Luugithõõ 6 - ꞌBuuk cĩ Thõõth cĩ Nyekuci

¹ Nĩngĩtĩ aduhaakĩ Makayyioohiti Mũũꞌtha annẽẽkĩ, “Acini aattĩ hatĩ nii ꞌyioko thõõth ꞌcĩ hadticaneehi naa habu cĩ Ijjibi. Hĩnĩngĩtĩ ꞌtirrian cĩ aꞌthiit caannĩ, alahaneek hatĩ nẽẽ eet hõõt nẽ itiggia ĩhõõggõ looccaa cĩnnĩ.”

² Nẽ tarĩ ĩĩnnĩk Nyekuci Mũũꞌtha, “Ẽlẽ, hĩĩnĩ naa Makayyioohit.

³ Baa huppwaannahi naa Abũrahaamõ hĩ Iꞌthaako hĩ Yakobo hĩ Nyekuci ꞌTirriannioohiti ꞌcĩ ĩllõõan vẽlẽk, ꞌthaarĩĩ cĩgannĩg ĩcĩg kaĩ Makayyioohit, baa nga heteretheek naa ĩhõõggõ ẽlẽ caannĩ.

⁴ Nẽ baa hadakta hĩ ĩhõõggõ lõhõt ꞌcĩ haaꞌnyĩkĩĩ looc cĩ Kanaanĩ, nga baa aattiyyi nẽẽg hĩ lihinniooha haaga.

⁵ Nẽ tarĩ hĩthĩha ꞌcannan hĩ tamaati cĩ eet cĩg Ĩꞌthĩraẽlĩ, ꞌcĩ ꞌyioko aarĩ eeta cĩg Ijjibi ĩhõõggõ hĩĩtõ appahacaaꞌnya, nĩngĩtĩ ꞌyioko hammuhõõꞌthĩ lõhõt baalannĩ.

⁶ “Nẽẽthĩ hoti ho, duhaak eet cĩg Ĩꞌthĩraẽlĩ anneek, ‘Hĩĩnĩ naa Makayyioohit nẽ hõõgannuung hatĩ naa ngagiit pĩĩrnattaa ꞌcĩ accanannuung eeta cĩg Ijjibi ho. Hõõgannuung hatĩ naa ngagiit ngaatĩ iiginnu appahacaaꞌnya cĩggĩĩng nẽ hẽẽlauung ꞌtirriaanaa caannĩ ĩcobbi ĩcĩ huuki eet cĩg Ijjibi.

⁷ Helemuung hatĩ naa ngagiit ĩĩtõ eet cĩgannĩg dẽẽdẽ nẽ hĩĩna naa Nyekuc cunuung. Nẽẽthĩ hatĩ agayyu niig ngaatĩ hĩĩnnĩ naa Makayyioohit Nyekuc cunuung, baa hõõgannuung ngagiit ꞌcannaana cĩ eet cĩg Ijjibi.

⁸ Haꞌnyahaannuung hatĩ naa ngagiit looccaa baa habũtaneehi Abũrahaamõ hĩ Iꞌthaako hĩ Yakobo, nẽ haaꞌnyuung hĩĩ looc cunuung. Hĩĩnĩ naa Makayyioohit.’ ”

⁹ Ma ho, ũũk uduhaak Mũũꞌtha eet cĩg Ĩꞌthĩraẽlĩ thõõth icci, abũrĩ hinnia eeta cĩg Ĩꞌthĩraẽlĩ ngaatĩ athĩknĩ ĩnõõnnõ, hĩnĩngĩtĩ baa uduulli ĩhõõggõ ꞌthinneeti hĩ pĩĩrnanĩt ꞌcĩ ecebiini nẽẽgĩ.

¹⁰ Nĩngĩtĩ annẽẽkĩ Makayyioohiti Mũũꞌtha,

¹¹ “Bĩĩt duhaak habu cĩ Ijjibi anneek lahaneek eet cĩg Ĩꞌthĩraẽlĩ huluugito Ijjiba.”

¹² Aduhaak hinnia Mũũꞌtha Makayyioohit anneek, “Má nõõ hõllõngaa athĩkna eeta cĩg Ĩꞌthĩraẽlĩ nganĩĩt nẽ occa hatĩ ĩthĩha habuui cĩ Ijjibi nganĩĩt, eet ꞌcĩ aꞌnyamannaa thõõth haaga ho hutuno?”

¹³ Nẽẽthĩ ꞌyioko, othoothĩk Makayyioohiti Mũũꞌtha hĩ Arõõnẽ nẽ uduhaak ĩhõõggõ thooꞌthiok cĩg eet cĩg Ĩꞌthĩraẽlĩ, hĩ thõõth cĩ habu cĩ Ijjibi. Baa aduhaak Makayyioohiti Mũũꞌtha hĩ Arõõnẽ huluukti eet cĩg Ĩꞌthĩraẽlĩ Ijjiba.

Hĩbaangĩ cĩg Mũũꞌtha hĩ Arõõnẽ

¹⁴ Baa hĩbaangĩ cĩg eet cĩg Ĩꞌthĩraẽlĩ ho cieegi: Lõhõlẽẽtĩg ꞌRuubenĩ ngeertĩ Yakobo ꞌcĩ oou, ĩhõõggõ Hanohĩ hĩ Paallu hĩ Hethoron hĩ Karmi. Baa ĩĩn cieeg hattũũg cĩ ꞌRuubenĩ.

¹⁵ Baa haĩ nyahaappanĩt cĩg ꞌThimiõõnẽ: ꞌJemueele hĩ ꞌJamin hĩ Õhad hĩ ꞌJakin hĩ ꞌThõhar hĩ ꞌThaaulo ngeertĩ ngaa baa ĩĩn Kanaaneenit. Baa ĩĩn nyahaappanĩta cieeg vẽlẽk hattũũg cĩ ꞌThimiõõnẽ.

¹⁶ Nẽ tarĩ ꞌthaarriok cĩg nyahaappanĩt cĩg ꞌLeevi cieegi: Ĩhõõggõ Gerthonĩ hĩ Kõhath hĩ Mẽraari. Baa arũgĩ ꞌLeevi ĩꞌthõng haꞌnyak irkiꞌnyia ꞌmiia hõdẽĩ hĩ hẽẽn iyyio hĩ tũkĩramma (137).

¹⁷ Buul cĩg Gerthonĩ hattũũgẽtĩĩ cĩggĩĩng noho cieegi, ĩhõõggõ Libini hĩ ꞌThimeei.

¹⁸ Baa haĩ nyahaappanĩt cĩg Kõhathĩ, Amram hĩ Iꞌthihar hĩ Heboron hĩ Uthieele. Baa arũgĩ Kõhathĩ ĩꞌthõng haꞌnyak irkiꞌnyia ꞌmiia hõdẽĩ hĩ hẽẽn iyyio hĩ iyyio (133).

¹⁹ Baa haĩ nyahaappanĩt cĩg Mẽraari, Mahali hĩ Muuthi. Baa ĩĩn cieeg hattũũgẽt cĩg ꞌLeevi ꞌgoolliohĩĩ ꞌcĩg baag eheedini nẽẽgĩ.

²⁰ Nẽ baa ikia ũꞌthũwan Amramĩ athanĩ ꞌcĩ haĩ ꞌthaar ꞌJothebed, ꞌcĩ baa hikia hittiraak ĩnõõnnõ Arõõnẽ hĩ Mũũꞌtha. Baa arũgĩ Amramĩ ĩꞌthõng haꞌnyak irkiꞌnyia ꞌmiia hõdẽĩ hĩ hẽẽn iyyio hĩ tũkĩramma (137).

²¹ Baa haĩ nyahaappanĩt cĩg Iꞌthiharĩ, Kõõra hĩ Nevvek hĩ Thicciri.

²² Lõhõlĩ cĩg Uthieele ꞌcĩg haĩ: Mithael hĩ Elthavvan hĩ Thithiri.

²³ Baa nẽ ikia ũꞌthũwan Arõõnẽ Eliꞌtheba, tĩnaatĩ Ammĩnadabĩ ꞌcĩ baa ĩĩn ngõõnĩ Nahathõnĩ. Nĩngĩtĩ aku arritaakĩ ĩnõõnnõ Nadab hĩ Abiihu hĩ Eleathar hĩ Ĩthamar.

²⁴ Nẽ buul cĩg Kõõra: hĩ Aꞌthiri hĩ Elkaana hĩ Abiathav. Baa ĩĩn nẽẽg hattũũgẽt cĩg eet cĩg Kõõra.

²⁵ Baa ikia ũꞌthũwan Eleatharĩ ngeertĩ Arõõnẽ, bũhẽẽc umwa buheecinii cĩg Puteli, ꞌcĩ baa hikia hittiraak ĩnõõnnõ Pineeha. Baa ĩĩn eeta cieeg maajihi eet cĩg halang cĩ ꞌLeevi hattũũgẽtĩ cũũmõ cũũmõ.

²⁶ Baa Arõõnẽ icci hĩ Mũũꞌtha ꞌcĩg baag anneek Makayyioohiti, “Uluukti eet cĩg Ĩꞌthĩraẽlĩ lothippiꞌnyaannĩĩ cĩggĩĩng vẽlẽk, hũtũngteek looc cĩ Ijjibi.”

²⁷ Nẽ baa ĩhõõggõ Arõõnẽ hĩ Mũũꞌtha dioo noho, ꞌcĩg aduhaak habu cĩ Ijjibi, halahaneek eet cĩg Ĩꞌthĩraẽlĩ huluugito looccaa cĩ Ijjibi.

Õthõõthĩ Arõõnẽ Mũũꞌtha

²⁸ Ma baa othoothĩk Makayyioohiti Mũũꞌtha Ijjiba ho,

²⁹ ikia ĩĩnnĩk ĩnõõnnõ, “Hĩĩnĩ naa Makayyioohit. Duhaak habu cĩ Ijjibi thõõth vẽlẽk ꞌcĩ haduhaakii naa nganiita.”

³⁰ Anneek hinnia Mũũꞌtha Makayyioohit, “Aꞌnyamannaa nganĩĩt ngaatĩ hõthõõthĩ, inni occa hatĩ hĩthĩha habuui cĩ Ijjibi nganĩĩt haaga ho?”