ꞌJeemith 5 - ꞌBuuk cĩ Thõõth cĩ Nyekuci

Tilooinit hĩ balliook ꞌcĩg arratan eet

¹ Nẽẽthĩ ꞌyioko, ĩthĩktõ niig balliooha, utullẽẽc, hĩnĩngĩtĩ thõõth ꞌcĩ abathĩ ꞌcĩ hatĩ adhukiaakuung ngagiita.

² Õtõngõl ngagiit baliiniti cunuung ẽlẽk nẽ adahit ꞌthõrõhõnyĩta ceremwa cugguung hathathaarri haaga.

³ Ohonooꞌthi ngagiit maccĩrẽẽna cugguung hĩ ꞌdaab. Adticaniini hatĩ Nyekuci honoothi cĩ ꞌdaabõ hĩ cĩ maccĩrẽẽnu ho, hĩĩ terethiinit ꞌcĩ hatĩ ukẽẽnĩt cunuung, ꞌcĩ atũũthẽnĩ eleeti cugguung ꞌgwoyyia. Baliiniti ciee athaddu niig ko, ĩĩn hatĩ ukẽẽnĩt cunuung kõr ꞌcĩ ẽttẽẽdĩkĩ Nyekuci eet thooꞌthiok.

⁴ Ĩthĩktõ! Ĩthĩhĩt ulwa cĩ dticcianniook cĩg manẽẽn cugguung, baag iggoollu hõllõngaa adũmannu ꞌrabbẽẽt cĩggĩĩng. Allweekuung ngagiit ꞌrabbẽẽta tĩko, baag edennu niiga. Õdõlan ulwaanĩ cĩ dticcianniook cĩg manẽẽn cugguung, Makayyioohit cĩ ũũrũta cĩ hẽẽtkujjieen.

⁵ Baa nga aattiyyu niig loota nĩnga, baa ammuku heengti cugguung diooni nẽ accamattoothihu. Nẽẽthĩ ꞌyioko, ĩdĩktu aauttu hĩ merukwaaꞌnya ꞌcĩg õõt etteeddi thõng.

⁶ Etteediku niig eet thooꞌthiok nẽ uruktu eet ꞌcĩg ammĩrĩ, tananga ẽlẽmĩ thooꞌthiok cugguung.

Etemeethit thooꞌthiok ꞌcannaana

⁷ ꞌGotoonoga hĩ ngoonoga, ereeyyio ĩꞌthõng hõbõda Makayyioohiti. Aaut hĩ kattiooha cĩg maneenu aag gõõng ereeyyi ĩꞌthõng hĩtĩĩl tammu nẽ tarĩ, ereeyyio ĩꞌthõng hibbiir mana.

⁸ Adiim ereeinnu niig buúk. Aanytĩk ꞌthinneeti hokomit, hĩnĩngĩtĩ õbõhĩ ikia Makayyioohiti.

⁹ ꞌGotoonoga hĩ ngoonoga, ma hongoongoeeku ꞌgoonogu, hode etteedoothĩkuung hinnia hatĩ ngagiit thõõtha. Hĩnĩngĩtĩ ĩbĩl ꞌgaadĩ ꞌcĩ ẽttẽẽd thõõth hattũũga.

¹⁰ Hõlõ, ũnnẽẽc terethiinit baa põrõvẽtaaꞌnya baag õthõõth thõõth cĩ Makayyiookto. Baa adĩhan nẽẽg ꞌcannan korrioohĩĩ baag accananiini nẽẽgĩ.

¹¹ Hadĩhĩth naag eet baag adĩhan ꞌcannan. Ĩthĩktu niig ꞌcannan cĩ ꞌJõõbĩ nẽ icittu ꞌgii ꞌcĩ aku adĩmaneek Makayyioohiti ĩnõõnnõ uruta. Aꞌnyak Makayyioohiti tamaati cobbi.

¹² ꞌGotoonoga hĩ ngoonoga, thooꞌthiohĩ vẽlẽk, ma habũtannu ꞌthaarĩĩ cĩg hẽẽtkujjieen hode ĩcĩg looc nicci hode ĩcĩg ꞌgiimwa. Udukta thõõth ꞌcĩ aĩ eei hode aitiõõ, hátĩ hiittiõõ hõllõngaa ẽꞌthẽcannu hode etteedoothĩkuung hinnia hatĩ thõõtha.

Laiinit cĩ lemiitto

¹³ Ma aꞌnyaku niig ꞌcannan umwa, occa alaiinnu. Nẽ má aattiyyu lõꞌngõõc, ebenit tegellwa cĩg dĩhĩthẽẽttak.

¹⁴ Ma õmmõõrĩ eet umwaa hõrggẽẽnaa cunuung, aꞌnyĩĩk hũtũvva makayyiook cĩg lothippit cĩ lemmioohu, hiita halayyiõõĩ ĩnõõnnõ nẽ ĩnĩĩbĩtõ ngõõrra ꞌthaarĩĩ cĩg Makayyiooktak.

¹⁵ Aaꞌnyĩk hatĩ laiiniti cĩ lemiinit cunuung eet ꞌcĩ õmmõõrĩ ho hũbũna. Aaꞌnyĩk hatĩ Makayyioohiti ĩnõõnnõ hĩtĩnga haau ꞌjieena. Ma baa ĩĩn eet ꞌcĩ ẽꞌthẽcanõõ, ũũnnĩk hatĩ Makayyioohiti ꞌthẽccanẽẽt cĩgĩnnĩg.

¹⁶ Má baa ẽꞌthẽcattoou niiga, occa aduhaaku ꞌgoonogu ꞌthẽccanẽẽt ꞌcĩg baa adĩmannu ho. Nẽẽthĩ, alayyiooyyu eleeti hõdẽĩ, hátĩ hũtũngeek Makayyioohiti ꞌthẽccanẽẽt cugguung. Attiran laiiniti cĩ eet ꞌcĩ abũnnaa nẽ aga ngaatĩ eelluung ngagiit gẽrrẽẽt.

¹⁷ Baa ĩĩn Eliijja eet ꞌcĩ aaĩ hĩ naaga. Baa alayyi nẽẽ gẽrrẽẽt aĩ hiittiõõ hõllõngaa atĩĩlĩ tammu, nẽẽꞌthẽk iittiõõ tammu hõllõngaa atĩĩlĩ looccaa tĩho irkiꞌnyia iyyio hĩ nyĩlõhĩ tõrkõnõn.

¹⁸ Ma baa alaõ nẽẽ tarĩ, ikia ĩtĩĩl tammu dĩdĩ haaꞌnyĩk haal hubuꞌthia.

¹⁹ ꞌGotoonoga hĩ ngoonoga, má baa arahan eet umwaa hõrggẽẽnaa cunuung thõõthaa ꞌcĩ ĩĩn dĩdĩ, immiirria ĩnõõnnõ.

²⁰ Nẽẽthĩ, ummuhuttooth thõõth icci. Ẽẽtĩ ꞌcĩ ammiira ꞌthẽccannioohit ꞌgõõlaa ꞌcĩ abathĩ, ẽẽla ẽẽtĩ tĩho ĩnõõnnõ daahĩtha nẽ ũmmũt ꞌthẽccanẽẽt ꞌcĩg mẽẽlĩg gẽrrẽẽt.