Luugithõõ 18 - ꞌBuuk cĩ Thõõth cĩ Nyekuci

Eheeronoothĩk ꞌJeꞌthoro Mũũꞌtha

¹ Nẽẽthĩ ꞌyioko, baa ĩthĩk ꞌJeꞌthoro paadĩrĩ cĩ looc cĩ Midianĩ, ꞌcĩ baa ĩĩn homoneec cĩ Mũũꞌtha, hẽlẽggĩ vẽlẽk ꞌcĩg baag adĩmaneek Nyekuci Mũũꞌtha, hĩ eet cĩg Ĩꞌthĩraẽlĩ hĩ ꞌgõõl ꞌcĩ baa aluuganĩ Makayyioohiti eet cĩg Ĩꞌthĩraẽlĩ looccaa cĩ Ijjibi.

² Ma baa urutaa ꞌcĩ ĩꞌthõõĩhĩ Mũũꞌtha ngaa cĩnnĩ ꞌThippõra ꞌgõõl hũũk, ikia ũũhĩ ꞌJeꞌthoro bũhaanyĩnĩ hĩ lõhõlĩ cĩg bũhaanyĩnĩ ꞌramma õlõõ cĩnnĩ.

³ Baa haĩ ngeertĩ Mũũꞌtha ꞌcĩ oou ꞌthaar Gerthom, hĩnĩngĩtĩ baa aĩ Mũũꞌtha, “Hikia hĩĩna tahanit looccaa ꞌcĩ ꞌrĩĩng.”

⁴ Nẽ hĩĩtõ ngeerĩnĩ umwa Eliether, hĩnĩngĩtĩ baa aĩ Mũũꞌtha, “Ĩĩn Nyekuci cĩ baaba ellioohit caannĩ, ẽẽlawaa nẽẽ nganĩĩt nyetubootaa ꞌcĩ adiim ẽꞌngẽdĩtta habuui cĩ Ijjibi.”

⁵ Ma ho, ookorria ꞌJeꞌthoro hõmõnẽẽcĩ cĩ Mũũꞌtha hĩ ngaa cĩ Mũũꞌtha lõhõlẽẽnĩ noho, hiita hĩcĩnĩt Mũũꞌtha horrwaa ꞌcĩ õdõhõhĩĩ kak, ngaatĩ baa ẽttẽẽdĩ Mũũꞌtha tuggẽẽt ngaatĩ õbõhõõ hĩ muur cĩ Nyekuci.

⁶ Nĩngĩtĩ ĩꞌthõõĩkĩ ꞌJeꞌthoro Mũũꞌtha nyeemuut annẽẽkĩ, “Nganĩĩt ꞌJeꞌthoro homoneec cunni ciee hõõkõraanna hĩ ngaa cunni hĩ buul cugunnig ꞌramma ho.”

⁷ Ma nĩngaata, ĩtĩnga Mũũꞌtha ũũk ithirriaamanõõthĩ homoneec cĩnnĩ, ma baa õmmõtõõ ho, iggiing nẽẽ õõ nĩngĩtĩ ĩꞌthaaĩ homoneec cĩnnĩ. Ĩꞌthaayyio noho nĩngĩtĩ adukni tuggatõõ.

⁸ Ma ho, uduhaak Mũũꞌtha homoneec cĩnnĩ ho thooꞌthiok vẽlẽk ꞌcĩg baag adĩmaneek Makayyioohiti habu cĩ Ijjibi hĩ eet cĩg Ijjibi, hĩnĩngĩtĩ eet cĩg Ĩꞌthĩraẽlĩ hĩ ꞌcannan vẽlẽk ꞌcĩ baa ammũda nẽẽg ꞌgõõla, hĩ ꞌgõõl ꞌcĩ baa ẽẽlanĩ Makayyioohiti ĩhõõggõ.

⁹ Baa accamanoothĩk ꞌJeꞌthoro gẽrrẽẽt ngaatĩ athĩknĩ thooꞌthiok vẽlẽk ꞌcĩg abũnnaa ꞌcĩg adĩmaneek Makayyioohiti eet cĩg Ĩꞌthĩraẽlĩ, ngaatĩ ẽẽlanĩ ĩhõõggõ athĩnĩĩ cĩg eet cĩg Ijjibi.

¹⁰ Baa nẽ õthõõth ꞌJeꞌthoro ĩĩ, “Aꞌnyĩĩk dĩhĩthẽẽnĩt haau hĩ Makayyioohit baa ẽẽlannii nganiit athĩnĩĩ cĩg eet cĩg Ijjibi, hĩ ĩcĩg habu cĩ Ijjibi nẽ ẽẽla eet cĩg Ĩꞌthĩraẽlĩ buúk athĩnĩĩ cĩg eet cĩg Ijjibi.

¹¹ Nẽẽthĩ ꞌyioko, hagawa aattĩ naa ngaatĩ ĩllõõanĩ Makayyioohiti nyekuꞌnya ũgĩ, hĩnĩngĩtĩ baa adĩmaneek nẽẽ thooꞌthiok iccig eet ꞌcĩg arratan eet cĩg Ĩꞌthĩraẽlĩ.”

¹² Ma nĩngaata, ittiha ꞌJeꞌthoro hõmõnẽẽcĩ cĩ Mũũꞌtha, ꞌbaaninit ꞌcĩ ĩwaaddi hĩ ꞌgaarriẽẽn ũgĩ nẽ aaꞌnyĩk Nyekuc, nĩngĩtĩ au aduhi Arõõnẽ hĩ makayyiook cĩg eet cĩg Ĩꞌthĩraẽlĩ, ũbũnẽẽt hõdẽĩ hĩ homoneec cĩ Mũũꞌtha hẽbẽrẽẽnnĩĩ cĩg Nyekuci.

¹³ Ma baa loohoth cĩnnĩ, ikia iccioloongan Mũũꞌtha dtaabawaa cĩnnĩ nẽ ẽttẽẽd lokihẽẽt cĩg eetuk, nĩngĩtĩ alũtõõthĩkĩ eeta ĩnõõnnõ ngaanĩngĩtĩ loohothu ĩꞌthõng hĩĩ ꞌjiaatĩn lõõcĩ.

¹⁴ Ma baa adtuuha hõmõnẽẽcĩ cĩnnĩ thõõth ꞌcĩ adĩmaneek Mũũꞌtha eet ko, ikia ĩĩ, “Ne ꞌcĩ adĩmaneehi nii eet ko? Etteedi gõõng thooꞌthiok cĩg eetuk nii dioo nẽ ibillieehi eeta cieeg vẽlẽk nganiit ngaanĩngĩtĩ oloohotha ĩꞌthõng hĩĩ ꞌjiaatĩn lõõcĩ hutuno?”

¹⁵ Ẽdẽcĩ Mũũꞌtha ĩnõõnnõ anneek, “Au ꞌthẽk eeta hĩ nganĩĩt, hĩnĩngĩtĩ adiim thõõth ꞌcĩ atab Nyekuci hidticanit nẽẽgĩ.

¹⁶ Hĩnĩngĩtĩ ma ẽggẽrꞌnyõõnĩ eeta thõõth umwa, aꞌnyakiaaka ꞌthẽk nganĩĩt nẽ hittiamana naa eet ꞌcĩg ẽggẽrꞌnyõõ ho nẽ huduhaaha ĩhõõggõ nyattalliook hĩ tilooinit cĩ Nyekuci.”

¹⁷ Ẽdẽcĩ hõmõnẽẽcĩ cĩ Mũũꞌtha aĩ, “Ẽlẽ, aitiõõ ꞌgii ꞌcĩ adĩmani nii ho hõllõngaa abũnnaa.

¹⁸ Appĩĩrnannu hatĩ niig hĩ eet iccig haaga. Maka nganiit dtiici ciee gẽrrẽẽt, occa ꞌthẽk hõllõngaa ũũlũ nii ẽmmẽn.

¹⁹ Thĩhaa thĩ da ꞌyioko nganĩĩt huduhaahii thõõth umwa ꞌcĩ abũnnaa nẽ aꞌnyĩĩk Nyekuc haau hĩ nganiita. Adiim ĩĩnĩ eet ꞌcĩ õthõõthĩ eet muumaa cĩ Nyekuci nẽ aꞌnyahaahu Nyekuc thooꞌthiok ꞌcĩg ẽggẽrꞌnyõõnĩ nẽẽgĩ.

²⁰ ꞌLimmaneek ĩhõõggõ nyattalliook cĩg Nyekuci nẽ eteretheehu ĩhõõggõ authet ꞌcĩ occa aattiyyi hĩ dtiicanĩ ꞌcĩg occa adĩman nẽẽgĩ.

²¹ Nẽẽthĩ, bẽra eet ꞌcĩg ũũlũ thooꞌthiok hõrggẽẽnaa cĩ eet vẽlẽk, eet ꞌcĩg iꞌngolli Nyekuc hĩ eet ꞌcĩg aduha thooꞌthiok ꞌcĩg ĩĩn dĩdĩ nẽ abũrĩ ĩgõr. Arĩĩk ĩhõõggõ hĩĩtõ makayyiook ꞌcĩg aggam eet aalibꞌnya, hĩ ꞌcĩg aggam eet ꞌmiia hõdẽĩ, hĩ ꞌcĩg aggam eet hẽẽn ꞌtur, hĩ ꞌcĩg aggam eet õmmõtõ.

²² Aꞌnyĩĩk ĩhõõggõ hidticattoothĩk eet hetteedito thooꞌthiok cĩg eetuk hõdõõkõthĩ, nẽẽthĩ, aꞌnyĩĩk haꞌnyaktaahi nganiit thooꞌthiok ꞌcĩg õkõmĩ, aꞌnyĩĩk ĩhõõggõ hetteedito thooꞌthiok ꞌcĩg ammũjĩ nyaagwaana. Aaꞌnyĩk hatĩ thõõth ciee dtiic cunni buúk hõõlõl, hĩnĩngĩtĩ otholeeki hatĩ nẽẽg nganiit dtiic.

²³ Má anũ nii tilooinit icci nẽ má aduhaaki Nyekuci nganiit dĩman noho, emmeethi thĩ hatĩ thooꞌthiok ꞌcĩg ommogeeki eeta ho nẽ hatĩ õõt eeta cieeg vẽlẽk õlõ lõꞌngõõc.”

²⁴ Nĩngĩtĩ athĩknĩ Mũũꞌtha thooꞌthiok cĩg homoneec cĩnnĩ ho nẽ ĩdĩman hẽlẽggĩ vẽlẽk ꞌcĩg aduhaak hõmõnẽẽcĩ cĩnnĩ ĩnõõnnõ ho.

²⁵ Ma ho, ẽbẽra nẽẽ eet ꞌcĩg ũũlũ thooꞌthiok eetinii cĩg Ĩꞌthĩraẽlĩ vẽlẽk nẽ aarĩk ĩhõõggõ hĩĩtõ makayyiook cĩg eetuk, makayyiook cĩg eet aalib hõdẽĩ, hĩ cĩg eet ꞌmiia hõdẽĩ hĩ cĩg eet hẽẽn ꞌtur hĩ cĩg eet õmmõtõ.

²⁶ Baa ĩĩn nẽẽg makayyiook ꞌcĩg ẽttẽẽd thooꞌthiok cĩg eetuk hõdõõkõthĩ. Nẽ thooꞌthioha ꞌcĩg õkõmĩ, aꞌnyahaak nẽẽg Mũũꞌtha, nẽẽthĩ, etteedito nẽẽg thooꞌthiok ꞌcĩg ammũjĩ nyaagwaana.

²⁷ Ma nĩngaata, ittioonĩk Mũũꞌtha homoneec cĩnnĩ ho ꞌgõõl hũũk, nĩngĩtĩ õbõdõõꞌthĩ ꞌJeꞌthoro ĩĩcĩ looc cĩnnĩ.