooꞌthiok ꞌcĩg aduhõõ hĩ ꞌcĩg adtican Arõõnẽ ho thõng, ꞌgõõlaa cĩnĩĩng ĩcĩ ammiꞌthi, nĩngĩtĩ aku õkõmmĩ habu cĩ Ijjibi õõ hiittiõõ hõllõngaa athĩhĩ thõõth cĩ Mũũꞌtha hĩ cĩ Arõõnẽ, hĩ baa aduha Makayyioohiti.

²³ Ma nĩngaata, ĩꞌngaathĩ hinnia habuui õkõ ꞌcieetõõ cĩnnĩ nẽ hõllõngaa ammuk thõõth icci buúk.

²⁴ Ma ho, adayyia eeta cĩg Ijjibi wĩĩtanĩ cĩg maam cĩg hũdẽẽttak dẽmẽtaa cĩ Naaĩlĩ, hĩnĩngĩtĩ hõllõngaa occa ahũd nẽẽg maam cĩg hidiowwaak.

Ukẽẽnĩt lõkĩdõdõõknyanĩ

²⁵ Ma ngaati, iita allanganit waathinniooha tũkĩramma urutaa ꞌcĩ baa uuki Makayyioohiti hidioo cĩ Naaĩlĩ.