Luugithõõ 15 - ꞌBuuk cĩ Thõõth cĩ Nyekuci

Tẽgẽl cĩ Mũũꞌtha hĩ cĩ Miriamĩ

¹ Nĩngĩtĩ ẽbẽnẽẽkĩ Mũũꞌtha hĩ eet cĩg Ĩꞌthĩraẽlĩ Makayyioohit tẽgẽl icci, “Hebenoothihi naa Makayyioohit, hĩnĩngĩtĩ bulẽẽnĩt cĩnnĩ cobbi! Udhuheek Makayyioohiti nyangõõllẽẽ hĩ ꞌthukannioohit cĩnnĩ bũlũcatõõ.

² Ĩĩn Makayyioohiti ꞌtirrian caannĩ hĩ tẽgẽl caannĩ; ikia ĩĩ nẽẽ ellioohit caannĩ. Ĩĩn nẽẽ Nyekuc caannĩ, nẽ hadihithi hatĩ naa ĩnõõnnõ, Nyekuc cĩ nyakangaan caannĩ, habuluthi hatĩ naa ĩnõõnnõ.

³ Ĩĩn Makayyioohiti toromeec; haĩ ꞌthaar cĩgĩnnĩg Makayyioohit.

⁴ Udhuheek nẽẽ ꞌgadiggadiꞌnya hĩ athegereeꞌnya ꞌcĩg avvir nyangõõllẽẽꞌnyanĩ bũlũcatõõ. Utududdi ꞌgaala cĩg ũũrũta cĩg habuuak, ꞌcĩg attiran vẽlẽk Bũlũcatõõ ꞌcĩ Marihi.

⁵ Ũmmũlũũnyan bũlũc ꞌcĩ uuthik ĩhõõggõ, udhuktoothĩk nẽẽg maamĩtõõ hĩ biyyiẽẽna.

⁶ Aꞌnyamanni aꞌthiiti cunni cobbi ꞌtirriaana Makayyioohit. Ĩꞌthaan aꞌthiiti cunni cobbi mĩrõk Makayyioohit.

⁷ Makaaꞌthĩtaa cĩ ꞌtirrian cunni, ĩllõõanuu nii eet ꞌcĩg aburri nganiita. Ĩggĩĩra nii ĩhõõggõ lĩĩlĩẽẽtta cunni, hĩ urutẽẽna cĩg tabarraannu.

⁸ Baa audahi nii lĩĩlĩẽẽtta ĩꞌthõng hathaddi maama hĩbĩlĩt ꞌjieena haauto hĩ dilata; iita okomit maama ꞌcĩg uuthik hõrggẽẽnaa cĩ bũlũcõ.

⁹ Baa irrian mirohiti aĩ, ‘Hiiggia hatĩ ĩhõõggõ ĩꞌthõng hõdõlanõ. Heꞌngeri hatĩ naa ijjio cĩggĩĩng; nẽ hũcũda ĩhõõggõ hĩĩ ꞌthĩĩ. Havvũũca hatĩ nyetuboot caannĩ nẽ hũcũda ĩhõõggõ.’

¹⁰ Nẽẽthĩ, baa abbeehi nii ĩhõõggõ ꞌlaũk cugunnig, nẽ ũmmũlũũnyan bũlũc ĩhõõggõ. Udhuktoothĩk nẽẽg bũlũcatõõ cobbi hĩ ꞌthĩĩha ꞌcĩg adĩddĩngĩĩ.

¹¹ Nganĩ umwaa nyekuꞌnyaannĩ, ꞌcĩ occa aduhoonnu hĩ nganiit Makayyioohit? Nganĩ ꞌcĩ aaĩ hĩ nii, attirani nii bulẽẽtta hĩ ꞌlẽẽmĩtha, ĩllõõani nii bulẽẽtta nẽ ĩdĩmanuu thooꞌthiok ꞌcĩg ĩnaat eeta.

¹² Baa odongi nii aꞌthiit cunni cobbi, nĩngĩtĩ akuui lõõcĩ ĩhõõggõ hĩĩ ꞌthĩĩ.

¹³ Mĩnnaniitta cunni ĩĩcĩ hõllõngaa edecciaa, aggami hatĩ nii eet baag ẽẽla niina. ꞌTirriaanaa cunni, atiꞌthiti hatĩ nii ĩhõõggõ ĩꞌthõng hõdõlanit nĩngĩtĩ ẽllẽẽmĩth ꞌcĩ aayyi niina.

¹⁴ Athĩhĩ hatĩ eeta loonyini nẽ abarritita; ahayũnganni hatĩ eeta cĩg Viliꞌthia gẽrrẽẽt.

¹⁵ Aꞌngalĩlĩ hatĩ habuẽẽta cĩg Edomĩ gẽrrẽẽt, aggam hatĩ habuẽẽt cĩg Mõabĩ barriti gẽrrẽẽt; obooyyi hatĩ eet cĩg Kanaanĩ ꞌthinneeti.

¹⁶ Adhukiaak hatĩ ĩhõõggõ barriti cobbiẽẽnĩ. ꞌTirriaanaa cĩ aꞌthiit cunni, emmeethĩk hatĩ nẽẽg hĩ bẽẽ, ĩꞌthõng hallacattĩ eeta cugunnẽẽgĩ Makayyioohit, ĩꞌthõng hallacattĩ eeta baag ũũta niina.

¹⁷ Aaꞌnyihi hatĩ nii eet cugunnig hõlõmanit muuraa ꞌcĩ aayyi niina, ngaatĩ ẽhẽnytĩ nii õlõ cunni Makayyioohit, nĩngĩtĩ aayyi niina, baa ẽhẽnyta nii athĩnĩĩ cugunnig.

¹⁸ Aggam hatĩ Makayyioohiti looc irkiꞌnyia hĩ irkiꞌnyia.”

¹⁹ Ma baa õõt nyangõõllẽẽꞌnya cĩg habu cĩ Ijjibi hĩ athegereeꞌnya ꞌcĩg aꞌthuhan nyangõõllẽẽꞌnya ꞌcĩg agurut ꞌgadiggadiꞌnya, hĩ eet ꞌcĩg aꞌthuhan nyangõõllẽẽꞌnya ĩĩcĩ bũlũcõ, ikia õbõdaaĩ Makayyioohiti maam cĩg bũlũcaak hũmmũlũũnyanit ĩhõõggõ, nẽẽthĩ, baa õvvõ eeta cĩg Ĩꞌthĩraẽlĩ ꞌgõõlaa ꞌcĩ õdõhõhĩĩ bũlũcatõõ.

²⁰ Nĩngĩtĩ attihaanĩ ngaa umwaa ꞌcĩ haĩ Miriam ꞌcĩ baa ĩĩn põrõvẽtaac, cũhũrrẽẽn nẽ ũũhĩ ngaaĩ ũgĩ hõõt hũrũgũmĩt. Baa ĩĩn Miriamĩ ngõõnĩ Arõõnẽ.

²¹ Ma nĩngaata, ebeneek Miriamĩ ĩhõõggõ tẽgẽl ꞌcĩ aĩ, “Ebetteek Makayyioohit tẽgẽl, hĩnĩngĩtĩ aꞌnyaman nẽẽ mĩrõk cĩgĩnnĩg. Amarkiihik nẽẽ nyangõõllẽẽ hĩ ꞌthukannioohit cĩnnĩ bũlũcatõõ.”

Maam ꞌcĩg ahahatĩĩ ngaatĩ haĩ Maara

²² Ma ho, ĩtĩngaaĩ Mũũꞌtha eet cĩg Ĩꞌthĩraẽlĩ Bũlũcatõõ ꞌcĩ Marihi ũũhĩ horrwaa ꞌcĩ õdõhõhĩĩ kak ĩĩcĩ haĩ ꞌThur. Baa õvvõ nẽẽg waathinniook iyyio horrwaa ꞌcĩ õdõhõhĩĩ kak hiꞌthihi maam.

²³ Ma baa iita õdõlanit nẽẽg nĩngĩtĩ haĩ Maara, baa hõllõngaa occa ahũd nẽẽg maam cĩgĩnnĩg, hĩnĩngĩtĩ baa ahahatĩĩ maama dtum. Ĩnõõ ꞌcĩ akannẽẽkĩ eeta nĩngĩtĩho annẽẽkĩ Maara ho.

²⁴ Ma nĩngaata, iita ongoongoyyieek eeta cĩg Ĩꞌthĩraẽlĩ Mũũꞌtha nẽ ijinit ĩĩttĩk, “Ẽlẽ, hahũdda ꞌyioko hatĩ ne?”

²⁵ Ma nĩngaata, ĩĩlaleek Mũũꞌtha Makayyioohit hẽẽl ĩnõõnnõ, nĩngĩtĩ ẽtẽrꞌthẽẽkĩ Makayyioohiti ĩnõõnnõ hẽẽt umwa ꞌcĩ dĩppĩlĩ. Ma ho, udhuheek Mũũꞌtha hẽẽt tĩho maamĩtõõ, nĩngĩtĩ au abũnnayyĩ maama. Ma nĩngaata, aaꞌnyĩk Makayyioohiti ĩhõõggõ nyattal ꞌcĩ attĩmanĩ ĩhõõggõ hatĩ aꞌnyak lemiinit hĩ ĩnõõnnõ ngaatĩ haĩ Maara ho.

²⁶ Nẽ ĩĩnnĩk Nyekuci ĩhõõggõ, “Má athiknu niig molook cĩ Makayyioohit Nyekuc cunuung jurrung nẽ ĩdĩmattu thõõth ꞌcĩ ĩĩn dĩdĩ hẽbẽrẽẽnnĩĩ cĩgĩnnĩg nẽ má anuyyu niig tilooinit cĩnnĩ nẽ uꞌthuuttu nyattalliook cĩgĩnnĩg, hõllõngaa hatĩ haꞌnyahaakuung mooriꞌthiook baag haꞌnyahaahi naa eet cĩg Ijjibi, hĩnĩngĩtĩ hĩĩnĩ naa Makayyioohit ꞌcĩ haaꞌnyuung ngagiit ũbũttaath.”

²⁷ Ma ho, iita õdõlanit nẽẽg nĩngĩtĩ haĩ Elim, ngaatĩ baa aꞌnyak ũꞌngĩ cĩg hidiowwaak õmmõtõ hĩ ꞌramma hĩ mĩlĩlla hẽẽn tũkĩramma, nĩngĩtĩ aarĩkĩ tuggẽẽt nĩngaata ngaatĩ obohiini maama.