Luugithõõ 12 - ꞌBuuk cĩ Thõõth cĩ Nyekuci

Kõr cĩ Haangittõõ

¹ Baa aduhaak Makayyioohiti Mũũꞌtha hĩ Arõõnẽ Ijjiba anneek,

² “Ĩĩn nyĩlõhĩ ciee hĩ ngagiit nyĩlõk ꞌcĩ oou cĩ irkit cunuung.

³ Duhaak lothippit cĩ Ĩꞌthĩraẽlĩ vẽlẽk anneek, kõrraa ꞌcĩ ĩĩn õmmõtõ nyĩlõhaa cĩ, aꞌnyĩĩk eet hõdẽĩ hõdẽĩ haꞌnyakta mĩꞌnyõ cĩg aꞌthaannu hode cĩg ẽẽthak halaꞌngiõõhĩĩ cĩggĩĩng hadahit.

⁴ Má hĩdĩcĩg eeta ũgẽẽgĩ halaangatõõ cĩnĩĩng ngaatĩ occa adahĩ mĩꞌnyõõn hedecciaak, aꞌnyĩĩk hotholit hĩ ꞌgõõnõgĩ ꞌcĩg aarõõ ꞌcieethi. Abũnnaa ittiamannu mĩꞌnyõõn ꞌcĩ occa ũũppan eet hatĩ adahĩ.

⁵ Nẽẽthĩ, hẽlẽggĩ ꞌcĩg ẽbẽraannu niig ko, adiim ĩĩn ꞌcĩg maacĩg ꞌcĩg aꞌnyak irkit hõdẽĩ nẽ abũnnaa eleeti, nẽẽthĩ, eberria ĩhõõggõ aꞌthaannĩtõõ hode ẽẽthatõõ.

⁶ Uꞌthuutti ĩhõõggõ ĩꞌthõng hõdõlan kõr ꞌcĩ ĩĩn õmmõtõ hĩ ꞌwec nyĩlõõha, kõr ꞌcĩ hatĩ acuhanĩ eeta cĩg Ĩꞌthĩraẽlĩ ĩhõõggõ hatĩ ĩĩ lõõcĩ garrii garrii niccia.

⁷ Aꞌnyĩĩk hitikta biyyi hurrwacanit ngadihẽẽt hĩ hattũũgẽt lokoraa cĩg ꞌcieethi ꞌcĩg adahĩ nẽẽg mĩꞌnyõ ho.

⁸ Baalin niccia noho dioo, aꞌnyĩĩk hurumatteek iding ꞌcĩ ĩwaaddi thõng hĩ hẽẽn ꞌcĩg ahahatĩĩ hõdẽĩ hĩ ũbũnẽẽt ꞌcĩg aitiõõ abũũlana tõõ.

⁹ Ma hadaku iding cũlahaak hode haaku thõng, nẽẽthĩ, ĩwaadit iding thõng, õõ hĩ ꞌthoo hĩ hẽẽngtõõ vẽlẽk.

¹⁰ Ma hanyiꞌthaannu umwa hĩĩ ngaalloohoth, má inyigiꞌthiaa umwaanĩ, ĩwaadit huturum hĩĩ dtĩng.

¹¹ ꞌGõõl ꞌcĩ occa adaku niig iding cieeni. Ũbũrattĩ jurrung nẽ ũkũmattoothihu õõtõ, itihimit caawa, aꞌnyahit hĩbahĩꞌnya cĩg tohomiittak. Adahit iding warawara, hĩnĩngĩtĩ ĩĩn Kõr cĩ Haangittõõ cĩ Makayyiookto.

¹² “Baalin niccia noho, hõvvõ hatĩ naa Ijjiba nẽ huruha lõhõlĩ ꞌcĩg maacĩg ꞌcĩg arrittiaa ĩĩcĩ oou, hĩ idiꞌngwa ꞌcĩg arrittiaa ĩĩcĩ oou vẽlẽk nẽ hatĩ huuka hẽlẽggĩ ꞌcĩg aar eeta hĩĩ nyekuꞌnya Ijjiba vẽlẽk. Hĩĩnĩ naa Makayyioohit.

¹³ Ĩĩn hatĩ biyyieetta cieeg terethiinit cĩ ꞌcieethi ꞌcĩg aattiyyu niiga nẽ má hĩcĩna naa biyyi, hahaaꞌnguung hatĩ naa ngagiita. Aitiõõ hatĩ ꞌthẽrẽt ꞌcĩ adakuung ngagiit tõõ hatĩ huuka naa Ijjib.

¹⁴ “Ĩĩn ciee kõr ꞌcĩ hatĩ gõõng ammuhaannu niiga. Adahit hatĩ gõõng karrama cĩ kõr icci hĩĩ cĩ Makayyiookto irkiꞌnyiaannĩ vẽlẽk, ĩꞌthõng hõdõlanit lohollia ꞌcĩg hatĩ nga au horumwa buúk.

¹⁵ Uduhit ũbũnẽẽt ꞌcĩg aitiõõ abũũlana tõõ waathinniook tũkĩramma. Kõrraa ꞌcĩ oou, udduutit abũũla ꞌcĩg aattĩg ꞌcieethinii cugguung, hĩnĩngĩtĩ ẽẽtĩ ꞌcĩ adak ꞌgẽẽn ꞌcĩ aarĩhoothĩk abũũlana kõrraa ꞌcĩ oou ĩꞌthõng hõdõlan kõr ꞌcĩ ĩĩn tũkĩramma, iggiaoothĩk hatĩ nẽẽ tuu lothippitaa cĩ eet cĩg Ĩꞌthĩraẽlĩ.

¹⁶ Kõrraa ꞌcĩ oou, aꞌnyahit rũmẽẽnĩt cĩ laiitto nẽ aꞌnyaktu umwa tarĩ kõrraa ꞌcĩ ĩĩn tũkĩramma. Ma hadticaniinnu korrioohĩĩ cĩg ũdũt, dtiic ꞌcĩ occa adticannu niig ꞌcĩ attuhurru ꞌgẽẽn ꞌcĩ adak eeta vẽlẽk, dtiic ꞌcĩ occa adticannu niig niccia diooni.

¹⁷ “Adahit Karrama cĩ Ũbũnẽẽt ꞌcĩg aitiõõ Abũũlana tõõ ho, hĩnĩngĩtĩ baa kõr ꞌcĩ hõõgannuung naa ngagiit Ijjiba cieeni. Adahit karrama cĩ kõr icci hĩĩ nyattal ꞌcĩ aalla ũdũt lõhõlẽẽnĩĩ ꞌcĩg arrittiaa horumwa.

¹⁸ Uduhit ũbũnẽẽt ꞌcĩg aitiõõ abũũlana tõõ nyĩlõhaa ꞌcĩ oou, iꞌthianaanĩ ꞌjiaatĩn cĩ kõr ꞌcĩ ĩĩn õmmõtõ hĩ ꞌwec, ĩꞌthõng ꞌjiaatĩn cĩ kõr ꞌcĩ ĩĩn hẽẽn ꞌramma hĩ hõdẽĩ.

¹⁹ Waathinnioohĩĩ ꞌcĩg ĩĩn tũkĩramma ho, occa ꞌthẽk hõllõngaa ammuddiaa abũũlana ꞌcieethini tõõ cugguung. Nẽ ẽẽtĩ ꞌcĩ adak ꞌgẽẽn ꞌcĩ aarĩhoothĩk abũũlana, occa iiggiayyi lothippitaa cĩ eet cĩg Ĩꞌthĩraẽlĩ, tananga ĩĩn eet cĩ looc ꞌcĩ ꞌrĩĩng hode arrittiaa Ĩꞌthĩraẽla.

²⁰ Ma hadaku ꞌgẽẽn ꞌcĩ aarĩhoothĩk abũũlana. Uduhit ũbũnẽẽt ꞌcĩg aitiõõ abũũlana tõõ diooni ꞌgoolliohĩ vẽlẽk ĩcĩg aattiyyu.”

²¹ Ma ho, ũtũvvũ Mũũꞌtha makayyiook cĩg Ĩꞌthĩraẽlĩ vẽlẽk nẽ ĩĩnnĩk, “Õtõõc hataman, õõt eberria hẽlẽggĩ ꞌcĩg adaku halaꞌngiõõhĩtõõ cugguung nẽ ibboorru mĩꞌnyõõn cĩ Kõr cĩ Haangittõõ.

²² Akattiaak biyyi hẽddẽẽma. Uduullia bolloohinit nẽ aarrihu biyyẽẽtĩtõõ nẽ urwacattu ngadihẽẽt hĩ hattũũgẽt biyyiẽẽtĩ. Anneek eet ma haduknaannu battaala ĩꞌthõng haal lõõcĩ.

²³ Ma ikia õtõõĩ Makayyioohiti looc cĩ Ijjibi nẽ uruk eeta, acĩn hatĩ biyyi hẽẽnĩĩ cĩg aattĩg ngadihẽẽtĩ hĩ lokoraa cĩ hattuugu nẽ iittiõõ hõllõngaa ẽlẽmaakĩ aajĩlõ cĩ daahĩthõõ huduhun ꞌcieethi cugguung nẽ uruhuung ngagiita.

²⁴ “Agayyiooth ngaatĩ ĩĩnnĩ thooꞌthioha cieeg nyattal ꞌcĩ ꞌthẽk hatĩ anuyyu niig hĩ lõhõlĩ cugguung ũdũt.

²⁵ Ma õdõlattu looc ꞌcĩ hatĩ aaꞌnyuung Makayyioohiti hĩ baa aduha nẽẽnĩ, uꞌthuutti karrama icci.

²⁶ Nẽ ma ajinnuung lohollia cugguung anneekuung, ‘Karrama cĩ niiyyio ciee?’

²⁷ Uduktaak ĩĩttĩg, ‘Ĩĩn ciee Karrama cĩ Kõr cĩ Haangittõõ hĩ Makayyioohit ꞌcĩ baa ahaang ꞌcieethi cĩg eet cĩg Ĩꞌthĩraẽlĩ Ijjiba nẽ iittiõõ hõllõngaa aruk eet cĩg Ĩꞌthĩraẽlĩ, baa aku aruk nẽẽ eet cĩg Ijjibi.’ ” Nĩngĩtĩ akannĩ eeta huruꞌnyia nẽ alaacõ ĩnõõnnõ.

²⁸ Ma ho, iita ĩdĩmanit eeta cĩg Ĩꞌthĩraẽlĩ hĩ baa aduhaak Makayyioohiti Mũũꞌtha hĩ Arõõnẽ.

²⁹ Ma baa hõrggẽẽnaa cĩ baalinu, ikia uruk Makayyioohiti lõhõlĩ cĩg eet cĩg Ijjibi ꞌcĩg arrittiaa ĩĩcĩ oou vẽlẽk, iꞌthianaanĩ loholeecaa cĩ habu cĩ Ijjibi ꞌcĩ aayyi dtaaba, ĩꞌthõng hõdõlan loholeec ꞌcĩ oou cĩ baabutheenit ꞌcĩ baa aaĩ baabuuthatõõ hĩ maala hĩ mĩꞌnyõ ꞌcĩg arrittiaa ĩĩcĩ oou hĩĩ ꞌthĩĩ.

³⁰ Ma ho, ĩtĩngaacõ habuui cĩ Ijjibi hĩ makayyiook cĩgĩnnĩg hĩ eet cĩg Ijjibi vẽlẽk baa baal, nĩngĩtĩ aluyyi eeta lõkõrẽẽt vẽlẽk hĩdĩĩtĩ lõõcĩ pĩd, hĩnĩngĩtĩ baa hiꞌthihi õlõ ꞌcĩ hõllõngaa adaaknĩ loholeec ꞌcĩ oou.

Uluugito eeta cĩg Ĩꞌthĩraẽlĩ

³¹ Ma baa baal, ikia ũtũvvũ habuui cĩ Ijjibi Mũũꞌtha hĩ Arõõnẽ nẽ ĩĩnnĩk, “Ĩtĩngaac õõtõ! Ũtũngteek eet cĩgannĩg! Ootti eet cĩg Ĩꞌthĩraẽlĩ buúk. Õõt ubuluthit Makayyioohit hĩ baa adiimmu niiga.

³² Ĩꞌngĩdĩt hẽlẽggĩ cugguung hĩ baa aduhaannu niiga nẽ oottu nẽ tarĩ aggatattaangu nganĩĩt buúk.”

³³ Ma nĩngaata, ũbũbũũranit eeta cĩg Ijjibi eet cĩg Ĩꞌthĩraẽlĩ hõõt hataman. Hĩnĩngĩtĩ baa ammuk nẽẽg aĩ, “Hacuddiaa mõnõ hatĩ naag vẽlẽk thõng!”

³⁴ Nĩngĩtĩ õꞌngõnyaanĩ eeta cĩg Ĩꞌthĩraẽlĩ tũkan ꞌcĩ ĩwaadanĩ ũbũnẽẽt hataman nẽ aarrik hẽddẽmẽẽtĩ. Nẽẽthĩ, baa hõllõngaa õꞌngõõtaneek nẽẽg tũkan abũũla hiittiõõ hõllõngaa aduui. Ma nĩngaata, ikiꞌthieek lohoddwaanĩtõõ nẽ ocoodito ootti.

³⁵ Nĩngĩtĩ adĩmanĩ eeta cĩg Ĩꞌthĩraẽlĩ hĩcĩ aduhaak Mũũꞌtha ĩhõõggõ, halayyia eet cĩg Ijjibi maccĩrẽẽn hĩ ꞌdaab hĩ ceremwa.

³⁶ Baa aaꞌnyĩk Makayyioohiti eet cĩg Ijjibi haccamatta eet cĩg Ĩꞌthĩraẽlĩ haanytĩk ĩhõõggõ hẽlẽggĩ ꞌcĩg ala nẽẽg ko, nĩngĩtĩ allũnganĩ eeta cĩg Ĩꞌthĩraẽlĩ baliinit cĩ Ijjibi hĩĩ lõõcĩ ꞌthĩĩ, hĩĩtõ maajihi lootu hullaha ꞌcĩg holittẽr.

³⁷ Ma ho, uluugito eeta cĩg Ĩꞌthĩraẽlĩ ꞌtaaũnaa cobbi ĩĩcĩ Ramethethĩ ĩꞌthõng hõdõlanit ꞌtaaũn cĩ Thukothĩ. Baa ĩĩn eeta ꞌcĩg maacĩg dioo aalibꞌnya ꞌmiiaꞌnya tõrkõnõn (600,000) ꞌcĩg õvvõ ꞌthõõnĩ nẽ hõllõngaa agiili ngaaĩ hĩ lõhõlĩ.

³⁸ Baa aattĩg eeta ũgẽẽgĩ ꞌcĩg õõkõr hĩ eet cĩg Ĩꞌthĩraẽlĩ nẽ baa aꞌngĩd nẽẽg tĩĩn hĩ ẽẽtha hĩ aꞌtha ꞌcĩg mẽẽlĩg ꞌrĩng.

³⁹ Iita ĩwaaddia nẽẽg ũbũnẽẽt ꞌcĩg nga harrihoothĩk abũũlana, tũkaanaa ĩbaa aꞌnyaha nẽẽg Ijjiba. Baa nga harrihoothĩk tũkan tĩho abũũlana, hĩnĩngĩtĩ baa iiggia eeta cĩg Ijjibi ĩhõõggõ nẽ iittiõõ kõrra ꞌcĩ occa atturri nẽẽg ꞌgẽẽn ꞌcĩ occa adak tõõ.

⁴⁰ Baa nohota, baa ĩĩtõ irkiꞌnyia ꞌcĩg aattiyyi eeta cĩg Ĩꞌthĩraẽlĩ Ijjiba, ꞌmiiaꞌnya ꞌwec hĩ hẽẽn iyyio (430).

⁴¹ Ma irkit ꞌcĩ ũttũbattõõthĩhĩ irkiꞌnyia ꞌcĩg ĩĩn ꞌmiiaꞌnya ꞌwec hĩ hẽẽn iyyio (430) ho dẽẽdẽ, ũtũngteek lothippiꞌnya cĩg eet cĩg Makayyiooktak looc cĩ Ijjibi hĩĩ noho.

⁴² Hĩnĩngĩtĩ baa ẽbẽk Makayyioohiti ĩhõõggõ baalin niccia, hátĩ huluugaĩĩ ĩhõõggõ Ijjiba, baa acĩnĩ eeta cĩg Ĩꞌthĩraẽlĩ vẽlẽk haal, hátĩ hubuluthit Makayyioohit, hĩnĩngĩtĩ lõhõlĩ cĩggĩĩng ꞌcĩg nga hatĩ au arrittiaa irkiꞌnyiaannĩ.

Nyattalliook cĩg Karrama cĩ Haangittõõ

⁴³ Baa aduhaak Makayyioohiti Mũũꞌtha hĩ Arõõnẽ anneek, “Nyattalliook ꞌcĩg hatĩ gõõng Karrama cĩ Haangittõõ cieegi. “Aꞌngirannii ngaatĩ adahĩ ẽẽtĩ cĩ looc cĩrrĩĩng karrama icci.

⁴⁴ Occa adak appahaca ꞌcĩ baa ũũtannu niig thõng diooni, hatĩ ẽttẽẽdĩ ẽlẽ cĩnnĩ cĩ eet ꞌcĩ maacĩ,

⁴⁵ nẽẽthĩ, aitiõõ hõllõngaa occa adak tahanit hode dticciannioohiti ꞌcĩ adũmannu niig thõng karrama icci.

⁴⁶ “Adiim adaki karrama ciee ꞌcieethaa hõdẽẽthõng, nẽ ma haduknaannu iding umwa battaala. Nẽ ma halibbu ẽmmẽ.

⁴⁷ Adiim ꞌthẽk adak lothippiti cĩ Ĩꞌthĩraẽlĩ vẽlẽk karrama icci.

⁴⁸ “Má aattĩg eeta ꞌcĩg looc ꞌcĩ ꞌrĩĩng ũgẽẽgĩ ꞌcĩg adiim adak Karrama cĩ Kõr cĩ Haangittõõ cĩ Makayyiookto ho, aanytĩk thĩ nõõ hetteeddi eleeti cĩg eet ꞌcĩg maacĩg cĩg õlõ cĩnnĩ vẽlẽk, nẽẽthĩ hatĩ adak karrama hĩ ẽẽtĩ ꞌcĩ arrittiaa ĩĩn Ĩꞌthĩraẽleenit. Aitiõõ ẽẽtĩ ꞌcĩ maacĩ ꞌcĩ nga hẽttẽẽdĩ ẽlẽ hõllõngaa occa adak karrama icci.

⁴⁹ Aggam hatĩ nyattalĩ ciee dioo eet cĩg Ĩꞌthĩraẽlĩ dẽẽdẽ hĩ eet cĩg looc ꞌcĩ ꞌrĩĩng ꞌcĩg arũmeennu hĩ ngagiita.”

⁵⁰ Ma ho, ĩdĩmanit eeta cĩg Ĩꞌthĩraẽlĩ vẽlẽk hĩcĩ aduhaak Makayyioohiti Mũũꞌtha hĩ Arõõnẽ ho.

⁵¹ Ma baa kõr niccia noho, ikia uluugi Makayyioohiti eet cĩg Ĩꞌthĩraẽlĩ looccaa cĩ Ijjibi.