Luugithõõ 21 - ꞌBuuk cĩ Thõõth cĩ Nyekuci

Dticcianniook cĩg Ebereei

¹ “Nyattalliook ꞌcĩg occa aaꞌnyihi nii eet hũnnẽẽcõ cieegi.

² “Má ũũtannu appahaca ꞌcĩ ĩĩn Ebereeinit, aanytĩk hĩĩ appahaca irkiꞌnyia tõrkõnõn. Nẽẽthĩ irkitaa ꞌcĩ ĩĩn tũkĩramma, oogit hũũk haaga, hiittiõõ dũmanĩ tõõ.

³ Má baa ĩĩn appahaca bũaarinit kõr ꞌcĩ akuuni ho, oogit hũũk nẽẽ diooni, nẽẽthĩ, má baa ũꞌthũwanõõ nẽẽnĩ, oogit ĩnõõnnõ ngaawa cĩnnĩ noho.

⁴ Má baa aꞌthũwanaak makayyioohiti cĩnnĩ ĩnõõnnõ ngaa nẽ ittirria lõhõlĩ ꞌcĩg maacĩg hĩ lõhõlĩ ꞌcĩg ngayyig, ĩĩn ngaa lõhõlẽẽnĩ noho cĩg makayyioohit cĩnnĩ, nẽẽthĩ nẽẽ õõgĩ ẽẽtĩ hũũk athĩnĩ ꞌtẽl.

⁵ “Nẽẽthĩ, má aĩ dticciannioohiti, ‘Hammĩna naa makayyioohit caannĩ hĩ ngaa caannĩ lõhõlẽẽnĩ noho nẽ hõllõngaa hadiimi huunnihi,’

⁶ adiim occa abĩllĩ makayyioohiti cĩnnĩ ĩnõõnnõ hĩ ꞌgaadĩꞌnya. Occa õkõõyyĩ ĩnõõnnõ hattũũga hode hẽẽtaa ꞌcĩ õdõõddõthõõthĩkĩ hattũũga nẽ ĩbbõõr ĩtat cĩnnĩ bõõca. Nẽẽthĩ hatĩ ĩĩ nẽẽ appahaca cĩ makayyioohit cĩnnĩ ũdũt.

⁷ “Má ũũtẽnĩ ẽẽtĩ umwaa bũhaanyĩnĩ hĩĩ dticciannioohit, occa hõllõngaa ooggi hũũk haaga hĩ dticciannioohiti ꞌcĩ maacẽẽnĩ.

⁸ Má hõllõngaa aaꞌnyĩk nẽẽ makayyioohit ꞌcĩ baa ẽbẽra ĩnõõnnõ hĩ ngaa cĩnnĩ ho haccamanoothĩk, occa alahaneek makayyioohiti ĩnõõnnõ hũtũũwa maaꞌnyia ĩnõõnnõ tarĩ. Occa hõllõngaa ũũtẽnĩ makayyioohiti ĩnõõnnõ hĩ eet cĩg looc cĩrrĩĩng tarĩ, hĩnĩngĩtĩ iittiõõ makayyioohiti hõllõngaa ẽlẽmĩ ĩnõõnnõ tarĩ.

⁹ Má baa ẽbẽraak makayyioohiti ĩnõõnnõ ngeerĩnĩ, adiim occa acĩn nẽẽ ĩnõõnnõ hĩ bũhaanyĩnẽẽnĩ.

¹⁰ Má ikia ũꞌthũwan ẽẽtĩ baa aꞌthũwan ngaa ꞌcĩ ĩĩn appahaca ngaa umwa tarĩ, occa hõllõngaa adhuk ngaa ꞌcĩ oou, ngaatĩ ẽdẽnẽẽkĩ ꞌgẽẽn hĩ ceremwa nẽ ũtũbũr ngaatĩ attihi ĩnõõnnõ.

¹¹ Má hõllõngaa aaꞌnyĩk nẽẽ ngaa hẽlẽggĩ iccig ĩĩn iyyio ho, occa õõg ĩnõõnnõ hũũk haaga hiittiõõ ꞌrabbẽẽta ꞌcĩg adũmaniini tõõ.

Ruhẽẽnĩt hĩ thooꞌthiok ũgĩ ꞌcĩg abathĩ

¹² “Ẽẽtĩ ꞌcĩ aruhõõ hĩ ꞌgõõnĩ nẽ uruk ĩnõõnnõ hadaak, adiim occa aruhi nẽẽ buúk hadaak.

¹³ Ma oorotoothĩk thõng nẽ alahaneek Nyekuci hĩdĩmanĩ noho, aꞌnyĩĩk hivvir hũũk ngaatĩ hatĩ hẽbẽraahi naana nẽ hatĩ ũũk aau lõꞌngõõc nĩĩca.

¹⁴ Nẽẽthĩ, má aruk ẽẽtĩ eet lohoroor, uduhutti ĩnõõnnõ battaala ngaatĩ ĩbboorini ꞌgaarrieeniti caannĩ nẽ uruktu hadaak.

¹⁵ “Ẽẽtĩ ꞌcĩ aruhõõ hĩ maaꞌnyĩ hĩ aattĩnnĩ, uruhit hadaak.

¹⁶ “Ẽẽtĩ ꞌcĩ ĩgõrĩth eet umwa nẽ ũtũũõĩ thõng, hode nga aꞌnyak ĩnõõnnõ ngaanĩngĩtĩ aggamĩ, aꞌnyĩĩk huruhi hadaak.

¹⁷ “Ẽẽtĩ ꞌcĩ õdõõm maaꞌnyĩ hode aattĩnnĩ, occa aruhi nẽẽ hadaak.

¹⁸ “Má ẽggẽrꞌnyõõ eeta nẽ õhõda umwaa ꞌgõõnĩ biyyiẽẽnĩ hode ĩdda attiaa nẽ nga arũgĩ nẽ atananĩ nangẽrẽba,

¹⁹ aitiõõ hatĩ ẽẽtĩ ꞌcĩ ĩdda ꞌgõõnĩ ho, hõllõngaa ẽhẽẽl thõõth icci, hatĩ ĩĩ mẽẽn ꞌgoonnia nẽ uduhuna hõtõ battaala nẽ õtõhõmĩ hĩbahĩta. Nẽẽthĩ, adiim adũman ẽẽtĩ ꞌcĩ ĩdda ꞌgõõnĩ ho, korriook ꞌcĩg atanaaniini nẽẽ ho, ĩꞌthõng hudtuuha ꞌgõõnĩ ngaatĩ abũnnayyĩ jurrung.

²⁰ “Má õhõda ẽẽtĩ appahaca cĩnnĩ ꞌcĩ maacĩ hode ꞌcĩ ngayyi ꞌthĩĩkta hadaak nĩĩcĩ noho, occa uuki ẽẽtĩ tĩho thõng,

²¹ nẽẽthĩ, occa hõllõngaa uuki ẽẽtĩ, hatĩ ikia ũbũna appahaca urutaa cĩ waathĩn hõdẽĩ hode urutaa cĩ waathinniook ꞌramma, hĩnĩngĩtĩ ĩĩn appahaca ciee cĩnnĩ.

²² “Má aruhõõ eeta ꞌcĩg maacĩg nẽ oorottioothĩk ngaa ꞌcĩ aꞌnyaki hẽꞌthẽcana loholeec nẽ nga hubutuni gẽrrẽẽt, aꞌnyĩĩk eet ꞌcĩ oorotoothĩk ko, hũdũman ꞌgii ꞌcĩ adiim maac cĩ ngaaõ, hẽlẽm lokiho buúk dũman tĩho.

²³ Nẽẽthĩ, ma ubutuni ngaa gẽrrẽẽt, aꞌnyĩĩk hĩcaaccia rũgẽtĩ hĩ rũgẽt,

²⁴ hebeereec hĩ hebeereec, nyĩgĩtaat hĩ nyĩgĩtaat, aꞌthiit hĩ aꞌthiit, ꞌthooc hĩ ꞌthooc,

²⁵ tũũthẽnĩt hĩ tũũthẽnĩt, carrahula hĩ carrahula, nĩngĩtĩ ahuci hĩ nĩngĩtĩ ahuci.

²⁶ “Má uuk ẽẽtĩ appahaca cĩnnĩ ꞌcĩ maacĩ hebereec hĩĩ ruben, aꞌnyĩĩk hõõg appahaca cĩnnĩ ho, hookorriõõ hĩ hebereec.

²⁷ Nẽ ma iliba nyĩgĩtaat cĩ dticciannioohit cĩnnĩ ꞌcĩ maacĩ hode ꞌcĩ ngayyi, aꞌnyĩĩk ĩnõõnnõ hõõg dticciannioohit cĩnnĩ hũũk haaga, hookorriõõ hĩ nyĩgĩtaat ꞌcĩ aliba nẽẽ ho.

²⁸ “Má attur olĩ eet ꞌcĩ maacĩ hode ngaa ꞌcĩ ngayyi hadaak, ohoddia olĩ tĩho hadaak nẽ occa hõllõngaa adaki idingi cĩnnĩ ũdũt. Nẽẽthĩ, occa hõllõngaa ẽhẽẽl baattĩ ollo lohouli.

²⁹ Nẽẽthĩ, ma gõõng atturi olĩ nẽ uduktaak eeta baattĩ ollo hẽcẽb olĩ thõng nẽ hõllõngaa ẽcẽb ĩꞌthõng huttur eet hode ngaa hadaak, ohoddia olĩ nicci hĩ maaꞌnyĩ vẽlẽk hadaahito.

³⁰ Nẽ ꞌgõõlaa umwaanĩ, horoong adiim ittioonnioha cĩg eet ꞌcĩ attur taang ko hũdũmanĩ ẽẽtĩ thõng. Aanytĩk baattĩ ollo hẽtẽhẽẽl lohouli hũdũman hẽlẽggĩ vẽlẽk ꞌcĩg adiim eeta.

³¹ Ũnnẽẽc nyattal icci hatĩ attur taang loholeec ꞌcĩ maacĩ hode ꞌcĩ ngayyi.

³² Nẽẽthĩ, má attur taang appahaca ꞌcĩ maacĩ hode ꞌcĩ ngayyi, aꞌnyĩĩk baattĩ taꞌngõõ hũdũman maaꞌnyĩ appahacaaõ, maccĩrẽẽn hẽẽn iyyio nẽ ohoddia taang hadaak.

³³ “Má ada eet umwa ꞌlook nẽ hõllõngaa amũt nẽ ikia udhuhoothĩk taang hode thigiri ĩĩttõõ,

³⁴ aanytĩk maaꞌnyĩ ꞌloohu hũdũmanõõ, aanytĩk ꞌthẽk hũdũman baattĩ taꞌngõõ hode baattĩ thigiiro nẽ aanytĩhu taang hode thigir ꞌcĩ adaak ko, hĩĩ cĩnnĩ.

³⁵ “Má acuhan olĩ cĩ eet umwa olĩ umwa hadaak, occa ũũtẽnĩ nẽẽg olĩ ꞌcĩ acuhan ꞌgõõnĩ ho thõng nẽ eꞌngerit ꞌrabbẽẽt hĩ baattĩ olĩ ꞌcĩ acuhan ꞌgoonnia hadaak ko hõdẽĩ.

³⁶ Nẽẽthĩ ꞌgõõlaa umwaanĩ, ma baa agayyi taang ngaatĩ atturẽẽnĩ nẽ hõllõngaa ẽcẽb maaꞌnyia, aanytĩk maaꞌnyĩ hũdũman taang ꞌgoonnia nẽ ũũhĩ taang ꞌcĩ acuhan ꞌgoonnia hadaak ko hĩĩ cĩnnĩ.”