Luugithõõ 16 - ꞌBuuk cĩ Thõõth cĩ Nyekuci

Ĩꞌthõõa Makayyioohiti ꞌgẽẽn hẽẽtahujjieen

¹ Baa ikia ũllũnganĩ lothippiti cĩ eet cĩg Ĩꞌthĩraẽlĩ vẽlẽk ũtũngeek looc cĩ Elimi nẽ ũũk ĩĩcĩ horu ꞌcĩ õdõhõhĩĩ kak, ꞌcĩ haĩ ꞌThĩn ꞌcĩ aaĩ hõrggẽẽnaa cĩ Elimi hĩ ꞌThĩnaĩ, baa kõr ꞌcĩ ĩĩn õmmõtõ hĩ ꞌtur nyĩlõk cĩ ꞌramma urutaa ꞌcĩ ũũnnĩkĩ nẽẽg Ijjib.

² Ma horrwatõõ ꞌcĩ õdõhõhĩĩ kak ko, ikia ongoongoeek lothippiti hũtũrũũr Mũũꞌtha hĩ Arõõnẽ.

³ Baa anneek eeta cĩg Ĩꞌthĩraẽlĩ ĩhõõggõ, “Occa nuun baa hadaakta athĩnĩĩ cĩg Makayyiooktak Ijjiba! Baa haattiyyia naag ĩĩca, baa hirriamaneeka ijjioꞌnya ꞌcĩg aahini idingi nẽ hadakta ꞌgii vẽlẽk hĩcĩ hadiimma naaga, nẽẽthĩ ꞌyioko, aꞌnyaktaaeetu niig ngagĩĩt horrwatõõ ꞌcĩ õdõhõhĩĩ kak ko, hikia hũcũda lothippit icci vẽlẽk magĩthĩ hĩĩ ꞌthĩĩ!”

⁴ Ma ho, ĩĩnnĩk Makayyioohiti Mũũꞌtha, “Hĩꞌthõõakuung hatĩ naa ngagiit ũbũnẽẽt hẽẽtahujjieen haau hĩ tammu. Kõr hõdẽẽthõng, adiim eet hõõt huluttia ꞌgẽẽn ꞌcĩ ũũppan waathĩn tĩho diooni. ꞌGõõl ꞌcĩ hatĩ hattĩmanĩĩ naa ĩhõõggõ, hĩcĩn hatĩ anũ nẽẽg thõõth caannĩ cieeni.

⁵ Nẽẽthĩ kõr ꞌcĩ ĩĩn tõrkõnõn, adiim huluttia nẽẽg ꞌgẽẽn ꞌcĩ maka ꞌcĩ aduk waathinniook ꞌramma.”

⁶ Nĩngĩtĩ annẽẽkĩ Mũũꞌtha hĩ Arõõnẽ eet cĩg Ĩꞌthĩraẽlĩ, “Ma utub lõõcĩ, agayyu thĩ hatĩ niig iittu, ĩko baa Makayyioohit ꞌcĩ aluugannuung ngagiit Ijjiba ho,

⁷ nẽ ngerrenita, acinnu hatĩ niig bulẽẽnĩt cĩ Makayyiookto, hĩnĩngĩtĩ ĩthĩk nẽẽ ngoongoi ꞌcĩ ongoongoeeku niig ĩnõõnnõ. Ngagĩĩt ꞌyioko ꞌthẽk hĩ nganĩ ꞌcĩg occa ongoongoeekeetu niig ko?”

⁸ Nẽ tarĩ ĩĩ Mũũꞌtha, “Agayyu hatĩ niig ĩko baa ꞌthẽk Makayyioohit dĩdĩ ꞌcĩ aaꞌnyuung ngagiit iding ꞌcĩ adaku ꞌjiaat hĩ ũbũnẽẽt vẽlẽk ꞌcĩg adiimmu niig ngerrenita, hĩnĩngĩtĩ ĩthĩk nẽẽ ngoongoi ꞌcĩ ongoongoeeku niig ĩnõõnnõ ho. Ngagĩĩt ꞌyioko ꞌthẽk hĩ nganĩ? Hõllõngaa ongoongoeekeetu niig ngagĩĩta, nẽẽthĩ hinnia, ongoongoeeku niig Makayyioohit.”

⁹ Nĩngĩtĩ annẽẽkĩ Mũũꞌtha Arõõnẽ, “Duhaak lothippit cĩ eet cĩg Ĩꞌthĩraẽlĩ vẽlẽk anneek, ‘Iita muumaa cĩ Makayyiookto, hĩnĩngĩtĩ ĩthĩk nẽẽ ngoongoi cunuung.’ ”

¹⁰ Ma baa nga othoothĩk Arõõnẽ lothippit cĩ eet cĩg Ĩꞌthĩraẽlĩ, ẽbẽktõõthĩ eeta looc ĩĩcĩ horu ꞌcĩ õdõhõhĩĩ kak ko, nĩngĩtĩ adtuuhanĩ bulẽẽnĩt cĩ Makayyiookto ngaatĩ uppwaannanĩ loduruatõõ.

¹¹ Ma ho, ĩĩnnĩk Makayyioohiti Mũũꞌtha,

¹² “Hĩthĩha naa ngoongoi cĩ eet cĩg Ĩꞌthĩraẽlĩ. Nẽẽthĩ ꞌyioko, duhaak ĩhõõggõ anneek, ‘Adaku hatĩ iding ꞌjiaat nẽ ngerrenita, ammũdaannu hatĩ ũbũnẽẽt vẽlẽk ꞌcĩg adiimmu niiga. Nẽẽthĩ hatĩ iita agayyu niig ngaatĩ hĩĩnnĩ naa Makayyioohit Nyekuc cunuung dĩdĩ.’ ”

¹³ Ma ꞌjiaatĩn niccia, iita ĩbbĩtĩt allurẽẽta lokor ꞌcĩ aarĩkĩ nẽẽg tuggẽẽt ko vẽlẽk nẽ ngerrenita, iita ũmmũlũũnyanit thĩĩthĩ nĩngĩtĩ aattiyyi nẽẽg ko battaala vẽlẽk.

¹⁴ Ma baa utururri thĩĩthĩ, ikia ũmmũlũũnyan ꞌgii umwaa ꞌcĩ õõppẽr ꞌcĩ ẽrẽẽrĩ looc cĩ horu ꞌcĩ õdõhõhĩĩ kak ko.

¹⁵ Ma baa ma adtuuha eeta cĩg Ĩꞌthĩraẽlĩ ho, othoothito nyaagwaana ĩĩtõ, “Ne occa gõõng nicciee?” Hĩnĩngĩtĩ baa hõllõngaa aga nẽẽg ꞌgii tĩho. Ma ho, ĩĩnnĩk Mũũꞌtha ĩhõõggõ, “Ĩĩn cieeg ũbũnẽẽt ꞌcĩg aaꞌnyuung Makayyioohiti ngagiit uduhit.

¹⁶ Thõõth ꞌcĩ aduha Makayyioohiti cieeni. Adiim eet hõdẽĩ hõdẽĩ huluttia ꞌgẽẽn hĩĩ maka hĩcĩ adiim nẽẽgĩ. Uluttia lokirriaac hõdẽĩ ꞌcĩ ũũppan eet hõdẽĩ halangatõõ hõdẽẽthõng.”

¹⁷ Nĩngĩtĩ adĩmanĩ eeta cĩg Ĩꞌthĩraẽlĩ hĩcĩ adukiaak ĩhõõggõ ho, baa alũta ũgẽẽgĩ ꞌcĩg mẽẽlĩg hĩllõõanit nẽ uluttia ũgẽẽgĩ ꞌcĩg abadtẽc haaga.

¹⁸ Nẽẽthĩ, ma baa appiiman nẽẽg ꞌgẽẽn tĩho lokirriaaca ho, ẽẽtĩ ꞌcĩ aꞌnyak hẽlẽggĩ ꞌcĩg mẽẽlĩg, hõllõngaa aꞌnyak ꞌcĩg mẽẽlĩg gẽrrẽẽt nẽ ẽẽtĩ ꞌcĩ aꞌnyak hẽlẽggĩ ꞌcĩg hidicig, hõllõngaa aꞌnyak hẽlẽggĩ ꞌcĩg hidicig gẽrrẽẽt. Baa alũta eeta hõdẽĩ hõdẽĩ ꞌgẽẽn hĩcĩ adiim nẽẽgĩ.

¹⁹ Ma ho, uduhaak Mũũꞌtha ĩhõõggõ ĩĩnnĩk, “Ma eet umwaa hanyiꞌthia umwa hĩĩ mohoyyio.”

²⁰ Ĩko nẽẽ aitiõõ eeta ũgẽẽgĩ hõllõngaa athĩhĩ thõõth ꞌcĩ aduha Mũũꞌtha ho, anyiꞌthia hinnia ũgĩ hĩĩ mohoyyiẽẽta. Ma baa ngerrenita, ummuddieek uggub nẽ aꞌnyak huluta. Nĩngĩtĩ alĩĩllĩkĩ Mũũꞌtha ĩhõõggõ gẽrrẽẽt ũdũt.

²¹ Baa alũta eeta ꞌgẽẽn ꞌcĩ ũũppan ĩhõõggõ hõdõõkõthĩ ngerrenita nẽ ma baa aabur kõrra, ikia õbõõĩ ĩĩ maam.

²² Ma lõõcĩ tõrkõnõn, iita uluttia nẽẽg ꞌgẽẽn ꞌcĩ ũũppan lokirriaaꞌnya ꞌramma ꞌcĩ ũũppan eet hõdẽẽthõng, nĩngĩtĩ au aduhaakĩ makayyiooha cĩg lothippitaak Mũũꞌtha.

²³ Ma ho, uduhaak Mũũꞌtha ĩhõõggõ ĩĩnnĩk, “Thõõth ꞌcĩ aduha Makayyioohiti ciee aĩ, ‘Ĩĩn lõõcĩ lohotha Kõr cĩ ꞌYiommaanõ, Kõr ꞌcĩ aꞌngirannii ꞌcĩ ẽllẽẽmĩth cĩ Makayyiookto. Ĩwaadit ũbũnĩ ꞌcĩ adiim ĩwaaddu nẽ aaktu ꞌgii ꞌcĩ adiim aaku kõr icci nẽ itiangiꞌthu ꞌgẽẽn ꞌcĩ anyiꞌthiaa hĩĩ cĩ lohotha.’ ”

²⁴ Nĩngĩtĩ itiangꞌthĩ eeta ꞌgẽẽn hĩĩ cĩ lohotha, hĩcĩ aduha Mũũꞌtha ho nẽ baa hõllõngaa aggub buúk hode nẽẽ aꞌnyak hulutaac hõdẽẽthõng haaga.

²⁵ Ma ho, uduhaak Mũũꞌtha ĩhõõggõ ĩĩnnĩk, “Uduhit ꞌgẽẽn nicci kõr nicci edecciaak, hĩnĩngĩtĩ ĩĩn kõrra cĩ iyyieni ho, Kõr cĩ iyyiomanĩ Makayyioohiti. Aitiõõ aattĩ kõr icci hõllõngaa ammũdaannu ꞌgẽẽn umwa loota.

²⁶ Uluttia hatĩ gõõng ꞌgẽẽn waathinnioohĩĩ ꞌcĩg ĩĩn tõrkõnõn, nẽẽthĩ kõr ꞌcĩ ĩĩn tũkĩramma, Kõrraa cĩ ꞌYiommaanõ, hiꞌthihi hatĩ ꞌgẽẽn umwa ũdũt.”

²⁷ Baa adĩĩtĩ eeta ũgẽẽgĩ adiim õõ alũta ꞌgẽẽn baa kõr ꞌcĩ ĩĩn tũkĩramma ho noho, õõ hinnia ammũdoothĩk hiꞌthihi ꞌgiimwa.

²⁸ Nĩngĩtĩ aduhaakĩ Makayyioohiti Mũũꞌtha annẽẽkĩ, “Aburru niig ngaatĩ anuyyu tilooinit hĩ thõõth caannĩ ĩꞌthõng ningina?

²⁹ Ummuhuttooth nõõ ngaatĩ aaꞌnyuung Makayyioohiti Kõr cĩ ꞌYiommaanõ, ĩnõõ ꞌcĩ aaꞌnyuung nẽẽ ngagiit ũbũnẽẽt ꞌcĩg ũũppan waathinniook ꞌramma lõõcĩ tõrkõnõn ko. Adiim aattĩg eeta vẽlẽk ngaatĩ aattiyyi kõrraa ꞌcĩ ĩĩn tũkĩramma, aitiõõ ẽẽtĩ ꞌcĩ occa õkõ ĩĩmwaanĩ tõõ.”

³⁰ Nĩngĩtĩ iyyiomanĩ eeta kõrraa ꞌcĩ ĩĩn tũkĩramma.

³¹ Baa avvĩ eeta cĩg Ĩꞌthĩraẽlĩ ũbũnĩ anneek manna. Baa õõrĩg ũbũnẽẽta tĩko aattĩg hĩ locceeri nẽ ĩĩtõ ꞌlĩĩ ꞌlĩĩ hĩ ꞌgii ꞌcĩ õꞌngõõtanoothĩk lõtẽẽcĩ.

³² Ma ho, ĩĩ Mũũꞌtha, “Thõõth ꞌcĩ aduha Makayyioohiti cieeni, ‘Uluttia manna ꞌcĩ ũũppan lokirriaac nẽ itiangiꞌthu hĩĩ cĩ lõhõlĩ ꞌcĩg arrittiaa horumwa irkiꞌnyiaannĩ, hátĩ hĩcĩnĩt lohollia ũbũnẽẽt ꞌcĩg haaꞌnyuung naa ngagiit uduhit horrwaa ꞌcĩ õdõhõhĩĩ kak, baa hõõgannuung ngagiit Ijjiba.’ ”

³³ Nĩngĩtĩ aduhaakĩ Mũũꞌtha Arõõnẽ annẽẽkĩ, “ꞌTiha manna umwa nẽ aarihuu lohilihiliiatõõ. Arĩĩk muumaa cĩ Makayyiookto hitiangĩthĩ hĩĩ cĩ lõhõlĩ ꞌcĩg nga au irkiꞌnyiaannĩ.”

³⁴ Hĩ baa aduhaak Makayyioohiti Mũũꞌtha, ikia ittiha Arõõnẽ manna nẽ aarĩk Cadduhatõõ cĩ Lohoto, hátĩ hitiangĩthĩ nĩngaata.

³⁵ Baa aduk eeta cĩg Ĩꞌthĩraẽlĩ manna irkiꞌnyia hẽẽn ꞌwec ĩꞌthõng hõdõlanit looc ꞌcĩ õõ õlõman nẽẽg ko, aduk nẽẽg manna ĩꞌthõng hiita hõdõlanit lõkõõrĩ cĩ looc cĩ Kanaanĩ.

³⁶ Ma aluttiaa manna ꞌcĩ ũũppan lokirriaaꞌnya õmmõtõ, ĩĩn ꞌthũbba hõdẽĩ. (Avvĩ eeta ꞌgii ꞌcĩ occa abbĩꞌthĩĩ lokirriaac anneek omer nẽ ũtũvvẽẽcõ ꞌcĩ occa abbĩꞌthĩĩ ꞌthũbba, ĩĩttĩk ẽvva.)