Luugithõõ 24 - ꞌBuuk cĩ Thõõth cĩ Nyekuci

Elemit eeta cĩg Ĩꞌthĩraẽlĩ lõhõt cĩ Makayyiookto

¹ Nĩngĩtĩ aduhaakĩ Makayyioohiti Mũũꞌtha annẽẽkĩ, “Ijjia mũdeehaa nganĩĩt muura hujjieen ngaati. Ookorria hĩ Arõõnẽ hĩ Nadab hĩ Abiihu hĩ makayyiook cĩg Ĩꞌthĩraẽlĩ hẽẽn tũrkĩramma buúk. Adiim alainnu niig vẽlẽk aattiyyiaannu ꞌrẽẽna.

² Nẽẽthĩ, Mũũꞌtha dioo ꞌcĩ occa aku hikia hõbõktõ hĩ Makayyioohit. Adiim occa hõllõngaa au nyakangaaꞌnya buúk, hiita hõbõktõ hĩ Makayyioohit nẽ aitiõõ eeta ũgẽẽgĩ ꞌcĩg occa alahanoothĩk hiita hotoddia hĩ Mũũꞌtha hummuddioothĩk Makayyioohit muura lokora tõõ.”

³ Ma baa allũũcĩ Mũũꞌtha õkõ aduhaak eet vẽlẽk thõõth ꞌcĩ aduhaak Makayyioohiti ĩnõõnnõ hĩ nyattalliook ko, baa ẽdẽcĩ eeta vẽlẽk molooha hõdẽẽthõng aĩ, “Hadĩmanna hatĩ hẽlẽggĩ vẽlẽk ꞌcĩg aduha Makayyioohiti.”

⁴ Ma ngaati ẽtẽhẽẽd Mũũꞌtha thooꞌthiok vẽlẽk baag aduha Makayyioohiti loota. Ma baa loohoth ꞌcĩ ꞌrĩĩng, ĩtĩnga nẽẽ ẽtẽhẽny nĩngĩtĩ ĩbboorini ꞌgaarrieeniti muura uruta nẽ adaeek biyyiẽẽn õmmõtõ hĩ ꞌramma ꞌcĩg ĩthakꞌthoothĩk habucieeꞌnya õmmõtõ hĩ ꞌramma cĩg Ĩꞌthĩraẽlĩ.

⁵ Ma nĩngaata, ĩꞌthõ nẽẽ nyahaappanĩt ũgĩ cĩg Ĩꞌthĩraẽlĩ hõõt haanytĩk Makayyioohit ꞌgaarriẽẽn ꞌcĩg ĩwaaddi nẽ ibboorrik olĩꞌnya hĩĩtõ ꞌgaarriẽẽn ꞌcĩg agaõõnĩ eeta hĩ Nyekuc.

⁶ Nĩngĩtĩ akannaanĩ Mũũꞌtha biyyi ũgĩ hẽddẽẽmẽẽtĩ nẽ ittiha biyyi ꞌcĩg abadtẽc urwacanĩ nĩngĩtĩ ĩbboorini ꞌgaarrieeniti ho.

⁷ Ma ho, ittiha ꞌBuuk cĩ Lohoto nẽ itigiilik eet molooha cobbi. Ẽdẽcĩ eeta tarĩ anneek, “Hathĩkna hatĩ Makayyioohit nẽ hĩdĩmatta thõõth vẽlẽk ꞌcĩ aduha nẽẽnĩ.”

⁸ Ma ho, ittiha Mũũꞌtha biyyi hẽddẽẽma nẽ urwacanĩ eeta. Ma tarĩ ho, ĩĩnnĩk ĩhõõggõ, “Biyyi cĩg lõhõtaak cieegi, baag aarĩk Makayyioohiti hĩ ngagiit, hĩnĩngĩtĩ thooꞌthiok iccig vẽlẽk.”

⁹ Nĩngĩtĩ ĩꞌngaannĩ Mũũꞌtha hĩ Arõõnẽ hĩ Nadab hĩ Abiihu hĩ makayyiook hẽẽn tũkĩramma cĩg Ĩꞌthĩraẽlĩ, õtõdĩ muura hujjieen.

¹⁰ Ma nĩngaata, udtuukta nẽẽg Nyekuc cĩ Ĩꞌthĩraẽlĩ. Nẽ ꞌthõõnĩĩ cĩgĩnnĩg loota, baa aaĩ ꞌgiimwaa ꞌcĩ aaĩ hĩ bẽẽ ꞌcĩ cũlahẽẽnĩ nẽ ĩĩ tẽlla haau hĩ hẽẽtkujjieen.

¹¹ Tananga baa ĩcĩnĩt nyakangaaꞌnya cĩg Ĩꞌthĩraẽlĩ Nyekuc, baa hõllõngaa aruk Nyekuci ĩhõõggõ buúk. Nĩngĩtĩ aduhẽẽnĩ nẽẽg nẽ uhuddi muumaa cĩ Makayyiookto.

¹² Ma nĩngaata, ĩĩnnĩk Makayyioohiti Mũũꞌtha, “Tõda muura hujjieen nẽ nõõ ikia aau ngaati hĩdĩhĩdĩĩc. Haaꞌnyii hatĩ naa nganiit biyyiẽẽn ꞌramma ꞌcĩg ꞌthabalĩg, ꞌcĩg baag heteheedĩha naa nyattalliook ꞌcĩg hatĩ allimaneehi eeta.”

¹³ Nĩngĩtĩ ĩꞌngaannĩ Mũũꞌtha hĩ dticciannioohit cĩnnĩ ꞌJooꞌthua nẽ ũũk õtõd Mũũꞌtha muur cĩ Nyekuci.

¹⁴ Baa aduhaak Mũũꞌtha makayyiook anneek, “Ereeyyieetu ngagĩĩt ngaati ĩꞌthõng hoboddiaawa naaga. Arõõnẽ hĩ Hur cieeg arũmeennu hĩ ngagiit ngaati ho. Má ẽppẽhanõõ eeta ũgẽẽgĩ nga haattiyyiaanna naaga, aanytĩk hootti thõõth hĩ ĩhõõggõ.”

¹⁵ Ma baa õtõd Mũũꞌtha muur, ikia ũmmũlũũnyan loduruui muur,

¹⁶ nĩngĩtĩ aku aayyi bulẽẽnĩtĩ cĩ Makayyiookto Muuraa cĩ ꞌThĩnaĩ lokora nẽ ũmmũlũũnyan loduruui muur waathinniook tõrkõnõn. Ma baa kõr ꞌcĩ ĩĩn tũrkĩramma, ũtũvvũ Makayyioohiti Mũũꞌtha loduruuwatõõ.

¹⁷ Nẽ hĩ eet cĩg Ĩꞌthĩraẽlĩ, baa edeeꞌnyia bulẽẽnĩtĩ cĩ Makayyiookto muura lokora aaĩ hĩ ꞌgwaa ꞌcĩ atũũthĩ thõng.

¹⁸ Nĩngĩtĩ adukni Mũũꞌtha loduruuwatõõ hĩcĩ õtõd nẽẽ muura lokora. Nẽ aau muura nĩngaata, waathinniook hẽẽn ꞌwec hĩ baalinniook hẽẽn ꞌwec buúk.