Luugithõõ 23 - ꞌBuuk cĩ Thõõth cĩ Nyekuci

Nyattalliook cĩg bũnnaiittak hĩ tamaati

¹ “Ma haduhaahi eet nyeemuꞌnya ꞌcĩg ĩĩn õlõng. Ma heeli eet ꞌcĩ abathĩ ngaatĩ ĩĩnnĩ hebereec cĩ thõõth ꞌcĩ hõllõngaa ĩĩn dĩdĩ.

² “Ma hanũ lothippit hatĩ adĩman thooꞌthiok ꞌcĩg abathĩ. Duha thõõth ꞌcĩ ĩĩn dĩdĩ hõdõõkõthĩ lokihooa, tananga hiittiõõ eeta vẽlẽk hõllõngaa aduha thõõth ꞌcĩ ĩĩn dĩdĩ.

³ Nẽ tarĩ, ma hahali hullaha lokihooa, hĩnĩngĩtĩ ĩĩn nẽẽg hullaha.

⁴ “Má ammũdeehi olĩ hode thigir cĩ mirohit cunni arahanĩ, ngĩdẽẽhĩ hũũk hĩ maaꞌnyĩ.

⁵ Má adtuuha nii thigir cĩ eet umwa ꞌcĩ aaburreeki nganiit, õcõõd ijjio hitihiici hẽttẽẽd looc, ma hedeceehi, bĩĩl nẽ eelu ĩnõõnnõ hĩ thigir cĩnnĩ ho.

⁶ “Aꞌnyĩĩk hullaha hetteeddiothoothĩk thõõth ꞌcĩ aduhõõ hĩ eet ꞌcĩg ĩĩn balliook lokihooa thõng.

⁷ Ma haddangaahi eet umwa thõõthaa ꞌcĩ ĩĩn õlõng. Ma hetteedihi eet ꞌcĩ ammĩrĩ daahĩth, hĩnĩngĩtĩ nga huduha naa eet ꞌcĩ ĩĩn nyeꞌtheccioohit hĩĩ ammĩrĩ.

⁸ “Ma helemi pirriidaniinit, hĩnĩngĩtĩ aaꞌnyi pirriidaniiniti nganiit tũbũr ꞌgii ꞌcĩ adtuuha dĩdĩ. Aaꞌnyĩk pirriidaniiniti eet ꞌcĩ abũnnaa hatalmaanyan thõõth ꞌcĩ ĩĩn dĩdĩ.

⁹ “Ma hadĩmannu eet cĩg looc ꞌcĩ ꞌrĩĩng ꞌbuth. Baa iiginnu niig buúk eet cĩg looc ꞌcĩ ꞌrĩĩng Ijjiba nẽ agayyu niig buúk rũgẽt cĩ eet cĩg looc ꞌcĩ ꞌrĩĩng.

Nyattalliook cĩg Kõr cĩ ꞌYiommaanõ

¹⁰ “Akattio nẽ ajattu manẽẽn cugguung irkiꞌnyia tõrkõnõn,

¹¹ nẽẽthĩ, aanytĩk looc hatangu irkit ꞌcĩ ĩĩn tũrkĩramma. Aanytĩk hullaha hajanit habbeeru. Ũtũngtẽẽhĩ ũgĩ idiꞌngwa cĩg moru hadahit. Ĩdĩmanit noho buúk hĩ manẽẽn cugguung cĩg viinoaak hĩ cĩg hẽẽn cĩg olivi.

¹² “Aꞌnyaku niig waathinniook tõrkõnõn lommidikaawa hõdẽẽthõng ꞌcĩg adticannu dtiic cunuung, nẽẽthĩ kõrraa ꞌcĩ ĩĩn tũrkĩramma, ma hadticaniinnu. Thõõth ꞌcĩ aaꞌnyĩk olĩꞌnya cugguung hĩ thigirẽẽt hiyyiomanit cieeni. Nẽ tarĩ ẽlẽmaakĩ thõõth ciee appahacaaꞌnya hĩ eet cĩg looc ꞌcĩ ꞌrĩĩng ꞌcĩg arũmeennu hĩ ngagiit buúk, hiyyiomanit.

¹³ “Ũnnẽẽc thooꞌthiok vẽlẽk ꞌcĩg haduhaakuung naa ho jurrung. Ma halayyu nyekuꞌnya ũgĩ haaga. Ma ꞌthẽk habbuuꞌngu ꞌthaarriok cĩggĩĩng ũdũt.

Karramẽẽt iyyio irkita hõdẽẽthõng

¹⁴ “Irkiꞌnyiaannĩ vẽlẽk, irkita hõdẽẽthõng tabattĩ iyyio, adahit karramẽẽt ꞌcĩg ingoliinnaangu nganĩĩta.

¹⁵ “Adahit nõõ Karrama cĩ Ũbũnẽẽt ꞌcĩg aitiõõ Abũũlana tõõ. Uduhit ũbũnẽẽt ꞌcĩg nga harrihoothĩk abũũlana waathinnioohĩĩ ꞌcĩg ĩĩn tũrkĩramma, hĩ baa haduhaakuung naa ngagiita. Adahit karrama icci korrioohĩĩ ꞌcĩg eberriaa nyĩlõõhaa cĩ Abiibi, hĩnĩngĩtĩ ĩĩn kõr baa aluugannu niig Ijjiba niccia. “Aitiõõ ẽẽtĩ ꞌcĩ occa aku uppwaanna muumaa caannĩ haaga, hiꞌthihi ꞌbaninit tõõ.

¹⁶ “ꞌRamma cĩnnĩ, adahit Karrama cĩ Janiitto hatĩ aꞌnyahaakaangu nganĩĩt haal ꞌcĩg ajanaannu manẽẽnĩĩ cugguung. “Adahit Karrama ꞌcĩ ẽdẽcaaku janiinit hatĩ edeccia nyĩlõhĩ cĩ janiitto, hatĩ ajattaau haal vẽlẽk manẽẽnĩĩ cugguung.

¹⁷ “Irkiꞌnyiaannĩĩ cĩg vẽlẽk, irkita hõdẽẽthõng tabattĩ iyyio, adiim eet ꞌcĩg maacĩg cĩg Ĩꞌthĩraẽlĩ vẽlẽk hiita muumaa caannĩ ꞌTirriannioohit Makayyioohit cunuung.

¹⁸ “Ma haaꞌnyaangu nganĩĩt biyyi cĩg ꞌgaarrieenit ꞌcĩ õꞌngõõtanoothĩk hĩ ũbũnẽẽt ꞌcĩg aariku abũũla hatĩ ĩbboorĩkaangu nganĩĩt iding umwa. “Agaac jurrung adiim ĩwaaddi mũrẽẽcĩ cĩ iding ꞌcĩ adĩhĩ ho huturum kõr niccia noho.

¹⁹ “Hĩcĩ ajannu niig manẽẽn cugguung, aꞌnyakta haal ꞌcĩg abbiiri jurrung ꞌcĩg ajanaannu ĩĩcĩ oou, ꞌCieethaa cĩ Makayyioohit Nyekuc cunuung. “Ma haaku mĩꞌnyõõn cĩ eetho iriaanĩ cĩg aattĩnnĩ.

Ĩꞌthõõa Nyekuci aajĩlõ

²⁰ “Ĩcĩnĩt, hĩꞌthõõakuung naa aajĩlõ hutuaneekuung ngagiit nẽ hũꞌthũũttuung ngagiit ꞌgõõla, hátĩ haꞌnyahaauung looccaa ĩbaa hakũmaneekuung naa ngagiita.

²¹ Ĩthĩhĩt thõõth vẽlẽk ꞌcĩ aduha aajĩlõ jurrung, hĩnĩngĩtĩ haaꞌnyĩha naa ĩnõõnnõ makaaꞌthĩt nẽ hõllõngaa occa hatĩ ẽlẽmĩ nẽẽ eet ꞌcĩ ĩĩn ꞌloorriahit.

²² Nẽẽthĩ, má anuyyu niig thõõth ꞌcĩ aduha aajĩlõ ho jurrung, nẽ ĩdĩmattu thooꞌthiok vẽlẽk ꞌcĩg haduha naana, hĩĩnĩ hatĩ naa mirohit cĩ mĩrõk cugguung nẽ haburreehi hatĩ naa eet ꞌcĩg aburreekuung ngagiita.

²³ Uwwatteekuung hatĩ ngagiit aajĩlõ caannĩ ĩĩcĩ oou nẽ aꞌnyahaauung looccaa cĩ Amõõrĩ hĩ ĩĩcĩ Hiiti hĩ ĩĩcĩ Peri hĩ ĩĩcĩ Kanaanĩ hĩ ĩĩcĩ Hiivvi hĩ ĩĩcĩ ꞌJeebu nẽ hacũda hatĩ naa ĩhõõggõ hĩĩ lõõcĩ ꞌthĩĩ.

²⁴ Ma halayyu nyekuꞌnya cĩggĩĩng hode ma hanuyyu nyattalliook cĩggĩĩng. Nẽẽthĩ hinnianĩ, adiim ĩꞌthaanit hẽlẽggĩ ꞌcĩg aar nẽẽg hĩĩtõ nyekuꞌnya cĩggĩĩng ko, hĩĩ lõõcĩ ꞌthĩĩ nẽ ilibtu ꞌthouraaꞌnya cĩggĩĩng ꞌcĩg ĩĩn biyyiẽẽn ko buúk.

²⁵ Alaac Makayyioohit Nyekuc cunuung diooni. Má adĩmannu noho, haggatannuung hatĩ naa ngagiit ꞌgẽẽna hĩ maamĩ nẽ hũꞌthũũttuung ngagiit hiittiõõ hõllõngaa ommoorru.

²⁶ Arrita hatĩ ngaaĩ cugguung lõhõlĩ ꞌcĩg atũnyĩ nẽ hatĩ ũrũgĩt eeta cugguung vẽlẽk irkiꞌnyia ꞌcĩg mẽẽlĩg.

²⁷ “Hĩꞌthõõa hatĩ naa bathi caannĩ hutuaneekuung ngagiit nẽ haaꞌnyĩha barriti eet vẽlẽk cĩg loonyin ꞌcĩg ommotonnu hĩ ngagiita. Haaꞌnyihi hatĩ naa mĩrõk cugguung vẽlẽk hutuhuyyi hukulit.

²⁸ Hĩꞌthõõa hatĩ naa bathi caannĩ hutuaneekuung ngagiit hitiggiaeek eet cĩg Hiivvi hĩ cĩg Kanaanĩ hĩ cĩg Hiiti battaala.

²⁹ Nẽẽthĩ, aitiõõ hatĩ naa hõllõngaa hiiggia ĩhõõggõ irkita hõdẽẽthõng, hĩnĩngĩtĩ aku hinnia hatĩ aaĩ lõõcĩ haaga nẽ iita ittirit idiꞌngwaana cĩg moru hĩĩtõ mẽẽlĩg nẽ aanytuung ngagiit itingolli ĩhõõggõ.

³⁰ Hiiggia hatĩ naa mĩrõk cugguung hĩdĩĩc hĩdĩĩc nẽ haaꞌnyĩha eet cugguung hittoorri hĩĩtõ mẽẽlĩg, hiita hũũppanit ngaatĩ õõyyĩ looc.

³¹ “Haarihi hatĩ naa lõkõõrẽẽn iꞌthianaanĩ Bũlũcaa ꞌcĩ Marihi hõdõlan Bũlũc cĩ Meditereennia nẽ tarĩ iꞌthianaaĩ horrwaa ꞌcĩ õdõhõhĩĩ ĩĩcĩ uruto, ĩꞌthõng hõdõlan Hidioo cĩ Euvaratẽthĩ. Haaꞌnyuung hatĩ naa itiggiayyieek maajihi lootu mõrõ.

³² Nẽẽthĩ, ma hadaku lõhõt hĩ ĩhõõggõ hode hĩ nyekuꞌnya cĩggĩĩng.

³³ Ma haaꞌnyiku ĩhõõggõ haautti looc cunuung, hĩnĩngĩtĩ aĩnanaannuung hinnia hatĩ nẽẽg ngagiit utuburriaangu nganĩĩta. Ma alayyu nyekuꞌnya cĩggĩĩng ko, aggamoothiku hatĩ ngaatĩ alayyu nyekuꞌnya ꞌcĩg hõllõngaa ĩĩn dĩdĩ.”