Kolooꞌthe 3 - ꞌBuuk cĩ Thõõth cĩ Nyekuci

ꞌGõõl ꞌcĩ haattiyyi rũgẽtaa ꞌcĩ ĩĩn ngeju

¹ Baa ũrũgũthaauung Nyekuci ngagiit hõdẽĩ hĩ Krĩstõ daahĩtha. Nẽẽthĩ ꞌyioko, aarrik ꞌthinneeti cugguung hẽlẽggẽẽnnĩĩ cĩg hẽẽtkujjieen, ngaatĩ aggamĩ Krĩstõ looc attiaa cobbi ĩĩcĩ Nyekuci.

² Ummuhit thooꞌthiok cĩg hẽẽtkujjieen, ma hammuku hẽlẽggĩ cĩg looc nicci.

³ Hĩnĩngĩtĩ baa aauttu niig hĩcĩ adaaktu ẽlẽk, nẽ ꞌyioko iyyangꞌthĩ rũgẽtĩ cunuung ꞌcĩ ĩĩn ngeju hĩ Krĩstõ ꞌcĩ aaĩ hĩ Nyekuc.

⁴ Ma õbõda Krĩstõ ꞌcĩ aaꞌnyuung ngagiit ũrũgĩt ko, au hatĩ arũmeennu niig hĩ ĩnõõnnõ bulẽẽtta.

⁵ Nẽẽthĩ hoti ho, ũtũngteek thooꞌthiok ꞌcĩg ĩĩn ꞌriiring ꞌcĩg abũraneek eleeti cugguung. Thooꞌthiok ꞌcĩg aattĩg hĩcĩg attihõõnĩ eeta tahatak, muhẽẽnĩt cĩ thooꞌthiok ꞌcĩg ĩĩn ꞌriiring, thõõth ꞌcĩ abũraneeku thooꞌthiok ꞌcĩg abathĩ, hode ma hainnu ngaam ngaam, aduhoo thooꞌthioha cieeg hĩ ngaatĩ alayyu nyekuꞌnya ꞌcĩg hõllõngaa ĩĩn dĩdĩ thõng.

⁶ Aku hatĩ uuk Nyekuci eet ngaꞌngaritta, hĩnĩngĩtĩ thooꞌthiok iccig.

⁷ Baa gõõng adĩmannu niig thooꞌthiok iccig, baa nga aattiyyu rũgẽtaa cĩ looc nicci.

⁸ Nẽẽthĩ ꞌyioko, ũtũbũrĩt thooꞌthiok ꞌcĩg aattĩg hĩ cieegi. Liilii hĩ ngaatĩ aaburreeku ꞌgoonogu nẽ ĩdĩmattu thooꞌthiok ꞌcĩg abathĩ hĩ ngaatĩ addangaaku eet ũgĩ, hĩ ngaatĩ othooꞌthu thooꞌthiok ꞌcĩg abathĩ.

⁹ Ma nga hoolongeeku ꞌgoonogu, hĩnĩngĩtĩ utuburru niig rũgẽt cunuung baa ꞌrẽẽnĩ hĩ thooꞌthiok vẽlẽk cĩgĩnnĩg.

¹⁰ Iittu niig vẽlẽk eet ꞌcĩg ĩĩn ngeju. Ũũhũyyuung ngagiit Nyekuci hõdõõkõthĩ aaut hĩ nẽẽ Teheꞌnyioohiti cĩ rũgẽt cunuung ꞌcĩ ĩĩn ngeju, nẽ iita hatĩ agayyu ĩnõõnnõ jurrung.

¹¹ Rũgẽtaa ꞌcĩ ĩĩn ngeju ho, aduhoonnu niig vẽlẽk thõng, hatĩ iiginnu ꞌGirik hode iiginnu ꞌJudeei hode etteeddi eleeti cĩg eet ꞌcĩg maacĩg hode nga hetteeddi eleeti. Hode iiginnu eet ꞌcĩg ꞌrĩĩng hode eet ꞌcĩg nga illimattĩ, hode iiginnu appahacaaꞌnya hode eet ꞌcĩg hõllõngaa ĩĩn appahacaaꞌnya. Krĩstõ dioo ꞌcĩ tiirẽẽnĩ nẽ aaĩ nẽẽ hĩ ngagĩĩt vẽlẽk.

¹² Nẽẽthĩ hoti ho, ammĩnannuung Nyekuci ngagiit nẽ ẽbẽraauung ĩĩtõ eet cĩgĩnnĩg ꞌcĩg ẽllẽẽmĩthĩ. Nẽẽthĩ, atamaattik ꞌgoonogu nẽ iittu tarbalĩg, ma hathĩngõõnyannu, etemeethit thooꞌthiok.

¹³ Adanganit ꞌgoonogu ꞌcĩg adĩmannuung ngagiit ꞌbuth nẽ atamaattihu ĩhõõggõ hĩ baa ammaannikuung Makayyioohiti ngagiita.

¹⁴ Nẽ thooꞌthiohĩĩ cĩg vẽlẽk, tiir mĩnnanĩ ĩllõõan ꞌgii vẽlẽk, ĩnõõnnõ ꞌcĩ arũm hẽlẽggĩ vẽlẽk hõdẽĩ.

¹⁵ Aanytĩk ganõn cĩ Krĩstõ haggamuung ꞌthinneeti cugguung, hĩnĩngĩtĩ baa utuvvuyyiaau niig, hátĩ aaut ganõõna, hĩ eeta cĩg ẽlẽ hõdẽẽthõng. Nẽ iittihu ĩnõõnnõ ĩlaallẽ.

¹⁶ Aanytĩk nyeemuut cĩ Krĩstõ haau hĩ ngagiit rũgẽtaa cunuung vẽlẽk, hĩcĩ adticaniinnu ꞌgẽẽnyĩth cunuung vẽlẽk ngaatĩ allimannu ꞌgoonogu. Ebenit tegellwa cĩg laiittak taliitta nẽ iittihu Nyekuc ĩlaallẽ.

¹⁷ Nẽ ꞌgii vẽlẽk ꞌcĩ adĩmannu, hode thõõth ꞌcĩ othooꞌthu, ĩdĩmanit, hĩnĩngĩtĩ Makayyioohit Yeesu, ngaatĩ atallu Nyekuc Baangeet ꞌthaarĩĩ cĩg Krĩstõ.

Nyattalliook cĩg rũgẽt cĩ lothippit cĩ lemmioohu

¹⁸ Niig ngaaĩ, ĩthĩhĩt maaccwa cugguung ꞌgõõlaa ꞌcĩ adiim Makayyioohiti.

¹⁹ Niig maaccwaana, ĩmmĩnanit ngaaĩ cugguung nẽ ma haũrrũũhannu ĩhõõggõ thõng.

²⁰ Niig lohollia, ĩthĩhĩt maajihu hĩ ngaaggu thooꞌthiohĩ vẽlẽk, hĩnĩngĩtĩ ma adĩmannu hoti, accamanoothĩk Makayyioohiti gẽrrẽẽt.

²¹ Niig maajihi loholeenu, ma hõhõggõõrannu lõhõlĩ nẽ hatĩ iita uduulli ꞌthinneeti.

²² Niig appahacaaꞌnya, ĩthĩhĩt thooꞌthiok vẽlẽk ꞌcĩg aduhaakuung makayyiooha cugguung cĩg looc nicci, hõllõngaa hĩnĩngĩtĩ ebekuung nẽẽg ngagiit thõng, hode hatĩ accamanaannuung ngagiit thõng diooni, ĩthĩhĩt ĩhõõggõ ꞌthinneetini dĩdĩ hĩ tẽẽlꞌthĩtaa cĩ Makayyiookto.

²³ ꞌGii ꞌcĩ adĩmannu niig vẽlẽk, idticanit ꞌthinneetinii ꞌcĩg õõrĩg, haau hĩcĩ adticanoothiku Makayyioohit, hõllõngaa haau hĩcĩ adticanoothiku makayyiook cĩg looc nicci.

²⁴ Ummuhuttooth ĩĩtõ, ammũdaannu hatĩ niig thooꞌthiok ꞌcĩg arigiꞌthu hĩ Makayyioohit hĩĩ ꞌbaaninit cunuung. Nẽ Makayyioohiti ꞌcĩ adticanoothiku niig ko, ĩnõõnnõ Krĩstõ.

²⁵ Nẽẽthĩ, ẽẽtĩ ꞌcĩ adĩman thõõth ꞌcĩ abathĩ, adĩmanoothĩk hatĩ ĩnõõnnõ buúk thõõth ꞌcĩ abathĩ nẽ aitiõõ haliiniti tõõ.