Luugithõõ 1 - ꞌBuuk cĩ Thõõth cĩ Nyekuci

Arratanit eeta cĩg Ijjibi eet cĩg Ĩꞌthĩraẽlĩ

¹ ꞌThaarriok cĩg nyahaappanĩt cĩg Ĩꞌthĩraẽlĩ baag õõ hĩ Yakobo Ijjiba halaꞌngiõõhĩĩ cĩggĩĩng cũũmõ cũũmõ cieegi:

² ꞌRuuben hĩ ꞌThimiõõnẽ hĩ ꞌLeevi hĩ ꞌJuuda;

³ Iꞌthakar hĩ ꞌThebulun hĩ Benyemiino;

⁴ hĩ ꞌDaan hĩ Navtali hĩ ꞌGad hĩ Aathẽr.

⁵ Baa ĩĩn lohollia cĩg õlõ cĩ Yakobo hĩ lõhõlĩ cĩggĩĩng vẽlẽk hẽẽn tũkĩramma. Nẽ baa ũmmũdeek aau Yothebo Ijjiba ẽlẽk.

⁶ Ma baa adaahito Yothebo hĩ ꞌgõtõõnõgĩ hĩ eet ꞌcĩg obbitig cĩg irkiꞌnyia nicciag vẽlẽk,

⁷ iita ittirit eeta cĩg Ĩꞌthĩraẽlĩ gẽrrẽẽt, hiita hĩĩtõ mẽẽlĩg hĩbbĩt lõõcĩ cĩ ꞌGõcẽnĩ.

⁸ Ma ho, ikia aggam habuui umwaa ꞌcĩ baa hõllõngaa aga Yothebo Ijjib.

⁹ Ma nĩngaata, uduhaak habuui tĩho eet cĩgĩnnĩg ko ĩĩnnĩk, “Ĩcĩnĩt nõõ eet cĩg Ĩꞌthĩraẽlĩ ho ngaatĩ au ĩĩnnĩ mẽẽlĩg gẽrrẽẽt hĩllõõatteet ngagĩĩta.

¹⁰ Hiita hummuhit ꞌgõõl umwa ꞌcĩ occa haaꞌnyĩkĩ eet iccig, hiittiõõ hõllõngaa arrit hĩĩtõ mẽẽlĩg. Nẽ má hõllõngaa hadĩman noho nẽ uluba jõrẽẽĩ umwaanĩ, arũm hinnia hatĩ nẽẽg eleeti hĩ mĩrõk cĩggaac nẽ huruktõõ hĩ ngagĩĩta nẽ hatĩ ũtũngteek looc cĩnaac.”

¹¹ Nĩngĩtĩ aarĩkĩ eeta cĩg Ijjibi makayyiook cĩg appahacaaꞌnyanu, hommokteek eet cĩg Ĩꞌthĩraẽlĩ dtiic nẽ aanytĩk hetehenyit ꞌtaaũn ꞌcĩ haĩ Pithom hĩ ꞌtaaũn ꞌcĩ haĩ Rametheth, hĩĩtõ ꞌtaaũnniook cĩg habu cĩ Ijjibi ꞌcĩg alũtõõthĩkĩ ꞌgẽẽna.

¹² Tananga ommogeek eeta cĩg Ijjibi eet cĩg Ĩꞌthĩraẽlĩ dtiicanĩ gẽrrẽẽt, au hinnia arrit eeta cĩg Ĩꞌthĩraẽlĩ hĩĩtõ mẽẽlĩg hĩꞌthattothoothĩk looc vẽlẽk. Nĩngĩtĩ au itieelini eeta cĩg Ijjibi eet cĩg Ĩꞌthĩraẽlĩ gẽrrẽẽt ũdũt,

¹³ ma ho, ommokteek ĩhõõggõ hidticattõõ gẽrrẽẽt.

¹⁴ Baa aaꞌnyĩk eeta cĩg Ijjibi eet cĩg Ĩꞌthĩraẽlĩ hõkõm rũgẽtĩ cĩnĩĩng gẽrrẽẽt nẽ ĩttĩngatteek ĩhõõggõ hutturria namatavvaalĩ, hĩ ngaatĩ õꞌngõnyaanĩ doob cĩ tehenyiitto nẽ ommokteek hidticattõõ manẽẽnĩtõõ nẽ ehecit ĩhõõggõ gẽrrẽẽt.

¹⁵ Ma ngaati, ikia uduhaak habuui cĩ Ijjibi ngaaĩ cĩg Ebereei ꞌcĩg ũũkca ꞌgõõnõgĩ, ngaaĩ ꞌcĩg kaĩ ꞌThĩppĩra hĩ Puua ĩĩnnĩk,

¹⁶ “Ma eellu niig ngaaĩ ꞌcĩg ĩĩn Ebereei hatĩ ũũkca lõhõlĩ, ebehit ĩhõõggõ hatĩ nga ũũkca lõhõlĩ. Má ũũkca loholeec ꞌcĩ maacĩ, uruhit ĩnõõnnõ nẽ má ĩĩn ꞌcĩ ngayyi, ũtũngteek hũrũg.”

¹⁷ Baa ammũdeek iꞌngolli ngaaĩ ꞌcĩg ũũkca ꞌgõõnõgĩ ho Nyekuc nẽ iittiõõ hõllõngaa adtican thõõth ꞌcĩ aduhaak habuui cĩ Ijjibi ho ĩhõõggõ, nĩngĩtĩ ũũnnĩkĩ lõhõlĩ ꞌcĩg maacĩg hũrũgĩt.

¹⁸ Ma nĩngaata, ikia ũtũvva habuui cĩ Ijjibi ngaaĩ ꞌcĩg ũũkca ꞌgõõnõgĩ ho nẽ ijin ĩĩnnĩk, “Adĩmannu thõõth ꞌcĩ aaĩ hoti inni? Uunniku lõhõlĩ ꞌcĩg maacĩg hũrũgĩt inni?”

¹⁹ Ẽdẽcĩ hinnia ngaaĩ cieeg ũũkca ꞌgõõnõgĩ ho habu anneek, “Hõllõngaa aduhõõ ngaaĩ ꞌcĩg Ebereei hĩ ngaaĩ cĩg Ijjibi, attiran ngaaĩ ꞌcĩg ĩĩn Ebereei ho gẽrrẽẽt, ũũkca nẽẽg lõhõlĩ cĩggĩĩng nga hõdõlatta naag buúk.”

²⁰ Nĩngĩtĩ aku ĩĩnnĩ Nyekuci tarbal hĩ ngaaĩ ꞌcĩg ũũkca ꞌgõõnõgĩ ho nẽ iita ittirit eeta cĩg Ĩꞌthĩraẽlĩ gẽrrẽẽt hĩĩtõ mẽẽlĩg ꞌrĩng.

²¹ Hĩnĩngĩtĩ baa iꞌngolli ngaaĩ ꞌcĩg ũũkca ꞌgõõnõgĩ ho Nyekuc, ikia aaꞌnyĩk Nyekuci ĩhõõggõ haꞌnyahit lõhõlĩ cĩggĩĩng ẽmmẽn.

²² Ma ho, ikia uduhaak habuui cĩ Ijjibi eet cĩgĩnnĩg thõõth icci ĩĩnnĩk, “Má arrittiaa loholeec ꞌcĩ maacĩ ꞌcĩ ĩĩn Ebereeinit, udhukteek hidiaatõõ cĩ Naaĩlĩ nẽ aanytĩhu ꞌcĩg ngayyig dioo hũrũgĩt.”