Luugithõõ 22 - ꞌBuuk cĩ Thõõth cĩ Nyekuci

ꞌGõõl ꞌcĩ haꞌthũũnnĩ ijjio

¹ “Má ĩgõrĩth ẽẽtĩ umwaa olĩ hode aꞌtheet nẽ ẽttẽẽd hode nẽ ũtũũõĩ thõng, aanytĩk igorriaahit tĩho hittiha olĩꞌnya ꞌtur hũdũmanĩ olĩ ꞌcĩ ĩgõrĩth ko nẽ ittiha aꞌtha ꞌwec hũdũmanĩ aꞌtheet ꞌcĩ ĩgõrĩth ko.

² “Má aggamĩ igorriaahiti ngaatĩ adukni ꞌcieethaa umwaanĩ nẽ ohoddia hadaak, aitiõõ ẽẽtĩ ꞌcĩ õhõda igorriaahit hadaak ko, hõllõngaa ĩĩn nyeꞌtheccioohit.

³ Nẽẽthĩ, ma ohoddiaa igorriaahiti hadaak hatĩ uppwaanna kõrra ẽlẽk, ĩĩn ẽẽtĩ ꞌcĩ õhõda igorriaahit ko nyeꞌtheccioohit. “Igorriaahiti umwaa ꞌcĩ aggamoothĩha, aanytĩk hũdũman hẽlẽggĩ vẽlẽk ꞌcĩg ĩgõrĩth hĩĩ dtĩng. Má hõllõngaa adũmanĩ, aanytĩk hũtũũĩ hĩĩ appahaca hũdũman ĩgõr cĩnnĩ ho.

⁴ “Má ĩgõrĩth eet umwaa olĩ hode thigir hode aꞌtheet nẽ ummuddia hõrggaa cĩnnĩ nga arũgĩ, aanytĩk igorriaahit tĩho hũdũman hẽlẽggĩ ꞌcĩg ĩgõrĩth nẽẽ ho hõdẽĩ hõdẽĩ tabattĩ ꞌramma.

⁵ “Má alahaneehu nii taang umwa tĩĩnĩtõõ cugunnig harahan hũũk hẽgĩ mana cĩ eet umwa hode cĩ viinoo, ꞌtiha haal cugunnig ꞌcĩg abbiiri jurrung nẽ ũdũmanĩĩ mana hode viino tĩho.

⁶ “Má akannĩ nii mana cunni ꞌgwoo nẽ alahaneehu ꞌgwoo hũũk hũtũũth mana ꞌcĩ ꞌrĩĩng, dũman haal cĩg baattĩ mana ꞌcĩ atũũth ꞌgwaa ho.

⁷ “Má iroraneek ẽẽtĩ umwaa eet ꞌcĩ aarõõ ꞌrabbẽẽt hode ijjio hitiangĩtheek ĩnõõnnõ thõng nẽ igoriꞌthi ijjio ꞌcieethaa cĩ eet ꞌcĩ aarõõ ho, aanytĩk igorriaahit tĩho hatĩ aggamĩ, hũdũman ijjio tabattĩ ꞌramma.

⁸ Nẽẽthĩ, má hõllõngaa aggammi igorriaahiti, aꞌnyakta eet ꞌcĩ iroranoothĩk ijjio ho, muumaa cĩ Nyekuc ꞌcĩ hatĩ aku aduha hatĩ ĩĩn ĩnõõnnõ ꞌcĩ baa ĩgõrĩth ijjio ho.

⁹ Ma aruhõõnĩ eeta ꞌramma olĩ hode thigir hode aꞌtheet hode cẽrẽm hode ꞌthẽk ijjioonit ꞌcĩ aꞌnginoothi, aĩ eet umwaa cĩnnĩ nẽ tarĩ ĩĩ umwaa buúk cĩnnĩ. Má aaĩ hoti, aanytĩk eet iccig vẽlẽk hiita muumaa cĩ Nyekuci nẽ ẽẽtĩ ꞌcĩ aduha Nyekuci aĩ ĩĩn nyeꞌtheccioohit, adũman hatĩ nẽẽ baattĩ ꞌgii tĩho tabattĩ ꞌramma.

¹⁰ “Má iroraneek ẽẽtĩ umwaa eet ꞌcĩ aarõõ olĩ hode aꞌtheet hode hẽlẽggĩ ũgĩ cĩgĩnnĩg hũtũhaeek nẽ adaak hode appũũthĩ hode ammanyanni haaga nẽ hõllõngaa adtuuha ẽẽtĩ umwaa buúk,

¹¹ aꞌnyĩĩk eet ꞌcĩ iroranoothĩk hẽlẽggĩ ho, hũbũtan muumaa cĩ Makayyiookto. Má ũmmũda Makayyioohiti ĩnõõnnõ ngaatĩ ammĩrrĩ, aꞌnyĩĩk baattĩ taꞌngõõ hẽlẽm thõõth icci nẽ iittiõõ hõllõngaa adiim dũman.

¹² Nẽẽthĩ, má baa ĩgõrĩthĩ taang hõrggaa cĩ eet ꞌcĩ iroranoothĩk ko dĩdĩ, aꞌnyĩĩk eet ꞌcĩ iroranoothĩk taang ko hũdũman baattĩ taꞌngõõ.

¹³ Má baa adak ꞌgii cĩ moru nẽ aꞌnyaha ꞌrõõk hiita hudtuukta eeta buúk, occa hõllõngaa adũmanni.

¹⁴ “Má acuhana ẽẽtĩ umwaa taang hode thigir cĩ eet ꞌcĩ aarõõ nẽ ikia orotoothĩk eet umwaa hode adaak thõng, hatĩ nga aitiõõ baattĩ taꞌngõõ hode cĩ thigiiro tõõ, aꞌnyĩĩk eet baa acuhana taang hode thigir ko hũdũmanõõ thõng.

¹⁵ Nẽẽthĩ, má aaĩ baattĩ taꞌngõõ hode baattĩ thigiiro, occa hõllõngaa adũmanni taang hode thigiri thõng. Nẽ ma adtican taang hode thigiri dtiic cĩ eet umwa, aꞌnyĩĩk eet tĩho hũdũman ꞌrabbẽẽt cĩg dtiic tĩho.

Nyattalliook cĩg authet ꞌcĩ haattiyyi

¹⁶ “Má alũllũũman ẽẽtĩ umwaa bũhẽẽc ꞌcĩ nga hatagguutho hĩ eet ꞌcĩ maacĩ, adiim adũman nẽẽ tĩĩn ꞌcĩg angĩdõõthĩkĩ bũhẽẽc hũꞌthũwan ĩnõõnnõ thõng.

¹⁷ Nẽẽthĩ, má abũrrĩ maaꞌnyĩ bũhẽẽcõ, aalla nga adiim adũman ẽẽtĩ tĩĩn ꞌcĩg ũũppan bũhẽẽc ꞌcĩ nga hatagguutho hĩ eet ꞌcĩ maacĩ ho noho.

¹⁸ “Ma hẽlẽmaaku ngarĩ hũrũg.

¹⁹ “Uruhit eet ꞌcĩ õtõd taang hode ẽẽth hode aꞌtheet hadaak.

²⁰ “Ẽẽtĩ umwaa ꞌcĩ ĩbboorĩk nyekuc umwa haaga ꞌgaarrieenit hĩllõõan ngaatĩ ĩbbõõrĩkĩ Makayyioohit, uruhit hadaak.

²¹ “Ma hadĩmannu eet cĩg looc ꞌcĩ ꞌrĩĩng ꞌcĩg arũmeennu hĩ ngagiit ꞌbuth. Ummuhutooth baa gõõng ꞌthẽk iiginnu niig buúk eet ꞌcĩg ꞌrĩĩng Ijjiba.

²² “Ma harratannu ngaatĩbõyyĩ hode booyyiohit.

²³ Má arratannu niig ĩhõõggõ ꞌgõõlaa umwaanĩ nẽ urruuyyioyyia nganĩĩta, hathihi ꞌthẽk hatĩ naa ulwa cĩnĩĩng.

²⁴ Haliillikuung hatĩ naa ngagiit nẽ huruhuung nyetuboota, hĩĩtõ ngaaĩ cugguung ngaatĩbõyyĩꞌnya nẽ iittiõõ lõhõlĩ cugguung buúk maajiha tõõ.

²⁵ “Má acuhanaanni eet umwaa caannĩ ꞌcĩ appĩĩrna ꞌrabbẽẽta, ma haaꞌnyihi hũdũman ꞌrabbẽẽt ꞌcĩg ĩllõõan baag acuhanaanni nganiita.

²⁶ Má aggama nii cẽrẽm cĩ bungẽẽttõ hĩ eet ꞌcĩ aaronnu hĩĩ ꞌgii ꞌcĩ hatĩ adũman ꞌrabbẽẽt ꞌcĩg acuhanaanni ho, adiim õbõdaakĩ ĩnõõnnõ nga hokoloothĩk kõrra.

²⁷ Hĩnĩngĩtĩ cẽrẽm icci dioo ꞌcĩ abungẽẽnĩ ẽẽtĩ ꞌcĩ aaronnu ho. Nẽ occa gõõng oongi ẽẽtĩ haaga hutuno? Má hõllõngaa õbõdĩ nẽ utuluuihaa ẽẽtĩ ꞌcĩ aaronnu ho nganĩĩt hẽẽl ĩnõõnnõ, hathihi hatĩ naa ĩnõõnnõ, hĩnĩngĩtĩ hĩĩnĩ naa Nyekuc ꞌcĩ hammaannihi eeta.

²⁸ “Ma hothooꞌthu Nyekuc ꞌbuth hode othooꞌthu makayyiook cĩg eet cugguung ꞌbuth.

²⁹ “Occa hõllõngaa agunyuꞌthu niig ꞌgiimwa, hatĩ aaꞌnyaangu nganĩĩt ꞌbaaninit cĩ haal cugguung hĩ mẽrtĩ cunuung. “Adiim aaꞌnyaangu niig nganĩĩt lõhõlĩ cugguung ꞌcĩg maacĩg ꞌcĩg arrittiaa ĩĩcĩ oou.

³⁰ Adiim tarĩ aaꞌnyaangu niig nganĩĩt maala cĩg tĩĩn cugguung hĩ mĩꞌnyõ cĩg aꞌthaannu hĩ cĩg ẽẽthak. Nẽẽthĩ, aanytĩk nõõ hẽlẽggĩ ꞌcĩg arrittiaa ĩĩcĩ oou hũrũmtĩ hĩ ngaaggi waathinniook tũrkĩramma nẽ thĩ iita aanytaangu nganĩĩt kõr ꞌcĩ ĩĩn turkiyyio.

³¹ “Adiim iiginnu niig eet cĩgannĩg ꞌcĩg ẽllẽẽmĩthĩ. Nẽẽthĩ hoti ho, ma hadaku taang ꞌcĩ adak ꞌgii cĩ moru. Udhuktẽẽhĩ ũthũrẽẽt hadahit.”