Luugithõõ 10 - ꞌBuuk cĩ Thõõth cĩ Nyekuci

Ĩꞌthõõa Nyekuci ꞌgirooc

¹ Ma ho, uduhaak Makayyioohiti Mũũꞌtha ĩĩnnĩk, “Mũdoothĩk habu cĩ Ijjibi, hĩnĩngĩtĩ haaꞌnyĩha naa ĩnõõnnõ hĩ makayyiook cĩgĩnnĩg hilloorito, hátĩ hidtican naa thooꞌthiok ꞌcĩg ĩnaat eeta hõrggẽẽnaa cĩnĩĩng,

² hátĩ uduktaak lõhõlĩ cugguung hĩ lõhõlĩ cĩg lõhõlĩ cugguung, thõõth ꞌcĩ huuki naa eet cĩg Ijjibi nẽ hidticana thooꞌthiok ꞌcĩg ĩnaat eeta hõrggẽẽnaa cĩnĩĩng, nẽ agayyu ngaatĩ hĩĩnnĩ naa Makayyioohit.”

³ Nĩngĩtĩ õõ ammũdõõthĩkĩ Mũũꞌtha hĩ Arõõnẽ habu cĩ Ijjibi nẽ ĩĩttĩk, “Thõõth ꞌcĩ aduha Makayyioohiti Nyekuci cĩ Ebereei cieeni, ‘Aburi hatĩ nii ngaatĩ athĩkna nganĩĩt ĩꞌthõng ningina? Lahaneeka eet cĩgannĩg hõõt halayyia nganĩĩta.

⁴ Má aburi ngaatĩ alahanẽẽekĩ ĩhõõggõ hõõt, hĩꞌthõõahi hatĩ looc cunni ꞌgirooc lohotha.

⁵ Ammũlũũnyan hatĩ ꞌgirooc looc vẽlẽk hiittiõõ hõllõngaa edeeꞌnyia ꞌthẽẽma. Au hatĩ aduheek hẽlẽggĩ hĩ hẽẽn ꞌcĩg nga abĩlĩ ꞌcĩg baag anyiꞌthia tammu cĩ telleenu manẽẽnĩtõõ cugguung hĩĩ dtĩng.

⁶ Abbĩꞌthĩĩ hatĩ ꞌgirooc ꞌcieethi cugunnig hĩ cĩg makayyiook cugunnig, hĩ cĩg eet cĩg Ijjibi vẽlẽk, ꞌgirooc ꞌcĩ nga hĩcĩnĩt maajihu hode hĩbaangĩ cugguung nganĩngĩtĩ õlõmanĩ looc icci.’ ” Nĩngĩtĩ ũũnnĩkĩ Mũũꞌtha habu cĩ Ijjibi.

⁷ Ma ho, uduktaak habu cĩ Ijjibi makayyiooha cĩgĩnnĩg ĩĩttĩk, “Ehecceet hatĩ ẽẽtĩ ciee ngagĩĩt ĩꞌthõng ningina? Lahaneek eet cĩg Ĩꞌthĩraẽlĩ hõõt, hátĩ halaacõ Makayyioohit Nyekuc cĩnĩĩng. Aitiõõ ꞌthẽk nii hõllõngaa adtuuha ngaatĩ ẽꞌthẽcanõõĩ lõõcĩ cĩ Ijjibi ho?”

⁸ Nĩngĩtĩ aꞌnyakiaanĩ Mũũꞌtha hĩ Arõõnẽ hiita hĩ habu cĩ Ijjibi. Ma ho, ĩĩnnĩk habuui cĩ Ijjibi ĩhõõggõ, “Hõlõ, õõt alaac Makayyioohit Nyekuc cunuung. Nẽẽthĩ, hĩ nganĩ hatĩ dẽẽdẽ ꞌcĩg õõ ho?”

⁹ Ẽdẽcĩ Mũũꞌtha anneek, “Hooyyia ꞌthẽk naag vẽlẽk hĩ nyakangaaꞌnya hĩ morwak lõhõlẽẽnĩĩ cĩggaang noho nẽ hiꞌngiddia hẽlẽggĩ cĩggaang vẽlẽk, hĩnĩngĩtĩ haĩ ꞌthẽk hoottia hadakta karrama cĩ Makayyiookto.”

¹⁰ Ẽdẽcĩ hinnia habuui cĩ Ijjibi Mũũꞌtha anneek, “Aaĩ thĩ mĩĩ Makayyioohiti hĩ ngagiit, hatĩ mĩĩ nẽẽ hẽlẽmaakuung naa ookorit hĩ ngaaĩ lõhõlẽẽnĩ noho! Hittiamani ꞌyioko nẽ hudtuuha ngaatĩ ogolleekaangu muhẽẽttaa ꞌcĩ abathĩ.

¹¹ Aitiõõ tõõ! Aꞌnyĩĩk eet ꞌcĩg maacĩg dioo hõõt halaacõ Makayyioohit, hĩnĩngĩtĩ thõõth ꞌcĩ adiimmu niig ko niccia.” Nĩngĩtĩ agurroothĩkĩ Mũũꞌtha hĩ Arõõnẽ battaali hũtũngteek habu cĩ Ijjibi.

¹² Ma nĩngaata, uduhaak Makayyioohiti Mũũꞌtha ĩĩnnĩk, “Dongeek aꞌthiit cunni looc cĩ Ijjibi, hátĩ hikia hũmmũlũũnyan ꞌgirooc looc cĩ Ijjibi nẽ adak ꞌgii vẽlẽk baa nga anyiꞌthia tammu cĩ telleenu manẽẽnĩtõõ hĩĩ ꞌthĩĩ.”

¹³ Ma nĩngaata, odongeek Mũũꞌtha looc cĩ Ijjibi ho hĩbahĩt cĩnnĩ, nĩngĩtĩ aaꞌnyĩkĩ Makayyioohiti ngõõt cĩ uruto huuhan looc waathĩn hĩ baalin vẽlẽk. Ma baa ngerrenita, ĩtĩgĩra ngõõtĩ ꞌgirooc;

¹⁴ hĩꞌthanothoothĩk looc cĩ Ijjibi hũtũrũũr nẽ ikia õlõman lokor cĩ Ijjibi vẽlẽk hĩbbĩt haaga. Baa nga haau ꞌgirooc ꞌcĩ ĩĩn noho looccaa cĩ Ijjibi ũdũt nẽ hõllõngaa hatĩ aku tarĩ.

¹⁵ Ammũlũũnyan ꞌgirooc looc vẽlẽk hĩĩ holittup. Adak ꞌgii vẽlẽk ꞌcĩ anyiꞌthia tammu cĩ telleenu hĩĩ dtĩng. Ẽgĩ ꞌgii vẽlẽk manẽẽnĩtõõ nẽ adahit hẽẽn ꞌcĩg abbiiri hĩĩ ꞌthĩĩ. Uduktoothĩk bõllõõha cĩg heenu Ijjiba hũtũrũũr hĩĩ lõõcĩ ꞌthĩĩ.

¹⁶ Nĩngĩtĩ avvaanĩ habuui cĩ Ijjibi Mũũꞌtha hĩ Arõõnẽ hĩdĩĩkoothong nẽ ĩĩnnĩk, “Hõlõ hẽꞌthẽcana naa muumaa cĩ Makayyioohit Nyekuc cunuung hĩ muumaa cunuung.

¹⁷ Nẽẽthĩ ꞌyioko, atamaattihaangu tarĩ nẽ alayyiooyyiaangu hĩ Makayyioohit Nyekuc cunuung, hittik ꞌthẽrẽt icci abathĩ ho battaala hĩ nganĩĩta.”

¹⁸ Nĩngĩtĩ ũũnnĩkĩ Mũũꞌtha habu cĩ Ijjibi nẽ ũũk ala Makayyioohit.

¹⁹ Ma ho, ũtũhũ Makayyioohiti ngõõt hikia ĩĩ gõõng õkõlõõthĩkĩ kõrra, huuhanneek ꞌgirooc Bũlũcatõõ ꞌcĩ Marihi. Baa nẽ iittiõõ ꞌgirooc ꞌcĩ idiongan looccaa cĩ Ijjibi tarĩ tõõ.

²⁰ Ma ngaati, aaꞌnyĩk hinnia Makayyioohiti habu cĩ Ijjibi hĩllõõr tarĩ nẽ iittiõõ hõllõngaa alahaaneek eet cĩg Ĩꞌthĩraẽlĩ hõõt.

Muguur

²¹ Ma ho, uduhaak Makayyioohiti Mũũꞌtha ĩĩnnĩk, “Dongeek aꞌthiit cunni hẽẽtahujjieen, hátĩ hũmmũlũũnyan muguuri Ijjib. Muguur umwa ꞌcĩ holittẽr ꞌcĩ occa ahumi attia.”

²² Nĩngĩtĩ õdõngĩ Mũũꞌtha aꞌthiit cĩnnĩ hẽẽtkujjieen nẽ ikia muguuuri ꞌcĩ ũdaan looc cĩ Ijjibi vẽlẽk waathinniook iyyio.

²³ Baa aitiõõ eet ꞌcĩ occa acĩn ꞌgõõnĩ tõõ hode nẽẽ occa ũũnnĩk ẽẽtĩ nĩngĩtĩ ꞌcĩ aayyi waathinnioohĩĩ ꞌcĩg ĩĩn iyyio ho. Nẽẽthĩ nẽẽ, baa aara lõõcĩ hĩ eet cĩg Ĩꞌthĩraẽlĩ ngaatĩ baa aattiyyi nẽẽgĩ.

²⁴ Ma ho, ũtũvvũ habuui cĩ Ijjibi Mũũꞌtha nẽ ĩĩnnĩk, “Ẽlẽ, õõt alaac Makayyioohit. Ookorit hĩ ngaaĩ cugguung lõhõlẽẽnĩ noho, nẽẽthĩ, ma hangiddu hẽlẽggĩ buúk.”

²⁵ Ẽdẽcĩ hinnia Mũũꞌtha habu cĩ Ijjibi ho anneek, “Abũnnaa alahaneekeet nii ngagĩĩt hoottia hibboorriha ꞌgaarriẽẽn Makayyioohit Nyekuc cĩnaang.

²⁶ Hadiimma ꞌthẽk haꞌngĩdda hẽlẽggĩ cĩggaang buúk, occa nõõ hõllõngaa hũũnnĩka maccĩhĩlleenit haaga uruta. Hadiimma hõõ hẽbẽraanna ꞌgaarriẽẽn ꞌcĩg halayya Makayyioohit Nyekuc cĩnaang, hẽlẽggẽẽnnĩ ĩcĩg, hatĩ hõdõlatta ĩĩca. Nẽ hõllõngaa hagayyĩa hõõ hatĩ halayyia Makayyioohit hutuno, ĩꞌthõng hõdõlatta ĩĩca.”

²⁷ Ma ho, aaꞌnyĩk hinnia Makayyioohiti habu cĩ Ijjibi hĩllõõr hiittiõõ hõllõngaa ẽlẽmaakĩ eet hõõt.

²⁸ Ma nĩngaata noho, ĩĩnnĩk habuui cĩ Ijjibi Mũũꞌtha, “Maꞌnyanĩ muumaa caannĩ! Ma huppwaanna ngaatĩ haayyi naa tarĩ! Kõr ꞌthẽk ꞌcĩ uppwaannanĩĩ ngaati tarĩ, adaahi ꞌthẽk hatĩnĩ.”

²⁹ Ẽdẽcĩ Mũũꞌtha anneek, “Hĩcĩ aduha nii hataa, iittiõõ hatĩ hõllõngaa hõmmõtõõ tarĩ.”