Luugithõõ 20 - ꞌBuuk cĩ Thõõth cĩ Nyekuci

Tilooinit cĩ Nyekuci ꞌcĩg ĩĩn õmmõtõ

¹ Baa aduha Nyekuci thooꞌthiok iccig vẽlẽk aĩ,

² “Hĩĩnĩ naa Makayyioohit Nyekuc cunuung, baa haluugannuung Ijjiba looccaa ĩbaa iiginnu appahacaaꞌnya.

³ Ma halayyu nyekuꞌnya ũgĩ, ubuluꞌthiaangu nganĩĩt diooni.

⁴ Ma hẽhẽnytaaku eleeti cugguung hẽlẽggĩ ꞌcĩg aarru hĩĩtõ nyekuꞌnya ꞌcĩg ĩthakꞌtheeku hẽlẽggĩ ũgĩ cĩg hẽẽtkujjieen hode hẽlẽggĩ cĩg lootu hode hẽlẽggĩ ꞌcĩg aattĩg bũlũccwaanĩtõõ.

⁵ Ma hakanneeku ĩhõõggõ huruꞌnyia hode alayyu ĩhõõggõ, hĩnĩngĩtĩ naa Makayyioohiti Nyekuci cunuung, hĩĩnĩ Nyekuc ꞌcĩ hõllõngaa haccamanoothihi, hatĩ abuluꞌthu nyekuꞌnya ũgĩ, occa huuki lõhõlĩ, hĩnĩngĩtĩ ꞌthẽccanẽẽt cĩg maajihi cĩggĩĩng, ĩꞌthõng lõhõlĩ cĩg lõhõlĩ cĩggĩĩng ꞌcĩg aaburreeka nganĩĩta.

⁶ Nẽẽthĩ, heterꞌtheehi hatĩ naa mĩnnan caannĩ lõhõlĩ cĩg lõhõlĩ cugguung, ꞌcĩg hatĩ nga arrittiaa irkiꞌnyia aalibꞌnya hĩ aalibꞌnya ꞌcĩg ammĩnannaa nganĩĩt nẽ ĩthĩhĩt tilooinit caannĩ.

⁷ Occa hõllõngaa urangannu ꞌthaar cĩg Makayyioohit Nyekuc cunuung, hĩnĩngĩtĩ hõllõngaa occa ũũnnĩk Makayyioohiti eet umwa ꞌcĩ uranganĩ ꞌthaar cĩgĩnnĩg haaga.

⁸ Ummuhuttooth Kõr cĩ ꞌYiommaanõ ngaatĩ aꞌthuunnu hĩĩ kõr ꞌcĩ aꞌngirannii.

⁹ Waathinnioohĩĩ ꞌcĩg ĩĩn tõrkõnõn, occa adticannu dtiicanĩ cugguung vẽlẽk,

¹⁰ nẽẽthĩ kõrra ꞌcĩ ĩĩn tũkĩramma, ĩĩn Kõr cĩ ꞌYiommaanõ, ꞌcĩ aaꞌnyĩhoothĩk Makayyioohit Nyekuc cunuung. Kõr niccia, occa hõllõngaa adticannu niig dtiic umwa ũdũt, hode lohollia cugguung ꞌcĩg maacĩg hĩ ꞌcĩg ngayyig hode appahacaaꞌnya cugguung ꞌcĩg maacĩg hĩ ꞌcĩg ngayyig, hode hẽlẽggĩ ꞌcĩg aballu, hode eeta cugguung ꞌcĩg ĩĩn mĩrõk ꞌcĩg ũrũmteeu hĩ ngagiita.

¹¹ Hĩnĩngĩtĩ waathinniooha ꞌcĩg ĩĩn tõrkõnõn ko, ĩĩn waathinniook baag ẽhẽnytaanĩ Makayyioohiti hẽẽtkujjieen hĩ looc hĩ bũlũccwa hĩ hẽlẽggĩ vẽlẽk ꞌcĩg aattiyyi ĩhõõggõ, nẽẽthĩ, baa iyyioman nẽẽ kõrraa ꞌcĩ ĩĩn tũrkĩramma. Nẽẽthĩ hoti ho, aggatan Makayyioohiti Kõr cĩ ꞌYiommaanõ nẽ aaꞌnyĩk hiꞌngiranĩ.

¹² Tingõlĩ maaꞌnyu hĩ ngaanu, hátĩ rũũg ĩꞌthõng looccaa ꞌcĩ aaꞌnyuung Makayyioohiti Nyekuci cunuung ko.

¹³ Ma haruhi.

¹⁴ Ma hattihi ngaa cĩ eet umwa.

¹⁵ Ma hĩgõrꞌthĩ.

¹⁶ Ma haddangaahi eet ꞌcĩ aaronnu.

¹⁷ Ma habũraneehi ꞌcieeth cĩ eet ꞌcĩ aaronnu. Ma habũraneehi ngaa cĩ eet ꞌcĩ aaronnu hode dticciannioohit cĩnnĩ ꞌcĩ maacĩ hode ꞌcĩ ngayyi hode olĩ cĩnnĩ hode thigir cĩnnĩ hode ꞌthẽk ꞌgiimwa cĩ eet ꞌcĩ aaronnu.”

¹⁸ Ma baa adtuuha eeta madĩĩth nẽ ĩthĩhĩt ꞌgerenyi cĩ tammwo nẽ ĩthĩhĩt tũũrĩ nẽ tarĩ udtuukta bũrrẽt muura hujjieen ko, iita abarritit nẽẽg tẽẽlꞌthĩta, nĩngĩtĩ abĩllaanĩ ꞌrẽẽna,

¹⁹ nẽ ĩĩttĩk Mũũꞌtha, “Má othoothĩkeet niina, occa hathĩkniina. Nẽẽthĩ, ma hẽlẽmaakĩ Nyekuc hothoothĩheet ngagĩĩta, hadaakna hinnia hatĩnĩ.”

²⁰ Ẽdẽcĩ Mũũꞌtha ĩhõõggõ anneek, “Hõlõ, ma hiteelinnu. Aku attĩmannuung ngagiit Nyekuci thõng, haau tẽẽlꞌthĩtĩ cĩ Nyekuci hĩ ngagiit, hátĩ ũtũngteek niig ꞌthẽccan.”

²¹ Baa abĩllaa eeta ꞌrẽẽna, baa nga aduhun Mũũꞌtha muguratõõ ꞌcĩ holittup ĩcĩ aayyi Nyekuci.

Nyekuꞌnya hĩ ꞌgoolliok ꞌcĩg ĩbbõõrĩ eeta ꞌgaarriẽẽn

²² Ma ho, ĩĩnnĩk Makayyioohiti Mũũꞌtha, “Duhaak eet cĩg Ĩꞌthĩraẽlĩ thõõth icci, ‘Icittu thĩ aattĩ ngaatĩ hõthõõthakuung naa ngagiit hẽẽtahujjieen.

²³ Ma hadĩmanaannu nyekuꞌnya ꞌcĩg ĩthakꞌtheekaangu nganĩĩta, ma hadĩmanaaku eleeti cugguung nyekuꞌnya ꞌcĩg ĩĩn maccĩrẽẽn hode nyekuꞌnya ꞌcĩg ĩĩn ꞌdaab.

²⁴ “ ‘Etehenyteehaangu nganĩĩt nĩngĩtĩ ĩbboorĩkaangu ꞌgaarrieenit dooba nẽ ĩbboorrihaangu ꞌgaarriẽẽn cugguung, ꞌgaarriẽẽn ꞌcĩg ĩwaaddu hĩĩ ꞌbaaninit nẽ ĩĩtõ ꞌgaarriẽẽn ꞌcĩg ĩĩn ꞌbaaninit cĩ ganõõnõ. Ĩbboorit aꞌtha hĩ ẽẽtha hĩ tĩĩn cugguung. Etehenyit nĩngĩtĩ ĩbboorini ꞌgaarrieeniti, hátĩ ma hidiima naa ꞌthaar cĩgannĩg hummukta eeta, halluuccia loota nẽ hikia haggatanuung ngagiita.

²⁵ Má ehenyteekaangu nganĩĩt nĩngĩtĩ ĩbboorĩkaangu ꞌgaarriẽẽn biyyiẽẽnĩ, ma hacciꞌthu biyyiẽẽn dtoongwẽẽtĩ, hĩnĩngĩtĩ ẽꞌthẽcannu hinnia hatĩ nĩngĩtĩ ꞌboorittõõ.

²⁶ Nẽẽthĩ, ma hehenyittu nĩngĩtĩ ĩbboorini ꞌgaarrieeniti caannĩ, haꞌnyak lõkĩrrĩhẽẽt ꞌcĩg õtõdĩ eeta. Ma ĩdĩmattu noho, horoong hatĩ acĩnoothi eet umwaa arriẽẽꞌthĩt cunuung ceremwaanĩtõõ cugguung hatĩ otoddu lõkĩrrĩhẽẽta.’ ”