Luugithõõ 2 - ꞌBuuk cĩ Thõõth cĩ Nyekuci

ꞌTirriaanĩt cĩ Mũũꞌtha

¹ Nẽẽthĩ ꞌyioko, baa aꞌthũwan eet umwaa cĩ hattũũg cĩ ꞌLeevi ngaa umwaa ꞌcĩ aku hattũũgaa cĩ ꞌLeevi diooni,

² nẽ ikia aꞌnyahõ ngaa tĩho, nĩngĩtĩ ũũkcanĩ loholeec ꞌcĩ maacĩ. Ma baa adtuuha nẽẽ ngaatĩ ẽllẽẽmmĩ loholeec ko, ikia utuguny ĩnõõnnõ nyĩlõhĩ iyyio.

³ Ma baa aꞌnyamanẽẽhĩ ĩnõõnnõ ngaatĩ agunyꞌthĩ loholeec, ikia ẽtẽhẽnya ꞌguuvva umwa ĩhaõõnnĩ nẽ idil doollianga. Ma ho, aarĩk loholeec ꞌguuvvawatõõ nĩĩcĩ nẽ aarĩk ĩhaõõnnĩtõõ dẽmẽtaa cĩ hidioo cĩ Naaĩlĩ.

⁴ Baa abĩllaa ngõõnĩ loholeeco ngadiiha, hátĩ hĩcĩn ꞌgii ꞌcĩ hatĩ adak loholeec.

⁵ Ma nĩngaata, ĩtĩnga tĩnaatĩ habu cĩ Ijjibi, ũũk ꞌraanitta hidiaatõõ cĩ Naaĩlĩ nẽ baa õvvõ dticcianniooha cĩgĩnnĩg anũ dẽmẽt cĩ hidiowwo. Ma ho, udtuuha tĩnaatĩ habuuo ho ꞌguuvva ĩhaõõnnĩtõõ, nĩngĩtĩ ĩꞌthõõĩ appahaca ꞌcĩ ngayyi hũũk haꞌnyaha.

⁶ Ma baa abbuuk tĩnaatĩ habuuo ꞌguuvva nicci ho, adtuuha hinnia loholeec ꞌcĩ maacĩ aaĩ ĩttõõ. Baa arruui loholeec gẽrrẽẽt, nĩngĩtĩ ammaannĩkĩ tĩnaatĩ habuuo ĩnõõnnõ. Ma ho, õthõõth ĩĩ, “Loholeec cĩ Ebereeitto cieeni.”

⁷ Nĩngĩtĩ ajini ngõõnĩ loholeeco tĩnaatĩ habuuo ho annẽẽkĩ, “Ĩcca occa hõkõ haꞌnyahaakii ngaa ꞌcĩ ĩĩn Ebereeinit hikia hitiroheehi ĩdõlĩ icci?”

⁸ Ẽdẽcĩ tĩnaatĩ habuuo anneek, “Eei bĩĩt nyahaahaanĩ,” nĩngĩtĩ õkõ aꞌnyahaanĩ bũhẽẽcĩ nicciee aattĩ ĩdolo dẽẽdẽ.

⁹ Ma nĩngaata, uduhaak tĩnaatĩ habuuo aattĩ loholeeco ĩĩnnĩk, “Bĩĩt tiroheehaa loholeec icci nẽ hatĩ hũdũmanii thõng.” Nĩngĩtĩ mĩĩ õkõ iroktĩ ngaa nicciee loholeec.

¹⁰ Ma baa ĩtĩlĩth loholeec ĩĩ maka, ũũhĩ ngaannia ĩnõõnnõ hĩ tĩnaatĩ habuuo, hũũk hĩĩ ngeerĩnĩ. Nĩngĩtĩ akannẽẽkĩ tĩnaatĩ habuuo loholeec ꞌthaar ꞌcĩg haĩ Mũũꞌtha nĩngĩtĩ aĩ, “Baa hõdõnga ĩnõõnnõ maamĩtõõ.”

Ukul Mũũꞌtha ũũk ĩĩcĩ Midianĩ

¹¹ Ma kõr umwa, baa ĩtĩlĩtha Mũũꞌtha ĩĩ maka, ũũk ĩcĩn nẽẽ eet cĩgĩnnĩg ngaatĩ baa aattiyyi nẽ udtuuha ĩhõõggõ ngaatĩ attĩnganõõthĩkĩ dtiici. Ma nĩngaata, udtuuha Ijjibeenit umwa ngaatĩ uuki Ebereeinit eet cĩnnĩ dẽẽdẽ.

¹² Ma ho, ubbuud Mũũꞌtha lõmẽrrẽẽt vẽlẽk, ma baa adtuuha aĩ lõõcĩ ꞌthĩĩ ho, ikia uruk eet ꞌcĩ ĩĩn Ijjibeenit ko hadaak nẽ idtibaneek hathaacatõõ.

¹³ Ma loohoth cĩnnĩ, ũũk ĩcĩn Mũũꞌtha eet cĩgĩnnĩg tarĩ, ammũdoothĩk hinnia aattĩ eet ũgĩ ꞌcĩg ĩĩn Ebereei ꞌramma aruhõõ ẽmmẽn. Ma nĩngaata, ijin nẽẽ Ebereeinit ꞌcĩ baa iꞌthianaanĩ jore ho nẽ ĩĩnnĩk, “Õhõda gõõng ꞌgoonu ꞌcĩ ĩĩn Ebereeinit hĩ nii dioo noho inni?”

¹⁴ Ẽdẽcĩ ẽẽtĩ nicciee anneek, “Nganĩ ꞌcĩ aaꞌnyi nganiit makaaꞌthĩt ꞌcĩ etteedĩkeet ngagĩĩt thõõth ko? Adiimi arukaa nganĩĩt buúk hĩ baa aruhi Ijjibeenit baa baalõ?” Nĩngĩtĩ itieelini Mũũꞌtha thõõth icci gẽrrẽẽt nẽ ummuk ĩĩ, “Ummuddia mõnõ thõõth baa hadĩmani naa thõng.”

¹⁵ Ma baa athĩhĩ habuui cĩ Ijjibi thõõth icci ho, idiim uruk nẽẽ Mũũꞌtha, nĩngĩtĩ avvirẽẽkĩ Mũũꞌtha habu cĩ Ijjibi nẽ ũũk aau looccaa cĩ Midianĩ, ngaatĩ baa õkõ iccioloonganĩ loota wetaneeca.

¹⁶ Nẽẽthĩ ꞌyioko, baa aꞌnyak paadĩrĩ umwaa cĩ Midianĩ buheeci tũkĩramma ꞌcĩg baag au õgõõc maam nẽ eellik hẽlẽggĩ cĩg maacõnĩ.

¹⁷ Baa hinnia au iiggia tuhayyiooha ũgẽẽgĩ ĩhõõggõ thõng, nĩngĩtĩ aku ẽẽlanĩ Mũũꞌtha ĩhõõggõ nẽ eelĩk hẽlẽggĩ cĩggĩĩng.

¹⁸ Ma baa oboddiõõthĩ buheeci cieegi, õõt ummuddioothĩk maaꞌnyĩ ꞌcĩ baa haĩ ꞌReuel ko, ma nĩngaata, ũũk ijin maaꞌnyia ĩhõõggõ ĩĩnnĩk, “Õbõdaannu aattĩ hatĩ kõr nicci hĩdĩĩkoothong inni?”

¹⁹ Ẽdẽcĩ nẽẽg aĩ, “Iyyia aku ẽẽlanneet Ijjibeeniti umwaa ngaatĩ alaamĩ tũhaayyiook nẽ tarĩ ẽẽlĩkeet hẽlẽggĩ buúk.”

²⁰ Nĩngĩtĩ ajini lõhõlĩ cĩgĩnnĩg ko annẽẽkĩ, “Aaĩ ꞌyioko ẽẽtĩ tĩho ĩĩna? Ũũnniku gõõng hatĩ eet inni? Õõt da utuvvuyyia hikia hadak ꞌgiimwa.”

²¹ Ma ho, ẽlẽm Mũũꞌtha ngaatĩ arũmẽẽnĩ hĩ ꞌReuel, nĩngĩtĩ attihaanĩ ꞌReuelĩ bũhaanyĩnĩ ꞌcĩ haĩ ꞌThippõra nẽ aaꞌnyĩk Mũũꞌtha hũꞌthũwan.

²² Ma ho, ũtũhũa ꞌThippõra loholeec ꞌcĩ maacĩ, nĩngĩtĩ akannẽẽkĩ Mũũꞌtha ngeerĩnĩ ꞌthaar ꞌcĩg kaĩ Gerthom, nẽ ĩĩ, “Hĩĩna tahanit looccaa cĩrrĩĩng.”

²³ Ma waathinnioohĩĩ nĩĩcag, ikia adaak habuui cĩ Ijjibi. Iita accanattĩ eeta cĩg Ĩꞌthĩraẽlĩ, hĩnĩngĩtĩ apahacaaꞌthĩt cĩnĩĩng nẽ urruuyyio, nĩngĩtĩ õdõlanĩ ulwaanĩ cĩnĩĩng ꞌcĩ adiimi eliinit ko Nyekuc hẽẽtahujjieen.

²⁴ Ma ho, ĩthĩk Nyekuci ulwa cĩnĩĩng nẽ ummuhunõõthĩ lõhõt baa adak nẽẽ hĩ Abũrahaamõ hĩ Iꞌthaako hĩ Yakobo.

²⁵ Nĩngĩtĩ ẽdẽẽnyanĩ Nyekuci eet cĩg Ĩꞌthĩraẽlĩ nẽ atamaatĩk ĩhõõggõ.